“13–19 Iulai. Alema 32–35: ‘Totō Lenei Afioga i o Outou Loto,’” Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2020 (2020)
“13–19 Iulai. Alema 32–35,” Sau, Mulimuli Mai ia te Au—Mo Tagata Taitoatasi ma Aiga: 2020
13–19 Iulai
Alema 32–35
“Totō Lenei Afioga i o Outou Loto”
Tusifaamaumau uunaiga faaleagaga e te maua a o e suesue i le Alema 32–35. O le a se mea ua uunaia oe e fai ona o le mea ua e aoaoina?
Tusifaamaumau Ou Lagona Uunai
Mo sa Sorama, o le tatalo sa o se faiga masani sa taula’i i le tagata lava ia, lea sa na’o le tasi i le vaiaso na tupu ai. Sa aofia ai le tu i le mea e vaai uma atu i ai tagata ma le fai soo o faaupuga faamaualuluga ma faaupuga e faamalie ai le tagata lava ia. Ae o le mea na sili ona leaga, sa leai se faatuatua o sa Sorama ia Iesu Keriso—sa faapea foi ona teenaina Lona i ai—ma sauaina e matitiva (tagai Alema 31:9–25). O se faatusatusaga, sa aoao atu ma le toa e Alema ma Amoleka e faapea, o le tatalo e tele lava i mea e faatatau i mea e tutupu i totonu o o tatou loto nai lo o luga o se tulaga ia iloa mai e tagata lautele. Ma afai e le taitai atu ai i le agaalofa ia i latou e le tagolima, o lona uiga ua “le aoga, … ma ua leai se mea e te maua mai ai” (Alema 34:28). O le mea aupito taua, o se faailoaga o le faatuatua ia Iesu Keriso, o le ofoina mai le togiola e ala i Lana “taulaga … le gata ma faavavau” (Alema 34:10). O se faatuatua faapena, na faamalamalama mai e Alema, e fanau mai i le lotomaualalo ma se “fia talitonu” (Alema 32:27). E tuputupu malie a’e, e pei o se laau, ma e manaomia ai le tausiga faifaipea. A o e faitau i le Alema 32–35, atonu e te mafaufau ai i lou lava faatuatua ma tatalo; pe e i ai ni taimi e te lagonaina ai le totolo mai o soo se uiga e faapei o sa Sorama? O le a faapefea ona e tausia lou faatuatua ia Iesu Keriso ina ia faapea ona avea “o se laau, e puna ae i le ola tumau-faavavau” ? (Alema 32:41).
Manatu mo Suesuega Faaletagata Lava Ia o Tusitusiga Paia
E mafai ona ou filifili e lotomaualalo.
Sa manatu Alema sa lotomaualalalo sa Sorama matitiva ma “saunia e faalogo i le afioga” (Alema 32:6). A o e faitau i le Alema 32:1–16, mafaufau i le ala ua e saunia ai e faalogo i le afioga a le Atua.
O a ni aafiaga ua faalotomaualaloina ai oe? O le a se mea ua e faia ia e lotomaualalo atili ai? O nei fuaiupu e mafai ona aoao ai oe i auala e filifili ai le lotomaualalo nai lo o le faamalosia ia lotomaualalo. Mo se faataitaiga, o le a le eseesega i le va o le “matitiva e faatatau i mea o le lalolagi” ma le “matitiva foi i le loto”? (fuaiupu 3). O le a le uiga o le ia “faalotomaualaloina moni [oe] lava ona o le afioga”? (fuaiupu 14).
Tagai foi “Humility,” Gospel Topics, topics.ChurchofJesusChrist.org.
Ou te faaalia le faatuatua ia Iesu Keriso e ala i le totōina ma le tausia o Lana afioga i lo’u loto.
Aisea e te manatu na tautala ai Alema e uiga i le totōina o se fatulaau e tali atu ai i fesili a sa Sorama e uiga i le tapuai? O le a le fatu na tautala e uiga i ai Alema? (tagai Alema 32:28; 33:22–23). A o e faitau i le Alema 32:17–43, ia maitau upu ma fasifuaitau e fesoasoani ia e malamalama ai i auala e faaaoga ai le faatuatua ia Iesu Keriso ma Lana afioga. O le a se mea ua e aoaoina i le, o le a le faatuatua ae o le a foi le mea e le faatatau i le faatuatua? Ma, a o e faitau i mataupu 33–34, saili mo tali i le fesili a sa Sorama “Pe faapefea ona [tatou] totō o le fatu?” (Alema 33:1).
O le isi lea auala e suesue ai le Alema 32–34: Tusi ni ata e faatusa i ai vaega eseese o le tuputupu a’e o se fatu. Ona faaigoa lea o ata taitasi i upu mai le Alema 32:28–43 e fesoasoani e te malamalama ai i le auala e totō ma tausi ai le afioga i lou loto.
Tagai foi Mataio 13:3–8, 18–23; Eperu 11; Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign po o le Liahona, Nov. 2015, 65–68; “Faith in Jesus Christ,” Gospel Topics, topics.ChurchofJesusChrist.org.
E mafai ona ou tapuai i le Atua i le tatalo, i soo se taimi ma i soo se mea.
