Seminare
Alema 32–35: Vaaiga Aoao

“Alema 32–35: Vaaiga Aoao,” Tusi Lesona a le Faiaoga o le Tusi a Mamona (2024)

“Alema 32–35,” Tusi Lesona a le Faiaoga o le Tusi a Mamona

Alema 32–35

Vaaiga Aoao

A o aoao atu e Alema sa Sorama, sa ia faatusaina le afioga a le Atua i se fatu e mafai ona tatou totoina i o tatou loto lea e mafai ona avea ma “se laau e puna ae i le ola tumau-faavavau” (Alema 32:41). Sa fesili atu tagata matitiva o sa Sorama ia te ia pe faapefea ona “tatau ona latou amata faaaoga ai lo latou faatuatua” (Alema 33:1), ma sa ia aoaoina i latou e mafai ona latou tatalo ma tapuai i nofoaga uma. Sa la molimau atu ma Amoleka ia Iesu Keriso, ma sa aoao atu Amoleka e faapea o tagata uma e faamaaaina, pauu, ma leiloloa e aunoa ma le taulaga e le gata ma faavavau a Keriso. Sa aioi atu Amoleka i sa Sorama ia aua nei faatuai le aso o lo latou salamo.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Alema 32

Faamoemoega o le lesona: O lenei lesona ua faamoemoe e fesoasoani ai i tagata aoga e totō le afioga a le Atua i o latou loto ma faafailele a latou molimau e uiga i ai.

  • Sauniuniga a le tagata aoga: Valaaulia tagata aoga e fesili i se tasi e pele ia te ia o loo i ai se molimau o le talalelei a Iesu Keriso, po o le a se mea na fesoasoani ia te ia e maua pe faamalosia ai.

  • Anotusi e faaali atu: O faamatalaga e tolu o loo i ai ni avanoa i le amataga o le lesona

  • Pepa e tufa atu: “Totoina ma le Faafaileleina o le Afioga a le Atua i o Tatou Loto”

  • Ata: O vaega o le tuputupu ae o se laau

  • Fautuaga faafaiaoga faavitio: A uma ona faitau e tagata aoga le Alema 32:28, tuu atu ia i latou e maitau o loo e totoina ni fatu se tele i totonu o se ulo o palapala matutu. Ma a o faitauina e tagata aoga fuaiupu e 37–43, valaaulia i latou e lisi mai ni mea o le a fesoasoani e tuputupu ae ai na fatu. Ina ia amata lesona faavitio taitasi i nai vaiaso e sosoo ai, valaaulia ni tagata aoga se toalua pe toatolu e faasoa faapuupuu mai se mea na latou faia talu ai nei e faafailele ai a latou molimau i le afioga a le Atua. Pe a faasoa mai tagata aoga taitasi, fai se mea o le a fesoasoani e faafailele ai fatu sa e totoina, e pei o le faaopoopoina o se sina vai po o le aveina o le ulo i se nofoaga e sili atu le malamalama.

Alema 33

Faamoemoega o le lesona: O lenei lesona e mafai ona faalolotoina ai le malamalama o tagata aoga i laasaga e mafai ona latou faia e faatino atili ai le faatuatua ia Iesu Keriso.

  • Sauniuniga a le tagata aoga: Valaaulia tagata aoga e faitau le Alema 33 i le fale ma filifili se fuaiupu po o se vaega o fuaiupu latou te mananao ia malamalama atili i ai.

  • Anotusi e faaali atu: O filifiliga e tolu mo le sauniuniga o le lesona, a le o le faaali atu pe kopi i luga o le laupapa

  • Pepa e tufa atu: “Manatu mo Sauniuniga o le Lesona”

  • Fautuaga faafaiaoga i fesootaiga i vitio: Valaaulia tagata aoga e tape a latou leo ​​ma meapueata a o saunia a latou lesona. A uma le taimi faatulagaina, tuu atu ia i latou e toe ki a latou meapueata ma leo, ma tuu i latou i potu vaevae. Valaaulia se tagata aoga naunautai se toatasi pe toalua i potu vaevae taitasi e aoao atu a latou lesona.

