“Atamai i Aoaoga Faavae: 3 Nifae 12:48—‘Ia Outou Atoatoa e pei lava o Aʼu, po o lo Outou Tamā O Le o i le Lagi E Atoatoa,’” Tusi Lesona a le Faiaoga o le Tusi a Mamona (2024)
“Atamai i Aoaoga Faavae: 3 Nifae 12:48,” Tusi Lesona a le Faiaoga o le Tusi a Mamona
Atamai i Aoaoga Faavae: 3 Nifae 12:48
“Ia Outou Atoatoa e pei lava o Aʼu, po o lo Outou Tamā O Le o i le Lagi E Atoatoa.”
I lau suesuega o le 3 Nifae 12, na e aoao ai e uiga i le ia atoatoa e pei o Iesu Keriso ma le Tama Faalelagi. O lenei lesona o le a fesoasoani e te tauloto ai le mau faasino ma le fasifuaitau autu o le mau mo le 3 Nifae 12:48, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.
Fausiaina o se siosiomaga mataalia e aoao ai. A o e saunia lesona ma fegalegaleai ma tagata aoga, vaavaai mo ni auala e valaaulia ai tagata aoga e auai ma le mataalia. O faataitaiga e aofia ai le valaaulia o tagata aoga e tusitusi i luga o le laupapa, tuuina atu mea latou te aoaoina i le vasega, pe filifili mai filifiliga eseese o suesuega. O le faia o lena mea o le a fesoasoani ai i tagata aoga e auai i le aoaoina ma fesoasoani ia i latou ia latalata atili atu ai i le Faaola.
Sauniuniga a le tagata aoga: Valaaulia tagata aoga e tauloto le 3 Nifae 12:48 a o lei o mai i le vasega. Atonu e te valaaulia i latou e faataitai le taulotoina o le mau mai le manatuaga i isi tagata o le vasega i le taimi e tau atu i le vasega, pe faafesagai, e ala i sāvali tusitusia, po o se isi lava auala.
Gaoioiga e Ono Mafai Ona Aoao Ai
O lenei lesona o le fuaitau o le atamai i aoaoga faavae ua mamanuina ina ia aoaoina pe a maea ona fai le lesona o le “3 Nifae 12:17–48,” o le lesona e faatatau mo le fuaitau o le atamai i aoaoga faavae o le 3 Nephi 12:48. Afai e manaomia le toe tuu atu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.
Faamatala ma tauloto
I le taimi o le lesona talu ai, sa e aoaoina ai le upumoni lenei: E finagalo Iesu Keriso ia tatou atoatoa e pei o Ia ma lo tatou Tama oi le Lagi.
Vaai faalemafaufau faapea e i ai sau uo e talitonu e lē o i ai ni faamoemoega o le Atua ia i tatou e sili atu nai lo le amiolelei ma le faaaloalo i isi.
-
E faapefea ona e faamatalaina le 3 Nifae 12:48 i se auala e mafai ona faaopoopo atu ai i le malamalama o lau uo?
Mafaufau e tuu atu i tagata aoga se taimi e tusi ai i lalo a latou tali i le fesili na muamua atu. A uma, valaaulia ni nai volenitia e faasoa mai i le vasega mea na latou tusia, faatino le talanoaga, pe faasoa atu a latou tali i se paga. A o tali mai tagata aoga, ia mautinoa ua latou malamalama o loo faamoemoe mai le Tama Faalelagi ma Iesu Keriso ia tatou taumafai e avea e faapei o i Laua, o le atoatoa e na o le fesoasoani mai a le Faaola e mafai ai, ma o le Togiola a Iesu Keriso ua faia ai le atoatoa o se mea e mafai ona tupu i le lumanai e ui lava i a tatou agasala ma mea sesē.
O le fuaitau autu o le mau mo le 3 Nifae 12:48 o le, Ia outou atoatoa e pei lava o au, po o lo outou Tamā o le o i le lagi e atoatoa.” Faaaoga le metotia lenei, po o se isi e te filifilia, e fesoasoani ai ia te oe e tauloto le mau faasino ma le fasifuaitau autu o le mau.
Filifili soo se metotia e fesoasoani ai i tagata aoga e tauloto le fasifuaitau autu ma le mau faasino mo lenei fuaitau. O le gaoioiga lenei o se faataitaiga o se tasi o auala e mafai ona e faia ai:
Mo le gaoioiga, tuu atu i tagata aoga taitasi se afa pepa ma fautuaina i latou e tusi ia fasifuaitau i soo se tulimanu o a latou pepa. O le taimi lava latou te faamaeaina ai le gaoioiga i a latou lava pepa, e mafai ona latou faafesuiaia pepa ma isi tagata aoga ma toe fai le gaoioiga.
Tusi le “3 Nifae 12:48” i le ogatotonu o se fasi pepa. I le tulimanu e tasi o le itulau, tusi ai upu “Ia atoatoa.” I se isi tulimanu, tusi ai “e pei lava o a’u.” I se isi tulimanu, tusi ai “po o lou Tama o i le lagi.” I le tulimanu mulimuli, tusi ai “e atoatoa.” Taumafai e tauloto le mau faasino ma le fasifuaitau autu o le mau e ala i le faapa’i atu o lau penitala po o lou tamailima i fasifuaitau taitasi i le faasologa, e amata i le mau faasino o loo i le ogatotonu. E mafai ona fesoasoani le fai leotele o upu a o e pa’i i ai. A uma ona faia lenei mea mo ni nai taimi, taumafai e toe fai le mau faasino ma le fasifuaitau atoa mai le manatuaga.
