Ntaub Ntawv Ntxiv tom Kawg C

Rau lub Koom Haum Me Nyuam Yaus—Cov Lus Qhia rau lub Caij Faib Qhia thiab cov Me Nyuam Yaus txoj Kev Ua Yeeb Yam rau ntawm txoj Kev Sib Ntsib Txais lub Cim Nco Txog

Tej zaj nkauj dawb ceev yeej yog ib yam uas muaj hwj chim pab cov me nyuam kawm txog Leej Txiv Saum Ntuj Ceeb Tsheej txoj hau kev zoo siab thiab tej lus tseeb tseem ceeb kawg nkaus ntawm Yexus Khetos txoj moo zoo. Thaum cov me nyuam hu nkauj txog tej ntsiab cai los ntawm txoj moo zoo, ces tus Vaj Ntsuj Plig Dawb Huv yuav ua tim khawv tias tej no muaj tseeb. Cov lus thiab cov suab nkauj yuav nyob hauv cov me nyuam lub siab lub ntsws tas lawv lub neej.

Nrhiav kom muaj tus Ntsuj Plig txoj kev pab koj thaum koj npaj siv cov nkauj qhia txoj moo zoo. Ua tim khawv txog tej lus tseeb los ntawm tej zaj nkauj ntawd. Pab cov me nyuam to taub tias cov nkauj qhia dab tsi txog tej yam uas lawv kawm nyob hauv tsev thiab nyob hauv lub Koom Haum Me Nyuam Yaus.

Tej Lus Qhia rau txoj Kev Ua Yeeb Yam rau ntawm txoj Kev Sib Ntsib Txais lub Cim Nco Txog

Raws li tus npisov qhia, cov me nyuam txoj kev ua yeeb yam hauv kev sib ntsib txais lub cim nco txog uas feem ntau yuav ua hauv peb lub hlis kawg txhua xyoo. Lub Koom Haum Me Nyuam Yaus pawg thawj tswj hwm thiab tus coj nkauj yuav tsum nrog tus pab cuam hauv pawg npisov uas saib xyuas lub Koom Haum Me Nyuam Yaus ua hauj lwm kom npaj txoj kev ua yeeb yam no.

Txoj kev ua yeeb yam no yuav tsum cai cov me nyuam qhia txog tej yam uas lawv thiab lawv tsev neeg tau kawm los ntawm phau Lus Qhuab Qhia thiab Kev Khi Lus nyob hauv tsev thiab nyob hauv lub Koom Haum Me Nyuam Yaus, tsis hais tej zaj nkauj uas lawv tau hu nkauj hauv lub Koom Haum Me Nyuam Yaus xyoo no. Thaum koj npaj txoj kev ua yeeb yam no, cia li xav txog tej yam uas yuav pab pawg ntseeg tsom ntsoov rau tus Cawm Seej thiab Nws tej lus qhia.

Tej pawg ntseeg uas tsis muaj me nyuam coob tej zaum yuav xav txog tej yam uas lawv yuav ua kom tej tsev neeg koom ua ke nrog lawv cov me nyuam ua. Ib tug hauv pawg npisov hais tau me ntsis kom xaus kev sib ntsib.

Thaum koj npaj txoj kev ua yeeb yam, nco qab ntsoov tej lus qhia nram qab no:

• Tej kev xyaum ua yeeb yam yuav tsum tsis txhob siv sij hawm los ntawm tej hoob kawm thiab cov me nyuam tej tsev neeg yog tias tsis tsim nyog ua li ntawd.

• Tej duab, tej tsoos tsho hnav ua txuj ua lwm tus neeg, thiab tej kev nthuav tswv yim siv tej vidi-aus tsis tsim nyog siv hauv txoj kev sib ntsib txais lub cim nco txog.

Saib Phau Qhia Kev Coj lub Koom Txoos: Kev Ua Hauj Lwm hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, 12.2.1.2, Txoj Moo Zoo cov Ntawv.

Tej Lus Qhia rau lub Caij Hu Nkauj

5 feeb (lub Koom Haum Me Nyuam Yaus pawg thawj tswj hwm): Thov Vajtswv qhib, nqe vaj lug kub los sis nqe kev ntseeg, thiab ib zaj lus hais

20 feeb (tus coj nkauj): Lub sij hawm hu nkauj

Lub Koom Haum Me Nyuam Yaus pawg thawj tswj hwm thiab tus coj nkauj xaiv cov nkauj rau txhua lub hlis kom qhia tej lub ntsiab cai uas cov me nyuam kawm hauv chav kawm thiab hauv tsev. Muaj tej zaj nkauj uas qhia txog tej ntsiab cai no nyob hauv phau ntawv no.

