Eteru 7–11

“E Moni Lava o Lenei Mea e Ta’ita’i Atu ai i le Faatagataotauaina”

tamaitai i totonu o le potu o le falepuipui

Ona e alofa le Atua ia i tatou, ua Ia valaauina ai perofeta e lapataia i tatou e uiga i le leaga ma uunaia i tatou e tausi poloaiga. Sa lei faalogo Sa Iaretō i se lapataiga mai le uso o Iareto, ma na taunuu ai i taunuuga faigata mo le tele o augatupulaga. O lenei lesona e mafai ona fesoasoani ia te oe e lagona ai le taua o le mulimuli i perofeta a le Alii.

Aoao atu upu a perofeta faatasi ma le talitonuga maumaututu ma le faamoemoe. O le finagalo ma faamoemoega o le Alii e faailoa mai e ala mai i Ana perofeta. Fesoasoani i tamaiti aoga ia iloa e mafai ona latou faalagolago i aoaoga faaperofeta mo le taitaiga ma le puipuiga, pe o tusia i tusitusiga paia pe tautalagia i aso nei.

Sauniuniga a le tamaitiiti aoga: Valaaulia tamaiti aoga e o mai saunia e faasoa mai nisi o fautuaga faaperofeta po o lapataiga ua tatou maua i o tatou aso. E mafai ona latou maua faataitaiga i le Mo Le Malosi o le Autalavou: O Se Taiala mo le Faia o Filifiliga (tamaitusi, 2022) po o lauga o konafesi aoao talu ai nei.

Gaoioiga e Ono Mafai Ona Aoao Ai

Faatagataotauaina

Mafaufau e faaali atu le ata lenei pe tusi se ata faigofie o se potu o le falepuipui i luga o le laupapa.

Vaavaai i le ata nei. Faamata o le a se mea o mafaufau i ai pe lagonaina e lenei tagata?

alii i totonu o le potu o le falepuipui

Mafaufau po o a filifiliga na muamua atu atonu na taitai malie atu ai i nei tulaga ma pe aisea atonu na faia ai e lenei tagata na filifiliga.

O le auai i ni amioga leaga e mafai ona taitai atu ai tagata i le faatagataotauaina faaleagaga ma le faaletino.

O le asō o le a e suesue ai i se tala o le a fesoasoani e te malamalama ai i se auala taua e aloese ai mai le faatagataotauaina faaleagaga. A o e suesue, ia gauai atu i uunaiga a le Agaga lea e mafai ona fesoasoani ia te oe e iloa ai pe faapefea ona faaaoga mea ua e aoaoina i lou lava olaga.

‟E moni lava o lenei mea e ta’ita’i atu ai i le faatagataotauaina”

Ina ua taunuu Sa Iaretō i le nuu folafolaina, sa latou auauna atu ma le faamaoni i le Alii ma faateleina ma tuputupu ae malolosi i le laueleele (tagai Eteru 6:17–18). A o latalata atu Iareto ma lona uso i le faaiuga o o laua olaga, sa la faapotopoto faatasi o la tagata e talanoa ma i latou.

Faitau le Eteru 6:19–23, ma vaavaai mo mea na mananao ai tagata.

• O le a le lapataiga na tuu atu e le uso o Iareto i tagata i le fuaiupu 23?

Mafaufau e valaaulia tamaiti aoga e faasoa mai pe na faapefea ona latou tali atu pe ana faapea sa latou i ai i lea tulaga. E mafai ona e valaaulia i latou e mafaufau pe mafai faapefea e lo latou malamalama i le Atua ma Ana perofeta ona faatosinaina la latou faaiuga. O a latou tali e mafai ona fausia ai le faatuatua ma le molimau i le Atua ma Ana perofeta.

Ua faataunuuina lapataiga

E ui i lapataiga a le uso o Iareto, sa filifili lava tagata ina ia fai se tupu. Ina ua mumusu nisi o o la atalii, sa iu ina ioe le atalii o Iareto o Oraea e avea ma tupu ma nofotupu i le amiotonu i lona olaga atoa (tagai Eteru 6:24–29; 7:1). Peitai, o le valoaga a le uso o Iareto faapea o le i ai o se tupu o le a taitai atu ai i le faatagataotauaina sa faataunuuina i le tele o taimi i le talafaasolopito atoa o Sa Iaretō.

