“Doktrinal nga Kahanas: Alma 41:10—‘Ang Pagkadaotan Dili Mahitabo Nga Kalipay,’” Manwal sa Magtutudlo sa Basahon ni Mormon (2024)

“Doktrinal nga Kahanas: Alma 41:10,” Manwal sa Magtutudlo sa Basahon ni Mormon

Doktrinal nga Kahanas: Alma 41:10

“Ang Pagkadaotan Dili Mahitabo Nga Kalipay”

Imahe

drowing sa usa ka masulob-on nga batan-ong lalaki

Sa Alma 41:10, imong nakat-onan nga “ang pagkadaotan dili mahitabo nga kalipay.” Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa Alma 41:10, mapasabot ang doktrina, ug mabansay ang paggamit sa mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Tabangi ang mga tigkat-on nga mahimong aktibong mga sumasalmot. Aktibo ang mga estudyante kon iapil nila ang ilang mga hunahuna ug mga kasingkasing sa pagkat-on sa ebanghelyo. Pipila ka mga paagi sa pagdapit og aktibong pagsalmot naglakip sa pagtabang sa mga estudyante sa pagdiskobre sa kalabotan sa mga kamatuoran sa ebanghelyo; pag-awhag kanila sa pagpangutana ug pagtinguha og mga tubag; ug pagdapit kanila sa pagpakigbahin sa ilang mga panabot, mga kasinatian, ug mga pagbati ug sa pagpraktis sa mga kahanas sa pagtuon sa kasulatan ug sa paggahin og panahon sa pagpamalandong ug pag-ampo.

Pagpangandam sa estudyante: Dapita ang mga estudyante sa pagsag-ulo sa Alma 41:10.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Alma 41,” nga mao ang pangkonteksto nga leksiyon alang sa tudling sa doktrinal nga kahanas sa Alma 34:9–10. Kon kini nga leksiyon sa tudling sa doktrinal nga kahanas kinahanglang ibalhin sa laing semana, seguroha nga itudlo usab ang katugbang nga leksiyon sa konteksto niana nga semana.

Isag-ulo ug ipasabot

Ikonsiderar ang pagdasig sa mga estudyante sa pagsag-ulo kutob sa ilang mahimo sa tudling sa doktrinal nga kahanas.

Gamita ang mosunod nga mga kalihokan o laing epektibong paagi sa pagtabang sa mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan sa Alma 41:10 ug ipasabot ang doktrina nga gitudlo niini nga tudling.

Bahina ang mga estudyante ngadto sa paresan. Ipasulti og kusog sa unang estudyante ang unang mga pulong: “ang pagkadaotan.” Ipasulti og kusog sa ikaduha ang una ug ikaduhang mga pulong: “ang pagkadaotan dili mahitabo.” Ipadayon ang pagdugang og pulong sa matag higayon ug sa kataposan ang pakisayran aron ang kataposang estudyante makasulti sa tibuok hugpong sa mga pulong ug sa pakisayran: “ang pagkadaotan dili mahitabo nga kalipay (Alma 41:10).”

Dapita ang mga estudyante sa pagsubli niini nga proseso sa makadaghang higayon, nga magpulipuli kon si kinsa sa estudyante ang mouna sa matag higayon.

Paghunahuna og sitwasyon diin makatabang alang sa usa ka tawo nga mahibalo sa doktrina nga gitudlo diha sa Alma 41:10. Dayon ipasabot kon sa unsang paagi ang doktrina makatabang sa sitwasyon.

Ikonsiderar ang pagdapit sa mga estudyante nga makighisgot sa usag-usa pinaagi sa pagpakigbahin sa ilang mga klasmeyt sa sitwasyon nga ilang gihunahuna. Sa higayon nga gipakigbahin na ang sitwasyon, mahimong makapasabot ang klasmeyt kon sa unsang paagi makatabang ang mga kamatuoran diha sa Alma 41:10.

