Atamai i Aoaoga Faavae: Moronae 10:4–5

“Ma o le Mana o le Agaga Paia E Mafai Ona Outou Iloa Ai le Moni o Mea Uma Lava”

alii talavou o loo tatalo

I lau suesuega o le Moronae 10:1–7, ua e aoao ai afai tatou te ole atu i le Atua ma se loto faamaoni, manatu moni, ma le faatuatua ia Keriso, e mafai ona tatou iloa e moni le Tusi a Mamona e ala i le mana o le Agaga Paia. O lenei lesona e mafai ona fesoasoani ia te oe e tauloto mau faasino o le atamai i aoaoga faavae ma le fasifuaitau autu o le mau mo le Moronae 10:4–5, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Fesoasoani i tamaiti aoga ia malamalama e faapea, o le mauaina o le malamalama faaleagaga o se mamanu faalelagi. I tusitusiga paia, e valaaulia pea lava pea e le Alii Ana fanau e ole atu, saili, ma tuitui atu (mo ni faataitaiga, tagai i le Mataio 7:7–8; 1 Nifae 15:11; Mataupu Faavae ma Feagaiga 18:18, 42:61). A o faataitai e tamaiti aoga ia mataupu faavae o le mauaina o le malamalama faaleagaga, faamanatu atu ia i latou ia faamaoni ma onosai i le sailia o tali. Molimau atu e mafai ona tatou faalagolago i le Tama Faalelagi e faaali mai upumoni i o tatou mafaufau ma loto e ala i le mana o le Agaga Paia.

Sauniuniga a le tamaitiiti aoga: Valaaulia tamaiti aoga e tauloto le mau faasino ma le fasifuaitau autu mo le Moronae 10:4–5: “Ole atu ma le loto faamaoni, ma le manatu moni i ai, ma le faatuatua ia Keriso. … Ma o le mana o le Agaga Paia e mafai ona outou iloa ai le moni o mea uma lava.”

Gaoioiga e Ono Mafai Ona Aoao Ai

O lenei lesona o le atamai i aoaoga faavae ua mamanuina e aoao atu pe a uma le lesona o le “Moronae 10:1–7,” o le lesona faatatau lea mo le fuaitau o le atamai i aoaoga faavae o le Moronae 10:4–5. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Tauloto ma faamatala

E mafai ona e amata i le valaaulia o i latou o e na faamaeaina le gaoioiga sauniuni a le tamaiti aoga e tauloto mai le mau faasino o le atamai i aoaoga faavae ma le fasifuaitau autu o le mau mo le Moronae 10:4–5.

E mafai ona faaaoga le gaoioiga lenei e fesoasoani ai i tamaiti aoga pe afai latou te lei faia lenei mea a o lei amataina le vasega. E mafai e tamaiti aoga ona feauauai i le toe faia o vaega taitasi nei ma se paga seia mafai ona latou taulotoina e i latou lava le mau faasino ma le fasifuaitau atoa o le mau autu.

• Moronae 10:4–5

• “Ole atu ma le loto faamaoni,

• Ma le manatu moni i ai, ma le faatuatua ia Keriso. …

• Ma o le mana o le Agaga Paia

• E mafai ona outou iloa ai le moni o mea uma lava.”

Faalogo ma le toto’a i tali a tamaiti aoga i le fesili lenei e fesoasoani e te iloa ai po o le a le lelei o lo latou malamalama i mea na aoao mai e Moronae i lenei fuaitau.

• O le a se mea e mafai ona fai e se tasi ia maua ai se molimau e moni le Tusi a Mamona?

Faataitai le faaaogaina

Tuu atu i tamaiti aoga se avanoa e toe faamanatu ia mataupu faavae o le mauaina o le malamalama faaleagaga. O se tasi o auala e faia ai lenei mea o le fai atu lea i tamaiti aoga e filifili se tasi o mataupu faavae o le mauaina o le malamalama faaleagaga ma faamatala pe faapefea ona anoa ia i latou.

Mafaufau e faaaoga le ata faataitai lenei po o se tasi e sili atu ona talafeagai i au tamaiti aoga e fesoasoani ai ia i latou e faataitai le faaaogaina o mataupu faavae o le mauaina o le malamalama faaleagaga.

O isi fautuaga e mafai ona maua i le vaega “Gaoioiga Faaopoopo e Aoao Ai” i le faaiuga o le lesona lenei.

Vaai faalemafaufau i le tulaga lenei o loo tuuina i luga i le vaega o “Fesili ma Tali” o le mekasini o le Mo Le Malosi o le Autalavou . Ina ia vaai i se faataitaiga, tagai i se lomiga talu ai nei ChurchofJesusChrist.org.

