Aramwa te Ataei e kabwarabwara

Aramwa te Ataei ngke e kabwarabwara,, iroun Gary L. Kapp

Tuun 3–9: “A Teimatoa man Aki Kamwaingaki”

Motiaea 29–Aramwa 4

Tabeman a na kona n noori ana babaire te Uea Motiaea n onoi mwiia ueea ma aia taan moti aika rineaki bwa ti te tamaroa ae wanawana. Ma nakoia Nibwaite, riki nakoia naake a maeka iaan ana babaire te Uea Noa, iai mwiin te bitaki n tamnei aei ae kakaawaki naba. A tia n nooria bwa e kanga te uea ae aki raoiroi ni kakorakorai nanoia ana aomata, ao a “rangin ni korakora nanoia” ni kani kainaomataaki man te kairoro anne. Te bitaki aei e na kariaia bwa a na bon bukintaeka ibukin raoiroia ao ni “bukinaki ibukin oin [aia] bure” (Motiaea 29:38).

Ni bon koauana, tokin aia tautaeka ueea tiaki nanona bwa tokin te kangaanga n aia botanaomata Nibwaite. Aomata aika taan kamwane n aron Neooa ao Ameriti a boutokai iango aika kewe, naake akea aia onimaki a bwainikiriniia aomata Aika Itiaki, ao a mwaiti kaain te Ekaretia aika a bwaina te kamoamoa ao a kitana te ekaretia. E ngae n anne “taan iriira te Atua aika nanorinano” a tiku n “teimatoa man aki kamwaingaki” n aki tabe n te bwai ae riki irarikiia (Aramwa 4:15; 1:25).

Iango ibukin Reiakinana n te Mweenga ao n te Taromauri

Motiaea 29:26–27; Aramwa 2:1–7

I kona n riki bwa te tia kairoro ae tamaroa n au kaomiuniti.

Ti nimaua te ririki n aia tautaeka taan moti, e riki te kangaanga are e na kataa ana taeka Motiaea ae bwanaia aomata a na rinea te bwai ae eti n tainako (taraa Motiaea 29:26). Kamatebwaia Aramwa 2:1–7 ni kakaea bwa tera ngkoa te kangaanga ao tera ae a karaoia tenaan Nibwaite ibukina. Tera ae e na kona n tia n riki ngkana “kaain te ekaretia” aki kaota bwanaia? Tera riki te bwai ae ko reiakinna man te rongorongo aei bwa e kanga te Uea n tangiriko bwa ko na rangi n ibuobuoki ma am kaomiunitii? (taraa naba Motiaea 29:26–27).

Tera kaangaanga aika kakaawaki aika e rinanona ami kaomiuniti? Iangoia bwa ko na kanga ngkoe, n aroia Nibwaite, ni kona ni kakoaua bwa a karinaki bwanami inanon “bwanaia aomata.” Tera kawai tabeua riki aika ko kona ngkoe, ae te tia iriira Iesu Kristo, ni kairoroa am kaomiunitii ibukin karaoan te raoiroi?

Taraa naba Dallin H. Oaks, “Tangiriia am Kairiribai,” Riaona, Nobembwa. 2020, 26–29.

Aramwa 1

E kona ana taeka te Atua ni buokai ni kinai reirei aika kewe.

E ngae ngke e teimatoa Neooa ni kaotia bwa te bwai are e reirei iaona bon te kewe, e teimatoa ana reirei n anai nanoia Nibwaite inanon ririki aika mwaiti. Bukin tera n am iango aomata a tangira ana reirei Neooa? N Aramwa 1:2–6, taratarai bwaai aika kewe n ana reirei Neooa—ao koaua aika e kabonganai ni karabai bwaai aika kewe aikanne.

