Kulongesha ne Luaku, Undonde—Bua mu Dîku ne mu Ekelezia

Tshiambuluishi Etshi Ntshia Nganyi?

Tshiambuluishi etshi tshidi tshia ewu yonsu udi musua kulonga Dilongesha ne Bipungidi—bua muntu, bua dîku, ne mu tulasa tua Ekelezia. Pawikala kuyi mulonga mifundu bimpa kala, tshiambuluishi etshi tshidi mua kukuambuluisha bua kubanga. Pawikala ukadi ne tshibidilu tshimpa tshia kulonga mifundu, tshiambuluishi etshi tshidi mua kukuambuluisha bua kuikala ne dimanya dikola.

Bantu ne Mêku ku Nzubu

Muaba wa nsongu wa kulonga lumu luimpa udi ku Nzubu. Balongeshi benu ku Ekelezia badi mua kunukuatshisha, ne nudi mua kupeta dikankamika dia kudi bidimba bikuabu bia tshikongu. Kadi bua disomba dia mu nyuma, yonsu wa kutudi udi ne dijinga ne tshiakudia tshia dituku dionsu tshia ku “dîyi dilenga dia Nzambi” (Moloni 6:4; tangila kabidi Russell M. Nelson, “Opening Remarks,” Liahona, Ngondu wa Dikumi ne Umua 2018, 6–8).

Enzela tshiambuluishi etshi mu mushindu wa ne tshidikala tshikuambuluisha. Bifundu binena bidi bileja amua malelela a tshiendelela adi asanganyibua mu Dilongesha ne Bipungidi. Adi aleja kabidi ngenyi ne bibilu bua kukuambuluisha bua kulonga mifundu nkayeba, ne dîku dieba, anyi ne balunda beba. Pawudi ubala, londa buludiki bua Nyuma bua kupeta malelela a tshiendelela adi ne mushinga kuwudi. Keba mikenji ya Nzambi bueba wewa, ne londa meji audi upeta pa lukasa.

Balongeshi ne Balongi ku Ekelezia

Pawudi ulongesha kalasa ka Mbedi, ka bansonga anyi kalasa ka Tshilongelu tshia Dialumingu ka bakulumpa, mpuilu wa bena Buakuidi bua Alona, anyi kalasa ka Nsongakaji, udi mukoleshibua bua kuenzela bifundu ebi mu tshiambuluishi pa udi udilongolola bua kulongesha. Luaku, Undonde—Bua mu Dîku ne mu Ekelezia udi kabadilu ka kalasa ka Dialumingu. Ngenyi ya dilonga idi mu tshiambuluishi etshi idi mienza bua dilonga ku nzubu ne ku Ekelezia. Pawudi udilongolola bua kulongesha, bangila ku dipeta dimanya dieba nkayeba mu mifundu. Didilongolola dieba dia mushinga nedienzeka mu dikeba dieba dia mifundu ne dikebulula dia kupeta meji a nkaya kudi Nyuma wa Tshijila. Udi mua kulonga kabidi ne majinga a bantu baudi ulongesha mu meji. Keba malelela a tshiendelela. Luaku, Undonde udi mua kukuambuluisha bua kumona amua a ku malelela a tshiendelela ne kulonga mushindu kayi udi mifundu mua kuenzejibua mu moyo weba.

Kuata mu meji ne dilonga dia lumu luimpa, mu buimpa, didi diteka nzubu munkatshi ne Ekelezia muambulushi. Mu miaku mikuabu, bujitu bueba bunena budi bua kukuatshisha bantu baudi ulongesha mu didienzeja diabu bua kulonga ne kuteka lumu luimpa mu tshienzedi ku nzubu. Kanudiabakenyi bua kuikala ne bintu bimua bia kubapesha mu kalasa. Pananku, bapesha mushindu wa kuabanyangana mamanya abu, ngenyi, ne nkonku pa bitupa bia mifundu bivuabu babala ku nzubu. Babikila bua kuabanyangana malelela a tshiendelela adibu bapeta. Etshi tshidi ne mushinga muvula kupita dijandula bintu bia bungi bia malonga.

Tulasa tua Dialumingu tua Bansonga ne tua Bakulumpa

Kamua ka ku tubingila tutudi tudisangishila mu tulasa tua Dialumingu kadi ka kukuatshishangana ne kukoleshangana umua ne mukuabu patudi tudienzeja bua kumanya ne kulonda Yezu Kilisto. Mushindu mupepela bua kutshienza udi wa kuela lukonku bu “Tshinyi tshidi Nyuma wa Tshijila mukulongesha lumingu elu pauvua ulonga mifundu ne Luaku, Undonde?” Mandamuna ku lukonku elu adi mua kulombola ku diyukilangana dimpa didi dibaka ditabuija mu Yezu Kilisto ne mu lumu luimpa luenda.

Pashisha udi mua kubikila diyukilangana dishindamena pa bidi bileja bia kulonga mu Luaku, Undonde. Tshilejilu, lungenyi lua dilonga ludi mua kuleja mu dikeba Dilongesha ne Bipungidi 19:15–20, dikeba mushindu udi Mukalenga umvuija dikenga dienda. Udi mua kukonka bidimba bia kalasa bua kuabanyangana mushindu uvuabu bumvua padibu babala diumvuija dienda ne mushindu kayi udibi bilenga ngelelu wabu wa meji pa yeya. Anyi nudi mua kupitshisha diba mu dilonga dia tunungu bu kalasa.