• “Sa avea au ma se tagata o le Ekalesia i le tele o lo’u olaga. Ou te taumafai e tausi poloaiga, faitau a’u tusitusiga paia, tatalo, ma alu i le Lotu. Ou te faalogo i isi tagata o faasoa mai o latou aafiaga e uiga i le iloaina e moni le Tusi a Mamona. Aisea e lei tuuina mai ai e le Atua ia te au lena ituaiga o aafiaga?”

Mafaufau e vaevae tamaiti aoga i ni vaega laiti. E mafai ona latou talanoaina pe mafai faapefea e le faaaogaina o mataupu faavae o le mauaina o le malamalama faaleagaga ona fesoasoani i se tasi e i ai se popolega e pei o lea mai le ata faataitai o i luga.

• O le fea le mataupu faavae o le mauaina o le malamalama faaleagaga o le a e fautuaina lenei tagata e mafaufau muamua i ai? Aisea?

• E mafai faapefea e le aoaoga faavae o loo aoao mai i le Moronae 10:4–5 ona fesoasoani ia te oe e faaaoga mataupu faavae o le mauaina o le malamalama faaleagaga i lenei tulaga?

A o faasoa mai tamaiti aoga, ia mautinoa ua latou iloa e leai ni tali sa’o pe sese. I le avea ai ma se vaega o le talanoaga, afai e te matauina e lei aumaia e le vasega mataupu faavae uma e tolu o le mauaina o le malamalama faaleagaga, e mafai ona e fai atu fesili e uiga i mataupu faavae latou te lei ta’ua. Atonu e te manao e faaaoga nisi o fesili nei o se vaega o lenei talanoaga.

Saili le malamalama atili e ala i punavai paia filifilia

• O le fea upu po o fasifuaitau i le Moronae 10:4–5 o le a e uunaia lenei tagata e suesue ma malamalama atili i ai? Aisea?

• O a nisi o punaoa mamana ua filifilia e mafai ona fesoasoani i lenei tagata ia maua ai se molimau patino i le moni o le Tusi a Mamona?

Faatino i le faatuatua

• O le a se foliga o le faatinoina o nisi o valaaulia a Moronae mai le Moronae 10:4–5 i lenei tulaga? E faapefea ona fesootai nei mea i le faatino i le faatuatua?

Iloilo manatu faavae ma fesili faatasi ai ma se vaaiga e faavavau

• O a ni upumoni e uiga i le Atua, le ala e fesootai mai ai o Ia i Ana fanau, ma Lona finagalo, e mafai ona fesoasoani i se tasi i lenei tulaga?

• E mafai faapefea ona e faaaogaina le aoaoga faavae o loo aoao mai i le Moronae 10:4–5 e fesoasoani ai i isi fesili e le fesootai i le Tusi a Mamona?

Toe faamanatu o le atamai i aoaoga faavae

E tatau ona faaaoga se gaoioiga toe faamanatu e pei o lenei i se lesona o le a aoao atu pe a maea le lesona lenei.

Faamanatu i tamaiti aoga le gaoioiga sa latou faia e tauloto ai le fuaitau o le mau ma le fuaitau autu o le mau “Moronae 10:4–5: Ole atu ma le loto faamaoni, ma le manatu moni i ai, ma le faatuatua ia Keriso. … Ma o le mana o le Agaga Paia e mafai ona outou iloa ai le moni o mea uma lava.” Valaaulia soo se tamaitiiti aoga o loo taulotoina pea lenei mau e tauloto mo le vasega. Afai e manaomia e isi se fesoasoani, mafaufau e faaali atu le mau ma le fasifuaitau autu o le mau i luga o le laupapa. Tape ese ni nai upu i le taimi ma fai atu i tamaiti aoga e tauloto le fasifuaitau seia oo ina latou tautino atu e manatua.

Gaoioiga Faaopoopo e Aoao Ai

Isi ata faataitai mo le faataitaiga o le faaaogaina

Fesoasoani i tamaiti aoga ia malamalama o le valaaulia a Moronae i le Moronae 10:4–5 e mafai ona fesoasoani ia i latou e iloa ai le moni o mea uma, ae le na o le moni o le Tusi a Mamona. Atonu e te mafaufau e faitau le fautuaga a Moronae i le Moronae 10:4–7 o se vasega ma faaali atu ata faataitai nei i luga o le laupapa. Valaaulia tamaiti aoga e faitau ma mafaufau po o le fea e sili ona latou fesootai i ai. O le galulue ai i ni paga po o ni vaega toalaiti, e mafai e tamaiti aoga ona filifili se tasi o nei ata faataitai ma faaaoga e faataitai ai le faaaogaina o mataupu faavae o le mauaina o le malamalama faaleagaga.

• E mafai faapefea ona ou iloa pe o se poloaiga e aumai moni mai le Atua?

• E mafai faapefea ona ou iloa o faamatalaga ou te maua i luga o le initoneti e uiga i le Ekalesia e moni?

• E mafai faapefea ona ou iloa pe o saunoa moni mai le perofeta mo le Atua?