Pagbansay sa paggamit

Bahina ang klase ngadto sa mga grupo nga tinagtulo. Hangyoa ang matag estudyante sa pagpili og managlahinga baroganan sa pag-angkon og espirituhanong kahibalo ug sa pagbasa sa katugbang nga mga parapo alang sa iyang baroganan diha sa Mahinungdanon nga Dokumento sa Doktrinal nga Kahanas (2022). Kon mahuman na ang mga estudyante, dapita sila sa pagpasabot sa baroganan ngadto sa ilang grupo. Ang mosunod nga pagbansay sa pagpares makatabang sa mga estudyante sa paghinumdom sa unsay ilang nakat-onan. Ang mga tubag ngadto sa pagbansay sa pagpares mao ang (1) B, F; (2) C, E; ug (3) A, D.

Rebyoha ang matag usa sa mosunod nga tulo ka mga baroganan sa pag-angkon og espirituhanong kahibalo diha sa Mahinungdanon nga Dokumento sa Doktrinal nga Kahanas (2022). Dayon ipares ang mga pamahayag A–F ngadto sa tukma nga baroganan. Ang matag baroganan adunay duha ka mga pamahayag nga may kalabotan niini.

“Ang Unang Kapangulohan ug ang Korum sa Napulog Duha ka Apostoles—mga propeta sa Ginoo dinhi sa kalibotan karon—mao ang importante kaayong tinubdan sa kamatuoran.”
“Samtang magtinguha kita sa pagpalambo sa atong panabot ug sa pagsulbad sa mga problema, importante nga mosalig kita sa pagpamatuod nga ato nang naangkon mahitungod ni Jesukristo.”
“Atong ikonsiderar ang [mga pangutana] diha sa kinatibuk-ang kahulogansa plano sa kaluwasan ug sa mga pagtulun-an sa Manluluwas.”
“Ang pagkat-on sa pag-ila ug paglikay sa dili kasaligang mga tinubdan makapanalipod nato gikan sa sayop nga impormasyon ug niadtong mga nagtinguha sa pagdaot sa atong tinuohan.”
“Tinguhaon nato ang tabang sa Espiritu Santo aron makita ang mga butang sama sa pagkakita niini sa Ginoo.”
“Samtang padayon kita nga mangita og mga tubag, kinahanglan nga magpakabuhi kita sa hugot nga pagtuo—mosalig nga sa kataposan kita makadawat sa mga tubag nga atong gitinguha.”

Kon ang mga estudyante gibutang ngadto sa mga grupo aron sa pagrebyo sa mga baroganan sa pag-angkon og espirituhanong kahibalo, mahimong makatabang nga ipabilin sila diha sa mga grupo.

Ipakita ang mosunod nga senaryo aron ang mga estudyante makakita niini samtang magtinabangay sila niini.

Si Carlos, usa ka miyembro sa Simbahan, naglisod nga makita ang kamahinungdanon sa pagsunod sa mga sugo sa Dios. Bag-ohay lang siya miingon kanimo, “Nakaila ko og daghang mga tawo kinsa milapas sa mga sugo ug ingon og adunay nindot nga mga kinabuhi. Unsaon nimo pag-ingon nga kinahanglan nimong sundon ang mga sugo aron magmalipayon?” Imong makita ang katim-os sa pangutana ni Carlos apan gibati nimo nga nagkinahanglan ka og igong panahon sa paghunahuna aron sa pagtubag. Nagkasabot mong duha nga maghisgot pa bahin sa iyang pangutana pagkasunod adlaw.

Gamita ang unsay imong nakat-onan ug gibati samtang nagtuon sa Alma 41:10 ug sa mga baroganan sa pag-angkon og espirituhanong kahibalo aron sa pagpangandam sa paghisgot sa pangutana ni Carlos.

Tinguhaa ang dugang nga panabot pinaagi sa balaanong gitudlo nga mga tinubdan

Ang mga kasulatan balaanong gitudlo nga mga tinubdan nga makatabang kanato sa pagtubag sa atong mga pangutana. Basaha ang Alma 41:10 ug pangita og bisan og usa ka laing tudling sa doktrinal nga kahanas nga makatabang kanimo sa pagtubag.

Mahimong magtinabangay ang mga estudyante diha sa ilang mga grupo sa pagpangita ug paghisgot og dugang nga mga tudling sa doktrinal nga kahanas nga makatabang kang Carlos. Pipila ka makatabang nga mga tudling naglakip sa 2 Nephi 2:25, 27 ug Mosiah 2:41.
Paghunahuna og pipila ka mga tinubdan nga imong idapit kang Carlos sa pagrebyo alang sa dugang nga impormasyon. Mahimo pa gani nimo ipasabot kon unsay nakapahimo sa tinubdan nga kasaligan mahitungod sa espirituwal nga mga butang.

