Helamana 13, Vaega 1

O Le Alofa Mutimutivale o le Alii

O Iesu Keriso o loo opoina se tasi

O le a sou manatu i le finagalo o le Atua e uiga ia i tatou pe a tatou agasala? E toatele sa Nifae sa fouvale i le Atua ma Ana poloaiga, o lea na auina atu ai e le Atua ia Samuelu le sa Lamana ia i latou ma se savali manino e salamo ina ia mafai ona faamagaloina i latou. O lenei lesona e mafai ona fesoasoani e te malamalama atili ai i le natura alofa mutimutivale ma le faamagalo atu o le Alii.

Taulai atu i le natura ma uiga o le Tama Faalelagi ma Iesu Keriso. O le ola e faavavau o le iloa lea o le Tama Faalelagi ma Iesu Keriso (tagai Ioane 17:3). Valaaulia tamaiti aoga e taulai atu i mea o loo aoao mai e tusitusiga paia e uiga i le natura ma uiga o le Tama Faalelagi ma Iesu Keriso. O le malamalama atili i lo La’ua natura ma uiga e mafai ona faamalosia ai le sootaga a tamaiti aoga ma i La’ua.

Sauniuniga a le tamaitiiti aoga: Valaaulia tamaiti aoga e o mai saunia e faasoa atu o latou lagona ina ua uma ona latou oo i le natura alofa mutimutivale ma le lotofaamagalo o le Alii i o latou olaga. Faamanatu ia i latou e aua nei faasoa atu ni mea e patino tele.

Gaoioiga e Ono Mafai Ona Aoao Ai

Pagatia mai le agasala

Ia maitau o le lesona e sosoo ai o le a taulai atu i le salamo. Mafaufau i lenei mea a o e fuafua pe faapefea ona sili atu ona lelei le aoaoina atu o lenei lesona.

Faaali atu pe faitau le faamatalaga lenei. I se isi itu, valaaulia tamaiti aoga e fatu se tulaga faalemafaufau ae ono tupu i se tagata atonu e lagonaina le pagatia po o le le mautonu ona o le agasala, ma faaaoga lena mea e suitulaga i le tala lenei.

Sa faamatala e Peresitene Russell M. Nelson le tala lenei e uiga i se tamaitai sa i ai i tulaga faigata. Mafaufau i mea e te manao ina ia ona iloa e uiga i le Tama Faalelagi ma Iesu Keriso. Matamata le “Salamo ma le Liuaina,” o loo maua i le ChurchofJesusChrist.org, mai le faailo taimi 0:00 i le 0:50, pe faitau le faamatalaga lenei.

Peresitene Russell M. Nelson

A o ma tietie atu ma Elder David S. Baxter i se konafesi a le siteki, sa ma afe ai i se faleaiga. Mulimuli ane ina ua ma toe foi atu i le ma taavale, na alu ane se tamaitai ma tauvalaau mai ia i ma’ua. Sa ma tetei i ona foliga vaaia. O ana teuga (po o le leai foi) e mafai ona ou faaupuina faaaloalo o le “soona fai.” Sa ia fesili mai pe o maua o ni toeaina i le Ekalesia. Sa ma tali atu ioe. Toetoe lava a le mataofiofia, sa ia faamatala mai le tala i lona olaga matautia, na tumu i le agasala. O lenei, i le na o le 28 o ona tausaga, ua matuai faanoanoa lava o ia. Sa ia lagonaina lona le aoga ma le leai o se faamoemoega e ola ai. … Sa ia aioi mai ma loimata ma fesili pe i ai lava se isi faamoemoe mo ia, i soo se auala e sola ese ai mai lona tulaga pagatia o loo i ai. (Russell M. Nelson, “Salamo ma le Liuaina,” Ensign po o le Liahona, Me 2007, 102)

• Afai e te talanoa atu i lenei tamaitai, o a upumoni e uiga i le Tama Faalelagi ma Iesu Keriso e te manao ia ona iloa?

• O le a se mea e te faia e taumafai e fesoasoani ai i lenei tamaitai?

• E mafai faapefea e ona lagona o i ai nei ona aafia ai lona manao e liliu atu i le Faaola?

Atonu o oe po o se tasi e te iloa na lagonaina foi le le agavaa po o le le mafaamagaloina. Mafaufau loloto i mea e te talitonu moni i ai e uiga i le Tama Faalelagi ma Iesu Keriso ma le faamagaloga.

