Seminare
Alema 8–12: Vaaiga Aoao

“Alema 8–12: Vaaiga Aoao,” Tusi Lesona a le Faiaoga o le Tusi a Mamona (2024)

“Alema 8–12,” Tusi Lesona a le Faiaoga o le Tusi a Mamona

Alema 8–12

Vaaiga Aoao

Sa faatino e Alema ma Amoleka le faatuatua ma valaau atu i le nuu o Amonaea ia salamo. Sa latou fetaia’i ma tagata o e sa faaaoga faiga taufaasese e taumafai ai e taofi i latou, ma sa faailoa atu e le Agaga Paia na faiga taufaasese ia i latou. Ina ua amata ona fesili atu le loia o Seseroma ia Alema ma Amoleka i fesili faamaoni, sa aoao atu Alema o i latou e le faamaaaina o latou loto e mafai ona aoaoina mea a le Atua. Sa ia aoao atu foi le fuafuaga o le togiola ma uunaia tagata e suesueina o latou loto.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Alema 8

Faamoemoega o le lesona: O lenei lesona e mafai ona fesoasoani ai i tagata aoga ia faalogo ma usiusitai i le Tama Faalelagi i o latou olaga.

Alema 9

Faamoemoega o le lesona: O lenei lesona ua faamoemoe e fesoasoani ai i tagata aoga ia iloa ma manatua faamanuiaga ua tuuina mai e le Alii ia i latou.

  • Sauniuniga a le tagata aoga: Mafaufau e valaaulia tagata aoga e faaaoga se minute se tasi pe lua e tusi ai i lalo ni nai faataitaiga o faamanuiaga ua latou maua mai le Tama Faalelagi ma Iesu Keriso.

  • Anotusi e faaali atu: O le siata o loo faatusatusa ai sa Lamanā i le nuu o Amonaea, a le o le faaali atu po o le kopi i luga o le laupapa; o fesili i lalo o le ulutala “O le a se mea ua tuuina atu e le Alii ia te oe?” mo tagata aoga e mafaufau loloto i ai

  • Fautuaga faafaiaoga faavitio: I le faaiuga o le lesona, mafaufau e valaaulia tagata aoga e talanoa e uiga i ni nai o latou faamanuiaga ma se auala se tasi o le a latou taumafai e manatua ai. E mafai ona e tuu se tagata aoga se toatasi e vaaia ma valaaulia o ia e valaau atu i isi tagata aoga i le faasologa lea e faaali mai i latou i luga o le lau [a le masini] a lena tagata aoga. Ia faamanino atu e mafai e tagata aoga ona pasi atu lenei avanoa pe afai latou te lagona le le toafimalie. Mafaufau e faasoa atu foi ou manatu.

Alema 10–11

Faamoemoega o le lesona: O lenei lesona e mafai ona fesoasoani i tagata aoga ia talia atili le Agaga Paia ia iloa le upumoni ma iloa ai taufaasese iloagatā a le fili.

  • Sauniuniga a le tagata aoga: Valaaulia tagata aoga e mafaufau loloto i auala e ono taumafai ai Satani e faasese i latou.

  • Anotusi e faaali atu: O le siata e uiga i aoaoga sese, a le o le faaali atu po o le kopiina i luga o le laupapa

  • Anomea mo tagata aoga (tuu i le faitalia): O se tusiga e faatatau i le Alema 11:26–37, 40–41, na tuuina atu i ni tagata aoga se toalua ina ia mafai ona la faitau pe faatino le talanoaga i le va o Amoleka ma Seseroma (Afai e te filifilia lenei filifiliga, aveese fasifuaitau e pei o le “O lenei sa fai mai Seseroma” [Alema 11:28] ma le “Ma sa ia tali atu” [Alema 11:29].)

  • Vitio: “Faaeteete i le Tiapolo i tua atu o Mata Ataata” (9:52; matamata mai le faailo taimi 0:30 i le 2:35)

  • Fautuaga faafaiaoga faavitio: Ina ia fesoasoani i tagata aoga ia malamalama i le mea na taumafai Seseroma e faalata ai Amoleka, mafaufau e valaaulia i latou e sue i luga o le initoneti pe fia se tupe e ono maua e se tasi e i ai se galuega totogi maualuga, e pei o se loia, e mafai ona maua i lou nuu mo le faigaluega ai i le ono vaiaso.

Alema 12

Faamoemoega o le lesona: O lenei lesona e mafai ona fesoasoani i tagata aoga e iloilo ai o latou loto ma lo latou naunautaiga e talia le afioga a le Atua.

  • Sauniuniga a le tagata aoga: Mafaufau e tuu atu i tagata aoga se kopi o le iloiloga faaletagata lava ia i lenei lesona. Valaaulia i latou e iloilo i latou lava ma mafaufau loloto pe faapefea ona aafia i latou i a latou tali.

  • Anomea mo tagata aoga: Kelei mo tagata aoga e fatufatu ai se mea e fesoasoani ai ia i latou e mafaufau e uiga i loto maaa ma loto agamalu (O le tuuina atu i nisi o tagata aoga o se kelei mago pe malō e mafai ona fesoasoani i se talanoaga e uiga i le eseesega i le va o loto maaa ma loto agamalu.)

  • Ata: Atatusi o se loto agamalu ma se loto maaa i luga o le laupapa (E mafai ona e faaopoopo ni faamatalaga i nei ata i le aluga o le lesona.)

  • Fautuaga faafaiaoga faavitio: Mafaufau e muai valaaulia ni nai tagata aooga e saunia e faaali atu se mea faitino vaivai ma se mea faitino malō mai o latou aiga. Fesili i tagata aoga nei e faamatala mai pe mafai faapefea ona fesoasoani nei mea faitino ia i latou e malamalama ai i le taua o le i ai o se loto agamalu ma aloese mai le faamaaaina o o latou loto.

Atamai i Aoaoga Faavae Iloiloga 11

Faamoemoega o le lesona: O lenei lesona ua faamoemoe e fesoasoani i tagata aoga e tauloto fuaitau autu o mau mai fuaitau muamua e 12 o le atamai i aoaoga faavae o le Tusi a Mamona ma saili le malamalama atili e ala i le faia ma le taliina o fesili musuia.

  • Sauniuniga a le tagata aoga: Valaaulia tagata aoga e filifili mai fuaitau muamua e 12 o le atamai i aoaoga faavae se fuaitau se tasi latou te mananao e aoao atili i ai. Uunaia i latou e o mai saunia i le vasega e faasoa mai le fuaitau na latou filifilia ma ia le itiiti ifo ma le tasi se fesili latou te lagona e mafai ona fesoasoani ia i latou e aoao atili ai e uiga i lena fuaitau.

  • Pepa e tufatufa atu: “Fuaitau ma Fasifuaitau Autu Muamua e 12 o le Atamai i Aoaoga Faavae”

  • Fautuaga faafaiaoga faavitio: Mafaufau e valaaulia tagata aoga e faasoa mai i le talanoaga le fuaitau o le atamai i aoaoga faavae sa latou filifilia ma se tasi o fesili sa latou mafaufau i ai. Ona mafai lea ona e uunaia i latou e tali fesili a le tasi ma le isi.