Faitau fuaitau nei, ma vaavaai mo faataitaiga pe na faapefea ona faataunuuina le valoaga a le uso o Iareto. Atonu e te manao e lisi nei mau faasino i totonu o au tusitusiga paia i autafa o le Eteru 6:23

Valaaulia tamaiti aoga e feauauai i le faitauina leotele o nisi po o fuaiupu uma nei. Afai e te filifili e le faitauina ia fuaiupu uma, ia mautinoa e te le faamisia le Eteru 7:1–5, lea o loo ta’u patino mai ai ua faataunuuina le valoaga a le uso o Iareto (tagai Eteru 7:5). Atonu foi e aoga le faitau o le Eteru 11:20–23, lea e faailoa mai ai le perofeta o Eteru.

• Eteru 7:1–5

• Eteru 7:15–17

• Eteru 8:2–3

• Eteru 9:28–32

• Eteru 10:13–15

• Eteru 10:29–31

• Eteru 11:1–7

• Eteru 11:20–23

• O le a se mea sa tulagaese ia te oe mai nei fuaiupu?

• O a upumoni e mafai ona tatou aoaoina mai lenei tala e uiga i taunuuga o le teenaina o perofeta a le Alii?

O se upumoni e tasi e mafai ona tatou aoao mai i lenei tala e faapea, O le teenaina o perofeta a le Alii e mafai ona taitai atu ai i le faatagataotauaina.

• O a nisi o faataitaiga o le auala e ono oo ai se tasi i le faatagataotauaina e ala i le lē amanaiaina po o le teenaina o perofeta a le Alii?

  Afai e manaomia e tamaiti aoga se fesoasoani i le fesili na muamua atu, mafaufau e faasoa atu ni nai faataitaiga, e pei o le mea e mafai ona oo iai i le lē usitaia o le Upu o le Poto po o le matamata i ponokalafi e mafai ona taitai atu ai i le faatagataotauaina o le tagofia o mea ua fai ma vaisu. Ia mautinoa ua malamalama ia tamaiti aoga e faapea o tulaga uma o agasala e faaitiitia ai le mana o le Agaga Paia i o tatou olaga.

• Aisea e te manatu e filifili ai tagata e le amanaia le fautuaga ma lapataiga e tuuina mai e le Alii e ala mai i Ana perofeta?

Fautuaga i aso nei mai perofeta a le Alii

Fesoasoani i tamaiti aoga ia iloa pe faapefea ona faaaoga pea lenei upumoni i aso nei. O le gaoioiga lenei o se tasi lea o auala e faia ai lenei mea.

Saili fautuaga po o lapataiga mai perofeta ma aposetolo o aso nei. E mafai ona maua mai nei mea mai le Mo Le Malosi o le Autalavou (tamaitusi, 2022), pe mai saunoaga talu ai nei o le konafesi aoao. Vaai pe mafai ona e maua ni upu po o ni fasifuaitau patino o loo faamatala ai le ala o le a faamanuiaina ai i tatou a o tatou mulimuli i lenei fautuaga, faapea foi taunuuga e mafai ona tatou oo i ai ona o le lē amanaiaina.

E ono fesoasoani le tuu o tamaiti aoga i ni vaega toalaiti ma tofi atu i vaega taitasi se autu ese mai le Mo Le Malosi o le Autalavou (tamaitusi, 2022) e suesue ai a o latou faamaeaina lenei gaoioiga. Mafaufau e faaali atu fesili nei. Tuu atu ia lava se taimi i tamaiti aoga e talanoaina ai a latou tali ma a latou vaega.

• O a lapataiga po o fautuaga na mafai ona e maua?

• O a nisi o auala o le a faamanuiaina ai i tatou e le Alii a o tatou mulimuli i lenei fautuaga?

