Dikudimuna Moyo Nkipatshila Ketu

Kipatshila ka dilonga ne dilongesha dionsu dia lumu luimpa kadi ka kulepesha dondu wa dikudimuna moyo dietu ne kutuambuluisha bua kuikala bu Yezu Kilisto. Bua kabingila aka, patudi tulonga lumu luimpa, katuena tukeba amu ngumu mipia-mipia; tudi basua kulua bu “tshifukibua tshipia-tshipia” (2 Kolinto 5:17). Tshidi tshiumvuija ne kueyemena kudi Tatu wa mu Diûlu ne Yezu Kilisto bua batuambuluisha bua dishintulula mioyo yetu, muenenu yetu, bienzedi bietu, ne buikadi buetu.

Kadi mushindu wa dilongesha lumu luimpa udi ukankamika ditabuija dietu ne ulombola ku bishima bia dikudimuna moyo kawena ufika musangu umua to. Bidi bidinana too ne pambelu pa kalasa mu mutshima ne ku nzubu wa muntu. Bidi bilomba didienzeja dia momumua ne dia ku dituku dionsu bua kumvua ne kuteka mu tshienzedi lumu luimpa. Dikudimuna moyo dilelela didi dilomba buenzeji bua Nyuma wa Tshijila.

Nyuma wa Tshijila udi utuludika ku bulelela ne udi utuala bujadiki bua bulelela ebu (tangila Yone 16:13). Udi utokesha meji etu, ukolesha ngumvuilu yetu, ne ulenga mitshima yetu ne dibuluila dia kudi Nzambi, mushima wa bulelela bonsu. Nyuma wa Tshijila udi ukezula mitshima yetu. Udi utusaka ku dijinga dia diteka bulelela mu tshienzedi, ne udi utunungena mishindu ya kutshienza. Bulelela, “Nyuma Muimpe mene … nea[tu]yishe malu onso” (Yone 14:26).

Bua tubingila etu, mu didienzeja dietu dia kusomba, kulonga, ne kulongesha lumu luimpa, tudi mua kukeba nangananga buikadianganyi bua Nyuma. Kipatshila aka kadi mua kulombola masungula etu ne kuludika ngenyi ne bienzedi bietu. Tudi mua kukeba bionsu bidi bibikila buenzeji bua Nyuma ne kubenga bionsu bidi bilombola buenzeji ebu kua tshianana—bualu tudi bamanya ne tuetu basua kuikala bakumbana kumpala kua Nyuma wa Tshijila, tudi mua kuikala kabidi bakumbana bua kusomba kumpala kua Tatu wa mu Diûlu ne Muanenda Yezu Kilisto.