« 8–14 nō ’Ēperēra : ‘Tē ’ohipa nei te Fatu ’e tātou.’ Iakoba 5–7, » Mai, pe’e mai—nō te ’utuāfare ’e te fare purera’a : Buka a Moromona 2024 (2024)
« 8–14 nō ’Ēperēra : Iakoba 5–7, » Mai, pe’e mai—nō te utuāfare ’e te fare purera’a : 2024 (2024)
’Ārētōria nō te tumu ’ōlive, nā Brad Teare
8–14 nō ’Ēperēra : « Tē ’ohipa nei te Fatu ’e tātou »
Iakoba 5–7
E rave rahi, e rave rahi ta’ata ’aita ā i fa’aro’o i te ’evanelia a Iesu Mesia. Mai te peu noa atu ’ua teimaha ’outou i te rahi o te ’ohipa nō te ha’aputuputura’a ia rātou i roto i te ’Ēkālesia a te Fatu, e fa’aha’amana’ora’a tāmarū ’ā’au i roto i te ’ārētōria nō te mau tumu ’ōlive i roto i te Iakoba 5 nā te Fatu te ’ō vine. E tuha’a iti noa tāna i hōro’a ia tātou ’ia tauturu mai i roto i teie ’ohipa—tō tātou ’utuāfare, tō tātou mau hoa ’e te tuha’a ta’ata ’ati a’e ia tātou. ’E i te tahi taime, te ta’ata mātāmua tā tātou e tauturu ’ia putuputu mai, ’o tātou iho ïa. E ’ere roa atu rā ’o tātou ana’e i roto i teie ’ohipa, tē ’ohipa nei ho’i te Fatu o te ’ō vine ’e tāna mau tāvini (hi’o Iakoba 5:72). ’Ua ’ite ’e ’ua here ho’i te Atua i tāna mau tamari’i, ’e e fa’aineine ’oia i te hō’ē rāve’a nō rātou tāta’itahi nō te fa’aro’o i tāna ’evanelia, nō rātou ato’a tei pāto’i iāna i te mātāmua ra (hi’o Iakoba 4:15–18). ’E i muri iho, ’ia oti te ’ohipa, e riro te feiā ato’a i « itoito… i te tauturura’a [iāna]… e noa’a te ’oa’oa ia [rātou i’ō iāna ra] nō te [hotu o tāna] ’ō vine » (Iakoba 5:75).
Hi’o ato’a « Te ha’api’i nei Iakoba nō ni’a i te ha’aputuputura’a o ’Īserā’ela » (video), Vaira’a buka ’evanelia.
Mana’o nō te ’apo i te ha’api’ira’a mai i te ’utuāfare ’e i te fare purera’a
’O Iesu Mesia te Fatu o te ’ō vine.
E aura’a tāipe te ’ā’amu o teIakoba 5 . Tē fa’ata’a nei te reira i te mau tumu rā’au ’e te hotu ’e te feiā rave ’ohipa, nō ni’a mau rā i te mau ’ohipa a te Atua e tōna mau ta’ata i roto i te ’ā’amu. Nō reira ’a tai’o ai ’outou i te ’ā’amu tumu, ’a feruri e aha te tahi o te mau mea i roto i te ’ā’amu e nehenehe e fa’aau.
’Ei hi’ora’a, mai te mea e fa’ahōho’a te ’ō vine i tō te ao nei, ’e e fa’ahōho’ara’a te tumu ’ōlive nō ’Īserā’ela (’aore rā te feiā tei rave i te mau fafaura’a e te Atua ; hi’o Iakoba 5:3), e aha tā te mau tumu ’ōlive e fa’ahōho’a nei ? E aha te fa’ahōho’ara’a nō te hotu maita’i ’e te ’ino ? E aha te tahi atu mau tāpa’o tā ’outou e ’ite ra ?
Noa atu ē tē ha’api’i nei te Iakoba 5 nō ni’a i te mau fenua ’e te mau tenetere o te ’ā’amu o te ao nei, nō ni’a ato’a rā ia ’outou ’e tō ’outou orara’a. E aha te mau poro’i tā ’outou e ’ite ra e tano nō ’outou i roto i te Iakoba 5 ?
Penei a’e te mea faufa’a roa a’e o te Iakoba 5 , nō ni’a ïa ia Iesu Mesia. ’A ’imi iāna ’a tai’o ai ’outou. E aha tā ’outou i ha’api’i mai nō ni’a iāna, ’ei hi’ora’a, i roto i te mau īrava 40–41, 46–47 ?
Nō te tahi atu ā mau mana’o nō ni’a ia Iakoba 5, hi’o i te hōho’a iti i te pae hope’a o teie arata’i ha’api’ira’a.
Tē ani mai nei te Fatu iā’u ʼia ʼohipa e ʼōna i roto i tāna ʼō vine.
Te « tahi atu mau tāvini » (Iakoba 5:70) tei pi’ihia i roto i te ’ō vine a te Fatu, o te mau ta’ata ïa mai ia ’outou. E aha te mau parau mau tā ’outou e ’ite ra i roto i te Iakoba 5, te mau ’īrava 61–62 ’e te 70–75, iho ā rā, nō ni’a i te ’ohipara’a i roto i te ’ō vine a te Fatu ? E aha tā ’outou i ha’api’i mai nō ni’a iāna nā roto i te tauturura’a i tāna ’ohipa ?
