“19–25 ni Feperueri: ‘A Ka Levu Vakaidina na Nona iTuvatuva na Noda Kalou.’ 2 Nifai 6–10,” Lako Mai, Mo Muri Au—Me Baleta na iTikotiko kei na Lotu: iVola i Momani 2024 (2024)
“19–25 ni Feperueri. 2 Nifai 6–10,” Lako Mai, Mo Muri Au—Me Baleta na iTikotiko kei na Lotu: 2024 (2024)
Kakua ni Yaco na Noqu Lewa, Nomuni Lewa Ga, mai vei Harry Anderson.
19–25 ni Feperueri: “A Ka Levu Vakaidina na Nona iTuvatuva na Noda Kalou”
2 Nifai 6–10
E sa sivia e 40 na yabaki mai na gauna e biuti Jerusalemi kina na matavuvale nei Liai. Era a tiko ena dua na vanua vou duatani, veimama ni dua na vuravura yawa mai Jerusalemi. Sa mai mate o Liai, ka sa tekivutaka na nona kawa na veileti ena lako tu me drau vakacaca na yabaki ena kedra maliwa na Nifaiti—“sai ira era vakabauta na ivakasala kei na ivakatakila ni Kalou”—kei ira na Lemanaiti, era sega ni vakakina (2 Nifai 5:6 Ena veituvaki oqo, e vinakata o Jekope, na taci Nifai ka sa lumuti me ivakavuvuli vei ira na Nifaiti, me ra kila na tamata ni veiyalayalati ni na sega ni guilecavi ira na Kalou, ka sega ni dodonu mera guilecavi Koya. Oqo e dua na itukutuku eda gadreva vakaidina nikua (raica na Vunau kei na Veiyalayalati 1:15–16). “Me da nanumi koya sara, … ni da sa sega ni muduki tani. … Sa cecere sara na yalayala ni Turaga,” e kaya o Jekope (2 Nifai 10:20–21). Ena kedra maliwa na yalayala eso oqori, e sega ni dua vei ira e cecere mai na “veisorovaki tawayalani” me ulabaleta rawa kina na mate kei eli (2 Nifai 9:7). “O koya,” e tinia o Jekope, “me reki kina na lomamudou”! (2 Nifai 10:23).
Vakasama eso ni Vuli ena iTikotiko kei na Lotu
Sa loloma veivueti tikoga na Turaga vei ira na Nona tamata ka na cakava na Nona yalayala.
Me vukei ira na nona tamata me ra kila ni ra kawa talega i Isireli ka rawa ni nuitaka na Kalou kei na Nona yalayala, e cavuta kina o Jekope na parofisai nei Aisea, e volai ena 2 Nifai 6–8 Na itukutuku oqori e baleti kemuni talega, baleta ni o ira na Yalododonu Edaidai era sa tiki talega ni tamata ni veiyalayalati ni Kalou. Ni o wilika na veiwase oqo, vakasamataka na veitaro vakaoqo:
-
Na cava au sa vulica me baleta na nona loloma veivueti na iVakabula me baleti au? Na vosa se malanivosa cava e vakamacalataka vakavinaka sara na loloma oqo?
-
Na vakacegu cava e solia na iVakabula vei ira era vakasaqarai Koya?
-
Na cava e rawa niu cakava meu “waraka” na iVakabula ena yalodina kei na Nona kalougata yalataki?
E vakabulai au mai na ivalavala ca kei na mate o Jisu Karisito.