Mpuilu ya Buakuidi bua Alona ne Tulasa tua Bansonga Bakaji

Padi mpuilu ya Bena Buakuidi bua Alona ne tulasa tua Bansonga Bakaji badisangisha mu Dialumingu, kipatshila kabu kadi kashilangana ne ka kalasa ka Tshilongelu tshia Dialumingu. Mu dikumbaja ku diambuluisha umua ne mukuabu bua kulonga lumu luimpa lua Yezu Kilisto, bisumbu ebi bidi bidisangisha bua kubelangana pamua pa dikumbaja dia mudimu wa lupandu ne dizanjikibua (tangila Mukanda Munena wa Maludiki: Disadila mu Ekelezia wa Yezu Kilisto wa Bansantu ba Matuku a Ndekelu, 1.2), bu baludikibua kudi bulombodi bukulu bua tulasa ne bua mpuilu yabu.

Bua kabingila aka, tshisangilu tshionsu tshia mpuilu anyi tshia kalasa tshidi mua kubanga ne tshidimba tshia bulombodi bukulu bua mpuilu anyi bua kalasa tshidi tshilombola diyukilangana pa didienzeja diabu. Tshilejilu, badi mua kubelangana pamua pa didienzeja diabu bua kuteka lumu luimpa mu tshienzedi, kusadila bantu badi mu mujinga, kutangalaja lumu luimpa, anyi kubuela mu mudimu wa ntempelo ne muyuki wa dîku.

Panyima pa diba edi dia dibelangana pamua, mulongeshi udi ulombola kalasa anyi mpuilu mu dilongesha lumu luimpa pamua. Balombodi bakulumpa anyi bidimba bia kalasa anyi bia mpuilu bidi mua kupeshibua bujitu bua kulongesha. Bulombodi bukulu bua kalasa anyi bua mpuilu, mu dipetangana ne balombodi bakulumpa, badi mua kuenza midimu eyi.

Bantu badi ne bujitu ebu badi mua kudilongolola mu kubala ngenyi ya mua kulongesha mu ndongamu wa ku lumingu wa Luaku, Undonde. Mu tshifundu tshionsu, ikone ewu udi uleja tshibilu tshidi tshisunguluka tshikala ne mushinga bua bansonga ne tshiteka mudipetangana ne tshidibu balonga ku seminaire. Nansha nanku, bionsu bia ku bidi bileja mu tshifundu bidi mua kuenzela bu tshibilu tshia dilonga dia bansonga.

Bua kakanda ka njila ka bisangilu bia mpuilu ne tulasa, tangila tshisakidilu D.

Tshilongelu tshia Mbedi

Didilongolola dieba bua kulongesha kalasa ka Mbedi didi dibanga pawudi ulonga mifundu nkayeba ne dîku dieba. Pawudi utshienza, ikala munzuluka ku ngumvuilu wa nyuma ne ngenyi ya kudi Nyuma wa Tshijila pa bana mu kalasa keba ka Mbedi. Ikala musambidi. Nyuma udi mua kukupesha meji ne ngenyi bua kubambuluisha bua kulonga lumu luimpa lua Yezu Kilisto.

Pawudi udilongolola bua kulongesha, udi mua kupeta meji a nsakidilu ku dijingulula dia ngenyi mu tshiambuluishi etshi. Tshifundu tshionsu mu Luaku, Undonde—Bua mu Dîku ne mu Ekelezia tshidi ne tshiena bualu tshia tshitupa “Ngenyi bua Dilongesha Bana.” Ela meji pa ngenyi eyi bu bidi bikupesha bua kujula dipa dia meji eba. Udi mumanya bana ba mu kalasa ka Mbedi keba—ne neubamanya bimpa pa udi uyukilangana nabu mu kalasa. Nzambi mmubamanya kabidi, ne neakupesha meji ne mushindu muimpa bua kubalongesha ne kubabenesha.

Bana mu kalasa keba badi mua kuikala bakadi benza tshimua tshia ku bibilu mu Luaku, Undonde ne mêku abu. Bidi bimpa. Diambulula didi dimpa. Ela meji bua kubikila bana bua kuabanyangana ne umua ne mukuabu tshivuabu balonga ku nzubu. Udi kabidi mua kulongolola mishindu bua bana kudibuinkamu nansha bobu kabayi balonga ku nzubu. Bana badi balonga malelela a lumu luimpa bikola menamena padi malelela â alongeshibua ku diambulula ku bibilu bishilangana. Pawudi usangana ne tshibilu tshia dilongesha tshidi tshimpa bua bana, ela meji bua ditshiambulula, sungasunga pawudi ulongesha bana batantamana.

Mu ngondu idi ne Dialumingu itanu, balongeshi ba tulasa tua Mbedi mbalombibua bua kushintulula kabala matuku ka Luaku, Undonde ka tshifundu mu Dialumingu ditanu ne tshimua anyi bibilu bia bungi bia dilonga mu “tshisakidilu B: Bua kalasa ka Mbedi—Dilongolola Bana bua Diba dia moyo wabu mujima bikala mu Njila wa Bipungidi ne Nzambi.”