Alema 37

“O Mea Laiti ma Faatauvaa”

alii talavou o loo suesue i tusitusiga paia

O nisi taimi o o tatou faafitauli e foliga mai e tetele ma lavelave ua tatou manatu ai o fofo e manaomia foi ona tetele ma lavelave. Peitai, na aoao atu e Alema lona atalii o Helamana e masani ona faaaoga e le Alii mea laiti ma faatauvaa e faia ai mea tetele, e pei o le faatagaina o tusitusiga paia e faasino “le ala e tatau ona [tatou] ui ai” i o tatou olaga (Alema 37:40). O lenei lesona ua faamoemoe e fesoasoani ia te oe e faatino ai le faatuatua ia Iesu Keriso a o e suesue i Lana afioga i tusitusiga paia.

Uunaia le suesue i tusitusiga paia i aso taitasi. O suesuega faaletagata lava ia o tusitusiga paia i aso taitasi e maua ai se avanoa faifai pea mo tagata aoga e aoao ai le talalelei, atiina ae molimau, ma lagona le siufofoga o le Alii. E i ai taimi atonu e lagona ai e tagata aoga le lotovaivai po o le manaomia o se uunaiga e suesue ai e le aunoa. Vaavaai mo avanoa e molimau atu ai i afioga a le Alii ma ia uunaia tagata aoga e suesue i tusitusiga paia i aso taitasi.

Sauniuniga a le tagata aoga: Uunaia tagata aoga a o latou faia suesuega o tusitusiga paia i aso taitasi ina ia mafaufau i faamanuiaga na te aumaia i o latou olaga, aemaise lava pe faapefea ona fesoasoani ia i latou e o mai ai ia Keriso.

Gaoioiga e Ono Mafai Ona Aoao Ai

O le maoae o mea laiti ma faatauvaa

Tusi upu laiti ma faatauvaa i le laupapa.

• O a nisi o mea laiti ma faatauvaa e faia ai se eseesega tele i lou olaga?

tamaitai talavou o loo faamalositino

telefonipoto

pulumu fufulunifo

talavou o loo faia auaunaga o le faamamaina o fafo o se fale

Mafaufau e faaali atu ni ata pe talanoaina ni faataitaiga, e pei o se pulumu fufulunifo, se feau tusitusia, se faamalositino, po o se faatinoga faigofie o le auauna atu.

I se isi itu, e mafai ona e fesili i tagata aoga pe i ai ni mea laiti o ia i latou e i ai se aafiaga tele i o latou olaga, e pei o se ata o le aiga, se telefoni, po o se atotupe. Valaaulia i latou e faaali atu po o le a lena mea ma faasoa mai le aafiaga tele o i ai.

E pei ona tusia i le Alema 37, na tuuina atu e Alema ia Helamana se tiutetauave taua na faaaoga e le Alii e matuai aafia ai fanau a le Atua. Faitau le Alema 37:1–2, 5–7 e vaai ai po o le a lena mea ma pe aisea na taua tele ai.

Afai e te manao e vaai i se vitio o loo faaalia ai nei fuaiupu, matamata i le “Ua Fautuaina e Alema Ona Atalii” mai le faailo taimi 3:15 i le 5:05, o loo maua i le ChurchofJesusChrist.org. Mulimuli tautu i le tala i au tusitusiga paia.

O se tasi o upumoni e mafai ona tatou aoao ai i le Alema 37 e faapea, e faaaoga e le Alii tusitusiga paia e aumaia ai le faaolataga i le toatele o tagata.

• Aisea e te manatu ai e faaaoga e le Alii tusitusiga paia e fesoasoani ai i tagata e fausia le faatuatua ia Iesu Keriso ma o mai ia te Ia mo le faaolataga?

A o faaauau lau suesuega, mafaufau loloto i fesili nei: E faapefea ona fesoasoani tusitusiga paia i le aumaia o tagata ia Iesu Keriso ma Lana faaolataga? E faapefea ona ou suesue ina ia maua ai nei faamanuiaga silisili?

Afai e te le lagonaina o loo e mauaina ni faamanuiaga maoae e ala i le suesueina o tusitusiga paia, saili le taitaiga a le Agaga Paia ia iloa ai mea atonu e manaomia ona e iloa pe suia.

Mafaufau e vaevae le vasega i ni vaega po o ni paga ma atofa atu ia i latou se tasi o gaoioiga nei. A mae’a, valaaulia tagata aoga e faasoa mai mea na latou aoaoina. E fuafua i le taimi ma manaoga o le vasega, mafaufau e fai faatasi o se vasega ia gaoioiga uma e lua.

Gaoioiga A: Mana maoae o tusitusiga paia

Alema o loo aoaoina lona atalii

Na faamanatu atu e Alema ia Helamana e uiga i auala na matua aafia ai sa Nifae ma sa Lamana i tusitusiga paia. Faitau le Alema 37:8–10, 14, ma vaavaai mo faamanuiaga faavavega na aumaia e le Alii e ala i tusitusiga paia. Mafaufau e faailoga nei faamanuiaga pe lisi i lau api talaaga mo suesuega.

