Moronae 2–3

Pule o le Perisitua

tamaitai talavou o loo faamauina

O le pule moni o le perisitua mai le Atua e taua i le Ekalesia a le Faaola. I nisi o upu mulimuli a Moronae i tupulaga i le lumanai, sa ia aoao atu ai e uiga i le pule e faatino ai sauniga o le perisitua. O le faia o lea mea sa ia faasaosaoina ai upumoni taua e uiga i le auala e faaaoga ai le perisitua. O lenei lesona e mafai ona fesoasoani e te malamalama ai i le pule o le perisitua i le Ekalesia a le Faaola.

Fesoasoani i tamaiti aoga ia taulai atu ia Iesu Keriso. Mafaufau loloto pe faapefea ona aoao mai e tusitusiga paia ia mataupu faavae e fesoasoani tatou te malamalama atili ai i le Faaola. Valaaulia tamaiti aoga e vaavaai mo mea e mafai ona latou aoaoina e uiga i le mana, alofa mutimutivale, ma le faatosinaga a Iesu Keriso mai mataupu faavae o le talalelei latou te maua i tusitusiga paia.

Sauniuniga a le tamaitiiti aoga: Mafaufau e valaaulia tamaiti aoga e talanoa ma se tasi e umia le perisitua po o se tasi o loo auauna atu i se valaauga o le Ekalesia. E mafai e tamaiti aoga ona fesili i lena tagata pe o a ona lagona e uiga i le mauaina o le pule a le Faaola e faatino ai ona tiutetauave.

Gaoioiga e Ono Mafai Ona Aoao Ai

A o le’i amataina le vasega, nanā se aitema o le a e manaomia i le taimi o le lesona, e pei o le penisina, maka, po o au tusitusiga paia. Valaaulia tamaiti aoga e sue le aitema, ma fesili pe aisea e manaomia ai mo le lesona.

Faamanatu i tamaiti aoga e tele upumoni manino ma taua na leiloloa i le taimi o le Liliuese Tele (tagai i le 1 Nifae 13:26–27, 32). O tusitusiga a Moronae o loo aoao mai ai upumoni taua e uiga i le faatulagaga o le Ekalesia a le Faaola ia na leiloloa i le taimi o le Liliuese.

‟O le a aogā”

O Moronae o se tasi o i latou mulimuli na umia le perisitua o lana tisipenisione i le konetineta o Amerika. Sa ia iloa a maliu o ia, o le a aveesea le malamalama taua e uiga i le Ekalesia a le Faaola ma Lana pule o le perisitua. I nisi o ana upu faaiu, na tusia ai e Moronae mea sa ia lagonaina atonu ‟o le a aogā” i tupulaga i le lumanai (Moronae 1:4). Sa ia tusia e uiga i le pule o le perisitua ma sauniga lea e na o le Ekalesia a le Faaola e maua ai.

Ina ua asiasi atu le Faaola toetu i sa Nifae, ‟sa pa’i atu lona aao i soo taitoatasi” ma ‟sa ia tuuina mai ia te i latou le mana e tuu atu ai le Agaga Paia” (3 Nifae 18:36–37). Na faaiuina e Moronae lana talafaamaumau i nisi o faatonuga a le Faaola i soo sa Nifae e toasefululua e uiga i le auala e tuuina atu ai le meaalofa o le Agaga Paia.

Ina ia faateleina le galulue faatasi o tamaiti aoga, mafaufau e valaaulia tamaiti aoga e galulue ma se tasi o le vasega po o ni vaega toalaiti mo le gaoioiga lenei. E mafai e tamaiti aoga ona suesue a le o le Moronae 2 po o le3 ona faasoa atu lea o mea na latou aoaoina i se tasi na suesueina le isi mataupu. O faamatalaga nei e mafai ona tuuina atu e taiala ai tamaiti aoga i a latou suesuega.

O le pule e tuuina atu ai le meaalofa o le Agaga Paia

Faitau le Moronae 2:1–3, ma vaavaai mo mea na aoao mai e Moronae e i ai sona taua.

• O le a se mea na e maua i nei fuaiupu e te lagona e i ai sona taua?

• Mai mea ua uma ona e iloa, o le a le pule o le perisitua e manaomia e faaee atu ai le meaalofa o le Agaga Paia?

• O le a se upumoni e mafai ona tatou aoao mai i le Moronae 2?

O se tasi o upumoni e faapea o i latou e umia le Perisitua Mekisateko e faaeeina atu le meaalofa o le Agaga Paia i luga o tagata o le Ekalesia ua papatisoina e ala i le faaee atu o lima.

• Aisea e te manatu ai e taua tele le faaeeina atu o le Agaga Paia? (Mo se tala o loo faaalia ai lenei mea, e mafai ona e faitauina le Galuega 8:14–24.)

• E mafai faapefea e le iloaina o le pule e faaee atu ai le meaalofa o le Agaga Paia e sau mai le Faaola ona tosina ai ou lagona e uiga i lenei meaalofa?

• E faapefea ona faamanuiaina lou olaga e le meaalofa o le Agaga Paia?

