9–15 ni Tiseba: “Me Laveti Iko Cake ko Karisito” Moronai 7–9
9–15 ni Tiseba: “Me Laveti Iko Cake ko Karisito” Moronai 7–9,” Lako Mai, Mo Muri Au—Me Vulici e Vale kei na Lotu : iVola i Momani 2024 (2023)
“9–15 ni Tiseba. Moronai 7-9,” Lako Mai, Mo Muri Au—Me Vulici e Vale kei na Lotu: 2024 (2023)
iVakatakilakila
Volavola ena peleti koula o Moronai
Minerva Teichert (1888 – 1976), Moronai: Na iOtioti ni Nifaiti,1949–1951, waiwai ena masonite, 34¾ x 47 na idi. Vale ni Maroroi Cakacakaniliga e Brigham Young University, 1969.
Ni bera ni tinia na itukutuku eda kila nikua me vaka na iVola i Momani vata kei na iotioti ni nona vosa o Moronai, e a wasea e tolu na itukutuku mai vei Tamana, o Momani: e dua na vosa vei ira na “daumuria na Karisito ena vakarokoroko” (Moronai 7:3) kei na rua na ivola e vola o Momani vei Moronai. E rairai tomana talega o Moronai na itukutuku oqo ena iVola i Momani baleta ni sa raica oti o koya na vei leqa eso e tautauvata mai na nona gauna kei na noda. Ni volai na veivosa oqo, era sa gole tani na Nifaiti mai vua na iVakabula. E vuqa “era sa sega ni veilomani,” ka sa taleitaka “na veika kece ka vakavo ga na veika e vinaka” (Moronai 9:5, 19 Ia a se kunea tikoga o Momani na vu ni inuinui, ka vakavulica vei keda ni inuinui e sega ni kena ibalebale me da vagalui se yalowai me baleta na leqa ni vuravura. Na inuinui sai koya na vakabauti Tamada Vakalomalagi kei Jisu Karisito, na nona kaukauwa e cecere ka tawamudu cake mai na leqa oqo. E kena ibalebale “[meda] taura matua na veika vinaka kecega” (Moronai 7:19). E kena ibalebale me tiko ga “na inuinui ni nona lagilagi kei na bula tawamudu, me tiko ena nomu vakasama me sega ni mudu” kei na Veisorovaki i Jisu Karisito (Moronai 9:25).
Na Rarama i Karisito e vukei au meu kila na dina mai na cala.
E vuqa na tamata era taroga, “Au na kila vakacava ni sa lako mai vua na Kalou e dua na veivakauqeti mai vua na Kalou se mai na noqu vakanananu?” se “Ena levu ni veicavilaki nikua, au na kila vakacava na ka dodonu se cala?” Na vosa nei Momani ena Moronai 7 e solia vei keda e vica na ivakavuvuli eda rawa ni vakayagataka me saumi kina na taro oqo. Vakaraici ira vakabibi ena tikina e 12–20. E rawa ni o vakayagataka na dina eso oqo me vukei iko mo dikeva na itukutuku o sotava kei na veika o sotava ena macawa oqo.
Ena vakabauti Karisito, sa rawa niu “taura matua na veika vinaka kecega.”
A taroga o Momani e dua na taro ka vaka me bibi sara nikua: “E rawa vakacava [me] taura matua na veika vinaka kecega?” (Moronai 7:20). A qai vakatavulica o koya na vakabauti Jisu Karisito, inuinui, kei na loloma cecere. Ni o wilika na tikina e 20–48, vakaraica na ivakarau ni bula yadua e vukei iko mo kunea ka “taura matua” na vinaka e lako mai vei Jisu Karisito. Na cava era ka bibi kina vua e dua na tisaipeli i Jisu Karisito na ivakarau oqo?
Raica talega na “iVakavuvuli ni Momani me baleta na Vakabauta, iNuinui, kei na Loloma Cecere” (vidio), Valenivola ni Kosipeli.
“Na loloma uasivi sa ikoya na loloma taucoko i Karisito.”
E raica o Momani ni noda vakabauti Jisu Karisito e liutaki keda me tu vei keda na loloma uasivi. Na cava na loloma cecere? E rawa ni o vola na loloma uasivi qai wilika na Moronai 7:44–48, ka vaqara na vosa se malanivosa e rawa ni vakacavara na iyatuvosa. Ni o sa vakacavara, vakasamataka mo sosomitaka na vosa loloma uasivi ena yaca i Jisu Karisito. Na cava eda vulica eke baleta na iVakabula? Sa vakaraitaka vakacava o Jisu Karisito na Nona loloma savasava? Vakasamataka na ivakaraitaki eso mai na ivolanikalou kei na nomu bula.
A raica rawa o Peresitedi Dallin H. Oaks: “Na vuna e sega ni mudu na loloma uasivi kei na vuna e levu cake sara na loloma uasivi mai nai vakarau vinaka … sai koya ni loloma uasivi, ‘na loloma savasava i Karisito’ [Moronai 7:47], e sega ni dua na cakacakaia e dua na ituvakise na ituvaki ni bula. … Na loloma uasivi sai koya e dua na ivakarau ni bula eda rawata” (“Na Bolebole mo Yaco,” Ensign, Nove. 2000, 34). Me tokona na veivosaki oqo, sa rawa ki na kuoramu se kalasi me wilika eso na tiki ni itukutuku nei Elder Massimo De Feo “Loloma Savasava: Na iVakatakilakila Dina ni Tisaipeli Dina i Jisu Karisito” (Liaona,, Me 2018, 81 – 83). E tara vakacava na nomu bula vakatisaipeli na loloma uasivi? Ena rawa vakacava mo “kabita na loloma”? (tikina e 46).
