Te Ari’i Beniamina e ha’api’i ra i tōna mau ta’ata

Te fāri’ira’a i te mau ha’api’ira’a a te Ari’i Beniamina, nā Maria Alejandra Gil

22–28 nō ’Ēperēra : « ’Ia fa’a’īhia i te aroha i te Atua ’e i te mau ta’ata ato’a ho’i »

Mosia 1–3

’Ia fa’aro’o ana’e ’outou i te ta’o ra Ari’i, e mana’o ’outou i te mau torōna, te mau tāvini ’e te mau terōno. I roto i te Mosia 1–3, e tai’o ’outou nō te tahi atu huru ari’i. ’Aita te Ari’i Beniamina i ora i ni’a i te mau ’ohipa o tōna mau ta’ata, ’ua « ’ohipa rā ’oia i [tōna] iho nā rima » (Mosia 2:14). ’Aita ’oia i fa’atāvini iāna, ’ua tāvini rā ’oia i tōna mau ta’ata « ma te mana ato’a, ’e te hina’aro ato’a, ’e te pūai ato’a ho’i tā te Fatu i hōro’a mai [iāna] ra » (Mosia 2:11). ’Aita teie Ari’i i hina’aro ’ia ha’amori tōna nūna’a iāna ; ’aita, ’ua ha’api’i rā ’oia ia rātou ’ia ha’amori i tō rātou Ari’i i te Ao ra, ia Iesu Mesia. ’Ua māramarama te Ari’i Beniamina ē « o te Fatu Manahope ’o tei fa’atere Ari’i na » (Mosia 3:5), tei pou mai « mai te ra’i mai » ’e tei haere « i rotopū i te ta’ata nei […] ’ia tae te fa’aorara’a i te mau tamari’i a te ta’ata nei, nā roto i te fa’aro’o i tōna ra i’oa » (Mosia 3:5, 9).

Mana’o nō te ’apo i te ha’api’ira’a i te ’utuāfare ’e i te fare purera’a

Mosia 1:1–7

’Imi māite i te mau pāpa’ira’a mo’a

I roto i teie mau ’īrava, a hi’o nāhea te mau pāpa’a parau mo’a i te ha’amaita’ira’a i te mau ta’ata o te Ari’i Beniamina. Nāhea tō ’outou orara’a i te maita’i a’e nō te mea tei ia ’outou ra te mau pāpa’ira’a mo’a ?

ītona nō te séminaire

Mosia 2:10–26

’Ia tāvini au i te ta’ata, tē tāvini ato’a ra vau i te Atua.

’Ia mana’o ’outou, e aha tā te Ari’i Beniamina e parau ’āhani e ui atu ’outou iāna nō te aha ’oia i tāvini ai « ma te mana’o ato’a, te hina’aro ato’a ’e te pūai ato’a ho’i » ? (Mosia 2:11). ’A feruri i te reira ’a tai’o ai ’outou i te Mosia 2:10–26. E aha tā te Ari’i Beniamina i ha’api’i ’o tē fa’auru ia ’outou ’ia tāvini ia vetahi ’ē ma te faufa’a rahi atu ā ? ’Ei hi’ora’a, e aha te aura’a nō ’outou ’ia ’ite ē, ’ia tāvini ’outou ia vetahi ’ē, tē tāvini ato’a ra ’outou i te Atua ? (hi’o Mosia 2:17). ’A ’imi i te fa’aurura’a nō ni’a e nāhea e nehenehe ai ia ’outou ’ia tāvini i te hō’ē ta’ata i teie hepetoma.

Noa atu ā ’ua ’ite tātou ē, e ti’a ia tātou ’ia tāvini ia vetahi ’ē, i te tahi taime, e fa’aruru tātou i te mau tāmatara’a. Te tahi atu rāve’a nō te tuatāpapa i te Mosia 2:10–26 o te hāmanira’a ïa i te hō’ē tāpura nō te mau parau mau tā te Ari’i Beniamina i ha’api’i o tē nehenehe e tauturu ia ’outou ’ia upo’oti’a i ni’a i te mau tāmatara’a o te tāpe’a ia ’outou ’ia tāvini. E aha te mau ’ohipa i tupu tei fa’a’ite ia ’outou ē, e parau mau te mea tā te Ari’i Beniamina i ha’api’i ?