Faauuina o isi i tofi o le perisitua

Na sosoo ai ma le faamatalaina e Moronae o le auala e faauu ai ositaulaga ma aoao.

Faitau le Moronae 3:1–4, ma vaavaai pe faapefea ona faauuina tagata taitoatasi i tofi o le perisitua.

• O le a se mea na e matauina e uiga i le ala e faauuina ai tagata taitoatasi i tofi o le perisitua?

E mafai e tamaiti aoga ona faitau ma faafesootai le Mataupu Faavae o le Faatuatua 1:5 i le Moronae 3.

E ui lava o le Moronae 3 o loo ta’ua patino ai le faauuina i tofi o le perisitua o ositaulaga ma aoao, ae e faatatau foi le pule ia i latou uma o e umia valaauga i le Ekalesia a le Faaola.

• Aisea e tatau ai mo tagata taitoatasi o e auauna atu i le Ekalesia a le Faaola ona maua Lana pule?

Afai e mafai, aumai se laina o le pule o le perisitua i le vasega.

O le pule o le perisitua e mai ia Iesu Keriso. E ui o i latou uma o e umia valaauga i le Ekalesia e i ai le pule o le perisitua, ae o i latou ua faauuina i le tofi o le Perisitua Arona po o le Mekisateko e i ai se laina o le pule o le perisitua. O lenei laina e tau atu ai le pule a se tasi e umia le perisitua ia Iesu Keriso. E mafai e i latou e umia le Perisitua Mekisateko ona talosagaina se faamaumauga o lo latou laina o le pule i luga o le ChurchofJesusChrist.org. E le tuuina atu e le Ekalesia ni faamaumauga o laina o le pule mo e umia le Perisitua Arona. Peitai, afai na faauuina se tasi e umia le Perisitua Arona e se e umia le Perisitua Mekisateko, e mafai ona ia aoao e uiga i le laina o le pule o le alii na faauuina o ia.

Sa faamalamalama mai e Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

O le galue i le pule faalelagi e sili atu mea e moomia ai nai lo o se maliliega faalauaitele. E le mafai ona faagaoioia i aoaoga faafaifeau po o se poloaiga mai le faapotopotoga. E leai, i le galuega faatagaina a le Atua e ao ona i ai le mana e sili atu nai lo lea ua umiaina e tagata o le faapotopotoga, po o feoai i auala, po o seminare—o se mea moni lea na silafia e le toatele o tagata na sailiili faamaoni i mataupu faalelotu ma faalauiloaina mai faalauaitele mo le tele o tupulaga lea na oo atu ai lava i le Toefuataiga. …

… [O le laina o le pule o le perisitua a i latou taitoatasi e umia le perisitua i le Ekalesia] e toe foi i tua i se filifili e lē mafaatusalia i auauna agelu o e na o mai mai le Alo o le Atua lava Ia, ua tauaveina lenei meaalofa e lē mafaatusalia mai le lagi. (Jeffrey R. Holland, “O Le Mea ua Sili Ona Tulaga Ese ai i Tatou,” Ensign po o le Liahona, Me 2005, 44)

Mafaufau e faaali atu i tamaiti aoga se filifili. Faamalamalama atu o le sootaga muamua o le filifili e faatusa ia Iesu Keriso ma le sootaga lona lua, o i latou na Ia faauuina i le perisitua. O le sootaga lona tolu e faatusa ia i latou na latou faauuina ma isi mea faapena, i augatupulaga i e umia le perisitua i aso nei, ua suitulaga i le sooga mulimuli o le filifili.

• Aisea e taua ai le mafai ona fesootai atu o le pule o le perisitua ia Iesu Keriso?

• E mafai faapefea e le iloaina o lenei sootaga ia Iesu Keriso ona aafia ai ou lagona e uiga i sauniga, valaauga, po o faamanuiaga e te maua e ala i le perisitua?

E mafai e tamaiti aoga ona lipoti mai e uiga i le gaoioiga sauniuni mo le vasega.

E mafai foi e tamaiti aoga ona iloilo le Moronae 2 ma le3, ma vaavaai mo mea e tutusa ai mataupu, ma lipoti mai mea latou te maua.

Faasoa atu mea na e aoaoina

Afai o le a fesoasoani mo tamaiti aoga le faaalia o lo latou malamalama i mea sa latou suesueina i le Moronae 2–3, mafaufau e talanoaina le ata faataitai lenei.

Manatu faapea e i ai se tagata o lou aiga o le a papatisoina ma faamauina, faauuina i le perisitua, pe vaetofia mo se valaauga. O le a se mea e mafai ona e faasoa atu ia i latou mai le Moronae 2 po o le3 e fesoasoani ai ia latou malamalama i le taua o le mea o loo tupu?

Manatu ma Talaaga o Faamatalaga

O le a le mea e fai e le perisitua mo i tatou?

