Alma 5:1–32

Mga Pangutana ni Alma alang sa Pagsukod sa Kaugalingon

usa ka kausaban sa kasingkasing

Ang mga gutlo sa pagsukod sa kaugalingon makatabang kanato nga makita nga mas klaro ang kalig-on sa atong relasyon uban ni Jesukristo. Si Alma, nakahibalo kon sa unsang paagi ang garbo ug panagbingkil nahimong kabahin sa Simbahan, nangutana sa mga miyembro sa Simbahan sa Zarahemla og sunodsunod nga mga pangutana nga nagdasig kanila sa pagpamalandong sa gitutokan sa ilang mga kasingkasing ug sa ilang kahimtang atubangan sa Dios. Kini nga leksiyon gituyo aron pagtabang kanimo sa pagsukod sa imong espirituhanong pag-uswag ug pagpalig-on sa imong pagkakabig ngadto ni Jesukristo.

Pagtabang sa mga tigkat-on nga magtinguha og personal nga pagpadayag.Ang paghatag sa mga estudyante og panahon sa hilom nga pagtuon ug pagpamalandong sa mga kasulatan makatabang sa pagdapit sa Espiritu Santo. Kon ang mga estudyante motan-aw sa sulod aron sa pagsukod sa ilang pagsabot ug pagtuo sa ebanghelyo, makaamgo sila sa unsay ila nang nahibaloan ug makadapit sa Espiritu Santo aron sa pagtabang kanila sa pag-ila kon unsay kinahanglan nilang mahibaloan, bation, ug buhaton aron mas maduol ngadto kang Jesukristo.

Pagpangandam sa estudyante: Dapita ang mga estudyante sa pagbasa sa daklit sa Alma 5 ug markahan ang tanang marka sa pangutana [question mark] diha sa kapitulo. Mahimo usab nga pangutan-on sa mga estudyante ang ilang mga kaugalingon sa pipila ka mga pangutana nga gipangutana ni Alma sa iyang katawhan niini nga kapitulo.

Mga Posibleng Kalihokan sa Pagkat-on

Pagsukod sa kaugalingon

Paghunahuna mahitungod sa mga kahigayonan nga kinahanglan ka nga interbyuhon sa laing tawo, lakip ang mga interbyo sa rekomend sa templo, tinuig nga mga interbyo uban sa imong bishop o presidente sa branch, ug mga interbyo sa panarbaho.

• Unsa ang katuyoan sa mga interbyo?

• Unsaon kaha nimo pag-interbyo ang imong kaugalingon?

Si Presidente M. Russell Ballard sa Korum sa Napulog Duha ka Apostoles mipakigbahin sa pipila ka mga kaayohan sa kanunay nga paggahin og panahon sa pagsukod sa atong espirituhanong pag-uswag. Mahimo nimong tan-awon ang bidyo nga “Mobalik ug Modawat,” anaa sa https://www.churchofjesuschrist.org/study/general-conference/2017/04/return-and-receive?lang=ceb ChurchofJesusChrist.org, gikan sa time code 8:14 hangtod sa 8:58 o basaha ang teksto sa ubos.

Presidente M. Russell Ballard

Akong nabantayan nga aron makapabilin nga magtutok sa pagbalik [sa presensiya sa Dios] ug pagdawat sa gisaad nga mga panalangin, kinahanglan kong kanunayng mangutana sa akong kaugalingon, “Kumusta na man ko?”

Sama kini sa pagbaton og personal, pribado nga interbyo sa inyong kaugalingon. Ug kon dili kana kasarangan, hunahunaa kini: kinsa man ang mas nakaila sa inyong kaugalingon kaysa inyong pagkaila sa inyong kaugalingon? Nahibalo kamo sa inyong mga hunahuna, sa inyong pribadong mga lihok; sa inyong mga tinguha; ug sa inyong mga damgo, mga tumong ug mga plano. Ug mas nakaila kamo kay ni bisan kinsa unsa ang inyong paglambo. (M. Russell Ballard, “Mobalik ug Modawat ,” Liahona, Mayo 2017, 64)

Hunahunaa kon unsa ka kasagad naggahin og panahon sa pagsukod sa imong espirituhanong pag-uswag.

• Unsang matang sa mga benepisyo ang makuha gikan sa kanunay nga paghimo niini?

