li Kristo natijok sa’ Getsemani

Ink’a’ chi’uxmanq li nawaj laa’in, a’ b’an laa waajom laa’at, xb’aan laj Harry Anderson

19–25 febrero: “Aay, k’a’jo’ xnimal lix k’uub’anb’il na’leb’ li qaDios”

2 Nefi 6–10

Ak numenaq 40 chihab’ relikeb’ chaq lix junkab’al laj Lehi aran Jerusalen. Ke’wan sa’ jun ak’ ch’och’ ink’a’ nano ru, q’axal najt rik’in Jerusalen. Ak kikam laj Lehi, ut lix junkab’al ak okenaqeb’ sa’ jun wech’ok-ib’ li taakanaaq chiru k’iila cient chihab’ sa’ xyanqeb’ laj Nefita—“li neke’paab’ank re lix tijom ut lix k’utb’esihom li Dios”—ut eb’ laj Lamanita, li ink’a’ neke’paab’an chi jo’kan (2 Nefi 5:6). Laj Jakob, a’an li riitz’in laj Nefi li k’ojob’anb’il chik anajwan jo’ aj k’utunel chiruheb’ laj Nefita, kiraj naq li tenamit re li sumwank te’xnaw naq maajo’q’e sachenaqeb’ sa’ xch’ool li Dios, jo’kan naq tento naq maajo’q’e taasachq li Dios sa’ xch’ooleb’ a’an. A’an jun esil naqaj ru chi yaal sa’ li kutan a’in (chi’ilmanq Tzol’leb’ ut Sumwank 1:15–16). “Chijultiko’q a’an qe, … xb’aan naq moko tz’eqb’ilo ta. … Nim ru li k’a’ru yeech’i’inb’il xb’aan li Qaawa’,” kixye laj Jakob (2 Nefi 10:20–21). Sa’ xyanqeb’ li yeechi’ihom a’an, maajun reheb’ naxq’ax xnimal ru li “xtojb’al rix li maak li maak’a’ roso’jik” re numtaak sa’ xb’een li kamk ut li xb’alb’a (2 Nefi 9:7). “Jo’kan ut,” chan laj Jakob, “chisaho’q sa’ eech’ool”! (2 Nefi 10:23).

Li na’leb’ re tzolok sa’ li ochoch ut sa’ li iglees

2 Nefi 6–8

Li Qaawa’ a’an aj uxtaan rik’in lix tenamit, ut tixtz’aqob’resiheb’ ru lix sumwank.

Re xtenq’ankileb’ lix tenamit chixtawb’al ru naq okenaqeb’ sa’ lix junkab’al laj Israel ut naru neke’xkanab’ rib’ chiru li Dios ut eb’ lix yeechi’ihom, laj Jakob kixye lix profeetil aatin laj Isaias, li tz’iib’anb’il sa’ 2 Nefi 6–8. Li esil a’an wan ajwi’ choq’ aawe, xb’aan naq eb’ laj Santil Paab’anel sa’ Roso’jikeb’ li Kutan a’aneb’ ajwi’ okenaqeb’ sa’ xtenamit li Dios re sumwank. Nak yooqat chirilb’aleb’ li ch’ol a’in, k’oxlaheb’ li patz’om jo’eb’ a’in:

• K’a’ru nintzol chirix lix rahom li Kolonel choq’ we laa’in? K’a’ruheb’ li aatin malaj ch’ol aatin li neke’xch’olob’ chi us li rahom a’in?

• K’a’ru naxyeechi’i li Kolonel reheb’ li neke’sik’ok re?

• K’a’ chik ru naru tinb’aanu re “royb’eninkil” chi mas tiik wi’chik inch’ool li Kolonel ut eb’ li osob’tesihom kixyeechi’i?

2 Nefi 9:1–26

reetalil li seminario

Li Jesukristo nikinixkol chiru li maak ut li kamk.

Jun na’leb’ re xchamob’resinkil laa b’antioxihom choq’ re li Jesukristo, a’an xk’oxlankil k’a’ raj ru kik’ulman qik’in wi ta maak’a’ a’an. Naq yooqat chirilb’al 2 Nefi 9:1–26, k’oxla xtz’iib’ankil malaj reetalinkil rik’in jun b’onol li taqak’ul raj wi ta maak’a’ lix tojb’al rix li maak kixb’aanu li Jesukristo. Chirix a’an, sa’ jalan chik na’ajej malaj rik’in jalan chik li b’onol, naru nakak’e reetalil li k’a’ru naru taqak’ul sa’ xk’ab’a’ lix tojb’al rix li maak xb’aan li Kolonel. Rik’in li xawil, chan raj ru taach’olob’ k’a’ut naq naqaj ru lix tojb’al rix li maak xb’aan li Jesukristo? K’a’ru nakataw li nakatxmusiq’a chixnimankil ru “lix chaabʼilal xnaʼlebʼ li Dios, li ruxtaan ut li rusilal”? (2 Nefi 9:8).