’Ia tai’o ’outou nō ni’a i te « tau hope’a » e ’ohipa ai te Fatu i roto i tāna ’ō vine, e aha te mea e fa’auru ia ’outou ’e i tō ’outou ’utuāfare ’ia tāvini i te Fatu « ma tō ’outou pūai ato’a » ? (Iakoba 5:71). Penei a’e e nehenehe tā ’outou e feruri i te hō’ē ’ohipa tei tupu nō ’outou iho i reira ’outou i te fāri’ira’a i te ’oa’oa a tāvini ai ’outou i te Fatu o te ’ō vine—’ei hi’ora’a, nā roto i te fa’a’itera’a i te ’evanelia, te tāvinira’a i roto i te hiero, ’aore rā te ha’apūaira’a ia vetahi ’ē. E nehenehe ato’a ’outou e hi’o i te mau hi’ora’a tā Elder Gary E. Stevenson i fa’a’ite mai i roto i tāna a’ora’a « E mea nehenehe mau—te mea ’ōhie roa » (Liahona, Novema 2021, 47–50).
’Ua ha’api’i te Peresideni Russell M. Nelson : « I te mau taime atoʼa e rave ʼoutou i te tahi meaʼo te tauturu i te mau taʼata atoʼa—i nā pae e piti o te pāruru—ʼia tu’u hō’ē ta’ahira’a i mua nō te ravera’a i te mau fafauraʼa e te Atua ʼe te fāriʼiraʼa i tō rātou mau ʼōroʼa faufaʼa rahi nō te bāpetizoraʼa ʼe te mau ʼōroʼa hiero, tē tauturu ra ïa ʼoutou i te haʼaputuputura’a ia ’Īserāʼela. E mea ’ōhie mai te reira » (« Ti’aturira’a nō Ziona » [purera’a nā te feiā ’āpī ’ati ti’a i te ao, 3 nō Tiunu 2018], ChurchofJesusChrist.org). E ha’amata i te hō’ē tāpura nō te mau mana’o nō ni’a i te mea tā ’outou e nehenehe e rave nō te tauturu i te ha’aputuputura’a ia ’Īserā’ela. I roto i tā ’outou tāpura, e aha tā ’outou e mana’o ra e aha tā te Fatu e hina’aro ’ia rave ’outou i teie mahana i roto i tāna ’ō vine ? ’Ia au i te ’īrava 75, nāhea te Fatu i te ha’amaita’i ia tātou nō te tāvinira’a i roto i tāna ’ō vine ?
Hi’o ato’a « Pi’i mai ra te Atua, » Te mau Hīmene, N°.4 ; « Te ’ō ōlive o te Faufa’a Tahito » (video), Vaira’a buka ’evanelia ; Te mau tumu parau o te ’evanelia, « Ha’aputuputura’a ia ’Īserā’ela, » « Anira’a i te mau ta’ata ato’a ’ia fāri’i i te ’evanelia a Iesu Mesia, » « Te ’āmuira’a i roto i te ’ohipa hiero ’e te ’ā’amu ’utuāfare, » Vaira’a buka ’evanelia.
Ha’api’i i te ha’api’ira’a tumu. ’Ia pāpū maita’i ē, tē fa’atumu nei tā ’outou mau tāu’ara’a parau i ni’a i te ha’api’ira’a tumu niu i roto i te mau pāpa’ira’a mo’a. E nehenehe ’outou e rave i te reira nā roto i te tai’ora’a ’āmui i te mau pāpa’ira’a mo’a ’e i muri iho, te fa’a’itera’a i te tahi e te tahi i te mau parau mau tā ’outou i ’ite mai, ’oia ato’a te mau ’ohipa i tupu nō te orara’a i te reira mau parau mau.
E haʼamanaʼo te Fatu i tōna nūnaʼa ma te here ʼe te aroha.
Hōʼē auraʼa nō te taʼo ʼati atu ʼo te ʼāpitiraʼa atu ïa i te tahi mea ma te pāpū, ma te piri roa ʼe ma te ’āueue ʼore. Nāhea terā tātarara’a i te fa’auru i tō ’outou hāro’aro’ara’a i te Iakoba 6:4–5 ? I roto i te ’ā’amu o te tumu ’ōlive, nāhea tō te Fatu o te ’ō vine torora’a i tōna « rima aroha » ? (hi’o, ’ei hi’ora’a, Iakoba 5:47, 51, 60–61, 71–72). Mea nāhea tōna ravera’a i te reira nō ’outou ?
E nehenehe tā’u e ti’a pāpū ’ia fa’ati’o ana’e vetahi ’ē i tō’u fa’aro’o.