• E mafai faapefea e le lē amanaiaina o lenei fautuaga po o nei lapataiga ona taitai atu ai se tasi i le faatagataotauaina?

A uma ona faia e tamaiti aoga lea vaega, valaaulia i latou e faasoa mai nisi o ō latou manatu i le vasega.

Atonu e fesoasoani le tuu atu i tamaiti aoga e faasoa mai tali na latou maua i fesili o loo lisi atu i luga. Mo se faataitaiga, o tamaiti aoga na suesueina le fautuaga mai le vaega o le “Savali i le Malamalama o le Atua” mai le Mo Le Malosi o le Autalavou e mafai ona faailoa mai o mea tatou te matamata, faitau, faalogo, pe auai i ai e mafai ona valaaulia ai mafaufauga lelei pe mafai foi ona faanenefuina lo tatou nofouta i le Agaga. (Tagai i le Mo Le Malosi o le Autalavou [tamaitusi, 2022], 18).

Faaaogaina i lou olaga

Mafaufau pe faapefea ona e tali atu i fautuaga ma lapataiga a perofeta a le Alii, faamanuiaga ua e maua mo le mulimuli i ai, ma fautuaga e te ono manaomia e mulimuli atili ai ma le faamaoni.

Mafaufau e valaaulia tamaiti aoga e faasoa mai ni faataitaiga o auala na faamanuiaina ai i latou e le Alii a o latou mulimuli i Ana fautuaga e ala mai i Ana perofeta. Atonu e te manao e faasoa atu foi se aafiaga patino.

O mea nei e mafai ona fesoasoani i tamaiti aoga o e atonu e lagona le lotovaivai ona o le nofopologa ua latou oo i ai ona o se taunuuga o le lē amanaiaina o fautuaga mai perofeta a le Alii. Mafaufau e faitau faatasi le Mosaea 7:33 o se vasega.

Atonu e lagona e nisi le lotovaivai pe a latou oo i taunuuga o le lē amanaiaina o fautuaga ma lapataiga a le Alii e ala mai i Ana perofeta. Ae tusa lava pe na tatou faia ni mea sese, e mafai e le Faaola ona laveai i tatou mai lo tatou faatagataotauaina pe a tatou liliu atu ia te Ia. Mo se faataitaiga, faitau le Eteru 7:25–27, ma matau le mea na tupu ina ua salamo tagata ma toe liliu atu i le Atua.

• O le a se mea o aoao mai e lenei fuaitau ia te oe e uiga i le Alii? (tagai foi Mosaea 7:33).

Ina ia vaai i se faataitaiga o le ala na maua ai e se tasi le laveaiga a le Alii ina ua uma ona oo i le faatagataotauaina faaleagaga, mafaufau e matamata le “The Immediate Goodness of God,” o loo maua i le ChurchofJesusChrist.org, mai le faailotaimi 3:37 i le 6:33.

Molimau atu i upumoni na suesueina i le asō, ma uunaia tamaiti aoga e faatino soo se uunaiga faaleagaga na latou maua.

Manatu ma Talaaga o Faamatalaga

Aisea e tatau ai ona tatou faalogo i upu a perofeta?

Ua aoao mai Elder Neil L. Andersen o le Korama a Aposetolo e Toasefululua:

Elder Neil L. Andersen

Aisea ua tatou matuā naunau ai e mulimuli i le siufofoga o lo tatou perofeta? Mo i latou o loo sailia ma le filigā le ola e faavavau, o le siufofoga o le perofeta e aumaia le saogalemu faaleagaga i taimi sili ona faigata. …

O le taulaina o o tatou agaga i le Alii o Iesu Keriso e manaomia ai le faalogo atu ia i latou ua Ia auina mai. O le mulimuli i le perofeta i se lalolagi o le vavao ua pei o le taai i se palanikeke mafanafana ma toafimalie i se aso matua malulu lava. (Neil L. Andersen, “O Le Perofeta a le Atua,” Ensign po o le Liahona, Me 2018, 26)

Matamata i le “Lagolagoina o Perofeta” mai le faailotaimi 3:30 i le 5:49 e vaai ai ia Peresitene Russell M. Nelson o faasoa mai upumoni taua e mafai ona fesoasoani tatou te malamalama ai pe aisea e taua tele ai le faalogo i perofeta.

