Ni da rogoca ena nodra vakayagataka na tamata na vosa qo me vakataka na mataqali i Isireli, o na vakila me vaka era tukuna tiko vei iko? O ira na Nifaiti kei na Leimanaiti era kawa dina i Isireli, “e dua na tabana ni vunikau ni Isireli,” ia era vakila ni ra “yali mai na yagona” (Alama 26:36; raica talega na 1 Nifai 15:12). Ia ena gauna e a rairai na iVakabula vei ira, e vinakata me ra kila ni ra sa sega ni yali mai vei Koya. “Dou sa lewe ni mataqali i Isireli,” e kaya o Koya, “Ia dou sa tamata ni veiyalayalati” (3 Nifai 20:25). Ena rawa me kaya vakaoqo o Koya vei iko nikua, vei ira kece era sa papitaiso ka veiyalayalati vata kei Koya e lewena talega na mataqali i Isireli, “ni veiyalayalati.” Se me dua tale na kena vosavosataki e tukuna o Jisu vei ira na mataqali i Isireli, koya sa tukuni kemuni tiko. Na ivakaro me vakalougatataki ”na veimataqali kecega e vuravura” e nomuni (3 Nifai 20:27). Na veisureti mo “yadra tale, ka daramaka na nomu kaukauwa” e nomuni (3 Nifai 20:36). Kei na nona yalayala talei, “Ena sega ni takali mai vei iko na noqu loloma, kei na noqu veiyalayalati ni noqu sautu me yavalati,” e nomuni (3 Nifai 22:10).
Ena iotioti ni gauna, ena vakayacora e dua na cakacaka levu ka talei na Kalou.
Ena 3 Nifai 20–22, a parofisaitaka na iVakabula na nodra veisiga ni mataka na Nona tamata ni veiyalayalati (raica na 3 Nifai 20:30–32, 39–41; 21:9–11, 22–29). Ni o wilika na veitikina oqo, nanuma na veika a tukuna o Peresitedi Russell M. Nelson: “Eda sa maliwai ira na tamata ni veiyalayalati ni Turaga. Sa noda na madigi meda vakaitavi kina vakatamata yadua me vakayacori kina na veiyalayala oqo. Sa dua na gauna talei meda bula donumaka!” (“Nodra Vakasoqoni Vata na Isireli era sa Veiseyaki Tu,” Liaona, Nove. 2006, 79). Na parofisai cava beka e taleitaki sara vei iko? Na cava o rawa ni vakayacora mo vukei ira kina?
Vakaraica na vei vosa kei na malanivosa veivakauqeti. O na raica kina ni so na vosa kei na malanivosa ena ivolanikalou ena uqeti iko, e vaka ni ra a volai me baleti iko sara ga. Raica mo toqai ira ena nomu ivolanikalou se volai ira ena nomu ivola ni veisiga.
Sa yalololoma na Kalou vei ira era sa lesu tale yani Vua.
Ena 3 Nifai 22 kei na 24, a cavuta na vosa na iVakabula mai vei Aisea kei Malakai ka sinai tu ena iyaloyalo kei na ivakatautauvata matata—na qilaiso ena bukawaqa, siliva savasava, vakamau, na katubaleka kei lomalagi (raica na 3 Nifai 22:7–8, 10–17; 24:10–12, 17–18). Na cava e vakavulica vei iko na veivakatauvatani oqo me baleta na veimaliwai ni Kalou kei ira na Nona tamata—kei na Nona veimaliwai kei iko? Sa vakayacori vakacava na iyalayala ena veiwase oqo ena nomu bula se na bula ni nomu matavuvale?
Na volai ni veika vakayalo e rawa ni vakalougatataka noqu matavuvale.
Na cava e vakauqeti iko me baleta na nona veimaliwai na iVakabula kei Nifai ena 3 Nifai 23:6–13? Kevaka e mai vakadikeva na iVakabula na ivola tukutuku eda maroroya tu vakavuvale, na taro cava beka ena taroga o Koya vei keda? Na veika bibi cava soti se veika vakayalo e dodonu mo vola? Na cava na vuna e bibi kina me vakayacori vakakina? (raica na 3 Nifai 26:2).
E vinakata na iVakabula me da vakasaqaqara ena ivolanikalou.
Ni o wilika na 3 Nifai 20:10–12; 23; 26:1–12, vakasamataka vakatitobu na veika e vakila na iVakabula me baleta na ivolanikalou. Kena ivakaraitaki, na cava na duidui ni vakasaqaqara ena ivolanikalou kei na noda wilika wale tu ga? (raica na 3 Nifai 23:1).
Na saumi ikatini e dolava na katubaleka kei lomalagi.
Era sa dau vakaroti tu ga na tamata ni Kalou me ra sauma na ikatini (raica Nai Vakatekivu 14:17–20; Malakai 3:8–11). Ni o vulica na 3 Nifai 24:7–12, vakasamataka na vuna e kerei ira kina na Nona tamata na Kalou me ra sauma na ikatini. Na veitaro oqo e rawa ni dusimaka na nomu vuli:
Na cava na lawa ni ikatini? Raica na Vunau kei na Veiyalayalati 119. Na “kauwai” ena ivakatakila oqo e kena ibalebale na ilavo. O ira kece na lewenilotu era rawa ilavo e dodonu me ra sauma na ikatini. E duidui vakacava na ikatini mai na veimataqali isolisoli tale eso?
