Ni oti e vica na drau na yabaki, ni ra sa vakarusai na Jeretaiti, era a kunea na Nifaiti na ivovo ni nodra itikotiko ni gauna makawa. Ena maliwa ni veika vakacacani oqo e dua na itukutuku vuni—na peleti ni “koula dina” ka ra sa “sinai tu ena iceuceu,” kei ira na Nifaiti era ”sa gadreva sara vakalevu” me ra wilika (Mosaia 8:9; 28:12). Nikua o tu kina e dua na ivakalekaleka ni vola, vakadewataki ki na nomu vosa, ka sa vakatokai na iVola i Ica. Ni ra wilika na Nifaiti, “era a vakasinaiti ena rarawa” me ra vulica na nodra lutu vakadoudou na Jeretaiti. “Ia era kila rawa kina e vuqa na ka, o koya era sa marau kina vakalevu” (Mosiah 28:12, 18). O iko talega, ena rawa ni o kunea na gauna ni rarawa ena ivola oqo. Ia sa rawa talega mo reki ena isolisoli ni kila-ka oqo. Me vaka a vola o Moronai, “ni sa lewa yalomatua ni Kalou me vakatakilai vei kemudou na veika oqo me muduki kina na ca, ka me na yaco na gauna ena sega kina na kaukauwa i Setani me rawa na yalodra na luve ni tamata” (Ica 8:26).
Ena dusimaki keda na Turaga ena noda ilakolako ni bula oqo.
Sa rawa mo raica na vakasama vakayalo kevaka mo dou veidutaitaka na nodra soko takosova na wasawasa na Jeretaiti ki na nomuni ilakolako ena bula oqo. Me kena ivakaraitaki, na cava sa vakarautaka na Turaga me vakararamataka kina na nomu sala me vakataka na vatu ena nodra waqa na Jeretaiti? Na cava e rawa ni matataka na waqa, se na “liwa tiko ni cagi vaka ki na vanua yalataki” Ica 6:8 Na cava o sa vulica mai na nodra ivakarau na Jeretaiti ni se bera, ni yaco tiko, kei na gauna sa oti kina na soko? E sa liutaki iko tiko vakacava na Turaga ki na nomu vanua yalataki?
“Dou sere vua na Turaga.” Era vakaraitaka na Jeretaiti na nodra vakavinavinaka kei na loloma vua na Kalou ena sere kei na vakacaucau (raica na Ica 6:9). Sa rawa mo vakasaqara se bulia na madigi mo vakayagataka na sereivakatagi kei na ivakadinadina mai vu ni yalomu mo vakacaucautaka na Kalou e vale kei na lotu. Me ivakaraitaki, e rawa ni ganita me lagati e dua na serenilotu ni vakacaucau me vaka na “Praise the Lord with Heart and Voice” (Serenilotu, naba 73) ni vulici tiko na Ica 6:1–12.
iVakatakilakila
Na matavuvale na Jeretaiti ena loma ni nodra waqa
Gonelailai e Vodo tiko, mai vei Kendal Ray Johnson
E dina ga ni dokadoka kei na ivalavala ca sa vaka tu kina na itukutuku ni kawa i Jereti, sa tu talega e dua na ivakaraitaki ni yalomalumalumu ena veiwase oqo — vakabibi ena Ica 6:5–18, 30; 9:28–35; kei na 10:1–2. Ni ko vakasamataka vakatitobu na taro eso oqo ena rawa ni vukei iko mo vuli mai na ivakaraitaki oqo: Na cava na vuna era a vakayalomalumalumutaki ira kina na Jeretaiti ena ituvaki vakaoqo? Rau a vakatubura vakacava nodrau vakabauta? A veisau vakacava na nomu bula? Vakasamataka na cava e rawa ni o cakava me sa lomamu ga mo “yalomalumalumu ena mata ni Turaga” (Ica 6:17) ka sega ni vakasaurarataki mo yalomalumalumu (raica na Mosaia 4:11–12; Alama 32:14–18).
NaWase 7–11 ni Ica e volaitukutukutaka tiko e 28 na itabatamata. E dina ga ni lailai na kena matailalai e rawa ni soli ena dua na vanua lailai, e yaco mai vakatotolo e dua na iwalewale me baleta na revurevu ni veiliutaki dodonu ka ca. Na cava o vulica me baleta na veiliutaki mai na ivakaraitaki—ca kei na vinaka—baleti ira na tui sa tuvai koto e ra?
A solia o Elder Dieter F. Uchtdorf na ivakasala veivukei me baleta na veiliutaki ena nona itukutuku “Sa Cecere Duadua vei Kemudou” (Liaona, Me 2017, 78–81). Vakasamataka mo vulica na itukutuku oqo—vakabibi na italanoa e tukuna tiko—ka vaqara na ivakavuvuli se ivakarau ni veiliutaki Vakarisito. Na gauna cava o sa bau raica kina na ivakavuvuli se ivakarau oqo era vakaraitaka tiko na tamata era veiliutaki tiko?
Ni o kitaka vakakina, vakasamataka eso na madigi mo liutaka se vakauqeti ira na tamata ena nomu vuvale, nomu itikotiko, nomu veikacivi ena Lotu, kei na so tale. E rawa vakacava me da tara cake na ivakarau oqo ka veiliutaki, kevaka sara mada ga e sega ni dua noda ilesilesi ni veiliutaki?