’Ua fa’a’ite mai te Peresideni Joy D. Jones i te hō’ē ’itera’a pūai tei taui i te huru o tōna hi’ora’a i te tāvinira’a ia vetahi ’ē. ’A tai’o nō ni’a i te reira i roto i te « Nōna » (Ensign ’aore rā Liahona, Novema 2018, 50–52), ’e a feruri i te mau rāve’a e roa’a ia ’outou nō te tāvini ia vetahi ’ē. E nehenehe ato’a ’outou e tāpura i te tahi ’e e feruri nāhea te parau poro’i a te peresideni Jones, nā reira ato’a te Mosia 2:17, e nehenehe e fa’auru i te huru o tā ’outou ravera’a i teie mau rāve’a. E nehenehe te hō’ē hīmene mai « ’Ua fārerei pinepine ra vau » (Te mau Hīmene, N° 17 ’aore rā te hō’ē video mai « The Old Shoemaker » (Vaira’a buka ’evanelia) e tauturu ia ’outou ’ia feruri i te tahi atu ā mau mana’o.

Hi’o ato’a i te Mataio 25:40 ; « Te ’ā’amu nō Faith Murray : Te upo’oti’ara’a i ni’a i te ’ati nā roto i te tāvinira’a, » « Tē ha’api’i nei te Ari’i Beniamina nō ni’a i te tāvinira’a i te Atua » (te mau video), Vaira’a buka ’evanelia ; JustServe.org ; Mau parau tumu nō te ’evanelia, « Tāvinira’a, » Vaira’a buka ’evanelia.

piti vahine e tauahi ra

’Ia tāvini au i te ta’ata, tē tāvini ato’a ra vau i te Atua.

Mosia 2:38–41

E tae mai te ʼoaʼoa nā roto i te haʼapaʼoraʼa i te mau faʼaueraʼa a te Atua.

Nāhea ’outou ’ia faʼataʼa i te ʼoaʼoa e tae mai nā roto i te haʼapaʼoraʼa i te faʼaue a te Atua ? Tē vai ra ānei te tahi mau pereota i roto i te Mosia 2:38–41 ’o te tauturu ia ’outou ’ia fa’ata’a ē, nō te aha ’outou e ha’apa’o ai i tāna mau fa’auera’a ?

Mosia 3:1–20

E nehenehe au e riro mai ’ei ta’ata mo’a nā roto i te Tāra’ehara a Iesu Mesia.

’Ua fa’a’ite pāpū te Ari’i Beniamina, mai te tā’āto’ara’a o te mau peropheta, nō Iesu Mesia ’ia ti’a i tōna mau ta’ata ’ia « roa’a te mātarara’a i tā rātou mau hara, ’e ’ia ’oa’oa ma te ’oa’oa rahi » (Mosia 3:13). Teie te tahi mau uira’a e feruri ’a tai’o ai ’outou i te ’itera’a pāpū o te Ari’i Beniamina nō ni’a i te Fa’aora i roto i te Mosia 3:1–20 :

• E aha tā’u e ha’api’i nei i roto i teie mau ’īrava nō ni’a i te Fa’aora ’e tāna misiōni ?

• E aha tā’u e ha’api’i nei i roto i te Mosia 3:18–19 nō ni’a i te aura’a ’ia riro ’ei ta’ata mo’a ?

• Nāhea o Iesu Mesia i te tauturura’a iā’u ’ia upo’oti’a i te hara, ’ia taui i tō’u nātura ta’ata, ’e ’ia riro rahi atu ā ’ei ta’ata mo’a ?

Mosia 3:5–21

« Te Fatu Manahope […] e pou mai mai te ra’i mai. »

E aha te ’aravihi tā te ito uira e hōro’a mai ia ’outou nō te rave ? E aha te ta’a-ē-ra’a i roto i tō ’outou orara’a ’āhani ’aita te reira ? E nehenehe teie mau uira’a e tauturu ia ’outou ’ia feruri i te mana rahi a’e tā te Fa’aora e nehenehe e hōpoi mai i roto i tō ’outou orara’a.