Thaum koj qhia tej zaj nkauj rau cov me nyuam, caw lawv qhia txog tej yam uas lawv tau kawm los ntawm cov dab neeg thiab cov qhuab qhia hauv tej zaj nkauj ntawd. Caw cov me nyuam qhia tias lawv xav li cas txog tej lus tseeb uas muaj nyob hauv tej zaj nkauj ntawd.

Phau ntawv Children’s Songbook yog phau ntawv tseem ceeb rau kev hu nkauj hauv lub Koom Haum Me Nyuam Yaus. Cov nkauj los ntawm phau Cov Nkauj Qhuas Vajtswv thiab tej zaj nkauj los ntawm phau xov xwm Phooj Ywg kuj tsim nyog siv thiab. Kev siv lwm zaj nkauj hauv lub Koom Haum Me Nyuam Yaus los pawg npisov yuav tsum pom zoo ua ntej (saib Phau Qhia Kev Coj lub Koom Txoos, 12.3.4).

Cov Nkauj rau lub Caij Hu Nkauj

Ib Hlis Ntuj

• “Follow the Prophet,” Children’s Songbook, 110–11

• “Search, Ponder, and Pray,” Children’s Songbook, 109

Ob Hlis Ntuj

• “Dare to Do Right,” Children’s Songbook, 158

• “A Child’s Prayer,” Children’s Songbook, 12–13

Peb Hlis Ntuj

• “Every Star Is Different,” Children’s Songbook, 142

• “When I Am Baptized,” Children’s Songbook, 103

Plaub Hlis Ntuj

• “When He Comes Again,” Children’s Songbook, 82–83

• “Did Jesus Really Live Again?,” Children’s Songbook, 64

Tsib Hlis Ntuj

• “‘Give,’ Said the Little Stream,” Children’s Songbook, 236

• “Shine On,” Children’s Songbook, 144

Rau Hli Ntuj

• “The Holy Ghost,” Children’s Songbook, 105

• “I Want to Be a Missionary Now,” Children’s Songbook, 168

Xya Hli Ntuj

• “Stand for the Right,” Children’s Songbook, 159

• “He Sent His Son,” Children’s Songbook, 34–35

Yim Hli Ntuj

• “I’m Trying to Be like Jesus,” Children’s Songbook, 78–79

• “I Feel My Savior’s Love,” Children’s Songbook, 74–75

Cuaj Hlis Ntuj

• “I Love to See the Temple,” Children’s Songbook, 95

• “To Think about Jesus,” Children’s Songbook, 71

Kaum Hli Ntuj

• “Family History—I Am Doing It,” Children’s Songbook, 94

• “The Church of Jesus Christ,” Children’s Songbook, 77

Kaum Ib Hlis Ntuj

• “Keep the Commandments,” Children’s Songbook, 146

• “To Be a Pioneer,” Children’s Songbook, 218–19

Kaum Ob Hlis Ntuj

• “I Am a Child of God,” Children’s Songbook, 2–3

• “Auj lub Me Zej Zos Npelehees,” Cov Nkauj Qhuas Vajtswv, zaj 94.

Siv tej Nkauj Kom Qhia cov Lus Qhuab Qhia

Lub sij hawm hu nkauj twb yog kom pab cov me nyuam kawm tej lus tseeb ntawm txoj moo zoo. Tej lub tswv yim nram qab no yuav tshoov koj lub siab thaum koj npaj tej kev qhia txog txoj moo zoo tej ntsiab cai uas nyob hauv tej zaj nkauj qhuas Vajtswv thiab tej zaj nkauj los ntawm lub Koom Haum Me Nyuam Yaus.

Nyeem cov vaj lug kub uas qhia lub ntsiab uas koj qhia. Muaj ntau zaj nkauj nyob hauv Children’s Songbook thiab phau nkauj qhuas Vajtswv, uas sau tias cov lus twb los ntawm tej nqe vaj lug kub twg. Cia li pab cov me nyuam nyeem tej zaj lus no, thiab sib tham txog qhov uas cov vaj lug kub muaj lub ntsiab ib yam li zaj nkauj ntawd. Tej zaum koj yuav xav sau ob peb nqe vaj lug kub rau daim kab das thiab caw cov me nyuam muab ib nqe txuas rau ib zaj nkauj los sis ib nqe los ntawm zaj nkauj.