• O fea o nei faamanuiaga na tulaga ese ia te oe? Aisea?

Mafaufau e tusi faamanuiaga na ta’ua e tagata aoga i luga o le laupapa.

Na aoao mai Alema o tusitusiga paia “ua faalauteleina le manatu o lenei nuu” (Alema 37:8). Na faamalamalama mai e Elder D. Todd Christofferson o le Korama a Aposetolo e Toasefululua lenei faamanuiaga:

Elder D. Todd Christofferson

O tusitusiga paia e faateleina o tatou manatu e ala i le fesoasoani ia i tatou e manatua pea le Alii ma la tatou sootaga ma Ia ma le Tama. Latou te faamanatu maia ia i tatou mea na tatou iloa i lo tatou muai olaga. Ma latou faateleina lo tatou manatu i se isi itu e ala i le aoao mai o i tatou e uiga i vaitaimi, tagata, ma mea na tutupu tatou te lei aafia ai i tatou lava. (D. Todd Christofferson, “O Le Faamanuiaga o Tusitusiga Paia,” Ensign po o le Liahona, Me 2010, 33)

• O anafea na oo ai ia te oe poo se tasi e te iloa se tasi o nei faamanuiaga o le suesueina o tusitusiga paia?

• O le a sou manatu e faapefea e tusitusiga paia ona aumaia ia i tatou “le malamalama o le Alii … ma ia olioli ia Iesu Keriso”? (Alema 37:9)

Mafaufau e faasoa atu se aafiaga patino po o se vitio o se tasi o loo faaalia lenei mea. O faataitaiga e aofia ai le “Manatunatu i le Alofa o le Atua—O Le Uiga o Tusitusiga Paia ia te Au” mai le faailo taimi 2:36–3:27 po o le “Liua Faifai Pea—O Le Uiga o Tusitusiga Paia ia te Au.” O nei vitio o loo maua i le .

Gaoioiga E: O Le Liahona ma afioga a Keriso

Ina ua uma ona tuuina atu ia Helamana se fautuaga faaopoopo, sa faatusa e Alema afioga a Keriso i se mea laitiiti ma faatauvaa na faaaoga e Liae ma lona aiga: o le Liahona. Toe manatunatu i mea ua e iloa e uiga i le Liahona.

Faaali atu se ata o le Liahona, e pei o le ata lenei. Mafaufau e valaaulia tagata aoga e faasoa mai mea latou te iloa e uiga i le Liahona.

O Liae ma lona aiga o loo tilotilo atu i le Liahona

Faitau le Alema 37:38–46 vaavaai mo mea laiti ma faatauvaa na tatau ona faia e le aiga o Liae ina ia mafai ai e le Liahona ona taialaina i latou.

Ina ia fesoasoani ia te oe e mafaufau pe faapefea ona faatatau aoaoga a Alema e uiga i le Liahona i le suesueina o tusitusiga paia, faaalu sina taimi e faamatala ai mea nei:

1. O le suesueina o tusitusiga paia ma le faatuatua i le Atua (tagai Alema 37:40). O le a le mea e ese ai lenei mea mai isi ituaiga suesuega?

2. Ina ua “faapaie” ma galo ona “faaaoga … faatuatua ma le filiga” e ala i le suesueina o tusitusiga paia (Alema 37:41).

Mafaufau e valaaulia tagata aoga e faasoa mai ni aafiaga na fesoasoani ia i latou e iloa ai le ala e mafai ai e le Alii ona faaaoga tusitusiga paia o se “faasinoala” e “tusi [ai] le ala e tatau ona [tatou] ui ai” i o tatou olaga (Alema 37:38, 40).

Suesuega faaletagata lava ia o tusitusiga paia

Tomanatu i au sini patino o le suesueina o tusitusiga paia i le taimi nei, mausa, ma aafiaga. Tusifaamaumau i lau api talaaga po o a ni fetuunaiga laiti e te ono faia e mafai ai e le Alii ona faamanuia oe i ni auala maoae. O ni nai fautuaga nei:

Suesue i tusitusiga paia ma saili mo nisi “malamalama o le Alii” pe ia “olioli ia Iesu Keriso” (Alema 37:9).

• E mafai ona aofia ai le vaavaai mo mau faasino ia Iesu Keriso, o Ana matafaioi, ma Lana misiona. A o e faailoa mai nei mau e mafai ona e mafaufau i ai e uiga i le ala e faatino ai e Iesu Keriso ni matafaioi faapena i lou olaga. E mafai ona e faamaumauina ni faailoaga o le lotofaafetai i se api talaaga pe i le polokalama o le Gospel Library a o e mauaina i latou.