’Ua parau te melahi tei fā i te Ari’i Beniamina ia Iesu Mesia ’ei « Fatu Manahope, » te aura’a ra, tei iāna ra te mana tā’āto’a. E aha tā ’outou e ha’api’i nei i roto i te Mosia 3:5–21 nō ni’a e nāhea te Fa’aora i te fa’a’ohipara’a i te reira mana ? Nāhea ’outou i te ’itera’a i te mana o te Fa’aora i roto i tō ’outou orara’a ’e i roto i te orara’a o te mau ta’ata ’ati a’e ia ’outou ? E aha tā tōna mana e fa’ati’a nei ia ’outou ’ia rave ’e ’ia riro mai ? E aha te ta’a-’ē-ra’a i roto i tō ’outou orara’a ’āhani ’aita te reira ?

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.

Mana’o nō te ha’api’i i te mau tamari’i

Mosia 2:11–18

’Ia tāvini au i te ta’ata, tē tāvini ra ïa vau i te Atua.

• Te ’api fa’a’ana’anataera’a nō teie hepetoma, o te hō’ē hei upo’o ’ōhie tā tā ’outou mau tamari’i e nehenehe e hāmani. Penei a’e tē hina’aro nei rātou e ti’a i ni’a i te hō’ē pārahira’a ’aore rā i te hō’ē pārahira’a tūru’ira’a-’ore ’e ’ia fa’ahua ē, o te Ari’i Beniamina ’a fa’a’ite ai ’outou i te tahi mau mea tā te Ari’i Beniamina i ha’api’i i tōna mau ta’ata, e ’itehia i roto i te Mosia 2–3. E nehenehe ato’a ’outou e fa’a’ite ia rātou i te « Pene 12 : Te Ari’i Beniamina » (Te mau ’ā’amu o te Buka a Moromona, 32–35) nō te hōro’a ia rātou i te hō’ē hi’ora’a nō te mau ha’api’ira’a a te Ari’i Beniamina.

• E riro paha teMosia 2:17 ’ei ’īrava maita’i nō tā ’outou mau tamari’i ’ia ha’api’i mai. E nehenehe ’outou e tauturu ia rātou ’ia fa’ahiti fa’ahou i te tahi mau ta’o i te taime hō’ē. ’Aore rā e nehenehe tā ’outou e pāpa’i i te ’īrava, ma te mau ta’o faufa’a rahi e toe ra, ’e e ani i tā ’outou mau tamari’i ’ia ’imi i te mau ta’o i e toe ra. I muri iho e paraparau i tā ’outou mau tamari’i nō ni’a i te tumu te Atua e hina’aro ai ’ia tāvini tātou te tahi ’e te tahi.

• E nehenehe ’outou e tauturu i tā ’outou mau tamari’i ’ia ’imi i roto i te Mosia 2:11–18 nō te ’ite mai e aha tā te Ari’i Beniamina i rave nō te tāvini ia vetahi ’ē. I muri iho e pāpa’i tā ’outou mau tamari’i i ni’a i te mau ’api parau i te tahi mau rāve’a e nehenehe ai ia rātou ’ia tāvini i te mau melo o te ’utuāfare. E tu’u i te mau ’api parau i roto i te hō’ē fa’ari’i, mai te hō’ē pūtē ’aore rā te hō’ē mōhina, ’ia ti’a i tā ’outou mau tamari’i ’ia rave hō’ē i te mahana tāta’itahi ’e ’ia rave i te reira ’ohipa tāvinira’a nō te hō’ē ta’ata.

E fāna’o te mau tamari’i nā roto i te nā ni’a-noa-ra’a. ’Eiaha e taiā i te nā ni’a-fa’ahou-noa-ra’a te mau ’ātivite e rave rahi taime, nō te mau tamari’i ’āpī iho ā rā. E tauturu te tāpiti-noa-ra’a i te mau tamari’i ’ia ha’amana’o i te mea tā rātou i ha’api’i mai.

mau tamari’i e tūfetu ra i te ’ahu

’Ua ha’api’i te Ari’i Beniamina ē, e nehenehe tātou e tāvini i te Atua nā roto i te tāvinira’a ia vetahi ’ē.