Dua na sala me titobu kina na noda vakavinavinakataki Jisu Karisito o ya meda vakasamataka na cava beka ena yaco vei keda ke sega o Koya. Ni o wilika na 2 Nifai 9:1–26, sa rawa mo rokataka ena dua ga na roka na veika ena yaco vei keda kevaka e sega na Veisorovaki i Jisu Karisito. Ena dua tale na lisi se na roka, e rawa ni o makataka na veika eda rawa ni ciqoma mai na Veisorovaki ni Vakabula. Mai na veika o sa wilika, o na vakamacalataka vakacava na vuna eda gadreva kina na Veisorovaki i Jisu Karisito? Na cava o sa raica e vakauqeti iko mo vakacaucautaka na “vuku ni Kalou, na nona loloma veivueti kei na loloma soliwale”? (2 Nifai 9:8)
Me ikuri ni nona vakavulica na veika e vakabulai keda kina o Jisu Karisito, a solia talega o Jekope na veivakararamataki me baleta na Nona cakava. Sa rawa mo vola na veika o kunea ena 2 Nifai 9:11–15, 20–24.
A kurabui vakalevu o Jekope ena ituvatuva ni veivueti ni Kalou ka kaya kina, “A ka levu vakaidina na nona ituvatuva na noda Kalou.” Vakaraica na nona kurabui ena 2 Nifai 9 (e vuqa vei ira era kunei ena tikina e 8–20). Na cava o sa vulica mai na veitikina oqo me baleta na ituvatuva ni Kalou? Na cava soti o sa sotava sa vukei iko mo vakila eso na ka a vakila o Jekope? Me tiki ni nomu sokalou kei na vuli, sa rawa mo vaqara e dua na serenilotu e rawa ni vakaraitaka na nomu nanuma me baleti Koya, me vaka na “Noqu Kalou Au Kurabui ka Galu” (Serenilotu, naba 44).
Raica talega na “Where Justice, Love, and Mercy Meet,” “Jacob Teaches of the Resurrection” (vidio), Gospel Library; Gospel Topics, “Atonement of Jesus Christ,” Gospel Library.
Na Veisorovaki ni iVakabula e tawayalani.
Na cava o rawa ni cakava mo kila vinaka cake kina na “veisorovaki tawayalani i Jisu Karisito”? (2 Nifai 9:7). Ena rawa beka ni ra raica se vakasamataka na veika e tawawili rawa—na veico ena dua na rara, na mataninuku e matasawa, se na kalokalo ni lomalagi. E sa tawayalani vakacava na Veisorovaki ni Vakabula? Sa baleta talega vakacava na tamata yadua? Na malanivosa cava ena 2 Nifai 9 e sa vukei iko mo vakavinavinakataka na veika vinaka sa cakava vei iko na noda iVakabula?
Au sa rawa ni lako mai vei Karisito ka muria na ituvatuva ni Kalou.
Ena 2 Nifai 9, a vakayagataka o Jekope e rua na malanivosa kaukauwa ka veibasai: “na nona ituvatuva loloma na Dauniveibuli cecere” kei na “nona inaki qaseqase na vu ni ca” (2 Nifai 9:6,28 E rawa ni o droinitaka e dua na sala ka vakayacana na iTuvatuva nei Tamada Vakalomalagi. Qai vakasaqaqara ena 2 Nifai 9:27–52. Vakaraica na ivakaro kei na veisureti a solia o Jekope me vukea noda muria na ituvatuva oqo. Vola na veika o kunea ena yasa ni sala. E dau tovolea vakacava o Setani me kauti keda tani mai na ituvatuva ni Kalou? Na cava o sa vakila ni ko sa vakauqeti kina mo vakamuria na ivakaro kei na veisureti eso oqo nei Jekope?
Na solibula i Jisu Karisito ena kauta mai vei au na reki.
Na itukutuku i Jekope a ka rekitaki. “Au sa vosataka vei kemudou na veika oqo,” e kaya o koya, “mo dou reki kina, ka laveta cake na ulumudou me sega ni mudu” (2 Nifai 9:3). Ni o wilika na 2 Nifai 10:20, 23–25, na cava o raica e solia vei iko na reki ni yalomu? Na cava o na cakava me rawa ni o nanuma tiko na veika oqo ena gauna o vakila kina ni o sa yalolailai mai?