Sau ntawv rau txoj kab. Sau ib nqe ntawm zaj nkauj ntawd rau daim kab das thiab tshem ob peb lo lus. Ces hais kom cov me nyuam hu zaj nkauj ntawd, mloog seb tej lus twg yuav tsum ntxig rau hauv rau ntawm tej txoj kab. Thaum lawv sau ntawv rau txhua txoj kab, sib tham seb nej kawm dab tsi los ntawm tej lus ntawd txog txoj moo zoo tej ntsiab cai.

Ua tim khawv. Ua tim khawv me ntsis rau cov me nyuam txog tej lus tseeb ntawm txoj moo zoo uas nyob hauv zaj nkauj rau lub Koom Haum Me Nyuam Yaus hu. Pab cov me nyuam to taub tias kev hu nkauj yog ib txoj kev ua tim khawv thiab ua rau lawv hnov tus Ntsuj Plig.

Sawv ua tim khawv. Caw cov me nyuam sawv thiab qhia tias lawv tau kawm dab tsi los ntawm zaj nkauj uas lawv hu nkauj los sis lawv xav li cas txog tej lus tseeb los ntawm zaj nkauj ntawd. Nug lawv seb lawv xav li cas thaum lawv hu nkauj, thiab pab lawv paub txog tus Vaj Ntsuj Plig Dawb Huv lub hwj huam.

Siv cov duab. Thov cov me nyuam kom pab koj nrhiav los sis kos duab uas sib haum nrog cov lus hauv zaj nkauj ntawd. Caw lawv qhia tias cov duab sib haum li cas thiab zaj nkauj ntawd qhia dab tsi. Piv txwv hais tias, yog koj qhia txog zaj nkauj “When He Comes Again” (Children’s Songbook, 82–83), tej zaum koj yuav xav tso duab rau hauv chav ntawd uas piav txog cov lus tseem ceeb ntawm zaj nkauj ntawd (xws li tim tswv, daus, thiab hnub qub). Thov cov me nyuam muab cov duab sau los ua ke thiab muab tsa raws li tus txheej txheem kom raug thaum nej hu nkauj ua ke.

Siv ib yam khoom qhia. Tej zaum koj yuav xav siv ib yam khoom kom pab nej sib tham txog ib zaj nkauj. Piv txwv hais tias, thaum hu zaj nkauj “‘Give,’ Said the Little Stream” (Children’s Songbook, 236), tej zaum koj yuav xav muab daim duab rau cov me nyuam saib txog tej yam xws li ib tug me nyuam dej, cov nyom, ntuj los nag, thiab cov paj. Tej zaum yog koj ua li no ces yuav pab nej sib tham txog qhov uas tej kev pab me me yuav foom koob hmoov rau lwm tus.

Caw cov me nyuam qhia txog lawv lub neej. Pab cov me nyuam to taub tias tej lub ntsiab cai hauv ib zaj nkauj muaj feem nrog lawv lub neej. Piv txwv hais tias, ua ntej hu zaj nkauj “I Love to See the Temple” (Children’s Songbook, 95), tej zaum koj yuav xav hais kom cov me nyuam tsa tes yog lawv tau pom ib lub tuam tsev. Caw lawv, thaum lawv hu nkauj, kom xav txog qhov uas lawv xav li cas thaum lawv pom ib lub tuam tsev.

Cia li nug. Muaj tej lus ntau uas koj nug tau thaum nej hu nkauj ua ke. Piv txwv hais tias, koj nug tau cov me nyuam tias lawv tau kawm dab tsi los ntawm txhua nqe hauv ib zaj nkauj. Koj kuj hais tau kom lawv xav txog tej lus nug uas zaj nkauj ntawd teb. Qhov no yuav pab nej sib tham txog tej lus tseeb uas zaj nkauj ntawd tau qhia.

Siv kev piav tes. Caw cov me nyuam xav txog tej kev piav tes uas yooj yim ua kom pab lawv nco txog tej lus thiab lub ntsiab ntawm ib zaj nkauj. Piv txwv hais tias, thaum nej hu nkauj “Search, Ponder, and Pray” (Children’s Songbook, 109), koj caw tau cov me nyuam taw tes rau lawv qhov muag thaum lawv hu nkauj txog kev nrhiav hauv cov vaj lug kub, taw tes rau lawv lub taub hau thaum lawv hu nkauj txog kev xav, thiab npuab tes thaum lawv hu nkauj txog kev thov Vajtswv.