Susihon ang mga konsepto o mga pangutana inubanan sa mahangtorong panglantaw

Ang mga estudyante diha sa mga grupo mahimong matag-usa nga makatubag sa usa sa mosunod nga mga pangutana nga mag-inusara, dayon ipakigbahin ang ilang mga tubag ngadto sa ilang grupo.

Tabangi ang mga estudyante sa pag-ila sa mga pangagpas nga mahimong anaa si Carlos. Kon ang mga estudyante nanginahanglan og tabang, ikonsiderar ang pagpakigbahin og usa o daghan pa sa mosunod: Mahimong maghunahuna si Carlos nga ang mga sugo mga pagpugong o nga kini naglimita sa iyang abilidad sa pagpili. Mahimong sayop ang iyang hunahuna nga ang kalipay makaplagan sa temporal nga kalipay.

Ang mosunod nga mga pangutana makatabang kanimo sa pag-ila sa mga pangagpas nga gihimo ni Carlos:

Unsa kaha ang iyang mga pangagpas mahitungod sa mga sugo o kalipay?
Unsa nga mga pagtulun-an sa ebanghelyo ang may kalabotan o naghatag og mga tubag sa iyang pangutana?
Unsa sa imong hunahuna ang kinahanglang mahibaloan ni Carlos mahitungod sa Langitnong Amahan, sa Iyang plano, ug giunsa Niya pagdumala ang Iyang mga anak?

Lihokon inubanan sa hugot nga pagtuo

Mahimong dapiton ang mga estudyante sa mga grupo sa pagtrabaho nga mag-inusara sa pag-ila sa mga sugo, dayon magpundok aron sa pagpakigbahin sa ilang mga ehemplo. Dayon mahimo silang magtinabangay sa paghatag og mga sugyot kon sa unsang paagi si Carlos makalihok inubanan sa hugot nga pagtuo pinaagi ba sa pagtinguha og dugang nga panabot o pinaagi ba sa paghimo og plano sa pagsunod sa mga sugo.

Si Carlos makalihok inubanan sa hugot nga pagtuo pinaagi sa pagtinguha nga mas makasabot sa mga sugo sa Langitnong Amahan. Ang pagpili sa pagtuman sa mga sugo samtang siya nagtinguha og dugang panabot mahitungod sa kamahinungdanon niini usa usab ka paglihok inubanan sa hugot nga pagtuo. Pagpili og labing menos duha ka mga sugo ug ilha kon sa unsang paagi ang pagsunod niini makatabang kang Carlos nga makasinati og kalipay o sa unsang paagi ang paglapas niini mahimong mosangpot sa kasakit. Mahimo usab nimong ipakigbahin kon sa unsang paagi ang pagsunod niini nga mga sugo nakahatag kanimo og kalipay.

Dapita ang mga estudyante sa pagpakigbahin sa unsay ilang giandam. Kon adunay panahon, ikonsiderar ang pagdapit sa klase sa paghunahuna og nagkalainlaing mga paagi nga mahimong motubag si Carlos. Dayon dapita ang mga estudyante nga mobalik sa ilang mga grupo aron mopahiuyon sa ilang mga plano. Mahimong mohimo ang mga estudyante og drama-drama atubangan sa klase o diha sa ilang mga grupo. Mahimo usab silang mag-text sa usag usa isip drama-drama.

Rebyo sa doktrinal nga kahanas

Ang mosunod nga pagrebyo mahimong himoon sa umaabot nga leksiyon. Pangutan-a ang mga estudyante kon makahinumdom ba sila sa mahinungdanon nga hugpong sa mga pulong sa kasulatan sa Alma 41:10. Kon gikinahanglan, pahinumdomi sila sa kalihokan sa pagsag-ulo nga ilang nahuman niini nga leksiyon. Dapita ang mga estudyante sa pagsulti og balik sa pakisayran ug sa mahinungdanon nga hugpong sa mga pulong hangtod ilaha kining masag-ulo.