“Tebetembwa 28–Okitobwa 11. 3 Nibwaai 17–19: ‘Nooria, Bwa e a Bwanin Kimwareireiu,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Tebetembwa 28–Okitobwa 11. 3 Nibwaai 17–19,” Nakomai, Iriirai—Ibukiia Aomata n Tatabemaniia ao Utu: 2020
Ootan Moamoana e Bon Ootamwaaka i Aoia, iroun Gary L. Kapp
Tebetembwa 28–Okitobwa 11
3 Nibwaai 17–19
“Nooria, Bwa e a Bwanin Kimwareireiu”
Ngkai mwakoro ake imwaina n 3 Nibwaai a turuturu riki iaon ana taeka te Tia Kamaiu, mwakoro 17–19 kabwarabwara Ana mwakuri n ibuobuoki ao Ana reirei ibuakoia aomata. Ngkana ko warekki mwakoro aikai, tera ae reireiniko te Tamnei ibukin te Tia Kamaiu?
Korei Am Namakin
Ea tibwa tia Iesu Kristo ni kabanea te bong n ibuobuoki n te Aba ni mari, n reirei Ana euangkerio, n anganiia aomata aia tai n nora ao n riing mwaake n Rabwatana ae mangauti, ao ni kakoauaa ae Ngaia bon te Tia Kamaiu ae beritanaki. Ao ngkai e a roko te tai are e nang nako iai. E kainnanoia n oki Nakon Tamana, ao E ataia bwa a kainnanoa te tai aomata n iangoa te bwai ae E reireiniia. Ngaia ae e berita bwa e na oki n te bong are imwiina, E kanakoia aika uanao nakon mweengaia. Ma akea ae nako. A aki taekina te bwai ae a namakinna, ma e kona n namakinna Iesu: a kantaningaia bwa E na “tiku riki teutana irarikiia” (3 Nibwaai 17:5). Iai ana bwai aika a kakawaki riki aika e na karaoi, ma te tai ni kaota te nanoanga e aki roko n tainako n te tai ae riai, ngaia are Iesu e a manga tiku ma aomata teutana riki te tai. Tera are riki imwiina bon te katooto ae moan te akoi n te mwakuri n ibuobuoki ae koreaki inanon koroboki aika tabu. Naake a mene ikekei a tii kona n taekinna bwa te bwai ae kaangaanga aron kabwarabwarakina (taraa 3 Nibwaai 17:16–17). Iesu e koroi ni kakimototoi babaire n tamnei aika aki baireaki raoi ma taeka aikai: “Ngkai nooria, bwa e a bwanin kimwareireiu” (3 Nibwaai 17:20).
Iango ibukin Am Kamatebwai I Bon Iroum ni Koroboki Aika Tabu
Te Tia Kamaiu bon au banna ni katooto ae kororaoi n te mwakuri n ibuobuoki.
Ti ataia bwa e kaniia 2,500 te aomata (taraa 3 Nibwaai 17:25) aika a taneiai ma moan rokon Kristo, n aron are koreaki n 3 Nibwaai 11–18. E ngae n anne ao e a tia te Tia Kamaiu ni kunea te kawai ni karaoa te ibuobuoki nakoia n tatabemaniia. Tera ae ko reiakinna ibukin te ibuobuoki man ana banna ni katooto te Tia Kamaiu n te mwakoro? Tera kainnano aika e ibuobuoki nako iai? Iangoia bwa e kanga Ana banna ni katooto ni buokiko ni buokiia tabeman.
Nooria Ami Ataei, iroun Gary L. Kapp
3 Nibwaai 17:13–22; 18:15–25; 19:6–9, 15–36
Te Tia Kamaiu e reireiniira arora n tataro.
Iangoia bwa e na kanga arona ngkana ko ongo bwa e tataro te Tia Kamaiu ibukim. Tera ae e na taekinna ibukim? Ana reirei ao ana tataro inanon mwakoro aikai e kona n anganiko te iango. Ngkana ko kamatebwai, tera ae ko reiakinna man ana katooto Kristo are e na kona ni karaoi oin am tataro bwa a na uaana? Tera kakabwaia man te tataro ae ko a tia n nooria ni maium?
I kona ni kaonaki n te tamnei ngkana I taua te toa.
Ngkana ko wareka 3 Nibwaai 18:1–12, iangoia bwa e kanga anakin te toa ni buokiko ni “kaonaki” n tamnei (3 Nibwaai 18:3–5, 9; Taraa naba 3 Nibwaai 20:1–9). Ibukin te katooto, ko kona ni karinani titiraki ni kawaekoai am iango ngkana ko taua te toa, n aron “E kanga aron au namakin ibukin te Tia Kamaiu ao Ana karea ibukiu?” “E kanga Ana karea ni kanakoraoa maiu ni katoabong?” ke “Tera ae I karaoia ae raoiroi n aron ana reirei Iesu, ao tera ae I kona ni kanakoraoia?”
