Kabanata 26
Ang mga Tao ni Ammon
Tinawag ng mga Lamanita na sumapi sa Simbahan ang kanilang sarili na Anti-Nephi-Lehi, o ang mga tao ni Ammon. Sila ay mabubuti at masisipag na mga tao.
Ang mga Lamanita na hindi nagsisi ay nagalit sa mga tao ni Ammon at naghanda na makipaglaban sa kanila.
Alam ng mga tao ni Ammon na ang masasamang Lamanita ay darating at papatayin sila ngunit nagpasiya silang huwag lumaban. Napagsisihan na nila ang pagpatay ng tao.
Ibinaon nila nang malalim sa lupa ang kanilang mga sandata at nangako sa Diyos na hindi na sila kailanman muling papatay ng tao.
Nang dumating ang masasamang Lamanita at nagsimulang pagpapatayin sila, nagpatirapa sila sa lupa at nanalangin.
Nang makita nilang hindi lumalaban ang mga tao ni Ammon, marami sa masasamang Lamanita ang tumigil sa pagpatay sa kanila.
Nalungkot ang mga Lamanita na pumatay sila. Itinapon nila ang kanilang mga sandata at sumama sa mga tao ni Ammon. Hindi na sila muling makikipagdigma.
Marami pang Lamanita ang dumating upang patayin ang mga tao ni Ammon. Hindi pa rin sila nakipaglaban, at marami ang napatay.
Dahil hindi niya nais na malipol ang mga taong minamahal niya, nanalangin si Ammon upang sila ay matulungan. Sinabi ng Panginoon sa kanya na dalhin ang kanyang mga tao at lisanin ang lupain.
Ibinigay ng mga Nephita sa Zarahemla kay Ammon at sa kanyang mga tao ang lupain ng Jerson at pinangalagaan sila. Naging magkakaibigan sila.