4–10 ni Noveba: “Au Vosa vei Kemudou Me Vaka Dou Sa Tiko Dina Oqo” Momani 7–9
Momani 7–9: “Au Vosa vei Kemudou Me Vaka Dou Sa Tiko Dina Oqo” Momani 7–9,” Lako Mai, Mo Muri Au—Me Vulici e Vale kei na Lotu: Vola i Momani 2024 (2023)
“4–10 ni Noveba. Momani 7–9,” Lako Mai, Mo Muri Au—Me Vulici e Vale kei na Valenilotu: 2024 (2023)
iVakatakilakila
Volavola ena peleti koula o Moronai
O Moronai e Volavola Tiko ena Peleti Koula,, mai vei Dale Kilborn
4–10 ni Noveba: “Au Vosa vei Kemudou Me Vaka Dou sa Tiko Dina Oqo”
E kila tu o Moronai na veika ena vakilai ni da tiko duadua ena dua na vuravura ca—vakauasivi ni mate ena ivalu o tamana ka ra vakarusai na Nifaiti. “Kau sa qai vo taudua ga ko i au,” a vola o koya. “Sa sega na wekaqu se na vanua meu lako kina” (Momani 8:3, 5). Sa vaka me sega na inuinui ni veika eso, ia a kune vakacegu ko Moronai mai na nona ivakadinadina me baleta na iVakabula kei na nona kila ni “na ia tiko ga na inaki ni Turaga” (Momani 8:22 Ka sa kila ko Moronai ni dua na itavi bibi ena inaki tawamudu oqori ena vakayacora na iVola i Momani—na ivolatukutuku ka sa vakacavara vagumatua tiko o koya, na itukutuku ena yaco ena dua na siga me kauta mai e vuqa na tamata “me ra kila na Karisito” (Momani 8:16; 9:36). Na vakabauta nei Moronai ena yalayala oqo a rawa kina vua me vakaraitaka vei ira na itabatamata mai muri era na wilika na ivola oqo, “Au sa vosa vei kemudou me vaka ga dou sa tiko dina oqo” ka “Niu kila ni dou na taura na noqu vosa” (Momani 8:35; 9:30). Eda sa cakavatiko na nona vosa, kei na cakacaka ni Turaga kasa toso tiko yani, ena dua na tikina ni rau sa dina tiko o Momani kei Moronai ena nodrau ilesilesi ena gauna mada ga erau tiko duadua kina.
Au na vakabauti Jisu Karisito ka “muria” na Nona kosipeli.
Ni oti nona vakalekalekataka na nodra itukutuku na nona tamata, a solia o Momani na iotioti ni nona itukutuku ena Momani 7. Na cava beka e digitaka kina na iwase ni tukutuku oqo o koya? Na cava na kena ibalebale vei iko mo “taura matua na itukutuku vinaka i Karisito”? (Momani 7:8).
A taroga o Peresitedi Russell M. Nelson: “Kevaka e soli vei kemuni na daimani se na rupi se na iVola i Momani, o cei o na digitaka? Ka dina, o cei sara mada e cecere cake na kena yaga vei iko? (“Na iVola i Momani: Ena Vakaivei Beka na Nomu Bula Kevaka e Sega,” Liaona, Nove. 2017, 61).
Au rawa ni talairawarawa ki na ivakaro kevaka sara mada ga era sega ni muria na kena vo.
Ena so na gauna o na galili ena nomu sasaga mo muria na ivakaro. Na cava o rawa ni vulica mai na ivakaraitaki nei Moronai e rawa ni veivuke? (raica na Momani 8:1–11). Kevaka e rawa ni o tarogi Moronai se a yalodina tikoga vakacava, na cava o nanuma ni na kaya o koya?
Na iVola i Momani a volai me baleta na noda gauna.
A vakaraitaka o Jisu Karisito vei Moronai na cava ena yaco ni sa lako mai na iVola i Momani (raica na Momani 8:34–35), kei na veika a raica o Moronai ka a vakavuna me veivakasalataki doudou baleta na noda gauna oqo. Ni o wilika na Momani 8:26–41 kei na 9:1–30, vakasamataka vakatitobu na sala e rawa ni yaga kina vei iko na nona vosa. Me kena ivakaraitaki, ena veitikina oqo e taroga o Moronai e 24 na taro. Na ivakadinadina cava o raica ena veitaro oqo a raica kina o Moronai na noda gauna oqo? Ena veivuke vakacava na iVola i Momani ki na ibolebole a raica rawa o Moronai?
Vakarogoca na Yalo. Yadrava matua na nomu vakasama kei na veika o vakila, ke sega mada ga ni veisotari kei na ka o wilika tiko. Na veivakanananu oqori sa rawa ni ka saraga e vinakata vei iko na Tamada Vakalomalagi mo vulica. Me ivakaraitaki, na veivakauqeti cava soti o sa bau vakasamataka vakatitobu na taro e taroga o Moronai ena Momani 9:1–30?
A tinia o Moronai na volavola nei tamana ena dua na itukutuku qaqa me baleti ira na tamata ena noda gauna era sega ni vakabauta na cakamana (raica na Momani 8:26; 9:1, 10–11). Na cava na vuna o nanuma kina ni sa gadrevi nikua na vakabauta ni cakamana? Vakasaqaqara ena Momani 9:9–11, 15–27 kei na Moronai 7:27–29 ka vakasamataka vakatitobu na taro eso me vakaoqo:
Na cava eda sa vulica baleta na iVakabula mai na veitikina oqo?
