Ngondu wa Kumpala 6–12: “Telejayi, Ô Nuenu Bantu”

Dilongesha ne Bipungidi 1

Mu Ngondu wa Dikumi ne Umua 1831, Ekelezia mupinguluja wa Yezu Kilisto uvua amu ne tshidimu tshimua ne tshitupa. Nansha muvuaye udiunda, uvua muikala kasumbu kakesa kakayi katamba kumanyika ka bena kuitabuija bavua basomba mu bimenga bikesa, mulombola kudi muambi wa bidimu pabuipi ne makumi abidi. Kadi Nzambi uvua muangata bitabuiji aba bikala basadidi benda ne batumibua benda, ne uvua musua ne mabuluila enda avuaye mubapesha apatuka kudi ba pa buloba.

Dilongesha ne Bipungidi tshitupa 1 tshidi ntuadijilu, anyi Tshibangilu, tshia Mukalenga ku mabuluila â. Tshidi tshileja patoka ne nansha muvua bidimba bia Ekelezia bikesa, kakuvua tshintu tshikesa bua mukenji uvua Nzambi musua bua Bansantu benda batangalaja. Tshidi dîyi dia didimuisha, bua bantu ba pa buloba bonsu, dibalongesha bua kukudimuna mutshima ne kushindamija tshipungidi tshia kashidi tshia Nzambi (tunungu 4, 8, 22). Basadidi batuadi ba mukenji ewu badi bateketa ne badipuekeshi. Kadi basadidi bapuekela ki badi Nzambi ubikila bua—makelela ne mpindiewu—bua kupatula Ekelezia wenda pambelu pa tshijimajima ne pa mîdima (kanungu 23, 30).

Ngenyi bua Kulonga ku Nzubu ne ku Ekelezia

Dilongesha ne Bipungidi 1

Telejayi, Ô nuenu bantu.

Ntuadijilu udi ubangisha mukanda. Udi uleja biena bualu ne tuipatshila tua mukanda ne wambuluisha babadi bua badilongolola bua kubala. Pawudi ubala tshitupa 1—“ntuadijilu” wa Mukalenga ku Dilongesha ne Bipungidi (kanungu 6)—keba biena bualu ne tuipatshila tudi Mukalenga mufila bua mabuluila enda. Tshinyi tshiudi ulonga tshiakuambuluisha mu dilonga dieba dia Dilongesha ne Bipungidi tshidimu etshi? Tshilejilu, udi mua kunana meji pa tshidi tshiumvuija kumvua dîyi dia Mukalenga mu mabuluila â (kanungu 14) anyi bua kukeba mikenji eyi (kanungu 37).

Tangila kabidi Mbangilu wa Dilongesha ne Bipungidi.

Dilongesha ne Bipungidi 1:4–6, 23–24, 37–39

Mukalenga udi wakula kupitshila kudi basadidi benda, biangata bambi ba matuku a ndekelu.

Tshitupa 1 tshidi tshibanga ne tshijika ne dimanyasha dia Mukalenga didiyi wakula kupitshila ku basadidi benda basungula (tangila tunungu 4–6, 23–24, 38). Funda tshiudi mulonga ku dibuluila edi pa:

• Mukalenga ne dîyi Dienda.

• Buatshinyi bambi badi bajingibua mu matuku etu.

Ntshinyi tshiudi umvua tshikusaka bua kuenza bua tshipeta tshia tshiudi mupeta?

Diba kayi diuvua mumvua dîyi dia Mukalenga kupitshila ku dîyi dia basadidi benda? (tangila kanungu 38).

Udi mua kufuanyikija kabidi ne mulunda udi kayi mumanya pa bambi badi ne moyo udi ubala tshitupa 1 neba. Nkonku kayi idi mulunda weba mua kuikala nayi? Tunungu kayi tuwudi mua kuyukilangana ne mulunda weba bua kumuambuluisha bua kumvuaye mushindu uwudi umvua pa bambi mu tshikondu tshietu?

