Tungod kay nagpuyo kita sa usa ka napukan nga kalibotan, daghang mga tawo ang gitratar nga mapintas ug dili patas. Dihang sila si Alma ug si Amulek mitudlo sa ebanghelyo ni Jesukristo sa siyudad sa Ammonihah, ang dautang mga tawo misakit sa mga tumutuo ug mipahamtang kanila og kamatayon pinaagi sa kalayo. Si Alma ug si Amulek dayon gipriso ug grabeng gipanglutos. Ang katuyoan niini nga leksiyon mao ang pagtabang kanimo nga mosalig sa Ginoo kon mag-atubang og kalisdanan, pag-antos, ug pagkadili makiangayon.
Pagtudlo pinaagi sa gahom sa Espiritu Santo. Ang Espiritu Santo nagpamatuod sa tanang kamatuoran ug nagsaksi sa Amahan ug sa Anak. Si Presidente Henry B. Eyring mitudlo, “Ang atong mga estudyante dili makaila sa Dios, ug mohigugma sama sa ilang paghigugma, gawas kon sila gitudloan sa Balaang Espiritu” (“To Know and to Love God” [gabii uban sa usa ka General Authority, Peb. 26, 2010], 2).
Pagpangandam sa estudyante: Dapita ang mga estudyante sa pagpamalandong sa bisan unsang mga pagsulay nga ilang nalahutay. Dasiga sila sa paghunahuna kon sa unsang paagi ang ilang pagsalig sa Langitnong Amahan ug ni Jesukristo nakatabang kanila o makatabang unta kanila sa paglahutay sa ilang mga pagsulay.
Posible nga mga Kalihokan sa Pagkat-on
Mortal nga mga hagit
Basaha ang mosunod nga pamahayag ni Elder Anthony D. Perkins sa Seventy:
Imahe
Elder Anthony D. Perkins
Bisan asa pa kamo nagpuyo, ang pisikal o emosyonal nga pag-antos sa nagkalainlaing mga pagsulay ug mortal nga mga kahuyang nahimo na kaniadto, karon, o sa umaabot nga kabahin sa inyong kinabuhi. (Anthony D. Perkins, “Hinumdomi ang Imong mga Santos nga Nag-antos, O Among Dios,” Liahona, Nob. 2021, 103)
Dasiga ang mga estudyante sa paghunahuna og daghang mga tubag sa mosunod nga pangutana kutob sa mahimo, ug ikonsiderar ang paglista niini diha sa pisara.
Unsa ang pipila sa nagkalain-laing mga paagi nga kita maka-react sa mga pagsulay?
Ang Alma 14 maoy usa ka asoy sa matarong nga mga tawo nga nakasinati og grabe nga mga pagsulay. Kadaghanan niini nga mga pagsulay gipugos ngadto kanila sa mga tawo nga sayop nga migamit sa ilang kabubut-on. Samtang magtuon ka, ikonsiderar kon sa unsang paagi ang mga kamatuoran nga imong nakaplagan gikan sa mga ehemplo ni Alma, Amulek, ug sa ubang matarong nga mga tawo makatabang kanimo sa pagtubag sa mga pagsulay karon ug sa umaabot.
Ikonsiderar ang pagsulat sa mosunod nga mga ngalan diha sa pisara. Dapita ang mga estudyante sa pagduol sa pisara ug isulat kon unsay giantos sa matag usa sama sa gihulagway diha sa Alma 14:1–9. Kon imong gamiton ang bidyo nga “Si Zeezrom Nagtuo, ug ang mga Matarong Gipanglutos” (3:51), anaa sa ChurchofJesusChrist.org, ikonsiderar ang paghunong diha sa time code nga 2:03.
Unsa kaha nga mga pangutana ang moabot kanimo kon makasinati ka og mga pagsulay sama sa pipila niini nga mga tawo?
Ikonsiderar ang paggamit sa dugang nga kalihokan sa pagkat-on nga giulohan og “Alma 14:11. Mahangturong panglantaw” aron matabangan ang mga estudyante sa pagrebyo kon unsaon pagsusi sa mga konsepto ug mga pangutana inubanan sa mahangturong panglantaw.
Pagsalig sa Ginoo
Kita makatubag sa daghang mga paagi kon makasinati kita og pag-antos o makasaksi sa pag-antos sa uban. Basaha ang Alma 14:10–11, mangita kon giunsa pagtubag ni Amulek ug Alma ang pag-antos sa mga tumutuo.
Nakasulay ka na ba sukad nga gusto nimong luwason ang imong kaugalingon o ang uban gikan sa kasakit sa pagsulay, sama sa gibuhat ni Amulek? Ngano man?
Unsa ang imong nakat-onan mahitungod sa Dios gikan sa tubag ni Alma sa bersikulo 11?
Basaha ang Alma 14:12–13, mangita sa kamatuoran nga gitudlo ni Alma kon unsaon sa pagtubag kon makasinati kita og pag-antos.
Sa unsang paagi ang mga pulong ni Alma nagpakita og pagsalig sa Ginoo?
Unsa nga baroganan ang atong makat-onan gikan sa ehemplo ni Alma?
Usa ka baroganan nga atong makat-onan mao nga kon makasinati kita og mga pagsulay ug pag-antos, makapili kita nga mosalig sa Ginoo bisan unsa pa ang resulta. Ikonsiderar ang pagrekord niini nga baroganan diha sa imong journal sa pagtuon ug markahi ang hugpong sa mga pulong nga “Mahimo kini sumala sa kabubut-on sa Ginoo” diha sa imong mga kasulatan.
