16–22 diciembre: “Chalqex rik’in li Kristo, ut chitz’aqloq eere eeru rik’in.” Moroni 10
“16–22 diciembre: “Chalqex rik’in li Kristo, ut chitz’aqloq eere eeru rik’in.” Moroni 10,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“16–22 diciembre. Moroni 10,” Kim, Taaqehin—Choq’ re li ochoch ut li iglees: 2024 (2023)
Jalam-uuch
li Jesus naxk’ut rib’ chiruheb’ laj Nefita
Re taaruuq teenaw, xb’aan laj Gary L. Kapp
16–22 diciembre: “Chalqex rik’in li Kristo, ut chitz’aqloq eere eeru rik’in”
Lix Hu laj Mormon natikla rik’in lix yeechi’ihom laj Nefi naq a’an tixk’ut chiqu naq “ebʼ lix qʼunil uxtaan li Qaawaʼ wankebʼ saʼ xbʼeenebʼ chixjunilebʼ li kixsikʼ ru, saʼ xkʼabʼaʼ lix paabʼaalebʼ” (1 Nefi 1:20). Li hu naraqe’ rik’in xb’oqom laj Moroni: “Chijultikoʼq eere chanru ruxtaanal chaq li Qaawaʼ” (Moroni 10:2–3). Kʼaʼruheb’ li reetalil li ruxtaan li Qaawa’ li aawilom sa’ lix Hu laj Mormon? Maare taak’oxla li ruxtaanal li Dios naq kixk’am xb’e lix junkab’al laj Lehi chiru li yamyookil ch’och’ ut chiru li nimla palaw, eb’ li q’unil uxtaan kixk’ut chiru laj Enos naq kitz’okaak li raam re te’kuye’q lix maak, malaj chan ru kiruxtaana laj Alma, jun aj xik’ ilonel re li Iglees li kijala choq’ jun aj kolol rix li Iglees maak’a’ xxiw. Malaj maare tatk’oxlaq chirix li uxtaan kixk’ut li Kolonel chiruheb’ li tenamit chirix xwaklijik chi yo’yo naq kixk’irtesiheb’ li yaj wankeb’ sa’ xyanqeb’ ut kirosob’tesiheb’ lix kok’al. Ut li nim wi’chik xwankil, a’an naq chixjunil a’in naru tixjultika aawe “chanru ruxtaanal li Qaawa’” choq’ aawe, xb’aan naq kitz’iib’aman lix Hu laj Mormon re xk’eeb’al qab’oqb’al chiqajunqal re taqak’ul li ruxtaan li Dios—jun b’oqom li natawman sa’ roso’jik li raatin laj Moroni, “Chalqex rik’in li Kristo, ut chitz’aqloq eere eeru rik’in” (Moroni 10:32).
Li na’leb’ re tzolok sa’ li ochoch ut sa’ li iglees
Naru ninnaw li yaal chirix chixjunil li kʼaʼaq re ru rik’in xwankil li Santil Musiq’ej.
Li yeechi’ihom sa’ Moroni 10:3–7 ak xjal lix yu’ameb’ k’iila millon li kristiaan chiru li ruchich’och’. Chan ru xjal laa yu’am laa’at? Naq nakawil Moroni 10:3–7, k’oxla rilb’al ru chi timil timil jo’ maajun wa aab’aanuhom. Naru nakatz’il rix li junjunq chi ch’ol aatin, chixpatz’b’al aawib’ li na’leb’ jo’eb’ a’in: K’a’ru naraj naxye a’in? Chan ru naru tinchaab’ilo’q sa’ xb’aanunkil a’in? K’a’ru ak innumsihom rik’in a’in?
Naq nakak’oxla li aab’aanuhom re xsik’b’al li musiq’ejil yaal, naru naq us xtzolb’al chan ru naq jalaneb’ chik li kristiaan ke’xtaw li yaal rik’in xwankil li Santil Musiq’ej. Li Elder Mathias Held kixye resil li kixk’ul naq ki’ok sa’ li Iglees (chi’ilmanq “Xsik’b’al li qanawom rik’in li Musiq’ej,” Jolomil ch’utub’aj-ib’ re abril 2019). Li Elder David F. Evans kixye resil li kixk’ul a’an jo’ jun li xk’iresiman sa’ li Iglees a’ut toj ke’wan lix patz’om (chi’ilmanq “Lix yaalalil chixjunil li k’a’aq re ru,” Jolomil ch’utub’aj-ib’ re octubre 2017). K’oxla rilb’al jun malaj xkab’ichaleb’ li aatin a’an ut xtz’iib’ankil li nakatzol rik’in li ke’xb’aanu re xsik’b’al li yaal, li naru nakatxtenq’a rik’in li yookat chixb’aanunkil.
