Doktrinal nga Kahanas: Alma 34:9–10

“Kinahanglan Gayod nga Adunay Pag-ula nga Pagahimoon, … usa ka Walay Kinutoban ug Walay Kataposan nga Sakripisyo.”

Kristo diha sa krus

Sa miaging leksiyon, imong nakat-onan ang mahitungod sa walay kinutoban ug walay kataposan nga Pag-ula ni Jesukristo. Kini nga leksiyon makatabang nimo sa pagsag-ulo sa pakisayran ug sa mahinungdano nga hugpong sa mga pulong sa kasulatan sa Alma 34:9–10, mapasabot ang doktrina nga gitudlo niini nga mga bersikulo, ug magamit ang mga baroganan sa pag-angkon og espirituhanong kahibalo sa tinud-anay nga mga senaryo gamit niini nga tudling sa kasulatan.

Tabangi ang mga estudyante nga magbansay sa paggamit sa “mga baroganan sa pag-angkon og espirituhanong kahibalo.” Paningkamoti nga isulti ang mga baroganan pinaagi sa ngalan aron dali nga makaila ang mga estudyante kon kanus-a ug giunsa kini paggamit sa mga panaghisgotan sa klase.

Pagpangandam sa estudyante: Ikonsiderar ang pagdapit sa mga estudyante sa paghunahuna kon sa unsang paagi ang mga kamatuoran nga gitudlo diha sa Alma 34:9–10 ug ang mga baroganan sa pag-angkon og espirituhanong kahibalo makatabang sa usa ka tawo kinsa mibati nga dili siya mapasaylo sa iyang mga sala.

Posible nga mga Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Alma 34:1–17,” nga mao ang pangkonteksto nga leksiyon alang sa tudling sa doktrinal nga kahanas sa Alma 34:9–10. Kon gikinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug isag-ulo

Namatikdan na ba nimo sukad nga mas sayon sabton ang usa ka butang sa imong hunahuna kaysa ipasabot kini sa mga pulong? Usa sa mga katuyoan sa doktrinal nga kahanas mao ang paghatag kanimo og mga kahigayonan sa pagpasabot sa doktrina gikan sa mga tudling sa doktrinal nga kahanas diha sa imong kaugalingong mga pulong.

Sa imong bag-ohay lang nga pagtuon sa Alma 34:9–10, imong nakat-onan nga kon wala ang walay kinutoban ug walay kataposan nga Pag-ula ni Jesukristo, ang tanang katawhan mahisalaag sa kahangtoran.

Hatagi ang mga estudyante og kahigayonan nga mapasabot ang doktrina nga gitudlo diha sa Alma 34:9–10 sa ilang kaugalingong mga pulong pinaagi sa pagpakigbahin sa mosunod nga mga instruksiyon.

Handurawa nga aduna kay kahigayonan sa pagpasabot sa kahulugan sa Alma 34:9–10 ngadto sa usa ka tawo nga gamay ra ang nahibaloan mahitungod ni Jesukristo. Paggahin og panahon sa pagrebyo niini nga mga bersikulo ug markahi o isulat ang mga pulong o mga hugpong sa mga pulong nga gusto nimong masabtan niini nga tawo.

Kon ang mga estudyante aduna nay igong panahon sa pagpangandam, ikonsiderar ang paghan-ay kanila ngadto sa mga paresan o sa gagmay nga mga grupo ug dapita ang matag estudyante nga magbansay sa pagpakigbahin sa ilang pagpasabot.

Ang mahinungdanon nga hugpong sa mga pulong sa kasulatan alang sa Alma 34:9–10 mao: “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”

Tabangi ang mga estudyante sa pagsag-ulo niini nga pakisayran sa kasulatan ug sa mahinungdanon nga hugpong sa mga pulong sa kasulatan. Han-aya ang klase nga magpares-pares. Mahimong isulti og balik sa usa ka estudyante ang unang katunga sa hugpong sa mga pulong, dayon ang usa sa pares mahimong balikon ang ikaduhang katunga. Mahimo dayon nga magdungan sa pagsulti sa pakisayran sa kasulatan ang duha. Human sa pagbuhat niini sa pipila ka higayon, mahimong magpuli ang mga estudyante ug mosulti sa laing katunga sa hugpong sa mga pulong.