Raica talega na 1 Korinica 13:1–13; Ica 12:33–34; “Dou Veilomani,” Sere ni Lotu, naba 188; “Loloma Cecere: Nodra iVakaraitaki na Vakabauta” (vidio), Valenivola ni Kosipeli; Ulutaga vakosipeli, “Loloma Uasivi,” Valenivola vakosipeli.
Vakayagataka na lesoni vakaraitaki. Ena rawa beka ni vukei iko na vakasama me baleta e dua na itolu yavatolu mo kila vakavinaka cake kina na kedrau isema na vakabauta, inuinui, kei na loloma uasivi (raica na Dieter F. Uchtdorf, “Na Kaukauwa Tawayalani ni iNuinui,” Liaona, Nove. 2008, 21–24).
Me veibasai kei na itukutuku ni loloma i Momani ena Moronai 7:44–48, na ikarua ni ivola i Momani vei Moronai e oka kina na ivakaro me baleta e dua na ka e sotavi tiko nikua—na cudru. Ena Moronai 9:3–5, na cava eso na revurevu ni nodra cudru na Nifaiti? Na ivakaro cava eda rawa ni taura mai na tikina e 3–5, 18–20, 23?
Raica talega Gordon B. Hinckley, “Berabera ni Cudru,” Liaona, Nove. 2007, 62–66.
E rawa ni’u vakanuinui vei Karisito, se cava ga na ituvaki ni bula au tu kina.
Ni oti na nona vakamacalataka na veika e raica, sa tukuna o Momani vei luvena me kakua ni rarawa. Na cava e vakauqeti iko me baleta na itukutuku ni vakanuinui nei Momani? Na cava e kena ibalebale vei iko me “laveti [iko]” ko Karisito? Na ivakarau kei na Nona ivakavuvuli cava o Karisito “me tiko ena nomu vakasama” ka solia vei iko nai nuinui? (Moronai 9:25).
Ke sa tu vei au na vakabauta, au sa rawa ni cakava na cava ga e gadreva na Kalou meu cakava.
Vakasamataka mo raica vata e vica na iyaloyalo ka vakaraitaka e dua mai na ivolanikalou ka rawata e dua na ka bibi (raica, me kena ivakaraitaki, iVola ni iYaloyalo Vakosipeli, naba 19, 70, 78, 81). Sa vakayaco veisau vakacava na vakabauti Karisito ena ivakaraitaki eso oqo? E rawa ni dou qai wilika vata kei ira na luvemudou na Moronai 7:33, ka vaqara na cava eda rawa ni cakava ni da vakabauti Jisu Karisito. Sa rawa talega mo veiwaseitaka na veika o ni sa sotava ena gauna sa vakalougatataki kemuni kina na Kalou ena kaukauwa mo ni cakava na Lomana.
Na vakabauti Jisu Karisito e rawa ni solia vei au na inuinui.
Wilika ka vakamacalataka na Moronai 7:41 vei ira na gone, ka kerei ira me ra laveta na ligadra ni ra rogoca e dua na ka e kaya o Momani e dodonu meda vakanuinui kina. Tukuna vei ira na gone me baleta na vakanuinui ko vakila ena vukui Jisu Karisito.
O iko kei ira na luvemu e rawa talega ni o vakasamataka e dua e sotava tiko e dua na gauna dredre ena dua na ka. Sureti ira na gone me ra droinitaka na iyaloyalo me baleta na tamata oya ka rawa ni vakananumi koya me nuinui vei Jisu Karisito.
Au rawa ga ni vakanuinui vei Jisu Karisito, ena gauna mada ga ni dredre levu.
Mo vakavulici ira na luvemu me baleta na inuinui vei Jisu Karisito, e rawa ni o vakatawana e dua na koniteina makare ena wai ka vakalutuma e rua na iyaya—e dua e vutovuto ka dua e luvu. Ni o ni wilika vata na Moronai 7:40–41 kei na 9:25–26, e rawa ni ra vakasaqara na luvemuni na veika e dau cakava vei keda na inuinui. Vakatautauvatataka na iyaya nawa kei na tamata ka tu vua na inuinui vei Karisito. E cakava beka vakacava ko Karisito me “laveti keda cake” ni da sotava na veika dredre? Vukei ira na gone mera vakasamataka eso na sala e rawa me ra maroroya kina na iVakabula kei na nona ivakavuvuli veivakauqeti “ena [nodra] vakasama me tawamudu.”
“Na loloma uasivi sa ikoya na loloma taucoko i Karisito.”
E dua na sere me baleta na loloma, me vaka na “Dou Veilomani” (Nodra iVolanisere na Lalai, 74), e rawa ni tekivuna e dua na veivosaki me baleta na cava na loloma. E rawa ni o wilika se vakalekalekataka na Moronai 7:47 ka sureti ira na luvemu me ra droinitaka na kedra iyaloyalo ni ra vakaraitaka tiko na loloma vua e dua. Vakatututaka mera biuta na nodra iyaloyalo ena vanua ka na vakananumi ira mera lomani ira na tani me vaka e cakava o Jisu.
O na vakauqeti ira vakacava na luvemu me ra vakasaqara ka tara cake na loloma savasava i Karisito ena nodra bula? Vukei ira na gone mera vakasamataka eso na sala ea vakaraitaka kina o Jisu na loloma uasivi (raica, me ivakaraitaki na, Luke 23:34; Joni 8:1–11; Ica 12:33–34). E rawa vakacava ni da vakamuria na Nona ivakaraitaki?
Me baleta na vakasama tale eso, raica na ilavelave ni vula oqo ena mekasini ni iTokani .
iVakatakilakila
Jisu Karisito
iYaloyalo kei Karisito, na iVakabula, mai vei Heinrich Hofmann