Seminare
Alema 57: Taumafai Ai e Usiusitai i Poloaiga E Le Aunoa

“Alema 57: Taumafai Ai e Usiusitai i Poloaiga E Le Aunoa,” Tusi Lesona a le Faiaoga o le Tusi a Mamona (2024)

“Alema 57,” Tusi Lesona a le Faiaoga o le Tusi a Mamona

Alema 57

Taumafai Ai e Usiusitai i Poloaiga E Le Aunoa

Ata
autau talavou manunu’a

O a ni ou uiga faaalia i le tausia o poloaiga? Aisea e taua ai ou uiga faaalia? A o tau ai i se isi taua matautia, sa usiusitai le autau talavou “i upu uma o poloaiga ma le sa’o atoatoa,” ma tuu atu “o latou faalagolago i le Atua e le aunoa” (Alema 57:21, 27). O lenei lesona ua mamanuina e fesoasoani ia te oe e taumafai ai e usiusitai e le aunoa i poloaiga a le Atua.

Fesoasoani i tagata aoga e faataitai le faaaogaina o tomai suesue i le āluga o le tausaga. E mafai e faiaoga ona faaali atu i tagata aoga le auala e faaaoga ai le tele o tomai eseese mo le suesueina o tusitusiga paia ma metotia e aoao ai i le vasega. Atonu e te manao e taofi ma talanoaina puupuu pe mafai faapefea ona faaaoga se metotia po o se tomai ona faataitai lea i le faagasologa o le lesona. Uunaia tagata aoga e faaaoga foi le tomai i a latou suesuega faaletagata lava ia.

Sauniuniga a le tagata aoga: Valaaulia tagata aoga e mafaufau i faataitaiga o le usiusitai o le Faaola i le Tama Faalelagi ma mafaufau loloto i mea e mafai ona latou aoaoina mai i na faataitaiga.

Gaoioiga e Mafai Ona Aoao Ai

Uiga faaalia i poloaiga

Ina ia fesoasoani e saunia tagata aoga e aoao e uiga i le tausia o poloaiga, mafaufau e valaaulia i latou e fai le gaoioiga lenei. Uunaia tagata aoga e fai a latou faamatalaga ia moni ma talafeagai.

Faamatala ni uiga faaalia eseese se tolu e ono i ai i se tasi i le tausia ai o poloaiga a le Atua ma pe aisea.

A o fefaasoaa’i tagata aoga, mafaufau e tusi uiga faaalia i luga o le laupapa. Uunaia tagata aoga e faasoa mai ni mafuaaga moni e ono maua ai e se tasi lenei uiga.

Faaalu sina taimi e tusi ai tali i fesili nei i lau api talaaga mo suesuega:

  • O le a sou uiga faaalia i le tausiaina o poloaiga a le Atua? Aisea e taua ai ou uiga faaalia?

  • Afai e te lē o taumafai i le taimi nei e tausia poloaiga i le mea sili e te mafaia, o le a se mea o taofia oe mai le faia o lena mea?

A o e suesue i le asō, vaavaai mo mataupu faavae e uiga i le usiusitai e ono musuia ma faaosofia ai oe ma fesoasoani ia te oe i soo se fesili po o ni atugaluga. Mafaufau loloto pe mafai faapefea ona latou faatatau ma faamanuiaina ai lou olaga.

Autau talavou

I le lesona talu ai, sa e aoao ai i le ala na fesoasoani ai le autau talavou e 2,000 ia Anetipa ma ona tagata e faatoilalo “le autau sili ona malosi” ma “sili ona toatele” a sa Lamanā i lena vaega o le laueleele (tagai Alema 56:34). I le Alema 57, na faaauau ai e Helamana lana tusi ia Kapeteni Moronae. E onosefulu isi atalii o le nuu o Amona na faatasi atu i lana autau (tagai Alema 57:6), ma sa feagai fitafita talavou e 2,060 ma se isi taufaamata’u. Sa osofa’ia e sa Lamanā ia sa Nifaē ma na toeititi a faatoilaloina i latou ae faatasi atu loa iā Helamana ma ona tagata se vaega o fitafita o ē sa auina atu muamua e momoli pagota sa Lamanā (tagai Alema 57:1–18).

O tomai e lua e suesue ai tusitusiga paia e mafai ona faalolotoina ai lau suesuega o lenei tala ma fesoasoani ai ia te oe e faaaoga ona lesona i lou olaga o le faailoa lea ma mafaufau loloto i upu po o fasifuaitau taua.

Faitau le Alema 57:19–23 e vaai ai i le mea na tupu. Mafaufau e faailoga upu ma fasifuaitau o loo faamatala ai le autau talavou a Helamana.

Ina ia faataitai lenei tomai, mafaufau e suesue faatasi le Alema 57:19–20 ma faamatala upu ma fasifuaitau e pei o le “mausali” ma le “lē faavaivai.” Mafaufau e uunaia tagata aoga e sue ia uiga o nei upu ma faasoa mai pe faapefea e nei uiga ona aafia ai lo latou malamalama. Ona valaaulia lea o tagata aoga e sue isi upu ma fasifuaitau taua i le Alema 57:21–23 ma faasoa mai o latou manatu e uiga i ai.

I le fuaiupu 21, mafaufau e faailoga pe na faapefea ona faamatala e Helamana le usiusitai o nei alii talavou. Faitau le Alema 58:40, ma vaavaai mo uiga faaalia o fitafita i le Atua ma Ana poloaiga ina ua mavae le isi taufaamata’u tau i vaega’au.

  • O le ā sou manatu i le uiga o le “fai upu uma o poloaiga ma le sao atoatoa” (Alema 57:21) ma “tausisi e tausi … ana poloaiga e le aunoa” (Alema 58:40)?

