Nifai kei na watina

12–18 ni Feperueri: “Keimami sa Bula ena iValavala ni Bula Marau”

2 Nifai 3–5

Ni wiliki na 1 Nifai, o na rawa ni ciqoma na veivakauqeti ni a levu cake mai na bula o Nifai. “Sa tubu levu” vakayago ka vakayalo (1 Nifai 2:16), e vaka me sega ni yavalati rawa mai na veivakatovolei a sotava. Se oqori sara ga na ka eda rawa ni nanuma. E dina ni vakasakiti na vakabauta nei Nifai, na nona vosa malumu ena 2 Nifai 4 e vakatakila ni so mada ga na tamata yalodina era dau vakila na “vakaloloma” ka “vakaleqai vakarawarawa” ena veitemaki. Eke eda raica kina e dua e tovolea tiko, ka vinakata me reki, ia “sa vutugu na yalona ena vuku ni [nona] ivalavala ca.” E rawa ni da sema ki na ka oqo kei na vakanananu nuitaki e tarava: “Ia, au sa kilai Koya kau sa vakararavi Vua” (raica na 2 Nifai 4:15–19).

Ni ra vulica o Nifai kei ira na nona tamata me ra bula “ena ivalavala ni bula marau” (2 Nifai 5:27), era sa vulica talega ni marau e sega ni dau yaco vakarawarawa se sega na gauna ni rarawa. E yaco mai ena noda vakararavi vua na Turaga, “na uluvatu ni [noda] yalododonu” (2 Nifai 4:35).

Vakasama eso ni Vuli ena iTikotiko kei na Lotu

ivakatakilakila ni semineri

2 Nifai 3:6–24

A digitaki Josefa Simici na Kalou me vakalesuya mai na kosipeli.

A wasea o Liai vei luvena o Josefa e dua na parofisai a solia o Josefa mai Ijipita. Na parofisai e baleta e dua na “daurairai digitaki” ena veisiga ni mataka,” o Josefa Simici. Na cava e kaya na tikina e 6–24 me na cakava o Josefa Simici me vakalougatataki ira na tamata ni Kalou? E sa “yaga vakalevu” vakacava na cakacaka i Josefa Simici vei iko? Sa rawa mo taura eso na vakasama mai na vidio me baleti Josefa Simici “Prophets of the Restoration” ena Gospel Library. Vakasamataka na veitaro vakaoqo, ka vakasamataka mo vola na nomu isaunitaro:

• Na cava o sa kila me baleta na Tamada Vakalomalagi kei Jisu Karisito ena vuku ni veika sa vakavulica o Josefa Simici?

• E duidui vakacava na nomu bula ena vuku ni veika sa vakalesuya mai na Turaga mai vei Josefa Simici?

• Ena vakacava beka na nomu bula kevaka a sega ni yaco na Veivakalesui mai?

E dua na tiki bibi ni nona ilesilesi o Josefa Simici o ya me kau mai na iVola i Momani. Na cava o vulica mai na wase oqo me baleta na vuna e bibi kina na iVola i Momani? Vakabibi, e rawa ni o vakaraica na vuna eso ena tikina e 7, 11–13, 18–24.

Raica talega na iVakadewa i Josefa Simici, Nai Vakatekivu 50:24–38 (ena Bible appendix); Ulutaga vakosipeli, “Joseph Smith,” Gospel Library; “Dokai Koya,” Sere ni Lotu, naba 15.

ko Josefa Simici na Parofita

Parofita ni Turaga, mai vei David Lindsley

2 Nifai 4:15–35

“Oi kemuni na Turaga, au sa vakararavi vei kemuni.”

E kaya o Nifai ni na “vola na veika ni yaloqu” (tikina e 15). Ni o wilika na veika a vola ena 2 Nifai 4:15–35, tarogi iko, “Na cava na veika ni yaloqu ?” Sa rawa mo vola, me vakataki Nifai, ka wasea vei ira na tamata o lomana.

Ni ko raica na sala a kunea kina o Nifai na vakacegu ni vakadrukai ka lomaleqa ena rawa ni vukei iko ni yaco vei iko na yalo vakaoya. Raica na tikina e 15–35 me baleta na veitikina e kauta mai vei iko na vakacegu. O kila beka e dua tale e rawa ni kune vakacegu ena veitikina oqo?

Raica talega na Ronald A. Rasband,“Na Veika ni Yaloqu,” Liaona, Nove. 2021, 39–41.

2 Nifai 5

Au sa rawa ni kunea na bula marau niu bulataka na kosipeli i Jisu Karisito.

Na cava o nanuma ni kena ibalebale meda bula marau? E vola o Nifai ni ra bula na nona tamata ena “ivalavala ni bula marau” (2 Nifai 5:27 Sa rawa mo vakaraica na digidigi era a cakava o Nifai kei ira na nona tamata ka a vukei ira mera bula marau (raica, me ivakaraitaki 2 Nifai 5:6, 10–17). Na cava e rawa ni vukei iko mo tara cake e dua na bula marau me vakataki ira na tamata i Nifai?

2 Nifai 5:20–21

Na cava na cudru a qai tau vei ira na Lemanaiti?

Ena gauna nei Nifai ni ra sa cudruvi na Leimanaiti ka ra sa “muduki tani mai na iserau [ni Turaga]… ena vuku ni nodra ivalavala ca” (2 Nifai 5:20–21). Sa kena ibalebale oqo na Yalo ni Turaga sa gole tani mai na nodra bula. Ni ra qai ciqoma na Leimanaiti na kosipeli i Jisu Karisito, “na cudru ni Kalou sa sega ni muri ira tale” (Alama 23:18).