A o e suesueina lenei lesona, vaavaai mo ni malamalamaaga i le natura o le Tama Faalelagi ma Iesu Keriso ma o La’ua finagalo e uiga ia i tatou e tusa lava pe tatou te agasala. Mafaufau loloto pe mafai faapefea e nei upumoni ona fesoasoani ia te oe ma i latou e te iloa.

Samuelu le sa Lamana

E faapei o lenei tamaitai, na mauaa sa Nifae i le agasala. I Lona alofa, na auina atu ai e le Alii le perofeta o Samuelu ma se savali mo i latou.

Faaali atu mau faasino nei. Mafaufau e tuu tamaiti aoga i ni paga ma valaaulia se tamaitiiti aoga se toatasi e faitau ia fuaiupu o i le mataupu 13 ma le isi e faitau ia fuaiupu i le mataupu 14 ma le 15. A uma ua lava se taimi, valaaulia tamaiti aoga e aoao e le tasi le isi i mea na latou maua ma pe aisea e taua ai ia i latou.

Faitau le Helamana 13:5–8, 11, 39; 14:11–13; 15:3, ma vaavaai mo mea ua e aoaoina e uiga i le Alii, aemaise lava malamalamaaga ia e ono fesoasoani ia i tatou pe a tatou agasala. (Atonu e fesoasoani le iloa o le aoaiina [tagai Helamana 15:3] o lona uiga o le faatonu po o le a’oa’i. Tagai i le Taiala i Tusitusiga Paia, “Aoai, Aoaiga,” scriptures.ChurchofJesusChrist.org)

Valaaulia tamaiti aoga e faasoa atu mea na latou aoaoina. Tusi i luga o le laupapa soo se mataupu faavae latou te faasoaina mai. Afai e aoga, mafaufau e fai atu nisi o fesili nei:

• Aisea o le a avea ai o se faamanuiaga le mauaina o se lapataiga e uiga i taunuuga le lelei o le a tatou feagai pe afai tatou te le salamo? E faapefea ona faaalia e le aoaiga a le Alii Lona alofa?

• Aisea o le a avea ai le oo mai o le savali a Iesu Keriso i le lalolagi, faatasi ai ma lo tatou gafatia e salamo ai, o se “tala fiafia”? Helamana 13:7).

• O a fasifuaitau o loo faaalia ai le naunau o le Alii e faamagalo pe afai e salamo sa Nifae, e ui lava ina sa latou faia se agasala matuia?

A o faasoa mai e tamaiti aoga ia fasifuaitau, ia mautinoa ua manino po o le a le fuaiupu o loo i ai ina ia mafai foi e isi tamaiti aoga ona faailoga na fasifuaitau.

O le alofa mutimutivale ma le faamagaloga a le Alii

O se tasi o upumoni ua tatou aoao mai nei fuaitau e faapea e lapataia ma le alofa mutimutivale e le Alii tagata e uiga i taunuuga o le agasala ma faamagalo i latou o e salamo.

Sa molimau mai le Perofeta o Iosefa Samita (1805–44) e faapea “ua i ai tagata uma i totonu o le faamagaloga o le alofa mutimutivale” (“Discourse, 3 October 1841, e pei ona Lomia i le Times and Seasons,” 577, josephsmithpapers.org).

• E mafai faapefea e le malamalama ai i le natura alofa mutimutivale ma le loto faamagalo o le Alii ona aafia ai le ala tatou te manatu ai i a tatou agasala ma e uiga i le salamo?

E taua le malamalama e ui ina alofa mutimutivale le Alii, ae e faamasinotonu atoatoa foi o Ia. Na te le faaseloa pe faateaeseina ia taunuuga o a tatou agasala. Ae ona sa totogi e le Faaola a tatou agasala i Lana Togiola ma “faamalie manaoga o le faamasinogatonu” (Mosaea 15:9), ua Ia ofoina mai ia i tatou le faamagaloga pe a tatou salamo.

• E mafai faapefea e le iloaina o le faamasinogatonu atoatoa ma le alofa mutimutivale o le Alii ona aafia ai lou sootaga ma Ia?