Raica talega na Ulutaga Vakosipeli, “Veiqaravi ena Veikacivi ni Lotu,” Valenivola ni Kosipeli; “iVakavuvuli ni Veiliutaki ena Lotu,” iVoladusidusi Raraba: Veiqaravi Na Lotu i Jisu Karisito ni Yalododonu Edaidai, 4.2 (ChurchofJesusChrist.org).
Ni rau bukivere e rua se sivia na tamata me kakua ni kilai na nodra cakacaka vuni, rau sa vakaitavi ena dua na vere vuni. Me ikuri ni isoqosoqo vuni ka vakamacalataki ena Ica 8:7–18, sa rawa ni laurai na ivakaraitaki tale eso ena Ilamani 1:9–12; 2:2–11; 6:16–30; kei na Mosese 5:29–33. Vakasamataka mo veidutaitaka vata na veitikina oqo kei na 2 Nifai 26:22–24, ka vakamacalataka kina o Nifai na sala e cakava kina na Turaga na Nona cakacaka. Na cava na vuna o nanuma kina ni a vakaroti o Moronai me vola na veika e cakava me baleta na isoqosoqo vuni?
Na cava eda sa vulica rawa mai na ivola nei Ica e rawa ni vukei keda meda rawata na veivakalougatataki ka tukuni tiko ena Ica 8:26?
Au rawa ni nuitaka na Tamada Vakalomalagi me vakacegui au niu rere.
Na tamata kece e sotava na veisiga dredre—o ira sara mada ga na gonelalai. E rawa beka ni o vukei ira na luvemu me ra raica na vosa kei na malanivosa eso ena Ica 6:1–12 e vakaraitaka na nodra nuitaka na Kalou na Jeretaiti ena so na siga dredre ka vakarerei. Navuca mo veiwaseitaka e so na ka o sotava ena gauna a vukei iko kina na Kalou ena gauna dredre ni nomu bula.
Niu nanuma tiko na veika sa cakava vei au na Turaga e kauta mai na vakacegu.
Ni ra yaco yani vakavinaka ki na vanua yalataki, era a vakavinavinaka kina vakalevu na Jeretaiti ka “drodro na wainimata ni marau” (Ica 6:12 E rawa ni o vakauqeti ira na luvemu me ra vakavinavinakataka na veivakalougatataki ni Kalou ena nomu vukei ira me ra kunea na malanivosa mai na Ica 6:9, 12 ka vakaraitaka na nodra a vakaraitaka na Jeretaiti na nodra vakavinavinaka vua na Kalou. Era na marautaka beka na lagasere, me vakataki ira na Jeretaiti, e dua na sere e vakaraitaka na vakavinavinaka, me vaka na “Rogoca na Sere ni Manumanu” (Nodra iVolanisere na Lalai, 16). Kerei ira na gone mera cavuta eso na ka era vakavinavinakataka.
De rawa ni ra wilika na luvemu na Ica 6:30; 7:27; kei na 10:2 ka raicana veika era nanuma na tui yalododonu oqo. E tara vakacava na ivakarau ni nodra liutaki ira na nodra tamata? Sa rawa vei iko kei ira na luvemu mo ni veivosakitaka na sala eso mo ni vakananuma kina vei kemuni na veika sa vakayacora vei kemuni na Kalou. Me ivakaraitaki, de rawa ni ra vola se droinitaka na iyaloyalo. Vakatura mera cakava e dua na itovo tudei mera dau vola na veivakalougatataki era raica mai vua na Turaga (raica na “Mo Ni Nanuma, Nanuma” [vidio], Valenivola ni Kosipeli).
E rairai o iko kei ira na luvemu ko ni na marautaka mo ni matanataka eso na ka sa vakavulica vei keda na parofita meda cakava. E rawa sara mada ga ni o vukica ki na dua na qito mo vakilakila kina na veika e matataka na ivalavala. Oqo ena rawa ni vakarautaki ira na luvemu me ra veivosakitaka na vuna e bibi kina me da muria na parofita ni Kalou. Sa rawa mo qai wilika na Ica 7:24–27 mo kila na ka a yaco ni ra talairawarawa na tamata vua na parofita ni Kalou. Eda sa vakalougatataki vakacava ena noda muria na parofita nikua?
Na vakasaqarai ni ivakarau sa dua na kila maqosa yaga sara ni vulici ni ivolanikalou. E tiko ena ivola i Ica e dua na ivakarau ka vakamatatataka na loloma veivueti ni Turaga. Me vukei ira na luvemu me ra raica na ivakarau oqo, sureti ira me ra wilika na Ica 9:28–35 kei na Ica 11:5–8, ka vaqara na veika e tautauvata ena kedrau maliwa na itukutuku e rua oqo. Na cava eda vulica mai na italanoa eso oqo? De rawa ni ra vaqara na iyaloyalo ena iVola ni iYaloyalo Vakosipeli ni so tale na tamata ena ivolanikalou era sa veivutuni ka vosoti.
Me baleta na vakasama tale eso, raica na ilavelave ni vula oqo ena mekasini ni iTokani .
iVakatakilakila
Waqa ni Jeretaiti e dela ni waitui
Na Nodra Waqa na Jeretaiti,, mai vei Gary Ernest Smith