Faaali le faatuatua i le Atua a o e suesue i le (tagai Alema 37:40).

• E mafai ona aofia ai le vaavaai mo auala e faatino ai mea o loo e suesueina ma sau ia Keriso. E mafai ona e saili e le aunoa e tali le fesili “E mafai faapefea e mea o loo o’u suesueina ona fesoasoani ia te a’u e sau ai ia Keriso ia maua Ana faamanuiaga ma mulimuli i Ana faataitaiga?” E mafai ona e faamaumauina au tali i totonu o se api talaaga.

Fuafua pe faapefea ona e aloese mai le “faapaie” ma galo ona “faaaoga [lou] faatuatua ma le filiga” i au suesuega (Alema 37:41).

• E mafai ona aofia ai i lenei mea le filifili o se taimi masani i aso taitasi e suesue ai au tusitusiga paia. E mafai foi ona e valaaulia se tagata o le aiga po o se uo e tulitatao e le aunoa i au taumafaiga mo le suesueina o tusitusiga paia. Afai e maua, e mafai ona e setiina se faamanatu o le kalena i luga o se telefoni po o se isi masini tekinolosi i aso taitasi.

Faaiu le vasega i le faasoa atu o auala na aumaia ai e le Alii ni mea tetele i lou olaga e ala i au suesuega o tusitusiga paia.

Manatu ma Talaaga o Faamatalaga

Aisea e taua ai le suesue i tusitusiga paia i aso taitasi?

Sa aoao mai e Peresitene Russell M. Nelson le mea lenei:

Peresitene Russell M. Nelson

Afai e te le o sailia foi le Alii e ala i tatalo i aso taitasi ma le suesueina o le talalelei, ua e tuua oe lava ia e lamatia i filosofia e ono faatosina ae e lē moni. E oo lava i le Au Paia o ē faatuatua e mafai lava ona tosina atu i le manaia o le pa’ō o le faaili o tu’inanau a Papelonia.

O’u uso e ma tuafafine, ou te aioi atu ia te outou ia faaavanoa se taimi mo le Alii! Ia fai lou oe lava faavae faaleagaga ia mausali ma mafai ona tumau i taimi o tofotofoga e ala i le faia o mea e faatagaina e le Agaga Paia e faatasi ma oe i taimi uma. (Russell M. Nelson, “Faaavanoa se Taimi mo le Alii,” Liahona, Nov. 2021, 120)

Peresitene Russell M. Nelson

O le faatofuina i aso taitasi i le afioga a le Atua e taua tele mo le ola faaleagaga, aemaise lava i nei aso o le faatupulaia o suiga faigata. Pe a tatou taumamafa i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i. (Russell M. Nelson, “Faalogo ia te Ia,” Ensign po o le Liahona, Me 2020, 89)

E mafai faapefea ona ou maua le taimi mo le suesueina o tusitusiga paia i le pisi o lo’u olaga?

Na aoao mai Elder Richard G. Scott (1928–2015) o le Korama a Aposetolo e Toasefululua:

Elder Richard G. Scott

Aua nei gauai atu i pepelo a Satani faapea e leai sou taimi e suesue ai i tusitusiga paia. Filifili e faaalu se taimi e suesue ai. O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e toe faatulagaina au mea e faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa! (Richard G. Scott, “Ia Avea le Faaaogaina o le Faatuatua ma Mea e te Faamuamuaina,” Ensign po o le Liahona, Nov. 2014, 93)

Gaoioiga Faaopoopo e Aoao Ai

Isi amataga

I le avea ai ma se isi amataga i le lesona, mafaufau e tufa atu se fasi pepa laitiiti ma valaaulia tagata aoga e tusi faalilolilo soo se mea faalavefau latou te feagai i le suesueina o tusitusiga paia. A uma ona ao mai pepa, valaaulia ni nai tagata aoga e tusi ia faafitauli i luga o le laupapa a o e faitauina leotele. Valaaulia tagata aoga e vaavaai mo mea i le lesona i le asō e mafai ona fesoasoani i se tasi e faatoilalo ai nei faafitauli.

Alema 37:21–32. O mataupu faavae eseese e uiga i le agasala ma le salamo

E pei ona i ai le tele o mataupu faavae e mafai ona maua i le Alema 37:21–32, mafaufau e valaaulia tagata aoga e faitau nei fuaiupu ma sue se mataupu faavae e mafai ona fesoasoani ia i tatou i aso nei. O nisi o nei mataupu faavae e ono aofia ai mea nei: E galue faalilolilo Satani; e le mafai ona tatou nanaina a tatou agasala mai le Atua; ma o le agasala e taitai atu ai i mafatiaga ma le faatafunaga faaleagaga. Afai e te taulai atu i nei mataupu faavae, e mafai ona fesoasoani e faamamafa atu ai le alofa ma le finagalo o le Atua mo lo tatou salamo.