Pagbansay sa paggamit

Sa dili pa ipakigbahin ang mosunod nga senaryo, ikonsiderar ang paghangyo sa mga estudyante sa paghingalan sa mga baroganan sa pag-angkon og espirituhanong kahibalo gikan sa panumdoman. Isulat diha sa pisara ang matag baroganan samtang isulti kini sa mga estudyante. Ipasabot nga aduna silay mga kahigayon sa pagrebyo ug pagbansay sa paggamit niini nga mga baroganan atol niini nga leksiyon.

Dayon ipakita ang senaryo o hatagi ang mga estudyante og kopya aron matan-aw samtang ilang kompletohon ang kalihokan.

Handurawa nga gihangyo ka sa pagtudlo og usa ka leksiyon mahitungod sa Pag-ula ni Jesukristo sa imong klase sa Sunday School. Isip kabahin sa imong pagpangandam, miduol ka sa usa ka batan-ong babaye sa imong ward nga ginganlan og Olive ug mihangyo nga siya mopakigbahin sa iyang mga hunahuna kon sa unsang paagi gipanalanginan ni Jesukristo ang iyang kinabuhi tungod sa Iyang Pag-ula.

Nakurat ka sa tubag ni Olive. Siya miingon, “Magmatinuoron ako kanimo, nagtuo ako nga ang Pag-ula ni Jesukristo mahinungdanon alang sa kadaghanan sa mga tawo, apan dili na ako sigurado kon asa kutob kini magamit kanako tungod sa pipila ka mga sayop nga akong nabuhat ug gipadayon sa pagbuhat. Adunay pipila ka mga sala nga wala nako mahibalo kon mahimo pa ba nako nga mabuntog.”

Samtang nagpadayon ka sa pag-andam sa imong leksiyon, kanunay nimong hunahunaon ang mga komentaryo ni Olive ug gusto nimo siyang tabangan. Ikonsiderar kon sa unsang paagi ang mga pagtulun-an diha sa Alma 34:9–10 ug ang mga baroganan sa pag-angkon og espirituhanong kahibalo makatabang kang Olive sa iyang kabalaka.

Ikonsiderar ang paghan-ay sa mga estudyante ngadto sa gagmay nga mga grupo ug i-assign ang matag grupo sa pagtutok sa usa sa mga baroganan sa pag-angkon og espirituhanong kahibalo. Mahimong maghimo ang mga estudyante og lista sa papel o diha sa pisara sa tanang mga paagi nga ilang gihunahuna nga kini nga baroganan makatabang ni Olive sa iyang sitwasyon. Mahimo dayong dapiton ang mga estudyante gikan sa matag grupo sa pagreport ngadto sa tibuok klase kon unsay ilang nahisgotan.

Kon gikinahanglan, ang mosunod nga mga pangutana mahimong ipakigbahin ngadto sa mga grupo aron magamit isip kabahin sa ilang panaghisgotan.

Lihok diha sa Hugot nga Pagtuo

• Unsa ang piho nga matinud-anon nga mga buhat sa imong hunahuna ang mahimo ni Olive aron makatabang kaniya?

• Unsa ang imong matudlo kang Olive mahitungod ni Jesukristo ug sa Iyang Pag-ula nga mahimong makatabang kaniya sa paglihok uban sa hugot nga pagtuo? Sa unsang paagi nga ang mga pagtulun-an diha sa Alma 34:9–10 makatabang?

Alang sa ubang mga ideya kon sa unsang paagi si Olive molihok diha sa hugot nga pagtuo, mahimo nimong basahon ang mga parapo 5–7 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Susihon ang mga konsepto ug mga pangutana inubanan sa mahangtorong panglantaw

Usa ka alternatibong paagi sa pagtudlo niini nga seksiyon mao ang pagdapit sa mga estudyante sa paglista diha sa pisara sa pipila ka sayop nga mga pangagpas nga mahimong anaa ni Olive mahitungod ni Jesukristo, sa Iyang Pag-ula, ug sa iyang papel sa pag-angkon sa kaluoy sa Manluluwas. Dayon dapita ang mga estudyante sa pagtabang kang Olive sa pag-usab sa iyang kabalaka (o pagtan-aw niini sa lahi nga paagi) pinaagi sa pagpakigbahin sa mga kamatuoran nga ilang nasabtan mahitungod ni Jesukristo, sa Iyang Pag-ula, ug sa atong papel sa pag-angkon sa kaluoy sa Manluluwas.

