Alema 8

Faalogo ma Usiusitai i le Tama Faalelagi

Alema ma Amoleka

O le usiusitai i le Tama Faalelagi e mafai ona faigata, ae e tau atu i le fiafia silisili. A o faatinoina e Alema ma Amoleka le faatuatua ma mulimuli i faatonuga a le Atua, sa faamanuia i laua e le Atua ma i latou na siomia i latou. O lenei lesona e mafai ona fesoasoani ia te oe ia faalogo ma usitai i le Tama Faalelagi i lou olaga.

Fesoasoani i tagata aoao ia lagona o a latou saofaga e taua. O le faalogo e manaomia ai le taulai atili atu o se faiaoga i manaoga o le tagata aoga nai lo le mea e sosoo ai i le otootoga o le lesona. Ia naunau e faataatia ese mea sa e fuafuaina, pe a musuia e le Agaga, ma faalogo i malamalamaaga o tagata aoga. Ia faailoa atu ia i latou e ala i au upu ma faatinoga o loo e naunau e faalogo atu ia i latou.

Sauniuniga a le tagata aoga: Valaaulia tagata aoga e tatalo ma fesili atu i le Tama Faalelagi po o le a le mea e finagalo o Ia latou te faia e mulimuli atoatoa ai ia te Ia.

Gaoioiga e Ono Mafai Ona Aoao Ai

Mulimuli i le Tama Faalelagi

Afai e sili atu ona talafeagai i tagata aoga nai lo faataitaiga o loo i lalo, amata i le valaaulia o tagata aoga e faasoa mai ni mea faigata e ono fetalai atu le Alii ia i latou e fai.

Mafaufau pe o le a sou lagona pe afai e fetalai mai le Tama Faalelagi ia te oe e fai mea nei ma pe aisea o le a e lagona ai faapena:

• Faasoa atu le talalelei i se tasi na teena au valaaulia i le taimi ua tuanai.

• Faauo ma fesoasoani i se tasi i lau aoga o lē e lē fiafia i ai pe teena e tagata.

  Valaaulia ni nai tagata aoga e faasoa mai o latou lagona ma pe aisea.

• O a nisi poloaiga po o uunaiga e ono tuuina mai e le Tama Faalelagi ia i tatou e mafai ona faigata ona talia ma usitai i ai? Aisea e ono faigata tele ai nei tulaga?

I le mataupu o le a e suesueina i le asō, sa faatonuina ai e le Atua ia Alema ia feagai ma se tulaga e pei o le tulaga faataitai muamua o loo i luga, ma sa feagai Amoleka ma se tulaga e pei o le lona lua. Faaalu sina taimi e mafaufau loloto ai pe o i ai ni poloaiga po o ni uunaiga mai le Atua e faigata ia te oe ona usitai i ai. A o e suesue, vaavaai pe na faapefea ona faatoilalo e Alema ma Amoleka o la’ua luitau ma mulimuli i poloaiga a le Atua. Saili le fesoasoani a le Tama Faalelagi ia iloa pe mafai faapefea ona e faalogo lelei ma mulimuli ia te Ia.

E ono mafai ona fesoasoani mo tagata aoga le galulue faatasi ma se tasi o le vasega e faitau ma faasoa mai tala ia Alema ma Amoleka e pei ona lisiina i lalo o ulutala eseese o loo i lalo. Pe valaaulia le afa o tagata aoga e faitau le tala a Alema ma le isi afa e faitau le tala a Amoleka. Ona mafai lea e tagata aoga ona paga ma se tasi o le vasega na faitauina le isi tala ma faamatala i le tasi ma le isi mea sa la faitauina. Faaali atu fesili o loo avatu faatasi ai ina ia mafai e tagata aoga ona tagai i ai a o latou faitau.

Aafiaga o Alema

Faitau le Alema 8:8–18, ma vaavaai mo mea na poloaiina e le Atua ia Alema e fai ma pe aisea atonu na faigata ai mo ia. Taumafai e vaai faalemafaufau i mea na tutupu a o e faitauina. Atonu e te manao e matamata le vitio “Ua Laveaina Alema ma Amoleka i le Mana o le Atua” mai le faailo taimi 0:36 i le 2:22, o loo maua i le ChurchofJesusChrist.org, ma mulimuli i ai i au tusitusiga paia.

• O a fasifuaitau i le fuaiupu 14 o loo ta’u mai ai pe faape’ī lagona o Alema ina ua ia mauaina lenei poloaiga?

• O le a le fasifuaitau i le fuaiupu 18 o loo faamatala mai ai poo le a le umi ae usitai loa Alema?

• Aisea e te manatu na vave ai ona usitai Alema e ui lava ina sa ia lagonaina lea faanoanoa?

Aafiaga o Amoleka

Faitau le Alema 8:19–21; 10:4–11 e vaai po o le a le isi mea na sosoo ai. (Atonu e fesoasoani le iloa na faamatalaina e Amoleka lona aafiaga i le Alema 10:4–11.) Taumafai e vaai faalemafaufau i mea na tutupu a o e faitauina. Atonu e te manao e faaauau pea ona matamata i le vitio “Ua Laveaina Alema ma Amoleka e le Mana o le Atua” mai le faailo taimi 2:22 i le 4:03, o loo maua i le ChurchofJesusChrist.org.