Raica talega na Joni 16:33; D. Todd Christofferson, “Nodra Reki na Yalododonu,” Liaona, Nove. 2019, 15–18; “Jacob Encourages the Nephites to Be Reconciled with God” (vidio), Gospel Library.
Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.
Vakasama ni Nodra Tuberi na Gonelalai
O Jisu Karisito sa noqu iVakabula.
-
O na vukei ira vakacava na luvemu mera kila vinaka ka vakila ni ra gadreva na iVakabula o Jisu Karisito? Sa rawa ni veivuke talega na tabana ni itaviqaravi ena macawa oqo. E vakayagataka e dua na vosa vakatautauvata rawarawa ni dua na qara kei na ikabakaba. Vakasamataka mo vakayagataka na 2 Nifai 9:21–22 mo vosa vei ira na luvemu me baleta na vuna o vakavinavinakataki Jisu Karisito kina.
-
E dua na sala me ra vukei kina na luvemu me ra kila na vuna eda gadreva kina na iVakabula oya me vakavulici vei ira na veika e baleta na Lutu. E rawa ni o vakaraitaka e dua na iyaloyalo kei Atama kei Ivi, me vaka na Leaving the Garden of Eden (Gospel Library), kei na dua na iyaloyalo kei Jisu Karisito ena kauveilatai. Kerei ira na gone me ra vakamacalataka na ka e yaco tiko ena iyaloyalo yadua. Eda sa vakataki rau vakacava o Atama kei Ivi? E rawa ni vukei ira na 2 Nifai 9:6–10 mera raica na veika e cakava o Jisu Karisito vei keda. Sa rawa mo sureti ira na gone me ra wasea na nodra nanuma me baleti Jisu Karisito. Na sere me vaka na “I Feel My Savior’s Love” (Nodra Sere na Lalai, 74–75) ena veivukei.
Vakavulica na dina ena italanoa kei na ivakaraitaki eso. Raica na italanoa kei na ivakaraitaki o vakayagataka ena nomu vakavulica na dina. Me ivakaraitaki, ni vakayagataki na tabana ni itaviqaravi ena macawa oqo, vakavulica ni o Jisu Karisito e lako mai ki na “qara” me vukei keda ena ikalawa yadua ni sala ni da kaba tani mai.
2 Nifai 9:20, 28–29, 42–43, 49
“Sa rekitaka na lomaqu na ivalavala dodonu.”
-
Me vakayaloqaqataki ira na luvemu me ra “[rekitaka] na lomadra na ivalavala dodonu” se talairawarawa ena reki vua na Turaga (2 Nifai 9:49), e rawa beka ni o wasea na ivakaraitaki eso e cakava kina e dua na gone e dua na digidigi vinaka se digidigi ca. Sureti ira na gone me ra tucake ni digidigi e kauta mai na marau ka dabe sobu ni digidigi e kauta mai na rarawa. Na gauna cava eda sa bau marau kina baleta ni da sa digitaka meda muri Jisu Karisito?
-
E rawa ni ra veimaliwai kei ira na tamata o ira na luvemu (kevaka era se bera) era nanuma ni ivakaro ni Turaga e ka lialia se sega ni veiganiti. Sa rawa vei iko kei ira na luvemu mo ni veivosakitaka na sala me vakamacalataki kina na vuna eda marautaka kina na muri ivunau. Na cava na vuna e bibi kina me da vakabauta na ivakasala ni Kalou kevaka sara mada ga e se bera ni taucoko noda kila? Vakayaloqaqataki ira na gone me ra rai ena 2 Nifai 9:20, 28–29, 42–43 me ra vukei ena kena vakasamataki ka veivosakitaki na taro eso oqo.
Me baleta na vakasama tale eso, raica na ilavelave ni vula oqo ena mekasini na iTokani .
A Vakabula o Koya e Vuqa na Veimataqali Mate, mai vei J. Kirk Richards