“Iloilo Lou Aoaoina 10: O Le Tusi a Mamona; 1 Nifae–Moronae” Tusi Lesona a le Faiaoga o le Tusi a Mamona (2024)
“Iloilo Lou Aoaoina 10,” Tusi Lesona a le Faiaoga o le Tusi a Mamona
Iloilo Lou Aoaoina 10
O Le Tusi a Mamona; 1 Nifae–Moronae
O le manatunatu i le ma le iloiloina o lou aoaoina faaleagaga e mafai ona fesoasoani e te latalata atili atu ai i le Faaola ma faamalosia ai lou liuaina. O lenei lesona ua faamoemoe e fesoasoani ia te oe e iloilo ai le alualu i luma ma le tuputupu ae ua e oo i ai i le taimi o au suesuega o le Tusi a Mamona i lenei tausaga.
Valaaulia tamaiti aoga e faasoa mai o latou manatu ma lagona. Faamanatu i tamaiti aoga e mafai e le Agaga Paia ona aoao i latou i mea i le taimi o le vasega e le o tautalagia leotele. A o tusifaamaumau e tamaiti aoga nei uunaiga faaleagaga, latou te faateleina lo latou tomai e iloa ai ma aoao e ala i le Agaga. O lenei mea e mafai ai e le Alii ona faaauau pea ona taiala o latou olaga.
Sauniuniga a le tamaitiiti aoga: E mafai e tamaiti aoga ona tomanatu i a latou suesuega o le Tusi a Mamona ma saunia e faasoa mai se malamalamaaga po o se upumoni na latou aoaoina ua faateleina ai lo latou alolofa mo Iesu Keriso.
Gaoioiga e Ono Mafai Ona Aoao Ai
I lenei lesona, o le a maua ai e tamaiti aoga ni avanoa e toe manatunatu ai pe na faapefea ona fesoasoani le Tusi a Mamona ia i latou e atiina ae le faatuatua ia Iesu Keriso ma liua atili ai ia te Ia. Afai e aoga le taulai atu i upumoni patino na suesueina e tamaiti aoga i le Tusi a Mamona, e mafai ona e fetuunaia gaoioiga e faaaofia ai na upumoni. E mafai e tamaiti aoga ona faamaea gaoioiga i soo se faasologa.
O a ni o ou lagona e uiga i le Tusi a Mamona?
O lenei vaega o le lesona ua faamoemoe e fesoasoani i tamaiti aoga e mafaufau ai pe na faapefea e a latou suesuega o le Tusi a Mamona i lenei tausaga ona tosina ai o latou lagona e uiga i le, ma le molimau ia Iesu Keriso ma Lana talalelei. Atonu e te manao e faaaoga fesili nei e amata ai se talanoaga ma au tamaiti aoga.
Sa valaaulia i tatou e Peresitene Russell M. Nelson e mafaufau e uiga i fesili e tolu e faatatau i le Tusi a Mamona:
Atonu e te manao e faaali atu fesili e tolu i le faamatalaga lenei i luga o le laupapa.
Muamua, faamata e faapeī lou olaga e aunoa ma le Tusi a Mamona? Lua, o le a se mea o le a e le iloaina? Ma le tolu, o le a se mea o le a e le mauaina? (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Lea?,” ” Ensign po o le Liahona, Nov. 2017, 61)
Valaaulia tamaiti aoga e talanoaina fesili e tolu i le saunoaga a Peresitene Nelson. E faalagolago i au tamaiti aoga, atonu e te manao e tuu atu ia i latou se taimi e talanoaina ai i ni vaega toalaiti a o lei faia o se vasega. A o tali mai tamaiti aoga, faalogo ma le toto’a, ma fai atu fesili tulitatao e fesoasoani ai ia i latou e faamanino atili ma loloto o latou mafaufauga.
O a ni mea ua e malamalama ai e uiga i le Tama Faalelagi ma Iesu Keriso?
O le vaega lenei e mafai ona fesoasoani i tamaiti aoga e faamalamalama ai aoaoga eseese e uiga i le Tama Faalelagi ma Iesu Keriso.
Sa faamatalaina e Peresitene Russell M. Nelson se tasi o matafaioi autu o le Tusi a Mamona:
E tupu se mea mamana pe a saili atu se atalii/afafine o le Atua ia iloa atili e uiga ia te Ia ma Lona Alo Pele. E leai se isi vaipanoa o loo manino ma mamana atili ai le aoaoina o na upumoni nai lo le Tusi a Mamona. (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Lea?,” Ensign po o le Liahona, Nov. 2017, 61)
Faaalu sina taimi e mafaufau ai i mea ua e aoaoina e uiga i le Tama Faalelagi ma Iesu Keriso a o e suesueina le Tusi a Mamona i lenei tausaga. E mafai ona e iloiloina au tusitusiga paia ma api faamaumau mo suesuega mo upumoni e uiga i le Tama Faalelagi ma Iesu Keriso atonu na e makaina pe tusia ni faamatalaga i le aluga o le tausaga. Lisi ni upumoni se tolu pe fa sa faapitoa ona anoa ia te oe i lau api faamaumau mo suesuega.