  • E faapefea e lo tatou faatuatua, ma le manatuaina o Iesu Keriso ona tosina ai lo tatou manao ma le gafatia e usiusitai i poloaiga a le Atua?

Faitau le Alema 57:24–27, ma vaavaai mo upu po o fasifuaitau o loo faaalia ai le ala na faamanuiaina ai atalii o Helamana i la latou taua lona lua ona o lo latou faatuatua ma le usiusitai i le Atua.

Valaaulia tagata aoga e faasoa mai po o a fasifuaitau e tumatila ia i latou ma pe aisea latou te manatu ai e taua ia fasifuaitau.

  • O le a se mea na e aoaoina mai lenei tala lea e mafai ona fesootai i lou olaga i le asō?

Uunaia tagata aoga e faasoa mai ni mataupu faavae eseese. Mafaufau e tusi tali i luga o le laupapa.

O se mataupu faavae e tasi e mafai ona tatou aoaoina o le afai tatou te tuu atu lo tatou faalagolago i le Atua ma taumafai e tausi e le aunoa Ana poloaiga, ona Ia faamanuiaina lea o i tatou e ala i Lona mana ofoofogia.

  • E mafai faapefea e le iloaina o loo i ai “se Atua faamasinotonu” o lē ua i ai le “mana faavavega” ma le “mana ofoofogia” (Alema 57:26) ona aafia ai o tatou uiga faaalia i le usiusitai ia te Ia?

  • O le a se uiga e te manatu e finagalo le Alii tatou te maua pe a tatou taumafai e tausi Ana poloaiga ae lē ausia le usiusitai atoatoa? E faapefea ona fesoasoani lou malamalama i le Togiola a Iesu Keriso e tali ai lenei fesili?

E taua le malamalama ai e faapea afai tatou te usiusitai i Ana poloaiga, o le a faamanuiaina i tatou e le Atua i Lana lava ala ma le taimi. I a latou taua uma e lua, sa faamanuiaina ai le autau talavou i le faasaoina o o latou ola e ui lava i fetaua’iga ma manuaga matautia.

Tuu atu i tagata aoga ni nai minute e fai ai ia lē itiiti ifo ma le lua o mea nei.

  1. Faitau ia lē itiiti ifo ma le lua o fuaitau nei e faateleina ai lou malamalama i faamoemoega o poloaiga a le Atua ma pe faapefea ona Ia faamanuiaina oe mo lou usiusitai: Aperaamo 3:25; Ioane 14:15; Mosaea 2:41; Alema 9:13.

  2. Mafaufau i faataitaiga o le usiusitai o le Faaola i le Tama Faalelagi, ma mafaufau loloto i mea ua e aoaoina mai Lana faataitaiga. Na aoao mai Elder Robert D. Hales (1932–2017) o le Korama a Aposetolo e Toasefululua e faapea “o lo tatou alolofa i le Faaola o le ki lea i le usiusitai faale-Faaola” (“Afai Tou te Alofa Mai ia te Au, Ia Outou Tausi Mai i Au Poloaiga,” Ensign po o le Liahona, Me 2014, 37). Mafaufau i nisi o mafuaaga e te alofa ai i le Faaola ma pe faapefea e lena alofa ona aafia ai ou uiga faaalia i le usitaia ai o poloaiga.

  3. Manatunatu i auala na e usiusitai ai i poloaiga a le Atua ma faamanuiaga ua Ia tuuina mai ia te oe mo lou usiusitai.

A uma ona fai e tagata aoga, valaaulia i latou e fai le mea sili latou te mafaia e mulimuli ai i nei faatonuga: Tu i luga. Saili se tasi i totonu o le potu, ma faasoa atu mea na e aoaoina mai se tasi o galuega. Sue se isi tagata i totonu o le potu ma faasoa atu ia i latou mea na e aoaoina mai se tasi o isi galuega. Toe foi atu i lou nofoaga.

A uma ona fai e tagata aoga, valaaulia i latou e faasoa mai i le vasega se mea na latou aoaoina e ala i a latou lava suesuega po o se mea anoa na faasoa mai e se tasi o le vasega.

Mafaufau i se tasi o poloaiga a le Atua. Faamatala pe faape’ī foliga moni o se talavou i aso nei o loo taumafai e manatua le Alii ma usiusitai e le aunoa i lenei poloaiga. Ona faamatala lea po o a faamanuiaga e ono maua e se talavou e usitai i lenei auala.

  • O a nisi o mafuaaga atonu tatou te lagona ai le faaosoosoina ia aua ne’i faia le mea sili tatou te mafaia e usitai ai i se poloaiga? E mafai faapefea ona tatou faatoilaloina nei faaosoosoga?

  • E faapefea e le taumafai ai e tausia poloaiga e le aunoa ona manaomia ai pea i tatou e faalagolago i le Faaola o Iesu Keriso?

Ina ia faaiuina lenei lesona, fai se sini i lau api talaaga mo suesuega pe faapefea ona e manao e “manatua le Alii [lou] Atua mai lea aso i lea aso; [ma] … tausisi e tausi … ana poloaiga e le aunoa” (Alema 58:40). Atonu e te filifilia se poloaiga faapitoa e te manao e usitaia atili. I le avea o se vaega o lau sini, mafaufau e tuu atu ia te oe lava se taimi—mo se faataitaiga, “O le a ou taumafai e tatalo faamaoni i le taeao ma le po mo le isi lima aso” po o le “O le a ou i le aso Sapati mo le isi fa vaiaso.”

Atonu e fesoasoani le iloa e faapea o le a i ai se avanoa i le lesona o le “Iloilo Lou Aoaoina 7” mo tagata aoga e iloilo ai lo latou alualu i luma.