Pinepine te ’ohipa i tupu i ni’a i te ’āti Nephi e Serema i te tupu i teie mahana : tē tāmata nei te ta’ata i te ha’amou i te fa’aro’o i te Mesia. E mea nāhea tō Iakoba pāhonora’a atu i te ’arora’ahia tōna fa’aro’o ? E aha tā ’outou e ’apo mai nā roto mai i tāna mau pāhonora’a ? E aha tā ’outou e nehenehe e rave i teienei ’ei fa’aineinera’a i te mau taime e fa’ati’ohia ai tō ’outou fa’aro’o ?
Hi’o ato’a Jeffrey R. Holland, « Te ho’o—’e te mau ha’amaita’ira’a—nō te ti’ara’a pipi, » Ensign ’aore rā Liahona, Mē 2014, 6–9 ; « Sherem Denies Christ » (video), Vaira’a buka ’evanelia.
Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā āpī nō teie ’āva’e.
Mana’o nō te ha’api’i i te tamari’i
Tē māna’ona’o nei te Fatu i tōna mau ta’ata.
-
Nāhea ’outou e nehenehe ai e fa’a’ite i te parabole nō te mau tumu ’ōlive ’ia ti’a i tā ’outou mau tamari’i ’ia hāro’aro’a ? Hō’ē rāve’a, ’o te haerera’a ïa nā rāpae nō te hi’o i te hō’ē tumu rā’au ’e ’ia hi’o poto noa i te mau tuha’a tumu o te ’ā’amu. E aha tā te Fatu o te ’ō vine i rave nō tāna mau tumu rā’au ? Nāhea tātou e nehenehe ai e riro mai te mau rave ’ohipa i roto i te ’ā’amu ’e ’ia tauturu ia vetahi ’ē ’ia ’ite i te here o te Fa’aora ?
-
’Ua fa’a’ite ’o Iakoba i te parabole nō te mau tumu ’ōlive nō te ani i tōna mau ta’ata ’ia haere mai i te Mesia. E nehenehe te reira e tupu ato’a i ni’a i tā ’outou mau tamari’i. Penei a’e e nehenehe ’outou e ha’apoto i te ’ā’amu e te mau ’īrava mai te Iakoba 5:3–4, 28–29, 47, ’e 70–72 (hi’o ato’a « Te ’ō ’ōlive o te Faufa’a Tahito » [video], Vaira’a buka ’evanelia). Muri iho e nehenehe ’outou ’e tā ’outou mau tamari’i e tai’o i te Iakoba 5:11, 41,47, ’e 72, ma te ’imi i te mau mea e fa’a’ite ra ē tē ha’ape’ape’a ra te Fatu o te ’ō vine (Iesu Mesia) nō te mau tumu rā’au. E aha tā te Fa’aora e rave nei nō te fa’a’ite ē, tē ha’ape’ape’a nei ’oia nō tātou ?
Tē here nei te Metua i te Ao ra iā’u ’e e fa’a’ore ’oia i tā’u hara ’ia tātarahapa ana’e au.
-
E poro’i faufa’a rahi tā teIakoba 6:4–5 nō tātou ’ia rave ana’e tātou i te mau mā’itira’a hape. E nehenehe paha ’outou e tauturu i tā ’outou mau tamari’i ’ia ’imi i te reira. E aha te mau parau i roto i teie mau ’īrava e hōro’a nei ia tātou i te tīa’ira’a i roto i te here fa’aora o te Atua ? E nehenehe te ’ā’amu a Elder Allen D. Haynie i roto i tāna parau poro’i nō ni’a i te repo o te vari paruparu i roto i te ’āpo’o « ’Ia ha’amana’o ’o vai tā tātou e ti’aturi » (Liahona, Novema 2015, 121–22) e tauturu. E aha tā teie ’ā’amu ’e tā te Jacob 6:4–5 e ha’api’i mai nei ia tātou nō ni’a i te mea e tītauhia ia tātou ’ia rave, ’ia fa’aorahia tātou i roto i te bāsileia o te Atua ?
E nehenehe au e ti’a nō te mea tā’u i ’ite e parau mau.
-
Nāhea ’outou i te fa’auru i tā ’outou mau tamari’i ’ia ti’a nō te parau mau mai tā Iakoba i nā reira ? E nehenehe tā ’outou mau tamari’i e māta’ita’i i te video « Pene 10 : Iakoba ’e ’o Serema » (Vaira’a buka ’evanelia) ’e ’ia ha’uti i te ’āparaura’a i rotopū ia Iakoba ’e ’o Serema, ma te fa’a’ohipa i te Iakoba 7:1–23 ’ei arata’i. Nāhea Iakoba i te ti’ara’a nō te mea tāna i ’ite ē, e parau ti’a ? ’A ani i te mau tamari’i ’ia fa’a’ite mai i te mau mea tei tupu ’a ti’a ai rātou nō te parau ti’a, ’e ’aore rā, ’a fa’a’ite atu i tō ’outou iho. Penei a’e e nehenehe ato’a tā rātou e hīmene i te hō’ē hīmene o tē fa’a’ite ra i te itoito mai tō Iakoba, mai te « Stand for the Right [Pāruru i te parau-ti’a], » Children’s Songbook [Chant pour les enfants], 159.
Nō te tahi atu ā mana’o, ’a hi’o i te ve’a Hoa nō teie ’āva’e.