Udi mua kusankishibua bua kumanya ne pavua tshipangu tshia bakulu tshikunguila mu 1831 bua kuakula pa dipatula dia mabuluila a Joseph Smith, bamua bantu bavua babenga lungenyi alu. Bavua ne bundu bua mateketa a Joseph mu difunda, ne batshina ne dipatula dia mabuluila kadikebi malu makola kudi Bansantu (tangila Saints, 1:140–43). Bu wewa muikala tshidimba tshia tshipangu etshi, mushindu kayi uwuvua mua kuandamuna ku malu â? Ngenyi kayi iwudi mupeta mu tshitupa 1 ivua mua kuambuluisha? (tangila tshilejilu, tunungu 6, 24, 38).

Ela meji bua kuangata musambu bu “Come, Listen to a Prophet’s Voice” (Hymns, no. 21) mu dilonga dieba ne dikukuila. Keba biambilu mu musambu bidi bilongesha nshindamenu ya momumua bu tunungu mu tshitupa 1.

Tangila kabidi Biena Bualu ne Nkonku, “Prophets [Bambi],” Tshisangi tshia Lumu Luimpa.

Mukalenga udi wakula kutudi kupitshila kudi bambi, basadidi benda.

Dilongesha ne Bipungidi 1:12–30, 34–36

Dipinguluja didi dingambuluisha bua kuluangana ne ntatu ya matuku a ndekelu.

Mu Dilongesha ne Bipungidi tshitupa 1, Mukalenga udi umvuija buatshinyi uvua mupinguluja lumu luimpa luenda. Tangila tubingila bungi kayi tuwudi mua kuela ku mulongu pa udi ubala tunungu 12–23. Mu dimanya dieba, mushindu kayi udi tuipatshila tua Mukalenga bua Dipinguluja tuikala tukumbana?

Mukalenga uvua mumanya ne matuku etu neikala ne ntatu mikola (tangila kanungu 17). Tshinyi tshiudi mupeta mu tunungu 17–30, 34–36 tshidi mua kukuambuluisha bua umvua ditalala ne lulamatu nansha kuikala ntatu?

Tangila kabidi Russell M. Nelson, “Embrace the Future with Faith,” Liahona, Ngondu wa Dikumi ne Umua 2020, 73–76.

Dilongesha ne Bipungidi 1:19–28

Mukalenga udi wenzela bateketa ne badipuekeshi bua kukumbaja mudimu wenda.

Pawudi ubala Dilongesha ne Bipungidi 1:19–28, udi mua kunana meji pa tshidi tshiumvuija kuikala musadidi wa Mukalenga. Ngikadilu kayi idi Mukalenga musua bua basadidi benda bikala nayi? Ntshinyi tshidi Mukalenga ukumbaja kupitshila kudi basadidi benda? Mushindu kayi udi mambi adi mu tunungu etu akumbana pa buloba ne mu moyo weba?

Keba Yezu Kilisto. Kipatshila ka mifundu kadi bua kujadika bua Mupandishi ne lumu luimpa luenda. Pawudi ubala Dilongesha ne Bipungidi 1, ela meji bua kuenza kamanyinu anyi kufunda tunungu tudi tukulongesha tshintu kampanda pa Yezu Kilisto.

Bua ngenyi ya bungi, tangila malu a ngondu ewu a Liahona ne makazina a Bua Dikankamika dia Bansonga.

Ngenyi bua Kulongesha Bana

Dilongesha ne Bipungidi 1:4, 37–39

Kupitshila kudi bambi benda, Mukalenga udi utudimuisha ku njiwu ya mu nyuma.