Naru ajwi’ nakatz’il rix li naxk’ut li Dios chirix li yaal rik’in rilb’aleb’ li raqal sa’ K’utul Raqal reheb’ li Loq’laj Hu, “Yaal” (Biblioteca del Evangelio). B’arwan reheb’ li raqal re li loq’laj hu li jwal neke’wulak chawu? Naru nakasik’ ru jun reheb’ re xwotzb’al rik’in jun chik li kristiaan li yoo ajwi’ chixsik’b’al li yaal.
Tz’iib’a li nakak’oxla Wi jalb’il qach’ool sa’ lix evangelio li Jesukristo, a’an naraj naxye naq naqanaw ut naqayu’ami li evangelio. Jwal wi’chik naq taak’anjela li na’leb’ nakatzol wi nakatz’iib’a. Wi yookat chi k’utuk, b’oqeb’ li komon chixtz’iib’ankil li musiq’ejil na’leb’ neke’xk’ul.
K’iila paay chan ru naq junaq taaruuq “tixtz’eqtaana xyaalaleb’ li maatan naxk’e li Dios” (Moroni 10:8). Wankeb’ li neke’xye naq moko yaaleb’ ta li maatan a’in. Wankeb’ chik li neke’xtz’eqtaana xyaalal lix maataneb’ rik’in naq ink’a’ neke’roksiheb’ chi moko neke’xchaab’ilob’resiheb’. Naq nakawil Moroni 10:8–25, sik’eb’ li na’leb’ li te’tenq’anq aawe chixtawb’aleb’ laa musiq’ejil maatan ut chiroksinkileb’ re rosob’tesinkileb’ li ralal xk’ajol li Dios. Naru neke’k’anjelak li patz’om a’in: K’a’ruheb’ li musiq’ejil maatan? Ani aj-e neke’k’ehe’? K’a’ut naq neke’k’ehe’? Chan ru neke’qak’ul? Ma naru nakak’oxla hoonal naq li kristiaan ke’roksiheb’ li maatan li tz’iib’anb’ileb’ sa’ Moroni 10:9–16?
Naru taatz’aqloq we wu xb’aan li rusilal li Jesukristo.
Li raatin laj Moroni naq “toochalq rik’in li Kristo” ink’a’ ka’ajwi’ na’aatinak chirix tzolok chirix a’an malaj xk’oxlankil a’an. A’an ajwi’ jun b’oqom re chalk rik’in li Kristo chi tz’aqal—naq too’ok jo’ chanru a’an. Naq nakawil Moroni 10:30–33, k’e reetaleb’ li ch’ol aatin nakate’xtenq’a chixtawb’al ru k’a’ru naraj naxye chalk rik’in li Kristo, chan ru nab’aanuman, ut k’a’ru nak’ulman wi naqab’aanu.
K’oxla li xatzol sa’ lix Hu laj Mormon chiru li chihab’ a’in, ut k’oxla k’a’ru xaweek’a ut xatzol chirix li Jesukristo. Qayehaq, chan ru naq lix Hu laj Mormon xatxtenq’a chi chalk rik’in? Chan ru naq xatxtenq’a chixkanab’ankil aawib’ chi tz’aqal chiru li rusilal? Chan ru naq xatxtenq’a re naq ink’a’ “xatz’eqtaana xyaalal” lix wankil li Kolonel? K’oxla xwotzb’al lix nawom aach’ool chirix lix Hu laj Mormon rik’in jun kristiaan naraj ru rab’inkil, maare eb’ laa komon ut laa wamiiw li ink’a’ neke’xnaw k’a’ru li esil tz’iib’anb’il chi sa’.
Chi’ilmanq ajwi’ li video chirix lix b’oqom laj Moroni naq chixjunileb’ te’chalq rik’in li Kristo, li wan sa’ li Biblioteca del Evangelio.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Naru ninnaw injunes naq tz’aqal yaal lix Hu laj Mormon.