Kiteon e tei ni kaitara Neooa ni kaetia “ma ana taeka te Atua” (Aramwa 1:7, 9). Aikai tabeua katooto aika aki kariaia ana reirei Neooa aika kewe: Mataio 7:21–23; 2 Nibwaai 26:29–31; Motiaea 18:24–26; ao Ereman 12:25–26. Kataia ni koroi ni kakimototoi n tatabeua nako taeka man koroboki aika tabu. Tera ae ko a tia n reiakinna mairouia burabeti aika maiu aika aki butimwaai reirei aika kewe n ara bong?

Aramwa 1:19–31; 4:6–15

Ana taan reirei ni kaoaua Iesu Kristo bon “taan iriira te Atua aika nanorinano.”

Mwakoro 1 ao 4 n Aramwa a kabwarabwarai taai ngke e kaubwai te Ekaretia, ma a kaeka kain te Ekaretia nakon te kaubwai anne n ae kaokoro ni kaineti ma aroia. Te katooto, kabotaua Aramwa 1:19–30 ma Aramwa 4:6–15 n taraia bwa a kanga kaain te Ekaretia ni bitaki inanon ti tabeua te ririki. Ni boboto iaon te bwai ae ko warekia, a kanga aia namakin taan iriira ni koaua Iesu Kristo ibukiia aomata aika a kaokoro aia koaua? Tera kateia taan iriira ni koaua Kristo nakoia aika kaubwai ao n nakoraoi aroia? Tera ae ko namakinna bwa ko na kona iai ni bita kateim?

Kabotauan booki aika tabu nakoim. Iangoia bwa a na kanga karaki ao reirei man booki aika tabu ni kaineti nakon maium. Te katooto, ko kona ni kunei baika a titebo imarenan kangaanga aika ko noori n te bong aei ao n aia kaangaanga Nibwaite ake a kaitarai n Aramwa 1–4.

te kanikina ibukin te tieminari

Aramwa 4:6–20

Au banna ni katooto ao au kakoaua a kona ni bitii naano.

Tao ko kona ni kairekerekea ma te nanokawaki are e namakinna Aramwa ngke e noora te bwai ae riki irouia ana aomata. Tarai kangaanga aika e noori n Aramwa 4:6–15. Ko a tia n noori kangaanga n aron aikai? Tao ko raraoma iroun temanna ae ko tangiria ae e kaitara ma kangaanga aikai. Ko a tia n iangoia bwa tera te ibuobuoki ae ko kona ni karaoia?

Tabeman a kona ni kangai ngkai Aramwa, te tia moti ae rietata, bon te kabanea n tamaroa n aomata ae kona ni buokii kangaanga aikai. Ma e kakoaua Aramwa bwa iai te kawai ae nakoraoi riki. Ngkana ko wareki kiibu 16–20, tera ana kawai ae anaa nanom ni buokiia ana aomata?

Iai ana onimaki Aramwa ae korakora n ana taeka te Atua ao “te koaua ae itiaki” (kibu 19). Tera katooto aika ko a tia n noori ni mwaakan te koaua ae itiaki? Ngkana ko iangoi kawai riki aika kakaokoro ko kona n tibwaua am kakoaua iroun Iesu Kristo ao Ana euangkerio, ko na bae ni manga wareka Aramwa 4:6–14. Tera aia mwakuri kaain te Ekaretia n kiibu aikai ae a kaota iai aia kakoaua iroun Iesu Kristo ao Ana reirei? Tera ae ko nooria mai imwiin aia mwakuri—bon iaoia ao iaoia tabeman? Ko kona naba n iangoi kawai aika ko a tia ni kakabwaiaki iai man koaua aika itiaki mairouia aomata riki tabeman, bwa a tibwauaaki rinanon taeka ke mwakuri.

Iangoi kawai aika ko kona iai n tibwaua am kakoaua iroun Iesu Kristo—n taian taeka ke n taian mwakuri. Antai ae na kabwaia man am kakoaua?

Taraa naba Gary E. Stevenson, “Karikirakean ao Tataekinan Am Koaua,” Riaona, Nobembwa 2022, 111–14; “Testimony,” Anene n Taromauri, nambwa 137; “Alma the Younger Steps Down as Chief Judge” (witeo), Gospel Library; Gospel Topics, “Revelation,” Gospel Library.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Aramwa 1:2–9

E kona n ibuobuoki te Uea ni kinai reirei aika kewe.

