Mamona 8:27–41; 9:1–6, 27–37

Tusia mo o Tatou Aso

O Moronae o loo tusitusi i luga o papatusi

Vaai faalemafaufau i le ola ai i le fiaselau tausaga ua mavae i le iloaina ai o le olaga o le a ola ai i o tatou taimi. Na oo Moronae i lenei mea; sa faaali atu e le Alii ia te ia o tatou aso. Na faamatalaina e Moronae agasala ma uiga faaalia o le a taatele i aso e gata ai. Sa Ia valaaulia i tatou ia “liliu … i le Alii” (Mamona 9:6) ma tuuina mai isi fautuaga e fesoasoani ia i tatou e mulimuli ia Iesu Keriso. O lenei lesona e mafai ona fesoasoani ia te oe e malamalama ai o le Tusi a Mamona ua tusia e fesoasoani ia i tatou, i aso e gata ai, e liliu atu i le Alii.

Ia iloa Iesu Keriso e ala i le suesueina o Lana afioga. O le suesueina o tusitusiga paia e fesoasoani i a i tatou e faalatalata atili atu ia Iesu Keriso. Fesoasoani i tagata aoga e faataitai le vaavaai mo Iesu Keriso a o latou suesue. A o latou faia lenei mea, o le a latou faamalosia lo latou sootaga ma Ia ma olioli i faamanuiaga o le talalelei.

Sauniuniga a le tagata aoga: Mafaufau e valaaulia tagata aoga e o mai saunia i le vasega e faasoa mai se mau mai le Tusi a Mamona e mafai ona fesoasoani ia i tatou e liliu atu ai ia Iesu Keriso.

Gaoioiga e Ono Mafai Ona Aoao Ai

Na tusi mai Moronae ia i tatou

Aumai se pusa e faatusa i se pusa o taimi.

Manatu faapea sa e ola i se taimi ua leva ma sa talosagaina oe e tusi se savali e tuu i se pusa o taimi o le a tatalaina i o tatou aso.

Tuu atu i tagata aoga se fasipepa laitiiti e tusi ai i lalo a latou tali i le fesili lenei. Fai atu i tagata aoga e teu a latou pepa i le pusa o taimi, ona faitau lea o ni nai pepa i le vasega.

• O le a se lapataiga, fautuaga, po o se faamalosiauga o le a e tuuina atu e fesoasoani ai i se tasi e faatautaia luitau o aso nei?

A o lei maliu Mamona, sa ia tuuina atu i lona atalii o Moronae ia papatusi auro (tagai Mamona 8:1). Na faamatalaina e Moronae se tasi o auala na fesoasoani ai le Alii ia te ia ia iloa le mea e tusitusi i tagata i o tatou aso. Faitau le Mamona 8:34–35; 9:30, ma vaavaai mo auala na faamanuiaina ai e le Alii Moronae i lona tiutetauave paia.

• O le a le mea na faailoa atu e le Alii ia Moronae?

• O a ni upumoni e mafai ona tatou aoaoina mai i lenei mea?

O se tasi o upumoni tatou te aoaoina e faapea na musuia e Iesu Keriso ia perofeta o le Tusi a Mamona e tusitusi faatasi ma o tatou aso i le mafaufau.

• E ono mafai faapefea e le iloaina na vaai perofeta o le Tusi a Mamona i o tatou aso ona aafia ai le ala tatou te faitauina ai le Tusi a Mamona?

Faitau le saunoaga lenei a Peresitene Ezra Taft Benson (1899–1994), e uiga i perofeta o le Tusi a Mamona:

Peresitene Ezra Taft Benson

Afai na latou vaai i o tatou aso, ma latou filifili mea e sili ona taua mo i tatou, pe le o se pogai sili ea lena e tatau ai ona tatou suesue le Tusi a Mamona? E tatau ona tatou fesili pea lava pea ia i tatou lava ‘Aisea na musuia ai Mamona e le Alii (po o Moronae po o Alema) ia faaaofia lena mea i lana tusi? O le a se lesona e mafai ona ou aoaoina mai lena mea e fesoasoani ia te au ou te ola ai i nei aso ma nei ona po?’” (Ezra Taft Benson, “The Book of Mormon—Keystone of Our Religion,” Ensign, Nov. 1986, 6)