O le fautuaga a Alema ma Amoleka e faatatau i le tapuai ma le tatalo, sa faamoemoe e faasa’o ai ni feeseeseaiga faapitoa sa i ai o sa Sorama (tagai Alema 31:13–23). Peitai o upumoni na latou aoaoina e mafai ona fesoasoani i soo se tagata o i tatou ia malamalama lelei i le tatalo ma le tapuai. Atonu e mafai ona e faia se lisi o upumoni e uiga i le tatalo e te mauaina i le Alema 33:2–11 ma le 34:17–29. E sosoo ma lena lisi, ia fai se lisi o ni manatu sese o ono i ai e uiga i le tatalo ua faapea ona faasa’oina e nei upumoni (tagai Alema 31:12–23). O le a faapefea ona aafia le ala e te tatalo ma tapuai ai i mea e te aoaoina mai nei fuaiupu?
O ai Senosa ma Senoka?
O Senosa ma Senoka o perofeta o e sa molimau ia Iesu Keriso i taimi o le Feagaiga Tuai, ae e le o maua a laua aoaoga i le Feagaiga Tuai. Na maua e sa Nifae aoaoga a nei perofeta, e masalo ona sa aofia ai i papatusi apamemea ia na aumai e Nifae mai ia Lapana. O loo ta’ua foi i laua i le 1 Nifae 19:10–12; Iakopo 5:1; ma le Helamana 8:19–20.
“O le olaga lenei o le taimi lea … e saunia ai e feiloai ma le Atua.”
A o e faitau i le Alema 34:30–41, mafaufau pe ono faapefea ona e “faaleleia [lou] taimi a o e i ai i lenei olaga” (fuaiupu 33). E mafai faapefea e le salamo ma le onosai ona fesoasoani ia te oe ia saunia ai e feiloai ma le Atua? O i ai ni suiga o manaomia ona e faia o loo faatuai ona e faia? Ia mautinoa e faatino soo se uunaiga faaleagaga e te maua.
Tagai foi Alema 12:24; Larry R. Lawrence, “Se A se Mea o Toe Ou Te Lei Faia?” Ensign po o le Liahona, Nov. 2015, 33–35.
Manatu mo Suesuega Faaleaiga o Tusitusiga Paia ma Afiafi Faaleaiga
A o e faitauina ma lou aiga ia tusitusiga paia, e mafai e le Agaga ona fesoasoani ia te oe ia iloa po o a mataupu faavae e faamamafa ma talanoaina ina ia taulimaina ai manaoga o lou aiga. O ni nai manatu nei.
Alema 32:9–11; 33:2–11; 34:38–39
E faapeī pe ana faapea e na’o Aso Sa lava e faataga ai i tatou e tapuai ma tatalo? A o outou faitau faatasi i nei fuaiupu, e mafai e tagata o le aiga ona talanoa pe mafai faapefea ona latou tapuai i aso uma ma pe aisea latou te faafetai ai ona o loo mafai ona latou tapuai.
Alema 32:28–43
O loo i ai i le otootoga lenei se ata o se laau; atonu e te faaaogaina e faamamafa atu ai upu a Alema o loo i nei fuaiupu. Pe e mafai ona ō le tou aiga e savalivali e su’e ni laau i o latou tulaga eseese o le tuputupu a’e ma faitau ia fuaiupu mai le Alema 32 o loo faatusa ai se laau e tuputupu a’e i lo tatou faatuatua. Atonu e mafai e tagata taitoatasi o le aiga ona totō se fatu ma talanoa po o a mea e tatau ona tatou faia e fesoasoani ai ia ola. I le aluga o vaiaso o le a sosoo ai, e mafai ona siaki a outou fatu ma faamanatu atu i le tasi ma le isi le manaomia o le tausia pea lava pea o a tatou molimau ia Iesu Keriso.
Alema 33:2–11; 34:17–29
O a mea o fautua mai e nei fuaiupu e uiga i le auala e mafai ona faaleleia ai a tatou tatalo faaletagata lava ia ma tatalo faaleaiga?
Alema 34:31
O a ni aafiaga ua faailoa mai ai ia i tatou e faapea, a tatou salamo, e amata “i le taimi nei lava” ona tatou maua faamanuiaga o le fuafuaga o le faaolataga?
Alema 34:33–35
O iloa e lou aiga le uiga o le faatuai? Atonu e mafai e se tasi ona faasoa mai ni faataitaiga o le faatuai ma ona taunuuga le lelei. O le a le uiga o le “faatuai le aso o lo [tatou] salamo”?
Mo nisi manatu mo le aoaoina o tamaiti, tagai i le otootoga o le vaiaso lenei i le Sau, Mulimuli Mai ia te Au—Mo le Peraimeri.
Faaleleia o Lo Tatou Aoao Atu
Tusi ni ata. Atonu e te tuu atu i tagata o le aiga e tusi ni ata a o latou aoao mai tusitusiga paia. Mo se faataitaiga, atonu latou te fiafia e tusi se ata o se fatu ua tupu a’e o se laau a o latou suesue i le Alema 32.
“Ona o lou filiga ma lou faatuatua ma lou onosai i le afioga i lona tausiga, … faauta, e lata le aso o le a e tauina ai lona fua, lea ua sili ona pele” (Alema 32:42).