• Teuana te kawai ni kamatebwaia Aramwa 1:2–4 ma am ataei bon man buokaia ni karaoa te kamwaninga ae koaua-ke-kewe ni kabongana te rongorongo are e reiakinaki iroun Neooa, te tia reirei ae kewe. Ngkanne ko kona ni maroroakinna ma ngaia bukina ngkai e aki toki Tatan ni kairekerekei koaua ma reirei aika kewe. Buokiia am ataei bwa a na iangoi tabeua katooto. Inanon kiibu 7–9, e kanga Kiteon ni kaitarai ana kewe Neooa? (Taraa naba “Mwakoro 20: Aramwa ao Neooa,” Karaki n Ana Boki Moomon, 54–55.)

Aramwa 1:19–25

Ngkai ngai kaain Ana Ekaretia Iesu Kristo, I tangiria ao ni kan beku ibukiia tabeman.

• Tabeman kaain Ana Ekaretia te Uea n ana bong Aramwa a mwamwannano ao n angaanga, ao tabeman membwa akea aia nanoanga ao a kainikatonga. N te aro bwa ko na buokiia n reireiniia am ataei man taneiai aikai, kam kona ni bootaki ni wareka Aramwa 1:27, 30 ao koroi ni karinani aeka n aomata aika a buokaki irouia kaain ana Ekaretia te Uea. Antai ae ti ataia ae na “[bae] ni kainnanoa” (Aramwa 1:30) ara tangira ao ara ibuobuoki? Kam kona aba ni bootaki n anenea te kuna ae taekan te tangira ao te ibuobuoki, n aron “Kindness Begins with Me” (Aia Boki n Anene Ataei, 145), ao buokiia ataei n iangoi aia kai ae a na kaairia ma kunaia.

• Tera ae ti na karaoia ngkana akea aia tangira aomata nakoira? Iangoia ni wareware ma am ataei bwa a kanga aroia taan iriira Kristo n Aramwa 1:19–20. Maroroakinna bwa a kanga ni kaeka nako iai n kiibu 22 ao 25. Tao ko kona ni kataneiaiko ni kaeka nakoia aika akea aia tangira.

Aramwa 4:8–20

Au kakoaua e kona ni kakorakoraia tabeman.

• N taainako ana “koaua ae itiaki” (Aramwa 4:19) te ataei e kona n iai mwiina ae korakora iaoia tabeman. Ni buokiia am ataei ni karekea aei, ko kona ni warekia mangaia Aramwa 4:8–12, 15, ni buokiia n atai kangaanga aika riki n te Ekaretia. Tera ae kona ni karaoia Aramwa ni buoki kangaanga aikai? Buokiia ni kakaea te bwai ae iangoia Aramwa ni karaoia n Aramwa 4:16–20. Tao ko kona n tibwauaia imarenami bwa e kanga ana kakoaua temanna iroun Kristo n tia ni kakorakorako.

• Ngkana a kainnanoi katooto am ataei bwa tera te kaoti koaua, iangoia ni kaota te witeo kiribi ae oti iai tamnein te tia taetae temanna n te maungatabu ni kabuta ae kaota ana kakoaua. Ko kona naba ni kabongana te iteraniba n te waaki ni kakukurei n te wiiki aei ke bootaki n anenea te anene n aron “Testimony” (Anene n Taromauri, nambwa 137). Tera ae ti reiakinna ibukin kakoaua man bwaai n ibuobuoki aikai? Kariaia am ataei bwa a na kataneiaia n tibwauai aia koaua.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Nibwaite a buakaniia Ameritinaite

Aramwa ao Ameriti, iroun Scott M. Snow

te iteraniba n te waaki ni kakukurei: Au kakoaua e kona ni kakorakoraia tabeman