O le faia o fesili e pei o na sa fautuaina mai e Peresitene Benson o se tomai aoga mo le suesueina o tusitusiga paia lea e mafai ona fesoasoani i tagata aoga ia maua atili le uiga ma le talafeagai i la latou suesuega o le Tusi a Mamona. E mafai ona tusi faamanatu e tagata aoga nei fesili e faasino i ai i a latou suesuega i le aso ma i a latou suesuega faaletagata lava ia i le lumanai.

• O le a sou manatu e mafai faapefea e le faia o nei fesili ona faaleleia lau suesuega o tusitusiga paia?

Mafaufau e vavae le vasega i le afa po o le tuu o tagata aoga i ni paga, ma ia tofu atofa i latou e faitau se tasi o fuaitau nei. Valaaulia tagata aoga e tusi mea latou te maua i luga o le laupapa i lalo o se ulutala e pei o le Faafitauli Faaleagaga i o Tatou Aso. Pe a manaomia, fesoasoani i tagata aoga ia malamalama i le uiga o upu o loo i faamatalaga a Moronae.

O le saunoaga a Sister Oscarson i le vaega o “Faamatalaga ma Talaaga” e mafai ona fesoasoani i tagata aoga e malamalama ai i nei fuaiupu.

Faitau le Mamona 8:27–33 po o le Mamona 8:36–41, ma vaavaai pe na faapefea ona faamatalaina e Moronae le tulaga faaleagaga o tagata i o tatou aso.

• O le fea o tulaga o loo faamatalaina e Moronae o e vaaia i lo tatou lalolagi?

• E mafai faapefea e nei uiga ma amioga ona aafia ai lo tatou talitonuga ia Iesu Keriso?

Fofō faaleagaga i o tatou aso

Valaaulia tagata aoga e tusi mea latou te maua i fuaiupu nei i luga o le laupapa i lalo o se ulutala e pei o le Fofo Faaleagaga i o Tatou Aso. Fesoasoani i tagata aoga e talanoaina pe mafai faapefea e fofo patino ona fesoasoani ia i tatou e faatoilalo ni faafitauli patino faaleagaga. Ia mautinoa ua talanoaina e tagata aoga pe faapefea ona faasino atu e Moronae i tatou ia Iesu Keriso.

O le Mamona 9:7–26 o le a suesueina i le lesona e sosoo ai.

Faitau le Mamona 9:6, 27–31, ma vaavaai mo mea na musuia e le Alii ia Moronae e tusi e fesoasoani ai ia i tatou e faatoilalo tulaga le lelei faaleagaga.

• O le a le mea na aoao mai e Moronae e mafai ona fesoasoani ia i tatou e faatoilalo ai agasala ma uiga faaalia e taatele i o tatou aso?

• O fea o nei aoaoga e sili ona fesoasoani i le autalavou o lenei tupulaga ia faalagolago atili ia Iesu Keriso?

• O le isi fesili e sosoo ai ua fuafuaina mo manatunatuga faaletagata lava ia, ae le o le talanoaga a le vasega.

  O le fea o nei aoaoga e te manatu e sili ona fesoasoani ia te oe i le taimi nei? Aisea?

O aoaoga o le Tusi a Mamona

Na tusia le Tusi a Mamona e fesoasoani ia i tatou ia talitonu ma liliu atu ia Iesu Keriso (tagai 1 Nifae 6:4; Mamona 7:5; Moronae 10:30, 32).

Valaaulia ni tagata aoga se toatele e sue ma faasoa mai fuaitau o le Tusi a Mamona e mafai ona fesoasoani ia i tatou e liliu atu ai ia Iesu Keriso. E mafai e tagata aoga ona faaaoga a latou sauniuniga mo le vasega. E mafai e tagata aoga ona faasoa mai i ni auala eseese—mo se faataitaiga, e ala i le tusia o mau faasino i luga o le laupapa po o luga o se pepa e pasi faataamilo i le vasega.