Vaai faalemafaufau i le eseesega e mafai ona faia e se malamalama loloto atu e uiga i le Alii i le tamaitai na saunoa i ai Peresitene Nelson i le amataga o le lesona. Ia saunia se faamalamalamaga mo ia e ala i le faia o mea nei:

Faamanatu i tamaiti aoga e faaaoga a latou sauniuniga mo le vasega i le gaoioiga lenei. E mafai ona latou faamaeaina le gaoioiga i ni paga. E mafai e se tamaitiiti aoga e toatasi ona faamaea le gaoioiga A, ae o le isi le gaoioiga E. E mafai ona latou faasoa atu mea na latou faia i le tasi ma le isi ona faamaea faatasi lea o le gaoioiga I.

Mo le gaoioiga I, e mafai e tamaiti aoga ona [fai se] tala-faatino e faapei o loo latou aoaoina le fafine. Savalivali solo i le potu ma faalogologo a o latou aoao atu. Fuafua pe latou te manaomia se fesoasoani faaopoopo e malamalama ai i le savali a Samuelu. Afai latou te manaomia, mafaufau e faasino atu upu po o fasifuaitau patino mai fuaitau e fesoasoani ai ia i latou i le gaoioiga A.

Atonu e te manao e faaali atu faatonuga mo gaoioiga taitasi.

1. Filifili ia le itiiti ifo ma le lua ni fasifuaitau mai fuaiupu e te faitauina i le Helamana, pe faailoa atu isi fuaitau ia e faaalia ai le natura faamagalo o le Alii pe a tatou salamo, e pei o Mosaea 26:30 po o le Moronae 6:8. E mafai faapefea ona fesoasoani nei fasifuaitau i lenei tamaitai?

2. E aunoa ma le faasoaina atu o faamatalaga e faatatau i agasala ua tuanai, tuuina atu se faataitaiga mai lou olaga, olaga o isi, po o tusitusiga paia lea e aliali manino mai ai le natura alofa mutimutivale ma le faamagalo atu o le Alii. Ina ia vaai i nisi o faataitaiga, e mafai ona e iloiloina le Luka 7:36–50 po o le Enosa 1:1–8 pe matamata le “Valiina i le Tulimanu” (3:41). O loo maua lenei vitio i le ChurchofJesusChrist.org.

3. I le faaaogaina o fuaitau po o faataitaiga na e faailoa atu, fesoasoani i le tamaitai ia malamalama e faapea, e faalautele mai e le Alii Lona alofa mutimutivale ma le faamagaloga ia i tatou pe a tatou salamo.

Mafaufau e faasoa atu foi ni fasifuaitau po o ni aafiaga.

Sa faasoa mai e Peresitene Nelson le mea na tupu i lenei tamaitai. Matamata le “Salamo ma le Liuaina” mai le faailo taimi 0:50 i le 1:27, o loo maua i le ChurchofJesusChrist.org, pe faitau le faamatalaga lenei.

Peresitene Russell M. Nelson

A o ia tautala, sa amata ona tino mai le matagofie o lona agaga. O le aioi mai ma loimata sa ia fesili mai pe i ai lava se isi faamoemoe mo ia, i soo se isi auala lava e sola ese ai mai lona tulaga pagatia o loo i ai.

“Ioe,” sa ma tali atu ai, “o loo i ai le faamoemoe. O le faamoemoe e fesootai atu i le salamo. E mafai ona e suia. E mafai ona e ‘sau ia Keriso, ma ia faaatoatoaina ia te ia’ [Moronae 10:32].” Sa ma uunaia o ia ina ia aua nei tolopoina [tagai Alema 13:27; 34:33]. Sa masūsū ma le faamaulalo o ia ma faafetai faamaoni mai ia i ma’ua. (Russell M. Nelson, “Salamo ma le Liuaina,” Ensign po o le Liahona, Me 2007, 102)

Molimau atu e uiga i le alofa mutimutivale ma le faamagaloga a le Alii. Uunaia tamaiti aoga e mafaufau loloto ma le faamaoni i mea nei.

O le lesona e sosoo ai o le a taulai atu i le salamo ma le auala e mafai ona tatou manumalo ai i soo se mea e faalavefau i lo tatou salamo.

Faaalu se taimi e mafaufau loloto ai ma le faamaoni pe mafai faapefea e le malamalama sili atu e uiga i le Alii ona fesoasoani ia te oe pe a e agasala. Tusi i lalo mea na e aoaoina ma lagonaina ia na anoa ia te oe ma pe aisea foi. Mafaufau pe faapefea e le sili atu o le malamalama i le natura alofa mutimutivale ma le faamagalo atu o le Alii, atoa ma le salamo ona mafai ona aumaia le filemu sili atu i lou olaga.