A uma ona iloilo a latou api faamaumau mo suesuega po o tusitusiga paia, e mafai e tamaiti aoga ona lisi upumoni anoa i luga o le laupapa. E mafai foi e tamaiti aoga ona faaaofia ai manatu mai a latou sauniuniga a le vasega.
Ina ia uunaia manatuaga o tamaiti aoga pe fesoasoani i tamaiti aoga e faigata ona faitau, mafaufau e faaali atu se tasi o vitio o le Tusi a Mamona o loo aofia i “Gaoioiga Faaopoopo e Aoao Ai.”
Saili ia le itiiti ifo ma le tasi se fasifuaitau o mau e lagolagoina upumoni taitasi na e lisiina i lau api faamaumau mo suesuega. Tusi le mau faasino i autafa o upumoni taitasi, ma faamatala pe mafai faapefea ona e faaaogaina le fuaitau o le mau e aoao atu ai lena upumoni.
Afai e manaomia e tamaiti aoga se fesoasoani i le sueina o fuaitau i le Tusi a Mamona o loo aoao mai ai upumoni e uiga i le Tama Faalelagi ma Iesu Keriso, e mafai ona e faasoa atu nisi o mea nei ia i latou. Ia mataala ma sauni e fesoasoani i tamaiti aoga o e atonu e manaomia se fesoasoani faaopoopo.
Faaalu se taimi mo tamaiti aoga e faasoa mai ai aoaoga o le Tusi a Mamona na latou filifilia i le vasega. E mafai e tamaiti aoga ona faasoa mai i le vasega atoa, pe e mafai foi ona vaevaeina i ni vaega toalaiti.
Na faapefea ona tosinaina e le Tusi a Mamona le ala e te ola ai i lou olaga?
O le vaega lenei e mafai ona fesoasoani i tamaiti aoga e toe manatunatu ai ma faailoa mai pe o faapefea ona latou taumafai e ola i aoaoga faavae ma aoaoga o le Tusi a Mamona.
Faitau le saunoaga lenei a le Perofeta o Iosefa Samita (1805–44), ma vaavaai mo mea na ia aoaoina mai e uiga i le mana o le Tusi a Mamona:
Manatua: E mafai e tamaiti aoga ona sue ma faitau le faamatalaga lenei i le parakalafa lona ono o le faatomuaga o le Tusi a Mamona.
© 1998 David Lindsley
Na ou tauina atu i le usoga e faapea, o le Tusi a Mamona o se tusi silisili ona sa’o i tusi uma lava o i le lalolagi, ma o le maa autu o la tatou ekalesia, ma e sili atu ona latalata le tagata i le Atua e ala i le usitaia o ona mataupu, nai lo se isi lava tusi. (Faatomuaga o le Tusi a Mamona; tagai foi i le History of the Church, 4:461)
Ina ia “ola i ona mataupu” o lona uiga ia ola i mataupu faavae ma aoaoga o loo i ai i le Tusi a Mamona. Mafaufau mo ni nai minute pe na faapefea ona tosina ou mafaufauga, uiga faaalia, po o faatinoga ona o mea ua e aoaoina mai le Tusi a Mamona.
Tuu se taimi i tamaiti aoga e tali mai ai se tasi o fesili nei i a latou api faamaumau mo suesuega. Fautuaina i latou ia mafaufau loloto ma valaaulia le Agaga Paia e fesoasoani ia i latou ia iloa pe na faapefea ona aafia o latou olaga i aoaoga o le Tusi a Mamona.
-
Na faapefea ona fesoasoani au suesuega o le Tusi a Mamona ia e latalata atili ai i le Tama Faalelagi ma Iesu Keriso?
-
O a nisi o aoaoga patino ua mafai ona e faaaogaina mai lau suesuega o le Tusi a Mamona?
-
O a ni faamanuiaga ua e oo i ai a o e suesueina e le aunoa le Tusi a Mamona?
Valaaulia tamaiti aoga e faasoa mai a latou tali. Pe a lava le taimi, faasoa atu lau molimau e uiga i le Tusi a Mamona ma aoaoga anoa na faatosinaina ai lou olaga.