Valaaulia tagata aoga e faasoa mai pe aisea e anoa ai ia fuaitau ia i latou. E mafai foi ona outou talanoaina pe mafai faapefea e fuaitau ona fesoasoani ia i tatou ia talitonu ia Iesu Keriso ma liliu atu ia te Ia (tagai Mamona 9:6).

E mafai foi ona e valaaulia tagata aoga e tuu se faamatalaga i le pusa o taimi faatasi ma se mau ma se savali e uiga i le Faaola. E mafai ona e faitauina nei savali i se vasega i le lumanai.

Faasoa atu lau molimau ia Iesu Keriso. Valaaulia tagata aoga e fai atu fesili na uunaia e Peresitene Benson.

Manatu ma Talaaga o Faamatalaga

O ai faatatau i ai le tusia o le Tusi a Mamona?

Na faasoa mai Elder Gary E. Stevenson o le Korama a Aposetolo e Toasefululua:

Elder Gary E. Stevenson

O e iloaina ea o le Tusi a Mamona sa tusia mo outou—ma mo lo outou taimi? O lenei tusi o se tasi o faamanuiaga o le ola ai i le taimi ua tatou ta’ua o le tisipenisione o le atoaga o taimi. E ui o le Tusi a Mamona sa tusiaina e ni tusitala musuia anamua—o le toatele o i latou o perofeta—ae sa latou lei mauaina ma tagata o o latou aso le faamanuiaga o le umiaina o le tusi atoa. Ua faigofie nei ona outou mauaina le faamaumauga paia na faapelepele, opomauina, ma faasaoina e perofeta, ositaulaga, ma tupu! Ua outou maua le manuia o le uuina i o outou lima le Tusi a Mamona atoa. O le mea e mata’ina ai, o se tasi o perofeta o le Tusi a Mamona, o Moronae, na vaai i o tatou aso—tou aso. Sa ia vaai foi ia te outou, i se faaaliga, i le faitau selau o tausaga ua mavae! (Gary E. Stevenson, “Vaai i le Tusi, Vaai i le Alii,” Ensign po o le Liahona, Nov. 2016, 46)

Na faapefea ona faamatalaina e Moronae aso e gata ai?

Na aoao mai e Sister Bonnie L. Oscarson, o lē sa avea ma Peresitene Aoao o Tamaitai Talavou:

Peresitene Bonnie L. Oscarson

Ua fai mai ai Moronae na vaai o ia i o tatou aso, ma ua aofia ai taua ma tala o taua, mea leaga, fasioti tagata, gaoi, ma tagata e ta’u mai ia i tatou e leai se sa’o po o se sese i fofoga o le Atua. Ua ia faamatalaina tagata ua tumu i le faamaualuga, e manao lava ia ofuina lavalava taugata, ma ē e faatauemu i tapuaiga. Na faaali atu ia te ia tagata ua pupū i mea o le lalolagi ma latou tuu “ē ua matitiva, ma e ua lē lavalavā, ma ē ua mama’i ma puapuagatia, e ui ane” [Mamona 8:39] e aunoa ma le amana’iaina.

Na fai e Moronae se fesili sailiili lagona e uiga ia i tatou—o ē o loo ola i nei aso. Fai mai o ia, “Aisea ea ua outou maasiasi ai e ave i o outou luga le suafa o Keriso?” [Mamona 8:38]. O lea tuua’iga ua faamatala tonu ai le faateleina o tulaga faaletino o lo tatou lalolagi. (Bonnie L. Oscarson, “Tutula’i A’e i le Malolosi, Uso e i Siona,” Ensign po o le Liahona, Nov. 2016, 12)

O le a le gagana na tusia ai le Tusi a Mamona?