Chan ru naru nakatenq’aheb’ laa kok’al chixk’ulub’ankil lix b’oqom laj Moroni re xpatz’b’al re li Dios ma tz’aqal yaal lix Hu laj Mormon? Naru nakak’e reheb’ kok’ hu tz’iib’anb’ileb’ wi’ li aatin Teeril, Chijultiko’q eere, Chetz’il rix sa’ eech’ool, ut Chepatz’. Laa kok’al naru neke’xtaweb’ li aatin a’an sa’ Moroni 10:3–4. K’a’ru li tento taqil, taqajultika, taqatz’il rix sa’ qach’ool, ut taqapatz’ re xtawb’al malaj xkawob’resinkil lix nawom qach’ool chirix lix Hu laj Mormon? Laa kok’al naru neke’xsik’ xjuntaq’eetileb’ li raqal a’an rik’in li b’ich “Tintzol, tinkʼoxla, tintijoq” (B’ichleb’aal choq’ reheb’ li Kok’al, 66).
Laa kok’al naru neke’roksi li jalam-uuch li wan sa’ xraqik li tusleb’ aatin a’in re aatinak chirix laj Moroni naq kixmuqeb’ li perel ch’iich’ oor (chi’ilmanq ajwi’ “Ch’ol 54: Li k’a’ru yeechi’inb’il sa’ lix Hu laj Mormon,” Eb’ li Esilal sa’ lix Hu laj Mormon, 156). Maare taawulaq chiruheb’ li kok’al toj ka’ch’ineb’ xyu’am xk’oxlankil naq a’aneb’ laj Moroni ut naq neketz’iib’ak chiru li perel ch’iich’ oor ut neke’xmuq rub’el ch’och’. Wotz cherib’il eerib’ lix nawom eech’ool chirix lix Hu laj Mormon.
Li qaChoxahil Yuwa’ naxk’eheb’ musiq’ejil maatan we.
Re xtzolb’aleb’ laa kok’al chirixeb’ li musiq’ejil maatan, naru nakatz’iib’aheb’ li ajl 9 toj sa’ 16 chiruheb’ kok’ hu ut nakalaneb’ rix li kok’ hu jo’ li maatan. Laa kok’al naru te’xteheb’ li maatan, te’rileb’ li raqal sa’ Moroni 10:9–16 li neke’xk’uli rib’ rik’ineb’ li ajl, ut te’xye k’a’ru li junjunq chi musiq’ejil maatan. Naru neketz’il rix chan ru naq li qaChoxahil Yuwa’ naraj naq te’qoksi li maatan a’in re rosob’tesinkileb’ li ralal xk’ajol. Naru ajwi’ nakatenq’aheb’ laa kok’al chixk’eeb’aleb’ reetal li maatan xk’ehom li qaChoxahil Yuwa’ reheb’.
Li Jesukristo naraj naq laa’in tinchalq rik’in a’an.
Ma neke’xtaw ru laa kok’al k’a’ru naraj naxye “chalk rik’in li Kristo”? Naru nakayaab’asi Moroni 10:32 ut nakapatz’ reheb’ naq te’xka’suti li ch’ol aatin aawik’in. Naru neke’xmutz’ li ru naq yooqat chixk’eeb’al jun xjalam-uuch li Jesus sa’ junaq na’ajej b’ar wankex wi’. Ye reheb’ naq te’xte li ru, te’xtaw li jalam-uuch, te’xch’utub’ rib’ chixsutam, ut te’xye chan ru naq nokoru chi chalk rik’in li Kristo. Maare us xtz’iib’ankil li patz’om K’a’ru naraj naxye chalk rik’in li Kristo? Patz’ reheb’ naq te’ril Moroni 10:32–33 re xtawb’al xsumenkil (chi’ilmanq ajwi’ Eb’ lix Raqalil li Paab’aal 1:3–4). Tz’iib’ahomaq li k’a’ru naraj li Kristo naq taqab’aanu ut li k’a’ru naxyeechi’i xb’aanunkil choq’ qe.
Maare taawulaq chiruheb’ laa kok’al rutz’u’ujinkil ru kok’ hu jo’ aamej li te’xye “Ninra li Dios chi anchal inmetz’ew, ink’a’uxl, ut inkawilal” (chi’ilmanq Moroni 10:32). Naq yooqeb’ chixb’aanunkil a’an, ye reheb’ chan ru naqak’ut chiru li Dios naq naqara.
Re xtawb’al xkomon chik li na’leb’, chi’ilmanq li hu Amigos re li po a’in.
Jalam-uuch
laj Moroni naxmuqebʼ li perel chʼiichʼ oor
Rub’elaj naq kixmuqeb’ li perel ch’iich’, laj Moroni kixye, “chijultikoʼq eere chanru ruxtaanal chaq li Qaawaʼ” (Moroni 10:2–3)