A kona taeka mairoun Beretitenti Henry B. Eyring aikai ni buokiko ni kaonaki n te tamnei: “Ngkai ko kamwataua aron maium n tain te otenanti n te toa, au kantaninga bwa am iango aki tii boboto iaon bwaai ake ko a tia ni karaoia aika a kairua ma bwaai naba ake ko a tia ni karaoi aika eti—taai ake ko a tia n namakina iai Tamam are i Karawa ao te Tia Kamaiu ngke a kukurei iroum. Ko kona naba n anaa tabeua te tai n tain te toa ni butiia te Atua bwa e na buokiko n noori bwaai aikai. … Ngkana I a tia ni karaoa aei, te Tamnei e na kamatoa nakoiu bwa ngkai I teimatoa n raroa man te kororaoi, ma I a nakoraoi riki nakon are ngkoananoa. Ao aio are e na anganai te raunnano bwa, ibukin te Tia Kamaiu, I kona n tamaroa riki nakon te ingabong” (“Always Remember Him,” Ensign, Beb. 2018, 5).
Ana reirei Iesu Kristo a ukoukora ana bwaintituaraoi te Tamnei ae Raoiroi.
Iangoa taekan te tataro ae ko taekinna n te tai ae aki maan n nako. Tera ae a reireiniko am tataro ibukin nanom ae korakora? Imwiin kabanean teuana te bong imatan te Tia Kamaiu, ao aomata ake a uanao “a tataro ibukiia aika a rangi n tangiriia”—ana bwaintituaraoi te Tamnei ae Raoiroi (3 Nibwaai 19:9). Ngkana ko wareki mwakoro n taeka aikai, iangoa nanom ibukin ana iraorao te Tamnei ae Raoiroi. Tera ae ko reiakinna ibukin ukoukoran ana iraorao te Tamnei ae Raoiroi?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
3 Nibwaai 17
N am tai ni wareka te mwakoro aei ma kain am utu, iangoia ni motirawa teutana te tai ni kaoia kain am utu bwa a na iangoi bwaai aikai i bon ibukiia. Te katooto, ko kona n tabeki titiraki n aron aikai “Tera kaangaanga aika ko na uoti nakon te Tia Kamaiu bwa a na kamaiuaki?” “Tera ae ko tangiria bwa E na tataro iai ibukim?” ke “Tera ae ko tangiria bwa E na kakabwaiaia aika ko tangiriia?” Warekan te mwakoro e kona naba ni kaungako bwa ko na tataro ibukiia kaain am utu, temanna imwiin temanna, n aron ae karaoia Iesu.
3 Nibwaai 18:1‒12
Tera ae nanonaki bwa ko na “kaonaki” man kanakin te toa, ao ti kanga n taneiai iai? Tera ae ti reiakinna man kiibu 5–7 bwa bukin tera E anganiira Iesu te otenanti n te toa?
3 Nibwaai 18:17–21
Tera ae ti reiakinna man kiibu aikai iaon kaantaninga n te tataro? Ti na kanga ni kanakoraoa te mwaaka n tamnei n ara tataro, iroura n tatabemaniira ao n ara utu?
3Nibwaai 18:25; 19:1-3
Tera ae a tia n rinanona ara utu rinanon te euangkerio are ti kantaningaira bwa aomata ni kabane ake a katobibiira a kona naba n rinanona? Ti na kanga ni kona n ira aia katooto aomata inanon kiibu aikai ao “ni mwakuri n ae korakora” (3 Nibwaai 19:3) ni uotiia tabeman nakon Kristo, bwa aonga naba n “namakinna ao n nooria” (3 Nibwaai 18:25) te bwai ae ti a tia ni kunea n te euangkerio?
Ibukin iango riki tabeua ibukin reireinaia, ataei n te kamataata n te wiiki aei in Nakomai, Iriirai—Ibukin te Moanrinan.
Kanakoraoan Am Kamatebwai
Kariaia te Tamnei bwa e na kairiko n am kamatebwai. E kona te Tamnei ae Raoiroi ni kairiko nakon bwaai aika ko kainnanoi bwa ko na reirei iaona ni katoabong. Tauraoi n tainako nakon Ana kairoro, e ngae ngke a na taraa n tuangko bwa ko na wareka atuun te reirei ae kaokoro ke ni kamatebwai n te kawai ae kaokoro nakon are ko tataneiai iai. Ibukin te katooto, ngkana ko wareka taekan te toa n 3 Nibwaai 18, te Tamnei e na kona ni kairoroko bwa ko na kabanea riki am tai iaon te reirei anne nakon are ko a tia ni baireia.
A Noora Karawa Bwa e Uki, iroun Walter Rane