Faataitai le faaaogaina
Vaevae le vasega i ni vaega taitoatolu. Valaaulia tagata aoga taitoatasi e filifili se tasi o mataupu faavae o le mauaina o le malamalama faaleagaga (tagai Pepa Autu o Atamai i Aoaoga Faavae [2023], “Mauaina o le Malamalama Faaleagaga,” parakalafa 5–12). Fai atu i tagata aoga e toe faamanatu puupuu le mataupu faavae ona faamalamalama atu lea i a latou vaega.
Faaaoga le ata faataitai lenei e fesoasoani ia te oe e faaaoga ai aoaoga a le Faaola o loo i le 3 Nifae 12:48 ma mataupu faavae o le mauaina o le malamalama faaleagaga.
Ia lagona le saoloto e sui le igoa pe sui le ata faataitai e taulima lelei ai manaoga o au tagata aoga.
O Ioane o se alii talavou e talitonu i le Atua. Peitai, e i ai ni vaega o le talalelei e lē fiafia e mafaufau i ai. O se tasi o na mea o le apoapoaiga a le Faaola ina ia atoatoa. Sa taumafai o ia e faia ni suiga ma avea atili e faapei o Keriso ae e fai lava ma faavaivai. Na te lagona e pei ua toilalo o ia, o le atoatoa la mo ia e lē mafai.
Ina ia faaopoopo ni vaega eseese i gaoioiga suesue nei, mafaufau e suesue le vaega “Faatino i le faatuatua” o lenei lesona o se vasega ma isi vaega i ni vaega toalaiti po o ni paga. Ona mafai lea e tagata aoga ona tali taitoatasi mai le fesili mulimuli.
Iloilo manatu faavae ma fesili faatasi ai ma se vaaiga e faavavau
Ua aoao mai le Pepa Autu o le Atamai i Aoaoga Faavae e faapea, pe a feagai ma se faafitauli faigata, e mafai ona tatou “toe faatulaga le fesili (ia ese le vaai i le fesili) ma vaai i manatu e faavae i le tulaga faatonuina a le Alii o le upumoni nai lo le taliaina o manatu po o talitonuga o le lalolagi” (itulau 3). O fesili nei e mafai ona fesoasoani i lenei faagasologa.
-
O le a sou manatu e faapefea ona ese le silasila a le Alii i le atoatoa nai lo le toatele i le lalolagi?
-
E faapefea e lo tatou malamalama i le ata o le faaolataga ma le Togiola a Iesu Keriso ona fesoasoani tatou te malamalama lelei ai i mea o loo aoao mai e le Faaola i le 3 Nifae 12:48?
Saili le malamalama atili e ala i punaoa faalelagi ua filifilia
-
E mafai faapefea ona e faaaogaina mea ua e aoaoina i le 3 Nifae 12:48 e uiga i le atoatoa e tali atu ai i le popolega o Ioane?
Mafaufau e valaaulia tagata aoga e saili mo mau po o faamatalaga mai taitai o le Ekalesia e mafai ona fesoasoani ia Ioane e malamalama lelei ai i aoaoga a le Faaola o loo i le 3 Nifae 12:48. Afai e manaomia e tagata aoga se fesoasoani, e mafai ona e fautuaina atu nisi o mau o loo i lalo.
O loo i ai foi saunoaga o le konafesi i le vaega o “Gaoioiga Faaopoopo e Aoao ai” e mafai ona fesoasoani.
-
E mafai faapefea e malamalamaaga na e maua ona fesoasoani ia Ioane i lona popolega?
Faatino i le faatuatua
Faitau ia parakalafa 5–7 i le vaega o le “Mauaina o le Malamalama Faaleagaga i le Pepa Autu o le Atamai i Aoaoga Faavae, ma vaavaai mo le mea e mafai ona fai e Ioane e faatino ai i le faatuatua.
-
O lē fea o nei aoaoga e te manatu e mafai ona fesoasoani ia Ioane? Aisea?
-
O le a se mea e mafai ona tatalo e uiga i ai Ioane o le a faapea ona fesoasoani i lona tulaga?
-
O le a se mea o le a e fautuaina Ioane e fai e “ola ai i le faatuatua” seia oo ina ia maua le malamalama atili e uiga i lona gafatia e atoatoa ai?
Mafaufau e tuu atu i tagata a’oga e tali le fesili lenei i a latou api faamaumau mo su’esu’ega.
-
E mafai faapefea e mea ua e aoaoina i le 3 Nifae 12:48 e uiga i le atoatoa ona tosina ai ou lava lagona ma amioga?
Iloiloga o le atamai i aoaoga faavae
Mafaufau e tusi se pepa i luga o le laupapa ma tusi ai le mau faasino 3 Nifae 12:48 i le ogatotonu ma fasifuaitau i tulimanu taitasi e pei o le gaoioiga o le taulotoina i lenei lesona i lalo o le ulutala “Faamalamalama ma tauloto.” Faasino i fasifuaitau taitasi i le faasologa sa’o ma tuu atu i tagata aoga e toe fai faatasi ia fasifuaitau. Tapē le fasifuaitau e tasi ma toe fai le gaoioiga. Faaauau pea ona tapēese ma toe fai seia tapēese uma fasifuaitau ma mau faasino.