Sa unsa nga paagi sa imong hunahuna nga ang pagsalig sa Ginoo usa ka pagpili?
Unsaon kaha nimo paggamit ang hugpong sa mga pulong nga “Mahimo kini sumala sa kabubut-on sa Ginoo” sa usa ka butang nga imong gisinati karon?
Paghunahuna kon unsaon nimo pagtabang ang mga estudyante sa pagtimbang-timbang sa ilang abilidad sa pagsalig sa Ginoo atol sa ilang mga pagsulay. Ikonsiderar ang paglista sa mosunod nga mga pamahayag diha sa pisara, ug tugoti ang mga estudyante og panahon sa hilom nga pagtimbang-timbang sa ilang kaugalingon.
Hunahunaa ang imong kinabuhi ug mga kahimtang. Unsay imong buhaton kon ikaw o kadtong imong gihigugma makasinati og pagbiaybiay, mga pagsulay, o pagkadili makiangayon? Tubaga ang mosunod nga mga pamahayag gamit ang kanunay, usahay, o wala gayod.
Ako misalig sa kabubut-on ug tayming sa Ginoo kon mag-ampo alang sa kahupayan gikan sa akong mga pagsulay.
Ako matinud-anong nagtinguha og pailob ug pagsabot kon ang kinabuhi ingon og dili na patas.
Akong gisentro ang akong hugot nga pagtuo kang Jesukristo ug sa Iyang mahangtorong mga saad kay sa usa ka partikular nga resulta nga akong gilaoman.
Si Elder Quentin L. Cook sa Korum sa Napulog Duha ka Apostoles mipakigbahin og usa ka panglantaw nga makatabang kanato sa pagsalig sa Ginoo atol sa atong mga pagsulay. Tan-awa ang bidyo nga “Personal nga Kalinaw: Ang Ganti sa Pagkamatarong” gikan sa time code 9:02 hangtod sa 9:33, anaa sa ChurchofJesusChrist.org, o basaha ang mosunod:
Imahe
Elder Quentin L. Cook
Miapil kitang tanan sa konseho sa langit nga naghatag sa moral nga kabubut-on, nakahibalo nga dunay mortal nga kasakit ug gani dili mahulagway nga trahedya tungod sa pag-abuso sa kabubut-on. Nakasabot kita nga kini makapasuko nato, makapalibog, dili makapanalipod, ug makapasakit. Apan nasayod usab kita nga ang Pag-ula sa Manluluwas mobuntog ug mopuli sa tanang dili makiangayon sa mortal nga kinabuhi ug maghatag og kalinaw. (Quentin L. Cook, “Personal nga Kalinaw: Ang Ganti sa Pagkamatarong,” Liahona, Mayo 2013, 34)
Unsa ang imong nakat-onan nga makatabang kanimo kon ikaw makasinati og pag-antos o makahibalo sa pag-antos sa uban?
Siguroha nga ang mga estudyante makasabot sa mosunod nga impormasyon isip kabahin sa panaghisgotan.
Mahinungdanon nga hinumdoman nga kon ikaw nasakitan o giabusohan sa bisan unsang paagi, kinahanglan nga mangayo ka og tabang gikan sa usa ka ginikanan o lider sa Simbahan aron sila makatabang kanimo sa pagsulbad sa problema. Ang Ginoo nahigugma kanimo ug gusto nga ikaw mobati og kalinaw ug kalipay.
Pagpadayon nga may hugot nga pagtuo ug pagsalig sa Ginoo
Human sila si Alma ug si Amulek napugos sa pagsaksi sa pagsunog sa matarong nga mga tumutuo, sila gibugalbugalan, gibunalan, ug gipriso sa mga magmamando sa Ammonihah (tan-awa sa Alma 14:14–17).
Hukmi kon sa unsang paagi labing maayo nga maapil ang mga estudyante sa imong klase samtang magtuon sila sa mosunod nga mga bersikulo. Mahimong malingaw ang mga estudyante nga magbasa og dungan o maminaw sa audio nga bersyon ug magsubay sa nadungog.
Kon makabenepisyo ang mga estudyante gikan sa pagtandi niini nga asoy ngadto sa kinabuhi sa Manluluwas, ikonsiderar ang paggamit sa dugang nga kalihokan sa pagtudlo “Alma 14:14–24. Pagsunod sa ehemplo ni Jesukristo.”
Sa unsang paagi si Alma ug Amulek nagpadayon sa pagsalig sa Ginoo atol sa ilang mga kasakit?
Kinsay nailhan nimo?
Ikonsiderar ang pagpares sa mga estudyante ug dapita sila sa pagpakigbahin mahitungod sa mga tawo nga ilang nailhan nga maayong mga ehemplo sa pagsalig sa Ginoo atol sa panahon sa mga pagsulay. Mahimo usab nga mopakigbahin ang mga estudyante og mga ideya kon sa unsang paagi sila mas makasalig sa Ginoo atol sa ilang mga pagsulay.
Paghunahuna og usa ka tawo sa imong kinabuhi kinsa naningkamot sa pagsalig sa Ginoo atol sa panahon sa mga pagsulay ug mga kasakit. Unsay imong makat-onan gikan sa iyang ehemplo? Unsa nga mga pagkaparehas ang imong nakita tali sa tubag niini nga tawo ug sa unsa nga paagi si Alma ug si Amulek mitubag sa kalisdanan?
Pagsulat og usa o duha ka piho nga butang nga imong mahimo aron mas mosalig sa Ginoo kon ang kinabuhi lisod o daw dili makiangayon. Ikonsiderar ang pagbutang sa imong gisulat sa usa ka dapit nga makita nimo kini kanunay.