Rochbʼeen xkʼutbʼal kʼaʼru chi aj-u kooxkol li Jesukristo, laj Jakob kixye ajwiʼ chan ru naq kixbʼaanu. K’oxla xtz’iib’ankil li nakatzol saʼ 2 Nefi 9:11–15, 20–24.

Laj Jakob k’a’jo’ naq sachso xch’ool rik’in lix k’uub’anb’il na’leb’ li Dios re li tojok-ix, jo’kan naq kixye, “Aay, kʼaʼjoʼ xnimal lix kʼuubʼanbʼil naʼlebʼ li qaDios.” K’e reetaleb’ lix yehom sa’ 2 Nefi 9 (lix k’ihaleb’ neke’tawman sa’eb’ li raqal 8–20). K’a’ru nakatzol sa’eb’ li raqal a’in chirix lix k’uub’anb’il na’leb’ li Dios? K’a’ru aanumsihom li xatxtenq’a chireek’ankil li kireek’a laj Jakob? Naq yooqat chi loq’onink ut chi tzolok, k’oxla xsik’b’al jun li b’ich li naxk’ut li nakaweek’a chirix a’an, maare “Jwal nim aawu” (Eb’ li B’ich, 46).

Chi’ilmanq ajwi’ “Donde la Justicia, el Amor y la Misericordia se encuentran,” “Jacob enseña sobre la resurrección” (eb’ li video), Biblioteca del Evangelio; Temas del Evangelio, “Expiación de Jesucristo,” Biblioteca del Evangelio.

2 Nefi 9:7

Maak’a’ roso’jik lix tojb’al rix li maak xb’aan li Kolonel.

K’a’ru naru nakab’aanu re naq mas taataw wi’chik ru li “xtojb’al rix li maak li maak’a’ roso’jik” kixb’aanu li Jesukristo? (2 Nefi 9:7). Naru nakatz’il rixeb’ li k’a’aq re ru chanchan naq maak’a’jo’ rajlankileb’—jo’ li pach’aya’ sa’ jun awimq, li samahib’ chire jun li palaw, malaj eb’ li chahim sa’ choxa. Chan ru naq maak’a’ roso’jik lix tojb’al rix li maak kixb’aanu li Kolonel? Chan ru naq nak’anjelak rik’in li junjunq chi kristiaan? K’a’ruheb’ li ch’ol aatin sa’ 2 Nefi 9 li nakate’xtenq’a chixb’antioxinkil li kixb’aanu li Kolonel choq’ aawe?

2 Nefi 9:27–54

Naru ninchal rik’in li Kristo ut nintaaqe lix k’uub’anb’il na’leb’ li Dios.

Sa’ 2 Nefi 9, laj Jakob kiroksi wiib’ ch’ol aatin li wankeb’ chi ka’pak’al: “li k’uub’anb’il na’leb’ aj uxtaan re li nimla aj Yo’ob’tesinel” ut “li b’alaq’il k’uub’anb’il na’leb’ a’an re li maa’us” (2 Nefi 9:6, 28). Naru nakayiib’ xjalam-uuch jun b’e, ut taatz’iib’a choq’ xk’ab’a’ Lix k’uub’anb’il na’leb’ li qaChoxahil Yuwa’. Chirix a’an, il 2 Nefi 9:27–52. Sik’eb’ li tijom ut li b’oqom kixk’e laj Jakob re qatenq’ankil chixtaaqenkil li k’uub’anb’il na’leb’ a’in. Tz’iib’a chire li b’e li k’a’ru nakataw. Chan ru naxyal laj Satanas qajalb’ehinkil rik’in lix k’uub’anb’il na’leb’ li Dios? K’a’ru eek’asinb’ilat chixb’aanunkil re xsumenkileb’ lix tijom ut lix b’oqom laj Jakob?

2 Nefi 10:20, 23–25

Lix mayej li Jesukristo naru naxk’e xsahil inch’ool.

Li raatin laj Jakob, a’an jun aatin re sahil ch’oolejil. “Ninye eere li na’leb’ a’in,” chan “re taasaho’q sa’ eech’ool, ut teetaqsi lee jolom chi junelik” (2 Nefi 9:3). Naq nakawil 2 Nefi 10:20, 23–25, k’a’ru nakataw li naxsahob’resi laa ch’ool? K’a’ru taab’aanu re naq te’jultiko’q aawe li k’a’aq re ru a’in naq nach’inan laa ch’ool?

