23–29 diciembre: “Aʼan taachalq saʼ li ruchichʼochʼ re xtojbʼal rix lix tenamit.” Li Ralankil
“23–29 diciembre: “Aʼan taachalq saʼ li ruchichʼochʼ re xtojbʼal rix lix tenamit.” Li Ralankil,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“23–29 diciembre. Li Ralankil,” Kim, Taaqehin—Choq’ re li ochoch ut li iglees: 2024 (2023)
Jalam-uuch
laj Jose, li xMaria, ut li k’uula’al Jesus sa’ xna’ajeb’ li xul
K’e reetal lix Karneer li Dios, xb’aan laj Walter Rane
23–29 diciembre: “Aʼan taachalq saʼ li ruchichʼochʼ re xtojbʼal rix lix tenamit”
Li Ralankil
Chalen laj Nefi toj laj Moroni, chixjunileb’ li profeet sa’ lix Hu laj Mormon k’eek’ookeb’ xch’ool chirix li santil ajom tz’iib’anb’il chi k’osb’il ru sa’ li perel re xjolomil aatin re li hu: “re te’q’unb’esiiq xch’ool [chixjunileb’] naq li Jesus a’an li Kristo.” Jun profeet kiril li Jesus jo’ jun musiq’ej naq maji’ nayo’la, ut jun chik kiril lix k’anjel chiru ruchich’och’ sa’ k’utb’esinb’il matk’. Jun kixxaqab’ rib’ sa’ xb’een jun xaqxookil tz’ak re xyaab’asinkileb’ li reetalil lix yo’lajik ut lix kamik, ut jun chik kixwiq’ib’ rib’ chiru naq waklijenaq chi yo’yo, ut kixch’e’eb’ li k’ob’olal sa li ruq’, li roq, ut xk’atq xsa’. Chixjunqaleb’ ke’xnaw li aajel ruhil yaal a’in: “Maajun chik b’e wan chi moko chan chik ru taaruuq taakole’q wi’ li winq, ka’ajwi’ chi tojb’il rix xmaak xb’aan xkik’el li Jesukristo, li … taachalq re xtojb’al rix li ruchich’och’” (Helaman 5:9).
Jo’kan naq sa’eb’ li kutan a’in re Ralankil, naq eb’ laj paab’anel chiru li ruchich’och’ neke’xninq’ehi lix chaab’ilal ut lix rahom li Dios naq kixtaqla li Ralal, k’oxla chan ru naq lix Hu laj Mormon xkawob’resi laa paab’aal chirix li Kristo. Naq nakatk’oxlak chirix lix yo’lajik, k’oxla k’a’ut naq kik’ulun arin ut chan ru naq lix k’ulunik xjal laa yu’am. Toja’ naq tatruuq chixnumsinkil li tz’aqal sahilal re li Ralankil—li maatan naxk’e aawe li Jesukristo.
Li na’leb’ re tzolok sa’ li ochoch ut sa’ li iglees
Li Jesukristo kiyo’la re wank choq’ inKolonel.
Wankeb’ naab’al li neke’ril ru resil lix yo’lajik li Kolonel sa’ li Ak’ Chaq’rab’ chiru xq’ehil li Ralankil, a’b’an naru ajwi’ te’tawmanq li chaab’il profeetil aatin chirix a’in sa’ lix Hu laj Mormon. Jo’ eetalil, neke’tawman li profeetil aatin chirix lix yo’lajik ut lix k’anjel li Kolonel sa’ 1 Nefi 11:13–36; Mosiah 3:5–10; ut Helaman 14:1–13. K’a’ruheb’ li na’leb’ chirix li Jesukristo li nachal aawik’in naq nakawileb’ li raqal a’an ut naq nakatk’oxlak chirix lix yaalalileb’ li reetalil lix yo’lajik? Chan ru naq lix nawom xch’ooleb’ li profeet a’in neke’xkawob’resi lix nawom aach’ool laa’at chirix li Kristo ut lix k’anjel a’an?
Wahi’ wiib’ oxib’ li na’leb’ li naru nakate’xtenq’a chixk’oxlankil li Jesukristo chiru li Ralankil:
Ma nakanaw naq naru nakawileb’ li ch’utam re Ralankil ak xe’xb’aanu li Xb’eenil Awa’b’ejil sa’ li Biblioteca del Evangelio? Naru nakataweb’ sa’ li ch’uut “Devocionales de Natividad.” Naru nakawotz li yeeb’il ut b’ichanb’il aran re xpuktesinkil xsahilal li Ralankil.