Na taua e Moronae e faapea na ia te ia le gafatia e tusi ai e le itiiti ifo ma le lua gagana: faaEperu ma le faaAikupito liua. Na ia taua pe ana fai “e lava le tetele o papatusi,” semanu na te tusia i le faa-Eperu; ae ui i lea, o i latou na tausia talafaamaumau na faaaogaina le “Aikupito liua” ona o le le lava o le avanoa (Mamona 9:32–33). Talu ai nei lava i le Tusi a Mamona, na faaalia ai e Nifae ma le Tupu o Peniamina lo la faaaogaina o le gagana Aikupito. Na taua e Nifae faapea na ia tusia i “le gagana a tagata Aikupito” a o ia vaneina papatusi laiti (1 Nifae 1:2).

A e ui i lea, na faaalia e Moronae faapea na ia tusia i le “faa-Aikupito liua” lea na “tuulima faasolo mai ma matou suia … e tusa ma la [latou] gagana” (Mamona 9:32), e ta’u mai ai na faia ni nai suiga i le faaaogaina o le gagana i le silia ma le afe tausaga talu mai le taimi o Liae. O lenei mea e ono faamatalaina ai pe aisea na faaiuina ai e Moronae i se faaupuga faapea “na leai ni isi tagata latou te iloaina la matou gagana” ae peitai o le Atua na “ia saunia ai ala” mo le faamatalaina ma le faaliliuina mulimuli ane o le talafaamaumau (Mamona 9:34).

Gaoioiga Faaopoopo e Aoao Ai

Mamona 8:33–41. O le a faamasinoina i tatou e le Atua mo le ala tatou te taulimaina ai e matitiva ma i latou e le tagolima

O se tasi lenei o auala e suesue ai se mataupu faavae faaopoopo i le Mamona 8. E mafai e tagata aoga ona tusi se fuaiupu o loo otooto ai mea na latou aoaoina mai le Mamona 8:33–41 e uiga i lo tatou tiutetauave o le tausia o e matitiva ma e le tagolima. Atonu e faailoa mai e tagata aoga e faapea o le a faamasinoina i tatou e le Atua mo le ala tatou te taulimaina ai e matitiva ma i latou e le tagolima.

Talanoaina ituaiga o manaoga eseese o loo i ai i tagata ma pe mafai faapefea e talavou ona fesoasoani e faamalieina na manaoga. E mafai foi ona outou talanoaina le ala e popole ai le Faaola mo i latou e le tagolima.

Fai atu i tagata aoga e faasoa mai ni aafiaga na latou maua i le fesoasoani atu ai i se tasi na manaomia le fesoasoani po o le fesoasoaniga na [latou] maua i se taimi o mafatiaga.

Mamona 8:34–35. Tusia mo o Tatou Aso

Mafaufau e faaaoga fuaitau o mau o le atamai i aoaoga faavae e fesoasoani ai i tagata aoga ia iloa pe na faapefea ona tusia le Tusi a Mamona mo o tatou aso. E mafai ona atofa atu i tagata aoga pe filifili se fuaitau se tasi pe sili atu o le atamai i aoaoga faavae i le Tusi a Mamona. Valaaulia tagata aoga e faitau le fuaitau ma fesili atu: Aisea atonu na faaaofia ai e se perofeta o le Tusi a Mamona lena mea i lana talafaamaumau? O le a se lesona e mafai ona ou aoaoina mai lena mea e fesoasoani ia te au ou te ola ai i nei taimi?

Valaaulia ni tagata aoga e faasoa mai o latou manatu.

O se auala e iloilo ai tusitusiga paia

O mea nei e mafai ona fesoasoani i tagata aoga e iloilo ai le anotusi i le Mamona 8–9.

O se tasi o auala e iloilo ai nisi o fuaitau o mau o le faitauina lea e pei o oe o se fomai o loo suesueina se ma’i ma le faatonuina o le togafitiga.

Mo se faataitaiga, a faitau e tagata aoga le Mamona 8:27–33 po o le Mamona 8:36–41, e mafai ona latou vaavaai mo gasegase faaleagaga e manaomia le togafitia. Ona mafai lea ona latou maua o togafitiga i le Mamona 9:6, 27–29.