• Bua kubanga diyukilangana pa didimuisha dia kudi Mukalenga, tudi mua kuakula pa didimuisha ditudi tupeta kudi bantu bakuabu pa njiwu itudi katuyi mua kumona. Bimua bilejilu bidi mua kuangata buloba bua buselemuka, mvula ya bipupu yalua, anyi mashinyi asemena. Pamuapa wewa ne bana beba nudi mua kutangila bilejilu bia bimanyishilu bia didimuisha ne kubipima madimuishi â ku madimuishi adi Mukalenga mutupesha. Bilondeshila ku Dilongesha ne Bipungidi 1:4, 37–39, mushindu kayi udi Mukalenga mutudimuisha? Ku tshinyi kudiyi mutudimuisha musangu mushala? Pamuapa nudi mua kumona anyi kubala bitupa anyi mikenji ya mpungilu munena ne kukeba bilejilu bia dîyi dia didimuisha dia Nzambi.

• Imbayi pamua musambu udi wakula pa bambi, bu mudi kanungu ka ndekelu ka “Follow the Prophet” (Children’s Songbook, 111). Abanyangana bujadiki bueba ne muambi udi wakula dîyi dia Nzambi.

Dilongesha ne Bipungidi 1:17

Dipinguluja didi dingambuluisha bua kuluangana ne ntatu ya matuku a ndekelu.

• Bua kukolesha muyuki pa Dilongesha ne Bipungidi 1:17, wewa ne bana beba nudi mua kufuanyikija ne nudi nudilongolola bua luendu. Tshinyi tshinudi mua kuambula? Panuikala bamanya kumpala ne mvula udi mua kuloka anyi ne mashinyi anyi bisa wenu udi mua kunyanguka ndundu, mushindu kayi uditshi mua kulenga didilongolola dienu bua luendu? Balayi pamua kanungu 17, ne akulayi pa tshivua Mukalenga mumanya tshivua mua kutufikila. Mushindu kayi uvuayi mudilongolola buatshi? (Biobi bikumbana, umvuija ne “dikenga dipita bukola ” didi tshintu tshibi ne tshia bowa.) Mushindu kayi udi mikenji ya Nzambi ituambuluisha bua kuluangana ne ntatu ya tshikondu tshietu?

Dilongesha ne Bipungidi 1:17, 29

Mukalenga wakabikila Joseph Smith bua kuikala muambi.

• Bua kulonga pa mudimu wa Joseph Smith mu dipinguluja dia lumu luimpa lua Mupandishi, wewa ne bana beba nudi mua kumona tshimfuanyi tshia Mupandishi ne tshimfuanyi tshia Joseph Smith (tangila bimfuanyi mu tshifundu etshi) ne akulayi pa tshidi Mupandishi mutupesha kupitshila kudi Joseph Smith. Bana beba badi mua kukeba bilejilu mu Dilongesha ne Bipungidi 1:17, 29. Ambila bana beba mushindu uwudi mumanya ne Nzambi mubikila musadidi wenda Joseph Smith, Muana, ne muakula nenda kumbukila ku diûlu” (verse 17).

© 1998 David Lindsley

Dilongesha ne Bipungidi 1:30

Ekelezia wa Yezu Kilisto wa Bansantu ba Matuku a Ndekelu udi Ekelezia mulelela ne udi ne moyo wa Mukalenga.

• Tshidi tshiumvuija tshinyi bua kuamba ne Ekelezia udi mulelela ne udi ne moyo? Bua kufikisha bana beba ku diela meji pa lukonku elu, pamuapa udi mua kubaleja bintu bidi ne moyo ne bidi kabiyi ne moyo—bu mudi tshikunyibua tshidi ne moyo ne tshidi tshifua. Mushindu kayi utudi tumanya ne tshintu kampanda tshidi ne moyo? Pashisha nudi mua kubala Dilongesha ne Bipungidi 1:30 ne kuakula pa tshidi tshiumvuija bua Ekelezia kuikala mulelela ne udi ne moyo.

Bua ngenyi ya bungi, tangila bualu bua ngondu ewu bua makazina a Mulunda.

Ku Luseka Lua Mâyi Matalala, kudi Simon Dewey