Laa’at ut laa junkab’al maare taawulaq cheru rab’inkileb’ li b’ich sa’ li ch’uut “Música de Navidad” sa’ li Biblioteca del Evangelio
Naru nakak’uub’ kok’ k’anjel naru nakab’aanu laa’at malaj laa junkab’al sa’eb’ li kutan rub’elaj li Ralankil re reek’ankil lix Musiq’ li Kristo, jo’ k’anjelak chiru jun kristiaan malaj xb’ichankileb’ sa’ komonil li b’ich re Ralankil. Chi’ilmanq LighttheWorld.org re xtawb’al li naru taab’aanumanq.
Xb’aan lix mayej aj tojol-ix naq naqaninq’ehi lix yo’lajik li Jesukristo. Rik’in li mayej a’an, a’an naru tooxkol chiru li maak ut li kamk, naru tooxtenq’a sa’ li qach’a’ajkilal, ut naru tooxtenq’a “chi tz’aqlok qe qu rik’in” (Moroni 10:32). K’a’ru xatzol sa’ lix Hu laj Mormon chiru li chihab’ a’in chirix lix wankil li Kolonel re xtojb’al aawix? Ma wankeb’ li seraq’ malaj li k’utum li jultikeb’ aawe? K’oxla li neke’xk’ut li raqal a’in chawu chirix lix k’anjel li Kolonel re xtojb’al qix: 2 Nefi 2:6; Alma 7:7–13; 11:40; ut Helaman 5:9; 14:16–17. K’a’ru eek’asinb’ilat chixb’aanunkil re xk’utb’al aab’antioxihom chiru a’an?
Jalam-uuch
reetalil li seminario
Lix Hu laj Mormon naxch’olob’ xyaalal li Jesukristo.
“Jun chik Ch’olob’anb’il Esil chirix li Jesukristo” maawa’ ka’ajwi’ jun chik k’ab’a’ej choq’ re lix Hu laj Mormon; naxk’ut xyaalal lix choxahil k’anjel. K’oxla li nakatzol rik’ineb’ li raqal a’in reheb’ li loq’laj hu chirix lix k’anjel lix Hu laj Mormon re xch’olob’ankil xyaalal li Kristo: 1 Nefi 6:4; 19:18; ut 2 Nefi 25:23, 26; 33:4, 10.
Naru nakatz’iib’a sa’ jun diario chan ru naq xtzolb’al lix Hu laj Mormon chiru li chihab’ a’in xatxnach’ob’resi rik’in li Kristo. Eb’ li ch’ol aatin a’in maare naru tate’xtenq’a chixtikib’ankil laa tz’iib’ahom:
“Jun na’leb’ xintzol malaj xweek’a chirix li Kolonel sa’ li chihab’ a’in, a’an naq …”
“Li tzolok chirix li Kolonel sa’ lix Hu laj Mormon kixjal chan ru naq laa’in …”
“Li kristiaan [malaj seraq’] mas nawulak chiwu sa’ lix Hu laj Mormon kixk’ut chiwu naq li Kolonel …”
Maare wan jun kristiaan li osob’tesinb’ilaq wi tixnaw k’a’ru nakaweek’a chirix lix Hu laj Mormon. Chan ru naru nakawotzeb’ laa numsihom ut lix nawom aach’ool? Maare taaweek’a naq taasi lix Hu laj Mormon re jun kristiaan chiru li Ralankil? Li aplicacion re lix Hu laj Mormon nokoxtenq’a chixwotzb’al sa’ junpaat.
Li obiisp aj Gérald Caussé kixye resil junjunq li na’leb’ chirix li Jesukristo li neke’tawman sa’ lix Hu laj Mormon (chi’ilmanq “Jun yo’yookil aj yehol nawom chirix li yo’yookil Kristo,” Jolomil ch’utub’aj-ib’ re abril 2020). Naru nakawil li kixye ut nakak’oxla chan ru naq li junjunq chi na’leb’ ak kixjal—malaj truuq tixjal—laa yu’am.
Chi’ilmanq ajwi’ Temas del Evangelio, “El Libro de Mormon,” Biblioteca del Evangelio.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Li Jesukristo a’an lix maatan lin Choxahil Yuwa’ choq’ we.