Na cava na inaki ni ikatini? E rawa ni o kunea e dua na lisi vakatikina ena Ulutaga Vakosipeli, “iKatini ”(Gospel Library). Ena sala cava soti o sa vakalougatataki kina baleta ni ra dau sauma na ikatini na lewe ni Lotu?
Na veivakalougatataki cava e lako mai vei ira na tamata era bulataka na lawa ni ikatini? Raica na 3 Nifai 24:7–12). E rawa ni o raica eso e vakamacalataki ena itukutuku nei Elder David A. Bednar “Na Katubaleka ni Lomalagi” (Liaona, Nove. 2013, 17–20). Raica, vakauasivi, na veivakalougatataki e sega ni ilavo vakarautaki. O sa raica vakacava ena nomu bula na veivakalougatataki oqo?
Sa rawa talega mo sarava na vidio “Vakavulica o Jisu na iLavo ni Yada” (Valenivola ni Kosipeli), se wilika na Marika 12:41–44. Na cava na ibalebale ni ka oqo vei iko?
A talai Ilaija na Turaga me vagolea na yaloqu vei ira na noqu qase e liu.
Ena noda gauna, sa “vagolei na yaloda vei ira na noda qase” ena cakacaka ni valetabu kei na tuva kawa. E sa vakalougatataki iko vakacava na kilaka oqo? Ni o wilika na 3 Nifai 25:5–6 kei na Vunau kei na Veiyalayalati 110:13–16, vakasamataka vakatitobu na vuna e tiki bibi kina ni ituvatuva ni Kalou oqo.
Au rawa ni vakasaqaqara vagumatua ena ivolanikalou.
Na ivakaro ni iVakabula ena 3 Nifai 23 e vakaraitaka na bibi ni ivolanikalou ki Vua. Me vukei ira na luvemu mera raica oqo, sa rawa mo wilika i cake na 3 Nifai 23:1, 5 ka kerei ira me ra vakarogoca e dua na vosa sa tokaruataki vakatolu. E duidui vakacava na vakasaqaqara mai na wilika walega?
Ena rawa beka vei iko kei ira na luvemu mo ni vola e dua na tiki ni ivolanikalou taleitaki ka vunitaka. Mo ni qai veivukevuke ena kunei ni ivolanikalou vunitaki, wilika vata, ka veivosakitaka na vuna e vakaibalebale kina na veitikina oqo.
Na saumi ikatini e dolava na katubaleka kei lomalagi.
Vukei ira na luvemu me ra vakasaqaqara ena 3 Nifai 24:8–12 me ra kunea na sala me vakacavari kina na iyatuvosa oqo: Kevaka au sauma na ikatini, ena . .. Wasea e dua na ka o sa vakalougatataki kina baleta ni o a sauma na ikatini. Kevaka ena veivuke, navuca mo vola e vica na ilavo ka vukei ira na luvemu me ra cakacakataka na levu ni ikatini (10 na pasede) me soli kina na levu ni ilavo yadua.
Na tabana ni itaviqaravi ena macawa oqo e rawa ni vukei ira na luvemu me ra veivosakitaka eso na sala e dau vakayagataka kina na Turaga na ikatini me vakalougatataki ira kina na lewe ni Nona Lotu. Kerei ira na gone me ra droinitaka na iyaloyalo (se raica na iyaloyalo ena mekasini ni Lotu) ni sala eso e vakalougatataka kina na Lotu na ikatini.
Na Tamada Vakalomalagi e vinakati au meu vulica baleti ira na noqu qase.
O na vakauqeti ira vakacava na luvemu mera vakasaqara ka vulica na veika baleti ira na nodra qase e liu? O na vakauqeti ira vakacava na luvemu me ra cakava na cakacaka vakalotu baleti ira na nodra qase e liu ni ra sa qase cake? Sa rawa mo vukei ira mera vakasaqara ena 3 Nifai 25:5–6 mera kunea e dua na ka me yaco ena iotioti ni gauna. O ira na gone sobu e rawa ni ra biuta na ligadra e utodra ena veigauna era rogoca kina na vosa “uto” ni o wilika na veitikina oqo. Sa rawa talega mo wilika na sala a vakayacori kina na parofisai oqo ena Vunau kei na Veiyalayalati 110:13–16 (raica talega na iVola ni iYaloyalo Vakosipeli, naba 95). Tukuna vei ira na luvemu me baleta na sala sa vuki kina na yalomu vei ira na nomu qase e liu. Me ivakaraitaki, e rawa ni o wasea e dua ga na ka o sa sotava ena nomu vulica na veika baleti ira na nomu qase e liu ka cakava na cakacaka vakalotu ni valetabu me baleti ira.
Vukei ira na gone me ra vakalewena ena dua na vunikau ni matavuvale na yacadra nodra itubutubu kei na tukadra-budra. Na italanoa cava so o rawa ni wasea me baleta e dua vei ira na nomu qase e liu? Vakaraitaka na iyaloyalo ke rawa. Sa rawa talega mo ni lagata vata na “Matavuvale Me Tawamudu Tu” (Nodra iVolanisere na Lalai,98) ka veitalanoa kei ira na luvemu me baleta na vuna e bibi kina na matavuvale ena ituvatuva nei Tamada Vakalomalagi.
Me baleta na vakasama tale eso, raica na ilavelave ni vula oqo ena mekasini ni iTokani .
iVakatakilakila
O Jisu sa wilika na kedra itukutuku na Nifai vei Nifai