Usa ka kahanas nga imong magamit kon magtuon sa imong mga kasulatan mao ang paggahin og panahon sa paghunong ug pagsukod kon unsa ka maayo ang imong pagsunod sa mga pagtulun-an o mga baroganan nga imong gitun-an. Karon makabaton ka og kahigayonan sa pagbansay niana nga kahanas samtang magtuon ka sa Alma 5. Kini nga kapitulo naglangkob og daghang mga pangutana nga gipangutana ni Alma sa iyang mga katawhan. Mahimo usab nimong pangutan-on ang imong kaugalingon niini nga mga pangutana aron sa pagsukod sa imong espirituhanong pag-uswag. Samtang magtuon ka, tinguhaa ang giya gikan sa Langitnong Amahan aron matabangan ka nga makahibalo kon unsa ang imong gibuhat nga maayo ug kon sa unsang paagi ka Niya gusto nga molambo.

Aron matabangan ang mga estudyante nga makakita sa daghang mga pangutana nga anaa sa Alma 5, ikonsiderar ang pagdapit sa mga estudyante sa pagtan-aw sa daklit sa kapitulo ug pamatikdi ang daghang marka sa pangutana. Mahimo usab nimong dapiton ang mga estudyante sa paggahin og panahon atol sa ilang personal nga pagtuon sa kasulatan nga markahan o linginan ang tanang marka sa pangutana niini nga kapitulo kon wala pa nila kini mahimo.

Alma nagsangyaw ngadto sa katawhan sa Zarahemla

Hinumdomi nga human makakita sa garbo ug kahakog taliwala sa iyang katawhan, si Alma mikanaog isip labaw nga maghuhukom sa mga Nephite aron sa mas hingpit nga pagpahinungod sa iyang kaugalingon sa pagtudlo sa pulong sa Dios (tan-awa sa Alma 4:19).

Gisugdan ni Alma ang iyang pagsangyaw sa yuta sa Zarahemla. Gipahinumdoman niya kini nga mga tawo sa espirituhanon ug pisikal nga pagkabihag nga nasinati sa mga Nephite sa panahon ni Hari Noah (tan-awa sa Alma 5:3–5).

Basaha ang Alma 5:6–13, mangita sa unsay gusto ni Alma nga mahinumdoman sa iyang katawhan mahitungod sa miaging mga kaliwatan sa mga Nephite.

• Ngano sa imong hunahuna si Alma gusto nga ang iyang mga katawhan mahinumdom niini nga mga butang?

• Unsa ang gusto ni Alma nga mahibaloan sa iyang mga katawhan mahitungod ni Jesukristo sa bersikulo 7?

Basaha ang Alma 5:14, 26, mangita sa mga pangutana nga gipangutana ni Alma sa iyang mga katawhan human sa pagpahinumdom kanila sa ilang espirituhanong kabilin.

• Unsa sa imong hunahuna ang gusto ni Alma nga masabtan sa iyang mga katawhan pinaagi sa pagpangutana kanila niini nga mga pangutana?

  Mahimong motubag ang mga estudyante pinaagi sa pagsulti og mga kamatuoran sama sa mosunod: Gusto sa Ginoo nga makasinati kita og dako nga kausaban diha sa kasingkasing ug human kita matawo sa espirituhanon nga paagi sa Dios, kinahanglang maningkamot kita sa pagpadayon sa kausaban diha sa atong kasingkasing.

• Sa imong hunahuna sa unsang paagi ang pagpangutana sa imong kaugalingon sama sa mga pangutana gikan sa mga bersikulo 14 ug 26 makaapekto sa imong kinabuhi?

Paggamit sa mga pagtulun-an ni Alma sa pagpahigayon og pagsukod sa kaugalingon

Ipakita ang mosunod nga mga instruksiyon ug hatagi ang mga estudyante og igong panahon (mga 10–15 ka minuto, kon mahimo) sa hilom nga pagbuhat niini nga kalihokan nga sila ra. Mahimo nimong ikonsiderar ang pagpatukar og mga himno o espiritohanong musika nga hilom samtang gikompleto sa mga estudyante ang kalihokan.

Paggahin og panahon sa pagtuon sa mga pulong ni Alma ngadto sa katawhan sa Zarahemla diha sa Alma 5:14–30 ug pagpamalandong kon ikaw nakasinati o nagsinati ba sa kausaban nga gihulagway ni Alma. Samtang magtuon ka, ipahigayon ang imong kaugalingong pagsukod pinaagi sa paggamit sa pipila o sa tanang pangutana nga gipangutana ni Alma niini nga mga bersikulo. Ania ang pipila ka mga paagi nga mahimo nimo kana.