E mafai faapefea e le lē amanaiaina o lapataiga faaperofeta ona taitai atu ai i le faatagataotauaina?

Na aoao mai Elder Quentin L. Cook o le Korama a Aposetolo e Toasefululua:

Elder Quentin L. Cook

Na faamoemoe le Atua o le a saoloto alii ma tamaitai e faia ni filifiliga i le va o le lelei ma le leaga. A oo ina avea filifiliga leaga ma uiga e pulea ai se aganuu po o se malo, o le a i ai taunuuga ogaoga e le gata i le olaga nei ae faapea foi le olaga a sau. E mafai ona faapologaina tagata pe tuu i latou lava i le nofo pologa e le gata i vailaau lamatia ua fai ma vaisu ae faapena foi i filosofia lamatia ua fai ma vaisu lea ua o ese ai mai le ola amiotonu.

O le liliuese mai le tapuai atu i le Atua moni ma soifua ae tapuai i atua ese e pei o le oa ma le lauiloa ma le punouai i amioga lē mama ma lē amiotonu e ui i le nofo pologa i ona ala uma ua aafia ai tagata. Ua aofia ai i nei mea le nofo pologa faaleagaga, faaletino, ma faaleatamai ma o nisi taimi e aumaia ai le faafanoga. (Quentin L. Cook, “O Auega a Ieremia: Faaeteete i le Nofopologa,” Ensign po o le Liahona, Nov. 2013, 88–89)

Gaoioiga Faaopoopo e Aoao Ai

O le taamilosaga o le faamaualuga

Atonu na aoaoina muamua e tamaiti aoga se mamanu i nisi taimi e ta’ua ‟o le taamilosaga o le faamaualuga” lea o loo maua i tusitusiga paia atoa. O lenei mamanu e aofia ai laasaga nei:

1. O le faamaualuga ma le amioleaga ma le faagaloina o le Alii

2. Aafiaga i puapuaga ma le faatafunaga

3. Manatuaina o le Alii, ia lotomaualalo, ma salamo

4. O le amiotonu ma le mauaina o le manuia

Mafaufau e valaaulia tamaiti aoga e suesue mau nei, ma vaavaai mo le mamanu lenei i totonu o Sa Iaretō:

• Eteru 7:23–27

• Eteru 9:26–35; 10:1–20

• Eteru 10:5–7, 15–19, 28, 30–34; 11:1–8

A uma ona suesue i nei fuaiupu, e mafai ona outou talanoaina pe faapefea ona fesootai lenei taamilosaga ia i tatou. Mafaufau e valaaulia tamaiti aoga e iloilo i latou lava e ala i le mafaufau po o le fea vaega o lenei taamilosaga atonu o loo latou i ai ma pe o le a se mea e mafai ona latou faia ina ia lotomaualalo ai pea lava pea ma manatua le Alii.

Eteru 9:14–22 O faamanuiaga o le ola amiotonu

E ui ina sa faatumulia le tele o talafaasolopito o Sa Iaretō i le amioleaga, ae sa i ai taimi na oo ai tagata i faamanuiaga maoae ona o lo latou amiotonu.

Mafaufau e valaaulia tamaiti aoga e suesue e uiga i se tasi o na vaitaimi amiotonu, na taitaia e se alii e igoa ia Emera. E mafai e tamaiti aoga ona faitau le Eteru 9:14–22, ma vaavaai mo faamanuiaga na oo i ai Emera ma lona nuu a o latou mulimuli i le Alii.

Atonu e fesoasoani mo tamaiti aoga le fefaasinoai o nei fuaiupu ma le Mosaea 2:41 po o isi mau o loo talanoaina ai faamanuiaga o le ola amiotonu. Valaaulia tamaiti aoga e faasoa mai ni faataitaiga o auala na faamanuiaina ai i latou e le Alii a o latou faia ni taumafaiga e tausi Ana poloaiga.