Alema 34:1–17

Faamoemoega o le lesona: O lenei lesona ua faamoemoe e fesoasoani i tagata aoga ia malamalama i le ala e mafai ai e Iesu Keriso ona faamanuiaina i latou e ala i Lana taulaga togiola e le gata ma faavavau.

  • Sauniuniga a le tagata aoga: Valaaulia tagata aoga e saili ma suesue i mau ia e fesoasoani latou te malamalama atili ai i le Togiola a Iesu Keriso. O le Taiala o Ulutala ma le Taiala i Tusitusiga Paia e mafai ona avea ma punaoa aoga.

  • Ata: O Iesu Keriso i Ketesemane

  • Anotusi e faaali atu: Atatusi e uiga i le Togiola a Iesu Keriso

  • Vitio: “O Le Togiola a Iesu Keriso e Le Gata ma Faavavau” (1:09); “O Le Togiola a Iesu Keriso” (11:46; matamata mai le faailo taimi 3:59 i le 4:27)

  • Fautuaga faafaiaoga faavitio: Mafaufau e fetuunai le gaoioiga suesue o loo i le faaiuga o le lesona e faaaofia ai mau eseese po o faamatalaga lata mai nei mai taitai o le Ekalesia.

Atamai i Aoaoga Faavae: Alema 34:9–10

Faamoemoega o le lesona: O lenei lesona e mafai ona fesoasoani i tagata aoga e tauloto ai le mau faasino ma le fasifuaitau autu o le mau mo le Alema 34:9–10, faamatala le aoaoga faavae ua aoao mai i nei fuaiupu, ma faaaoga mataupu faavae o le mauaina o le malamalama faaleagaga i tulaga masani e faaaogaina ai lenei mau.

  • Sauniuniga a le tagata aoga: Mafaufau e valaaulia tagata aoga e mafaufau pe mafai faapefea e upumoni o loo aoao mai i le Alema 34:9–10 ma mataupu faavae o le mauaina o le malamalama faaleagaga ona fesoasoani i tagata o e lagona e le mafai ona faamagaloina i latou mo a latou agasala.

  • Fautuaga faafaiaoga faavitio: I le taimi o le gaoioiga faataitai o le faaaogaina, mafaufau e vaevae tagata aoga i ni potu vaevae se tolu ma tofi vaega taitasi e taulai atu i se tasi o mataupu faavae o le mauaina o le malamalama faaleagaga. E mafai e tagata aoga mai vaega taitasi ona lisi auala uma latou te manatu e mafai ona fesoasoani ai lenei mataupu faavae ia Olive i lona tulaga. Ona valaaulia lea o tagata o vaega taitasi e lipoti mai mea na latou talanoaina ma le isi vaega o le vasega.

Alema 34:17–41

Faamoemoega o le lesona: O lenei lesona ua faamoemoe e fesoasoani i tagata aoga ia latou taumafaiga e saunia e feiloai ma le Atua.

  • Sauniuniga a le tagata aoga: Valaaulia tagata aoga e faitau le Alema 34:32 ma mafaufau i ni auala e mafai ona latou mulimuli ai i le fautuaga o loo i le fuaiupu. E mafai ona latou tusia i lalo nisi o auala o loo latou sauniuni ai e toe foi atu i le afioaga o le Atua ma suiga e mafai ona latou faia o le a fesoasoani ia i latou e saunia lelei ai.

  • Fautuaga faafaiaoga faavitio: A o faailoa mai e tagata aoga ia mataupu faavae mai le Alema 34:17–41, mafaufau e faaaoga le vaega o le laupapa paepae e mafai ai ona latou tusia ia mataupu faavae na latou mauaina.