1. Hunong ug pamalandongi ang matag duha ngadto sa tulo ka mga bersikulo, sukdon kon sa unsang paagi ang mga pangutana ni Alma niadto nga mga bersikulo may kalabotan sa imong kinabuhi.

2. Pagpili og pipila sa mga pangutana ni Alma nga imong gibati nga labing makahuluganon ug may kalabotan kanimo. Isulat kini nga mga pangutana diha sa imong journal sa pagtuon ug irekord ang imong mga tubag sa matag pangutana ingon man sa bisan unsang ubang mga hunahuna o mga impresyon nga mamahimong aduna ka.

3. Human mailhan ang mga pangutana nga gipangutana ni Alma niini nga mga bersikulo, paghimo og duha o tulo ka mga pangutana nga imong magamit sa pagsukod sa imong kaugalingong espirituhanong pag-uswag. Irekord ang imong mga tubag diha sa imong journal sa pagtuon.

Human makompleto sa mga estudyante kini nga kalihokan sa pagtuon, hisgoti uban nila kon unsay ilang nakat-onan ug gibati samtang naghimo sila sa ilang mga pagsukod sa kaugalingon. Ang mosunod nga mga pangutana mahimong gamiton isip kabahin niini nga panaghisgotan.

• Hain sa mga pangutana ni Alma ang imong gibati nga labing makahuluganon kanimo? Ngano man?

• Unsa nga mga pulong o hugpong sa mga pulong ang imong napalgan gikan niini nga mga bersikulo nga makahatag kanimo og tinguha ug kaisog sa paghinulsol?

• Unsa ang imong nakat-onan mahitungod sa Dios ug sa Iyang mga tinguha alang kanimo gikan sa unsay imong natun-an?

Hunahunaa kon unsay imong nakat-onan o gibati karon samtang imong gigamit ang mga pulong ni Alma sa pagsukod sa imong espirituhanong pag-uswag. Pag-ila og usa o duha ka butang nga gusto nimong buhaton isip resulta sa imong natun-an. Hunahunaa kon unsay imong sugdan nga buhaton karon, unsa nga mga babag ang mahimong imong maatubang, ug unsaon nimo pagpangayo og tabang sa Dios sa pagbuntog sa imong mga babag. Irekord ang imong mga hunahuna ug mga impresyon diha sa imong journal sa pagtuon.

Komentaryo ug Background nga Impormasyon

Alma 5:9, 26. Unsay makapugong kanato sa padayong pagbaton og usa ka kausaban diha sa kasingkasing?

Si Elder Wilford W. Andersen sa Seventy mitudlo:

Elder Wilford W. Andersen

Kon madawat nato ang gasa sa Espiritu Santo human sa bunyag, mapuno kita sa langitnong musika nga nag-uban sa pagkakabig. Ang atong kasingkasing mausab, ug kita “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2). Apan ang Espiritu dili motunga kon dunay pagkadili mabination o garbo o kasina. Kon mawala nato kanang malumong impluwensya sa atong kinabuhi, ang abundang panag-uyon sa ebanghelyo mahanaw dayon ug sa katapusan dili na madungog. Si Alma nangutana sa makapatandog nga pangutana: “Kon kamo mibati sa pag-awit sa awit sa matubsanon nga gugma, ako mangutana, kamo mibati ba karon sa mao?” (Alma 5:26). (Wilford W. Andersen, “Ang Musika sa Ebanghelyo,” Liahona, Mayo 2015, 55)

Alma 5:14. Unsa ang gipasabot sa natawo sa Dios?

Si Elder David A. Bednar sa Korum sa Napulog Duha ka Apostoles mipasabot:

Elder David A. Bednar

Ang gitugotan nga mga sulugoon sa Ginoo nagbalik-balik sa pagtudlo nga usa sa importanting mga katuyoan sa atong mortal nga kinabuhi mao ang pag-usab sa espirituhanong paagi ug pag-usab pinaagi sa Pag-ula ni Jesukristo. …

Gimandoan kita sa “pagduol ngadto kang Kristo, ug paghingpit diha kaniya, ug paglimod sa [atong kaugalingon] sa tanan nga dili diosnon” (Moroni 10:32), aron mahimong “bag-o nang [mga] binuhat” diha ni Kristo (tan-awa sa 2 Mga Taga-Corinto 5:17), sa pagsalikway “sa kinaiyanhon nga tawo” (Mosiah 3:19), ug sa pagsinati og “dako nga kausaban dinhi kanato, o sa atong mga kasingkasing, nga kita wala nay hilig sa pag buhat og dautan, apan sa pagbuhat og maayo kanunay” (Mosiah 5:2). Palihog timan-i nga ang pagkakabig nga gihulagway niini nga mga bersikulo dako, dili gamay—usa ka espirituhanong pagkatawo pag-usab ug sukaranang kausaban sa unsay atong gibati ug gitinguha, unsay atong gihunahuna ug gibuhat, ug unsa kita. Sa pagkatinuod, ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa “maayo nga buhat, ug kaluoy, ug grasya sa Balaan nga Mesiyas” (2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab. (David A. Bednar, “Kinahanglang Matawo Kamo Pag-usab,” Liahona, Mayo 2007, 20)