Na cava au vulica me baleta na cakamana ena gauna e liu kei na gauna nikua?
Na cava na yaga ni vakabauti ni o Jisu Karisito e sa Kalou ni cakamana? Na cava so e dau yaco ni da sega ni vakabauta na veika oqo?
Na cakamana cava—levu ka lailai—sa cakacaka beka na iVakabula ena noqu bula? Na cava e vakavulica vei keda na cakamana eso oqo me baleti Koya?
Vakavulica o President Russell M. Nelson: “Na noda iVakabula kei na Dauveivueti, ko Jisu Karisito, ena vakayacora eso na Nona cakacaka cecere duadua ena maliwa ni gauna oqo kei na Nona lesu mai. Eda na raica na veivakatakilakila veivakurabuitaki ni sa vakatulewataka tu na Lotu oqo na Kalou na Tamada kei na Luvena, o Jisu Karisito ena sala vakaturaga ka lagilagi” (“iVakatakilakila ki na Lotu, iVakatakilakila ki na Noda Bula,” Liaona, Me 2018, 96). Na cava o vakila ni so vei ira na cakamana oqo? Na veivuke cava vua na iVakabula o rawa mo solia me vakayacori kina?
Na cava o vulica me baleta na vakabauta kei na cakamana mai na veika era sotava na Yalododonu mai Samoa, Toga, Viti, kei Taiti ena gauna erau sikovi rau kina o Peresitedi kei Sisita Nelson? (raica na Russell M. Nelson, “Sa Tucake tale ko Karisito; Na Vakabauti Koya ena Tosoya na Ulunivanua,” Liaona, Me 2021, 101–4).
Raica talega Ronald A. Rasband, “Raica! Au sa Kalou ni Caka Mana,” Liaona, Me 2021, 109–12; Ulutaga vakosipeli, “Cakamana,” Valenivola Vakosipeli.
Na iVola i Momani kei na iVola Tabu e rau vakadinadinataki Jisu Karisito ruarua.
Me vakabibitaki na veiwekani ena iVolatabu kei na iVola i Momani, me vaka a vakayacora o Moronai, sa rawa mo qitotaka e dua na qito vakaoqo vata kei ira na luvemu: Kerei ira me ra kaya “Veiyalayalati Makawa, Veiyalayalati Vou” ni o taura cake e dua na ilavelave ni iVolatabu kei na “Dua Tale na Veiyalayalati” ni o taura cake e dua na iVola i Momani. E rawa talega ni o digitaka e vica na ka a yaco ka vakadinadinataka na iVola Tabu kei na iVola i Momani—me vaka na sucu i Jisu, mate, kei na Tucaketale—ka sureti ira na luvemu me ra vaqara na iyaloyalo ni veika oqo (me vakataka, ena iVola ni iYaloyalo Vakosipeli).
Me vukei ira na luvemu me ra vulica na ikawalu ni yavu ni vakabauta, sa rawa mo vola na vosa yadua ena veitiki ni pepa duidui. Sureti ira na luvemu me ra cakacaka vata me ra tuva vakadodonu ka tokaruataka vakavica.
Au rawa ni maroroya na ivakaro kevaka mada ga au galili voli.
Na ivakaraitaki nei Moronai e rawa ni vakauqeti ira na luvemu me ra talairawarawa ki na ivakaro ni Kalou ena gauna mada ga era galili kina. Ni o wilika oti na Momani 8:1–7 vata kei ira, sa rawa ni ra wasea na veika era na vakila ke o ira o Moronai. Ena tikina e 1, 3, kei na 4, na cava a vakaroti kina o Moronai me cakava, kei na sala cava a talairawarawa kina? Me da vakataki Moronai vakalevu vakacava beka?
E rawa beka vei iko kei ira na luvemu me ra veivosakitaka na ituvaki me ra digitaka kina na dodonu kei na cala ni sega ni dua e sarava tiko. Ena vukei keda vakacava na noda vakabauti Jisu Karisito na ituvaki duidui vakaoqo? E dua na sere me vaka na “Me da Dina” (Nodra iVolanisere na Lalai, 81) e rawa ni vakuri ki na veivosaki oqo.
O na gadreva beka mo vakamacalataka vei ira na luvemu ni cakamana e dua na ka e cakava na Kalou me vakaraitaka na Nona kaukauwa ka vakalougatataka na noda bula. Mo qai wilika na malanivosa eso mai na Momani 9:11–13, 17 e vakamacalataka eso na cakamana ni Kalou, ka rawa ni ra vakasamataka na luvemu eso tale na cakamana (iyaloyalo mai na iVola ni iYaloyalo Vakosipeli, me vaka na naba 26, 40, 41, kei na 83, e rawa ni veivuke). Veivosakitaka na cakamana sa vakayacora na Kalou ena nomu bula.
Vakaraitaka vei ira na luvemu e dua na icakacaka ni kakana, ka veivosakitaka na cava ena yaco kevaka o biuta tani e dua na iwali bibi. Wilika vata na Momani 8:24 kei na 9:20–21 me kunei kina na “gacagaca” e rawa ni veimuataki ki na cakamana mai vua na Kalou.
Me baleta na vakasama tale eso, raica na ilavelave ni vula oqo ena mekasini ni iTokani .
iVakatakilakila
Raibaleta o Moronai na nodra vakarusai na Nifaiti
Raibaleta o Moronai na Nodra Vakarusai na Nifaiti, mai vei Joseph Brickey