Mosia 2:19–25

Nō ’ō mai tō’u mau ha’amaita’ira’a ato’a i te Metua i te Ao ra ra.

• ’Ua fa’auruhia te tāvinira’a a te Ari’i Beniamina i tōna mau ta’ata nā roto i tōna māuruuru rahi i te Atua. Nāhea ’outou i te fa’auru i te mau mana’o mai te reira i roto i tā ’outou mau tamari’i ? E nehenehe ’outou e tai’o ’āmui i te Mosia 2:21 ’e e ha’amata i te hō’ē tāpura nō te mau ha’amaita’ira’a tā te Metua i te Ao ra i hōro’a mai ia tātou. I muri iho e tu’u atu i ni’a i te tāpura i te tahi atu mau ha’amaita’ira’a tā te mau tamari’i e feruri.

• Teie te hō’ē ha’uti tā ’outou e nehenehe e ha’uti nō te tauturu i tā ’outou mau tamari’i ’ia ’ite i te mau ha’amaita’ira’a a te Metua i te Ao ra. E nehenehe te mau tamari’i e fa’a’ite nā roto i te hō’ē hōho’a o te Fa’aora ’a hīmene ai ’aore rā ’a fa’aro’o ai rātou i te hō’ē hīmene nō ni’a i te ’ā’au mehara (hi’o « ’Ā’au mehara » i roto i te fa’ahorora’a tumu parau nō te Recueil de chants pour enfants). E fa’aea i te hīmene ’e ’aore rā, e tāpe’a i te pehe i te tahi taime, ’e e ani i te tamari’i e tāpe’a ra i te hōho’a ’ia fa’a’ite mai i te hō’ē ha’amaita’ira’a tā rātou e māuruuru nei. ’Ia au i tei pāpa’ihia i roto i te Mosia 2:22–24, nāhea tātou e nehenehe ai e fa’a’ite ē, tē māuruuru nei tātou nō tō tātou mau ha’amaita’ira’a ?

Mosia 3:5–10, 19

E tauturu mai Iesu Mesia iā’u ’ia riro hau atu mai iāna te huru.

• ’Ua parau te hō’ē melahi i te Ari’i Beniamina i te mau parau mau faufa’a rahi nō ni’a i te orara’a ’e i te tau tāvinira’a a Iesu Mesia. Penei a’e e nehenehe ’outou ’e tā ’outou tamari’i e ’imi i te mau hōho’a o te tahi mau ’ohipa i tupu i fa’ahitihia i roto i te Mosia 3:5–10 (hi’o, ’ei hi’ora’a, te Vaira’a hōho’a ’evanelia, te mau nūmera 30, 41, 42, 57, 59). ’A tai’o ai ’outou i te Mosia 3:5–10, e nehenehe tā ’outou mau tamari’i e ’āfa’i i tō rātou rima i ni’a ’ia fa’aro’o ana’e rātou i te hō’ē mea i roto i te mau ’īrava e ’itehia i roto i te hō’ē o te mau hōho’a.

• ’Ua tauturu a’enei tā ’outou mau tamari’i i te fa’aineine i te mā’a ma te fa’a’ohipa i te hō’ē tāpura mā’a ? Penei a’e e nehenehe ’outou e ’āparau i teie ’ohipa i tupu ’e e fa’a’ohipa i te Mosia 3:19 nō te ’ite mai i te hō’ē « rāve’a » nāhea e ti’a ai ia tātou ’ia riro mai ia Iesu Mesia ra te huru. Nāhea Iesu Mesia i te tauturu ia tātou nō te riro mai iāna te huru ?

Nō te tahi atu ā mana’o, ’a hi’o i te ve’a Hoa nō teie ’āva’e.

te porora’a te Ari’i Beniamina i tōna mau ta’ata

Te a’ora’a a te Ari’i Beniamina, nā Jeremy Winborg

’api fa’a’ana’anataera’a : ’Ia tāvini au i te ta’ata, tē tāvini ato’a ra ïa vau i te Atua