E tukuna talega na iVola i Momani ni sa buto mai na kuli ni yagodra na Leimanaiti ni ra sa tawase tani na Nifaiti mai vei ira. Na ituvaki kei na irairai ni ivakatakilakila oqo e sega ni kilaimatata taucoko. Na ivakatakilakila e vakaduiduitaki taumada kina o ira na Lemanaiti mai vei ira na Nifaiti. E muri, ni ra sa lako yadudua mai na Nifaiti kei na Leimanaiti ena gauna ni caka ca kei na ivalavala dodonu, sa qai tawayaga na ivakatakilakila.

Era vakadeitaka na parofita ena noda gauna ni buto ni kuli e sega ni ivakatakilakila ni rarawa se cudru vakalou. E vakadeitaka kina o Peresitedi Russell M. Nelson: “Au vakadeitaka vei iko na nomu tikina ena mata ni Kalou e sega ni vakatau mai na roka ni yagomu. Nomu tovaki se na nomu sega ni tovaki mai vua na Kalou e vakatau ena nomu yalodina vua na Kalou kei na Nona ivakaro, ka sega ni roka ni yagomu. (“Me Qaqa Duadua Ga na Kalou,” Liaona, Nove. 2020, 94).

Me vaka e vakatavulica o Nifai, na Turaga “sa sega ni bureitaka vua e dua sa lako mai vua, na tamata loaloa kei na tamata vulavula, na bobula kei na galala, na tagane kei na yalewa; .…era sa tautauvata na tamata kecega vua na Kalou” (2 Nifai 26:33).

Raica talega na “Till We All Come in the Unity of the Faith” (vidio), Gospel Library.

Me baleta na vakasama tale eso, raica na ilavelave ni vula oqo ni Liaona kei na Me iSakisaki ni iTabagone ena kena mekasini.

Vakasama ni Nodra Tuberi na Gonelalai

2 Nifai 3:6–24

E a dua na parofita o Josefa Simici.

• Vakasamataka na sala o rawa ni vakavulici ira kina na luvemu me baleta na cakacaka cecere a rawata na Kalou mai vei Josefa Simici Me tekivu, e rawa ni o vukei ira na luvemu me ra raica na vosa “daurairai” ena 2 Nifai 3:6 ka vakamacalataka ni o ira na parofita era vakatokai me daurairai baleta ni Tamada Vakalomalagi sa vukei ira me ra raica na veika eda sega ni raica rawa. Wasea na vuna o vakavinavinakataka kina ni dua na daurairai sa liutaka tiko na Lotu.

• Na iVola ni iYaloyalo Vakosipeli e tiko kina e vica na iyaloyalo o rawa ni vakayagataka mo vakavulica kina na cakacaka ni Kalou mai vei Josefa Simici (raica na iyaloyalo 89–95). Kerei ira na gone mera wasea na veika era kila me baleta nai yaloyalo oqori. Na cava e vakatokai kina o Josefa Simici me dua na “daurairai digitaki”? Na cava a cakava o Josefa Simici ka “yaga vakalevu sara”? (tikina e 7).

2 Nifai 4:15–35; 5

Au taleitaka na “veika ni Turaga.”

• Na cava e dau vakamarautaki keda? Sa rawa mo ni wilika vata na veitikina mai na 2 Nifai 4 me laurai na ka a marautaka o Nifai se vakamarautaki koya (raica na tikina e 15–16, 20–25, 34–35). Ena nona itukutuku “Na Veika ni Yaloqu,” a wasea o Elder Ronald A. Rasband e vitu na “veika ni Turaga” ka sa vakamareqeti vua (Liaona, Nove. 2021, 39–41). Sa rawa mo railesuva vata na nona lisi ka veivosakitaka na “veika ni Turaga” ka sa ka talei vei iko.

• 2 Nifai 5 e vakamacalataka talega na veika e vukei ira na Nifaiti me ra bula “ena ivalavala ni bula marau” (tikina e 27). E rawa ni o vakarautaka eso na vosa se iyaloyalo e matataka na veika oqo ka vukei ira na luvemu me ra vakasotara vata ki na veitikina ena wase e 5. Eso na ivakaraitaki e oka kina na matavuvale (tikina e 6), ivakaro ni Kalou (tikina e 10), na ivolanikalou (tikina e 12), cakacaka (tikina e 15 kei na 17), valetabu (tikina e 16), kei na veikacivi ni Lotu (tikina e 26). Era na kauta vakacava mai vei keda na bula marau na veika oqo?

2 Nifai 5:15–16

Na valetabu e vale ni Turaga

• Ni o wilika na 2 Nifai 5:15–16 vei ira na luvemu, e rawa ni ra vakatasuasuataka ni ra sa vukei Nifai tiko me tara e dua na valetabu. E rawa talega ni o vakaraitaka vei ira na iyaloyalo ni veivale duidui eso, oka kina e dua na valetabu. E duidui vakacava na valetabu mai na veivale tale eso? Veiwaseitaka na vuna e bibi kina vei iko na valetabu (raica talega na “I Love to See the Temple,” Nodra Sere na Lalai, 95).

Na veigauna kece ga e rawa ni dua na gauna ni veivakatavulici. Kakua ni vakasamataka mo vakavulica na nomu matavuvale me dua na ka o dau cakava vakadua e veimacawa ena dua na lesoni ena kena gauna dodonu. Vakasamataka ni oqo sa dua na ka o na dau cakava ena veigauna kece.

Me baleta na vakasama tale eso, raica na ilavelave ni vula oqo ni iTokani ena kena mekasini.

Era tara tiko e dua na valetabu na Nifaiti

Na Valetabu i Nifai, mai vei Michael T. Malm

tabana ni itaviqaravi: Na valetabu e vale ni Turaga.