Re xtenq’ankil laa kok’al chixk’oxlankil li maatan kixk’e qe li Dios naq kixtaqla li Ralal, naru nakalan jun xjalam-uuch li Jesukristo jo’ jun maatan re Ralankil. Naru nekex’aatinak chirixeb’ li maatan xek’ul sa’ Ralankil li mas xe’wulak cheru malaj li maatan mas teeraj xk’ulb’al. Chirix a’an laa kok’al naru neke’risi xlanb’al lix jalam-uuch li Kristo ut neke’ru chixtz’ilb’al rix chan ru naq li Kristo a’an jun maatan nim xloq’al choq’ qe. Jun b’ich jo’ “Kixtaqla li Ralal” (B’ichleb’aal choq’ reheb’ li Kok’al, 20–21) naru nekexxtenq’a sa’ li tz’ilok-ix a’an. Tenq’aheb’ laa kok’al chixtawb’aleb’ ch’ol aatin reheb’ li b’ich li neke’xch’olob’ li osob’tesihom wan choq’ qe sa’ xk’ab’a’ lix yo’lajik li Jesus.
Li Jesukristo kiyo’la re wank choq’ inKolonel.
Maare taawulaq chiruheb’ laa kok’al xwotzb’al aawik’in li neke’xnaw chirix lix yo’lajik li Jesus. Sa’ li Hu reheb’ li Jalam-uuch re li Evangelio wankeb’ k’iila jalam-uuch neke’ru chatenq’ankil chixyeeb’al li seraq’ reheb’ (che’ilmanq 28, 29, 30, 31). Naru ajwi’ nekerileb’ xjalam-uuch lix yu’am li Kolonel ut lix tojb’al rix li maak xb’aan. K’a’ut naq li qaChoxahil Yuwa’ kixtaqla li Jesukristo?
Maare taawulaq ajwi’ chiruheb’ laa kok’al xyiib’ankil xjalam-uuch lix yo’lajik ut lix k’anjel li Jesus. Naru neke’xyiib’ xjalam-uuch li k’a’ru ch’olob’anb’il sa’ 1 Nefi 11:13–23; Mosiah 3:5–10; Helaman 14:1–13; ut 3 Nefi 1:4–22. Naru neke’xwotz aawik’in k’a’ru neke’xk’ut lix jalam-uuch chirix li Jesukristo.
Re xka’jultikankil naq sa’ wiib’al li Santil Hu ut lix Hu laj Mormon neke’xk’ut lix yo’lajik li Jesus, naru nakatz’iib’a li k’a’ru nak’ulman sa’ Lukas 2:4–14; Mateo 2:1–2; ut 3 Nefi 1:15, 19–21. Laa kok’al naru neke’xtz’il rixeb’ li raqal a’in re xk’eeb’al reetal ma Belen ke’k’ulman a’an, malaj sa’ li ch’och’ America, malaj sa’ xkab’ichal li na’ajej. K’a’ut naq naqab’antioxi naq wan lix Hu laj Mormon jo’ jun xkab’ aj ch’olob’anel chirix lix yo’lajik li Jesukristo?
Jwal neke’wulak li seraq’ chiruheb’ li kok’al. Eb’ li seraq’ jwal chaab’ileb’ re xtenq’ankileb’ li kok’al chixtzolb’al ut chixjultikankileb’ li yaalil na’leb’. Naq yooqat chixwotzb’aleb’ li seraq’ chirix lix yo’lajik li Jesus, k’oxla xwotzb’al ajwi’ seraq’ re laa yu’am li xate’xtenq’a chixkawob’resinkil laa paab’aal chirix li Kolonel.
Lix Hu laj Mormon naxch’olob’ xyaalal li Jesukristo.
Naq nekechoy xtzolb’al lix Hu laj Mormon chiru li chihab’ a’in, us naq teewotz cherib’il eerib’ eb’ li seraq’ malaj raqal jwal neke’wulak cheru sa’ li loq’laj hu a’in. Rilb’aleb’ junjunqeb’ li jalam-uuch neke’tawman sa’ Kim, Taaqehin malaj Eb’ li Esilal sa’ lix Hu laj Mormon naru naxtenq’aheb’ laa kok’al chixjultikankil li k’a’ru xe’xtzol chiru li chihab’ a’in. Tenq’aheb’ chixk’eeb’al reetal k’a’ru neke’xk’ut li seraq’ a’an chirix li Jesukristo.
Naru ajwi’ nakak’e reheb’ laa kok’al jun xjalam-uuch li Jesus, malaj taakanab’eb’ chixyiib’ankil xjalam-uuch a’an. Patz’ reheb’ naq te’xchap chi kutankil lix jalam-uucheb’ rajlal sut naq te’rab’i xk’ab’a’ li Kristo naq yooqat chixyaab’asinkil 2 Nefi 25:23, 26. Ch’olob’ xyaalal naq lix Hu laj Mormon kitz’iib’aman re qatenq’ankil re naq “taqapaab’ li Kristo” (2 Nefi 25:23).
Re xtawb’al xkomon chik li na’leb’, chi’ilmanq li hu Amigos re li po a’in.