• Unsa sa imong hunahuna ang panglantaw sa Langitnong Amahan ug ni Jesukristo sa usa ka kabalaka sama sa kang Olive?

• Ngano nga importante nga mahinumdoman ni Olive nga ang Pag-ula sa Manluluwas “walay kinutoban ug walay kataposan” (Alma 34:10)?

• Sa unsang paagi nga ang paghinumdom nga ang tanan napukan ug nahisalaag kon wala ang Pag-ula sa Manluluwas makatabang niya sa pagtan-aw sa iyang kabalaka sa lahi nga paagi?

Alang sa ubang mga ideya kon sa unsang paagi masusi ni Olive ang mga konsepto o mga pangutana nga adunay mahangtorong panglantaw, mahimo nimong basahon ang parapo 8 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Tinguhaa ang dugang nga panabot pinaagi sa balaanong gitudlo nga mga tinubdan

• Unsa nga mga matang sa balaanong gitudlo nga mga tinubdan ang imong irekomendar kang Olive aron matabangan siya nga makadawat og giya ug direksiyon? Ngano man?

• Agi og dugang sa Alma 34:9–10, unsa nga kasulatan o pamahayag gikan sa usa ka lider sa Simbahan ang mahimo nimong ipakigbahin kang Olive? Sa unsang paagi kini makatabang kaniya?

Alang sa ubang mga ideya kon unsaon ni Olive pagtinguha og dugang nga panabot pinaagi sa balaanong gitudlo nga mga tinubdan, mahimo nimong basahon ang mga parapo 11–12 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas.

Dapita ang mga estudyante sa paghunahuna mahitungod sa unsay ilang nakat-onan o gibati karon nga makapanalangin sa ilang mga kinabuhi o sa mga kinabuhi sa mga tawo nga ilang nailhan. Dasiga sila sa pagpangita og mga kahigayonan sa paggamit sa mga baroganan sa pag-angkon og espirituhanong kahibalo ug sa doktrina nga gitudlo sa mga kasulatan ngadto sa mga sitwasyon nga ilang giatubang.

Rebyo sa doktrinal nga kahanas

Sa umaabot nga leksiyon, tabangi ang mga estudyante sa pagrebyo sa pakisayran sa kasulatan ug sa mahinungdanon nga hugpong sa mga pulong sa kasulatan sa Alma 34:9–10: “Kinahanglan gayod nga adunay pag-ula nga pagahimoon, … usa ka walay kinutoban ug walay kataposan nga sakripisyo.”

Usa ka paagi nga mahimo kini mao ang pagsulat sa unang mga letra sa pakisayran ug sa mahinungdanon nga hugpong sa mga pulong diha sa pisara ug dapita ang mga estudyante sa pagsulay sa paghinumdom sa mga pulong nga adunay kalabotan sa matag letra. Bansaya ang pagbuhat niini sa pipila ka mga higayon hangtod nga masulti og balik sa mga estudyante ang pakisayran sa kasulatan ug ang mahinungdanon nga hugpong sa mga pulong sa kasulatan gikan sa panumdoman.

Dugang nga Kalihokan sa Pagkat-on

Alternatibo nga paagi sa pagtuon sa senaryo

Mahimong dapiton ang mga estudyante sa pag-andam og leksiyon mahitungod sa Pag-ula ni Jesukristo nga nagtubag sa mga kabalaka ni Olive. Hatagi og instruksiyon ang mga estudyante sa paggamit sa mga pagtulun-an gikan sa Alma 34:9–10 ug sa usa ka butang nga may kalabotan sa matag usa sa mga baroganan sa pag-angkon og espirituhanong kahibalo diha sa ilang leksiyon. Mahimo dayong hisgotan sa mga estudyante kon unsa ang ilang gilakip sa leksiyon ngadto sa usa ka pares, sa gamay nga grupo, o sa tibuok klase.