• O le a se mea ua tatou aoaoina i le Alema 10:4–6 e uiga ia Amoleka? Aisea na ono faigata ai ia te ia ona usitai i le Atua ona o nei mea?

• Aisea e te manatu ai na faaauau pea ona aapa atu le Tama Faalelagi ia Amoleka e ui lava sa lei usitai o ia i le taimi ua tuanai?

Faitau le Alema 8:26–32 e iloa ai pe na faapefea ona faamanuiaina Amoleka ma Alema ona o a laua faatinoga.

• O a mataupu faavae na e aoaoina mai le tala ia Alema ma Amoleka?

Faalogo a o faasoa mai tagata aoga. Tusi so o se mataupu faavae i luga o le laupapa. Fesili atu pe aisea e taua ai le malamalama ai i nei mataupu faavae. Faaaoga upu a tagata aoga e tusi ai i luga o le laupapa se mataupu faavae e talitutusa ma le mataupu faavae o loo i lalo.

O se tasi o mataupu faavae atonu na e faailoa maia o le taimi tatou te faalogo ma usiusitai ai i le Tama Faalelagi, Na te faamanuiaina i tatou ma isi. E mafai ona tatou faalogo i le afioga a le Atua i ni auala eseese. Mo se faataitaiga, na taufai faalogo Alema ma Amoleka i le afioga a le Atua mai se agelu.

Atonu e fesoasoani le talanoaina ma tagata aoga o auala eseese e mafai ona tatou faalogo ai i le afioga a le Atua. Atonu e te manao e iloilo e tagata aoga le “Faaaliga” i le O le Taiala i Tusitusiga Paia po o le Bible Dictionary.

Faalogo ia te Ia

O le gaoioiga o loo i lalo ua faamoemoe e fesoasoani ai i tagata aoga e faatoilalo faafitauli atonu latou te feagai i le faalogo ma le usiusitai i le Atua. Atonu e sili atu ona lelei le faia o se talanoaga a le vasega po o ni vaega toalaiti. E mafai e tagata aoga ona faasoa mai manatu ma lisi i luga o le laupapa. Uunaia tagata aoga e fai ni fesili ma fesoasoani le tasi i le isi e sue tali. I le avea ai ma se vaega o lenei gaoioiga, atonu e te fautuaina atu pe faaaoga nisi o manatu o loo i lalo.

Sa fai atu Amoleka, “Sa valaauina au i le tele o taimi ae sa ou le fia faalogo” (Alema 10:6). I le amataga o lona olaga, sa lei faalogo foi Alema i le Atua mo se taimi (tagai Mosaea 27:8).

Vaai faalemafaufau e faapea, o se tasi e te iloa o loo faigata ona faalogo ma usiusitai i le Atua. Faaalu ni nai minute e mafaufau ai i mea e ono faaosofia ai lena tagata e faalagolago i le Alii. E ono mafai ona aofia ai mea nei:

• O le faataitaiga a Alema ma Amoleka o le usiusitai

• O faataitaiga o le usiusitai o le Faaola i le Tama

• O isi tala o tusitusiga paia ina ua faalogo se tasi ma usiusitai i le Atua

• O faamanuiaga ua e oo i ai a o e taumafai e usitai i le Atua

Mafaufau e matamata le vitio “O Le Faatuatua E Le Tupu Faafuasei, ae e ala i Filifiliga” mai le faailo taimi 1:40 i le 4:25, o loo maua i le ChurchofJesusChrist.org. I le vitio, o loo faamatala ai e Elder Neil L. Andersen o le Korama a Aposetolo e Toasefululua se alii talavou o le e faatinoina ma le faamaoni ma le usiusitai se musumusuga i se taimi o le le mautonu.

Valaaulia ni nai tagata aoga e faasoa mai o latou manatu. Mafaufau e faasoa atu foi ou manatu.

Faaalu sina taimi e faamaumau ai soo se musumusuga atonu na e maua mai le Tama Faalelagi. Mafaufau i mea e mafai ona e faia e faatino ai na musumusuga. E mafai ona aofia ai le tautino atu e usitai i poloaiga po o musumusuga patino ma soo se laasaga e tatau ona e faia. Afai e faigata le usitaia o nei poloaiga, mafaufau e tatalo ina ia fesoasoani le Tama Faalelagi ia te oe.

Valaaulia tagata aoga e faasoa mai mea latou te mananao e manatua mai faataitaiga a Alema ma Amoleka.

Faasoa atu lau molimau i au tagata aoga e faapea o le a fesoasoani le Tama Faalelagi ia i latou a o latou taumafai e faalogo ma usitai ia te Ia.

Manatu ma Talaaga o Faamatalaga

O a nisi o faamanuiaga e maua mai i lo tatou usiusitai i le Atua?