Chi’ilmanq ajwi’ Jwan 16:33; D. Todd Christofferson, “Lix sahileb’ xch’ool laj santil paab’anel,” Jolomil ch’utub’aj-ib’ re octubre 2019; “Jacob insta a los nefitas a reconciliarse con Dios” (video), Biblioteca del Evangelio.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

2 Nefi 9:6–10, 19–24

Li Jesukristo a’an lin Kolonel.

• Chan ru taatenq’aheb’ laa kok’al chixtawb’al ru ut chireek’ankil naq neke’raj ru li Kolonel Jesukristo? Li perel re kok’ k’anjel re li xamaan a’in naru natenq’an. Naroksi jun jaljookil ru aatin chirix jun li jul ut jun li eeb’. Naru nakawoksi 2 Nefi 9:21–22 re aatinak rik’ineb’ laa kok’al chirix laa b’antioxihom choq’ re li Jesukristo.

• Re xtenq’ankileb’ laa kok’al chixtawb’al ru k’a’ut naq naqaj ru li Kolonel, naru nakatzoleb’ chirix li t’ane’k. Naru nakak’ut jun xjalam-uuch laj Adan ut xEva, jo’ Saliendo del Jardín de Edén (Biblioteca del Evangelio), ut jun xjalam-uuch li Jesukristo chiru li krus. Patz’ reheb’ naq te’xch’olob’ k’a’ru yoo chi k’ulmank sa’eb’ li jalam-uuch. Chan ru naq laa’o chanchano laj Adan ut li xEva? Maare 2 Nefi 9:6–10 naru naxtenq’aheb’ chixk’eeb’al reetal k’a’ru naxb’aanu li Jesukristo choq’ qe. Naru nakapatz’ reheb’ laa kok’al naq te’xwotz li neke’reek’a chirix li Jesukristo. Jun b’ich jo’ “Ninnaw naq raab’ilin” (B’ichleb’aal choq’ reheb’ li Kok’al, 42–43) naru natenq’an.

K’ut li yaal rik’ineb’ li seraq’ ut li eetalil. K’e reetal naq eb’ li seraq’ ut li eetalil nakawoksi neke’xk’ut li yaal. Qayehaq, naq nakawoksi li perel re kok’ k’anjel re li xamaan a’in, k’ut naq li Jesukristo ki’ok sa’ li “jul” re qatenq’ankil sa’ li junjunq chi yokb’ re elk chaq chi sa’.

2 Nefi 9:20, 28–29, 42–43, 49

“Lin chʼool nasahoʼ rikʼin li tiikilal.”

• Re xwaklesinkileb’ xch’ool laa kok’al chi “sahoʼk [sa’ xch’ooleb’] rikʼin li tiikilal” malaj chi ab’ink chiru li Qaawa’ rik’in xsahilal xch’ooleb’ (2 Nefi 9:49), naru nakawotzeb’ seraq’ b’ar wi’ naq jun li ch’ina al naxsik’ ru xb’aaunkil li us malaj li ink’a’ us. Patz’ reheb’ li kok’al naq te’xaqliiq naq li k’a’ru nasik’e’ ru naxk’e sahil ch’oolej ut chi chunlaak naq li k’a’ru nasik’e’ ru naxk’e rahil ch’oolej. Ma xqeek’a xsahil qach’ool xb’aan naq xqasik’ ru xtaaqenkil li Jesukristo?

• Laa kok’al te’xnaweb’ ru li kristiaan (malaj ak xe’xnaweb’ ru) li neke’xk’oxla naq maak’a’ xyaalaleb’ lix taqlahom li Qaawa’ malaj naq maak’a’eb’ aj-e sa’ li kutan a’in. Naru nekek’uub’ eena’leb’ chirix li teeye raj re xch’olob’ankil k’a’ut naq sa qach’ool chixpaab’ankileb’ li taqlahom. K’a’ut naq aajel ru naq taqakanab’ qib’ rub’el lix na’leb’ li Dios us ta ink’a’ naqataw ru chi tz’aqal re ru? Naru nakawaklesiheb’ xch’ool chixsik’b’al xtenq’ sa’ 2 Nefi 9:20, 28─29, 42─43 re xk’oxlankileb’ ut xtz’ilb’al rixeb’ li patz’om a’in.

Re xtawb’al xkomon chik li na’leb’, chi’ilmanq li hu Amigos re li po a’in.

li Jesukristo naxk’irtesinkileb’ li kristiaan

Kixk’irtesi naab’aleb’, k’iila paay ruheb’ lix yajel, xb’aan laj J. Kirk Richards

perel re kok’ k’anjel: Li Jesukristo nokoxkol chiru li maak ut li kamk