Sa ta’ua e Peresitene Dieter F. Uchtdorf, o lē sa avea ma uso o le Au Peresitene Sili:

Peresitene Dieter F. Uchtdorf

Ua tatou iloa uma e sili atu lava le perisitua nai lo na o se igoa po o se faalagiga. Sa a’oa’o mai le perofeta o Iosefa Samita e faapea “O le Perisitua o se mataupu faavae e faavavau, ma sa i ai lava i le Atua mai le faavavau, ma o le a i ai pea e faavavau, e aunoa ma le amataga o aso po o le iuga o tausaga” [Aoaoga a Peresitene a le Ekalesia: Iosefa Samita (2007), 104]. Na te umia ‟le ki lava lea o le malamalama o le Atua” [Mataupu Faavae ma Feagaiga 84:19]. O le mea moni, e ala i le perisitua “e faaalia ai le mana o le faale-atua” [Mataupu Faavae ma Feagaiga 84:20].

O faamanuiaga o le perisitua e faateleina ai lo tatou tomai e malamalama ai. O e umia ma le faamaoni le Perisitua Mekisateko e mafai ona ‟avea … o le au filifilia a le Atua” [Mataupu Faavae ma Feagaiga 84:34]. E ‟faapaiaina i latou e le Agaga i le faafouina o o latou tino” [Mataupu Faavae ma Feagaiga 84:33] ma e mafai ona iu ina maua ‟mea uma ua i ai i le Tama” [Mataupu Faavae ma Feagaiga 84:38]. Atonu e faigata ona malamalama ai, ae e matagofie, ma ou te molimau atu e moni. (Dieter F. Uchtdorf, “Lou Tulaga Gafatia, Lou Avanoa,” Ensign po o le Liahona, Me 2011, 58)

O ai e mafai ona mauaina faamanuiaga o le perisitua?

Na ta’ua e Peresitene Dallin H. Oaks o le Au Peresitene Sili:

Peresitene Dallin H. Oaks

E le pei o ki ma faauuga o le perisitua, o faamanuiaga o le perisitua o loo avanoa mo tamaitai ma alii i tuutuuga lava e tasi. O le meaalofa o le Agaga Paia ma faamanuiaga o le malumalu o faataitaiga ia ua masani ai o lenei upumoni. (Dallin H. Oaks, “O Ki ma le Pule o le Perisitua,” Ensign po o le Liahona, Me 2014, 52)

Gaoioiga Faaopoopo e Aoao Ai

Tofi o le perisitua

A o lei faailoaina le upumoni i le Moronae 2, e mafai e tamaiti aoga ona lisi tofi o le Perisitua Arona ma le Mekisateko i luga o le laupapa ma tuu se maka faasa’o e ala i tofi e mafai ona faaee atua le meaalofa o le Agaga Paia. Fesili i tamaiti aoga pe faapefea ona tatou iloa lena mea. Ona mafai lea e tamaiti aoga ona faaaoga le faasino upu e su’e ai se fuaiupu o loo aoao mai ai lenei mea. Afai e manaomia, faasino i latou i nisi o fuaiupu (tagai i le Mataupu Faavae ma Feagaiga 20:38, 41, 43; 107:18).

Laina o le pule o le perisitua

A o lei amataina le vasega, sauni e aumai se faamaumauga o le laina o le pule o le perisitua a se tasi o lou aiga po o lau uarota po o le paranesi ma faasoa atu i le vasega. Mafaufau e fai se filifili pepa. I luga o le sootaga muamua tusi ai le igoa ‟Iesu Keriso.” I le sootaga lona lua tusi ai ‟Soo: e aofia ai Peteru, Iakopo, ma Ioane.” Faaauau le tusiaina o igoa o i latou taitoatasi e umia le perisitua mai le laina o le pule i luga o le filifili. Fesoasoani i tamaiti aoga ia iloa o le perisitua i le Ekalesia i aso nei o le perisitua lava lea e tasi na faaaoga e le Faaola e faatino ai vavega ma faia le galuega a Lona Tama.

Moronae 2–6. Sauniga o le perisitua

Afai e manaomia lou tuufaatasia o lesona, mafaufau e aoao atu le Moronae 2–6, ma vaavaai mo sauniga o le perisitua. Valaaulia tamaiti aoga e mafaufau po o a sauniga sa latou auai ai ma pe na faapefea ona fesoasoani sauniga ia i latou e latalata atili atu ai i le Faaola. Ona mafai lea ona latou mafaufau po o a sauniga o le a latou oo i ai i le lumanai (o le faamanatuga, sauniga o le malumalu, ma isi) ma pe mafai faapefea ona latou saunia e auai i na sauniga. Mafaufau e toefaamanatu le vaega i le Sau, Mulimuli Mai ia te A’u—Mo le Aiga ma le Ekalesia: Tusi a Mamona 2024 ua faaautuina “Moronae 2–6: E tatau ona faia sauniga o le perisitua e pei ona poloaiina ai e le Alii.”

Moronae 2–3. Ata vitiō “O Famanuiaga o le Perisitua”

A o e aoao atu mai le Moronae 2–3, mafaufau e faaali atu le “Faamanuiaga o le Perisitua” (3:04), lea o loo faamalamalama mai ai e Elder Robert D. Hales (1932–2017) o le Korama a Aposetolo e Toasefululua nisi o auala e mafai ai e le perisitua ona faamanuiaina o tatou olaga.