Dugang nga mga Kalihokan sa Pagkat-on

Alma 5:4–13. “Kamo nagbilin ba og igo nga panumdoman sa pagkabihag sa inyong mga amahan?”

Ikonsiderar ang pagdapit sa mga estudyante nga motambong sa klase nga andam sa pagpakigbahin mahitungod sa usa ka katigulangan kinsa nagbilin kanila og kabilin nga sundon. Samtang naghisgot sa Alma 5:4–13, mahimo nimong dapiton ang mga estudyante sa pagpakigbahin sa ilang mga istorya. Mahimo usab nimong ikonsiderar ang paggamit sa mosunod nga pamahayag ni Elder William R. Walker sa Seventy isip kabahin niini nga panaghisgotan:

“Nindot kon ang matag Santos sa Ulahing mga Adlaw nakahibalo sa mga istorya sa pagkakabig sa ilang mga katigulangan. …

“Kon mobati kita nga konektado sa atong matarong nga mga katigulangan, mas makahimo kita og maalamon ug matarong nga mga pagpili.

“Kini tinuod. Matag usa nato mapanalanginan og maayo kon kita makahibalo sa mga istorya sa hugot nga pagtuo ug sakripisyo nga naggiya sa atong mga katigulangan sa pag-apil sa Simbahan sa Ginoo” (William R. Walker, “Pagpuyo nga Matinud-anon sa Tinuohan,” Liahona, Mayo 2014, 97, 99).

Espirituhanon nga cardiogram

Ipasabot nga ang cardiogram usa ka tsart nga usahay gamiton sa mga doktor sa pagsukod sa kahimtang sa atong pisikal nga mga kasingkasing. Sa samang paagi, ang mga pangutana nga gipangutana ni Alma diha sa Alma 5 gidesinyo sa pagtabang sa iyang mga katawhan sa pagsukod sa espirituhanong kahimtang sa ilang mga kasingkasing.

Ikonsiderar ang pagpakita sa mosunod nga mga bersikulo: Alma 5:27, 28, 29, 30–31. Dapita ang mga estudyante sa pagtuon sa matag bersikulo o hugpong sa mga bersikulo nga sila ra ug tubagan kon unsa ka maayo ang paghulagway sa mga pangutana ni Alma kanila pinaagi sa paggamit sa mosunod nga sukdanan: “Kanunay,” “Hapit kanunay,” “Kasagaran,” “Usahay,” o “Tagsa ra, kon ugaling.” Mahimo nimong isugyot nga tubagon sa mga estudyante ang pangutana sa bersikulo 29 ingon nga kini mabasa nga, “Nahuboan ka ba sa kasina?”

Human ang mga estudyante adunay igong panahon sa pagkompleto sa kalihokan, dapita sila sa pagrekord sa bisan unsa nga mga hunahuna o mga impresyon nga tingale aduna sila diha sa ilang mga journal sa pagtuon.

Mga pagtulun-an ni Alma sa pagpakatawo pag-usab

Mahimong makabenepisyo ang mga estudyante sa pagtuon sa Alma 5 nga adunay hunahuna sa pagpaningkamot nga mas masabtan ang pagkakabig. Pananglitan, ang mga estudyante mahimong magtuon sa Alma 5:2–7, maghatag og pagtagad sa papel [role] nga mahimo ni Jesukristo sa pagtabang kanato nga matawo pag-usab ug makasinati og kausaban sa kasingkasing. Mahimo nilang tun-an ang Alma 5:8–16, 21, mangita sa epekto nga mahimo sa Manluluwas niadtong kinsa natawo pag-usab ug nagpakita og hugot nga pagtuo diha Kaniya.

Bidyo sa Basahon ni Mormon

Isip kabahin sa pagtuon sa mga estudyante sa Alma 5, ikonsiderar ang pagpakita sa “Si Alma Nagpahimutang sa Simbahan diha sa Kahusay sa Zarahemla” gikan sa time code 0:00 hangtod sa 3:02.