Mafaufau e faasoa atu mea na e aoaoina ma lagonaina i le asō i se tasi e te alofa i ai.

Manatu ma Talaaga o Faamatalaga

E faapefea ona galulue faatasi le faamasinogatonu ma le alofa mutimutivale o le Alii?

Na aoao mai Elder D. Todd Christoffferson o le Korama a Aposetolo e Toasefululua:

Elder D. Todd Christofferson

O se faamaoniga faamalosi o Lana faamasinogatonu na faavae ai e le Atua le mataupu faavae o le alofa mutimutivale. Ona e amiotonu o Ia na ala ai ona Ia faavaeina ni auala e faataunuu ai e le alofa mutimutivale lana matafaioi taua i lo tatou taunuuga e faavavau. O lea la, “e faaaoga e le faamasinogatonu ona manaoga uma, ma e maua foi e le alofa mutimutivale mea uma e a ia lava” [Alema 42:24].

Ua tatou iloa o “mafatiaga ma le oti o lē na le faia e ia se agasala, o lē na fiafia tele i ai [le Tama]; … le toto o [Lona] Atalii na faamaligiina” (Mataupu Faavae ma Feagaiga 45:4) lea ua faamalieina ia manaoga o le faamasinogatonu, faalautele mai le alofa mutimutivale, ma togiola i tatou. E oo lava, “e tusa ma le faamasino[ga]tonu, e le mafai ona faataunuuina o le fuafuaga o le togiola, ua na o tulaga lava o le salamo” (Alema 42:13; ua faaopoopo le faamamafa). O se mea e manaomia ma le avanoa mo le salamo lea e faatagaina ai le alofa mutimutivale e faatino lana galuega e aunoa ma le solipalaina o le faamasinogatonu. (D. Todd Christofferson, “Saoloto e Faavavau, e Galue mo i Latou Lava,” Ensign po o le Liahona, Nov. 2014, 17–18)

Gaoioiga Faaopoopo e Aoao Ai

O le faamasinogatonu a le Atua ma le toasa o le Alii

Afai o le a manuia tamaiti aoga mai le malamalama atili i le faamasinogatonu ma le toasa o le Atua e pei ona faamatalaina e Samuelu, mafaufau e valaaulia i latou e faitau ma le totoa i le saunoaga a Elder D. Todd Christofferson o le Korama a Aposetolo e Toasefululua i le vaega o “Manatu ma Talaaga o Faamatalaga” pe a uma ona latou suesue i fuaiupu ua fautuaina atu i lenei lesona. Mafaufau e fesili atu pe faapefea ona fesootai le faamasinogatonu ma le alofa mutimutivale o le Alii.

Valaaulia tamaiti aoga e faasoa atu pe mafai faapefea e le malamalama ai i le atoatoa o le Atua i le faamasinogatonu ma le alofa mutimutivale ona aafia ai lo latou sootaga ma Ia.

Tatala lou fofoga ma o le a faatumuina

Ina ia fesoasoani i tamaiti aoga ia lagonaina le faateleina o le mautinoa i le faasoaina atu o upumoni o le talalelei a Iesu Keriso i isi, valaaulia i latou e suesue le Helamana 13:3–5 ma vaavaai mo mea na faia e le Alii mo Samuelu a o ia naunau e tatala lona fofoga. Fai atu ia i latou e faasoa mai ni mea latou te lagona na tuuina e le Alii i o latou loto po o taimi na faatumuina ai e le Alii o latou fofoga a o latou tatalaina. Ona mafai lea ona e valaaulia tamaiti aoga e sue nisi faataitaiga po o fuaitau e faapupula mai ai le ala e faatumu ai e le Alii o tatou gutu a o tatou tatalaina mo Ia. O faataitaiga e mafai ona aofia ai mea nei: Mataupu Faavae ma Feagaiga 11:21; 31:3; 84:85; 100:5–8; Helamana 5:13–19; Luka 21:14–15.

Valaaulia tamaiti aoga e faasoa atu po o a mea ua fesoasoani nei fuaitau ia i latou e malamalama atili ai e uiga i le Tama Faalelagi ma Iesu Keriso ma pe mafai faapefea e lenei malamalamaaga ona aafia ai o latou olaga.