Na ta’ua e Peresitene George Q. Cannon (1827–1901):

Peresitene George Q. Cannon

O le usiusitai i le Talalelei e aumaia ai [tagata] i ni sootaga vavalalata tele ma le mafana ma le Alii. E faavae ai se sootaga vavalalata i le va o tagata i le lalolagi ma lo tatou Foafoa Sili i le lagi. E aumaia ai i le mafaufau o le tagata ola se lagona o le mautinoa atoatoa i le Silisiliese ma Lona naunau e faafofoga mai ma tali mai i aioiga a i latou o e faalagolago ia te Ia. I taimi o tofotofoga ma faigata o lenei talitonuga mautinoa e le mafaatusalia. Atonu e oo mai faalavelave i luga o tagata taitoatasi po o ni tagata, atonu e taufaamata’u mai mala, ma foliga ai ua lafotuina le faamoemoega uma faaletagata, ae, o mea o loo tuuavanoa ai e tagata i latou i manuia e aumaia e le usiusitai i le Talalelei, e mautinoa lava lo latou nofoaga; o loo tutu foi o latou vae i luga o se papa e le mafai ona fuliesea. (Gospel Truth: Discourses and Writings of George Q. Cannon, sel. Jerreld L. Newquist [1987], 116)

O le a se mea e mafai ona tatou aoao mai ia Amoleka?

Sa aoao mai Elder Dieter F. Uchtdorf, a o avea ma sui o le Au Peresitene Sili:

Peresitene Dieter F. Uchtdorf

Masalo, e pei o Amoleka, e te iloaina i lou loto e faapea ua “valaauina [oe e le Alii] i le tele o taimi” ae “sa [e] le fia faalogo.”

Ae ui i lea, o loo silasila atu le Alii ia te oe i le mea na Ia silasila ai ia Amoleka—o le gafatia o se auauna lototoa i se galuega taua e fai faatasi ai ma se molimau e faasoa atu. O loo i ai auaunaga e leai se tasi e mafai ona faia i le ala lava lea e tasi. Ua faatuatuaina oe e le Alii i Lana perisitua paia, lea e umia le gafatia paia e faamanuia ma siitia ai isi. Faalogo ma lou loto ma mulimuli i uunaiga a le Agaga. (Dieter F. Uchtdorf, “Aoao mai ia Alema ma Amoleka,” Ensign po o le Liahona, Nov. 2016, 73)

Gaoioiga Faaopoopo e Aoao Ai

Faitalia i le fuafuaga a le Tama Faalelagi

Na aoao atu e Alema le talalelei i tagata i Meleka ma Amonaea faatasi ai ma ni taunuuga fefiloi. E mafai e tagata aoga ona faatusatusa ia tali i le savali a Alema i le Alema 8:3–5, 8–13 ma talanoaina pe aisea e faatauaina ai e le Tama Faalelagi le faitalia. E mafai e le vasega ona fai se lisi o filifiliga o aso taitasi e fesoasoani ia i latou e latalata atili atu ai i le Tama Faalelagi ma filifiliga e taumamao ai mai ia te Ia. Mafaufau e valaaulia i latou e faaaoga lo latou faitalia e faalatalata atili atu ai i le Alii.

Valaauliaina o isi e o mai ia Iesu Keriso

O Alema ma Amoleka o ni faataitaiga lelei o soo o e sa finafinau ma onosai i le valaauliaina o isi e o mai ia Iesu Keriso. Mafaufau e valaaulia le vasega e faitau le Alema 8:10–21, 27–32, ma vaavaai pe na faapefea ona faaalia e Alema ma Amoleka lo la onosai ma le faatuatua. E mafai e tagata aoga ona faasoa mai ni auala e mafai ai ona latou finafinau ma onosai a o latou saili e fesoasoani i isi e o mai ia Iesu Keriso. E mafai ona latou fuafua pe fai se tala faatino o le auala e mafai ona latou tali atu ai ma le alofa ma le onosai pe afai e teena e se tasi se valaaulia mai ia i latou.

Sa lagona e Alema le lotovaivai

Mafaufau e valaaulia tagata aoga e mafaufau pe na faapefea ona fesoasoani le Alii ia Alema ina ua ia lagonaina le lotovaivai (tagai Alema 8:14). E ono fesoasoani le vaai o le ala na tali atu ai le Alii i popolega o Alema (tagai fuaiupu 15) ma le mea na faia mulimuli ane e Alema (tagai fuaiupu 18). Valaaulia tagata aoga e tusi se faamatalaga faamalosiau i se tasi latou te iloa atonu o loo lagonaina le lotovaivai.

E le tuuaunoaina lava i tatou e le Tama Faalelagi

Mafaufau e valaaulia tagata aoga e suesue nisi o tala nei, ma vaavaai mo faataitaiga a le Alii o loo faaauau pea ona aapa atu e fesoasoani i tagata.

• Tagata o Meleka (Alema 8:3–5)

• Nuu o Amonaea (Alema 8:8–10, 13, 16, 18, 29)

• Alema (Alema 8:14–15, 30–32)

• Amoleka (Alema 10:4–7, 11, 30–32)

Ona mafai lea e tagata aoga ona mafaufau pe na faapefea ona aapa atu le Alii pe o loo aapa atu ai e fesoasoani ia i latou.