Alema 4

O Le Maa Tu’ia o le Faamaualuga

Alema le Itiiti o loo talai atu i Kitiona

O le faamaualuga o le aunoa lea o se lotomaualalo ma e taitai atu ai tagata ia sili atu i latou po o le tetee atu le tasi i le isi ma le Atua (tagai O le Taiala i Tusitusiga Paia, “Faamaualuga,” scriptures.ChurchofJesusChrist.org). Mafaufau i le faamaualuga e te vaaia i le lalolagi i aso nei ma aafiaga le lelei o loo i ai ia te oe ma i latou o siomia oe. O le faamaualuga ma finauga na faaalia e nisi o tagata o le Ekalesia a le Faaola i ona po o Alema na mafua ai ona vaivai le Ekalesia i lona alualu i luma. O se taunuuga, sa musuia Alema e faamavae i le avea ai ma faamasino sili ina ia tuuto atu o ia lava i le talaiina o le afioga a le Atua. O lenei lesona e mafai ona fesoasoani ia te oe e faaaoga le afioga a le Atua e faatoilalo ai le faamaualuga ma finauga.

Fesoasoani i tagata aoga e maua aoaoga faavae ma mataupu faavae o le talalelei. O aoaoga faavae ma mataupu faavae e tatau ona faamatalaina manino ma maioio. E mafai ona latou aoaoina tagata aoga i le taua o tusitusiga paia ma pe faapefea ona faatatau tala ma aoaoga faatusi paia i o latou olaga i aso uma. O le malamalama ai i aoaoga faavae ma mataupu faavae e mafai ona faaosofia ai tagata aoga e aoao ma faaaoga aoaoga o le talalelei.

Sauniuniga a le tagata aoga: Valaaulia tagata aoga e o mai saunia e faasoa mai se mau po o se faamatalaga mai se taitai o le Ekalesia e uiga i le lotomaualalo.

Gaoioiga e Ono Mafai Ona Aoao Ai

O se maa tu’ia

I luga o le fola i le faitotoa o le potuaoga, faapipii se fasi pepa ma le upu “maa tu’ia” o loo tusia ai. Fesili atu pe toafia ni tagata aoga na faafuasei ona tu ai i luga ae latou te lei maitauina sa i ai iina ina ua latou o mai i le vasega. Afai e moomia, e mafai foi e tagata aoga ona faasoa mai ni aafiaga o se taimi na latou sulu pe tautevateva ai.

Toe mafaufau i se taimi na e sulu pe tautevateva ai. E te manatua le mea na mafua ai ona e sulu? I le olaga, o nisi taimi tatou te lāvea ai i mea e mafai ona ta’ua o “maa tu’ia.” E moni foi lenei mea i le faaleagaga.

E mafai ona fai o se vasega le gaoioiga fautuaina lenei o le tusi o ata i luga o le laupapa. Pe e mafai foi e tagata aoga ona faauma taitoatasi.

ata o poloka

Tusi ni nai poloka ma faaigoa i mea e ono afua ai ona tautevateva faaleagaga le autalavou. Mo se faataitaiga, atonu e faafaigata i nisi ona faalogo i le perofeta pe usitai i le Upu o le Poto.

Mafaufau i taunuuga o le tautevateva ai i nei mea. Mafaufau loloto pe aisea e te manaomia ai le fesoasoani a le Atua ia iloa, aloese ai, ma faatoilalo nei maa tu’ia.

Na aafia talu ai nei le nuu o Alema i le tele o toilalo i le taua ma sa Lamana. Ona o o latou puapuaga, “na fagua ai i latou i le manatuaina o lo latou tiute,” ma e toatele tagata na papatisoina (tagai Alema 4:1–5). Peitai, sa lei umi lo latou filemu ona sa amata ona latou tautevateva faaleagaga.

Faitau le Alema 4:6–8, ma vaavaai pe aisea na popole ai taitai o le Ekalesia.

Valaaulia tagata aoga e faasoa mai mea na latou maua ma fesoasoani ia latou iloa o le faamaualuga e mafai ona avea ma se maa tu’ia faaleagaga.

• Aisea e te manatu ai na “faanoanoa tele” taitai o le Ekalesia (Alema 4:7) i le faateleina o le faamaualuga o tagata?

Sa aoao mai Peresitene Ezra Taft Benson (1899–1994):

Peresitene Ezra Taft Benson

O le faamaualuga o le maa tuia tele lea i Siona. Ou te toe fai atu: O le faamaualuga o le maa tuia tele lea ia Siona. (Ezra Taft Benson, “Beware of Pride,” Ensign, Me 1989, 7)

Tusi se poloka tele e faatusa i le maa tu’ia o le faamaualuga. I luga o le poloka, lisi ai tali i fesili nei:

• O le a sou manatu e mafai faapefea e le faamaualuga ona tautevateva faaleagaga ai se tasi?

• O a ni auala e taofia ai i tatou e le faamaualuga mai le avea atili e faapei o le Faaola?

A o faaauau pea ona e suesue i le Alema 4, mafaufau pe faapefea ona avea le faamaualuga ma se maa tu’ia ia te oe ma poo a mea e mafai ona e faia e faatoilalo ai.

Faitau le Alema 4:8–12, ma vaavaai mo aafiaga o le faamaualuga i le Ekalesia. Ia matau o le fefinauai o lona uiga o le ita po o le feeseeseaiga po o finauga. O le feitaga’i o le manao lea e fai mea leaga, po o le loto le lelei.

Valaaulia tagata aoga e lisi i luga o le laupapa ia aafiaga o le faamaualuga i le Ekalesia. O le a faasino atu i le lisi i se taimi mulimuli ane o le lesona. Afai e lava au mea e faaaoga i tusitusiga, ia tuu atu i ni tagata aoga e o mai i le laupapa i le taimi e tasi. Ona valaaulia lea o tagata aoga e tali fesili nei:

• O a ni aafiaga o le faamaualuga sa iai i le Ekalesia?

• O a ni auala e le talafeagai ai nei amioga i tagata o le Ekalesia a le Faaola?

• Na faapefea ona aafia i latou e le o ni tagata o le Ekalesia?

Aloese ai mai le faamaualuga ma finauga

Sa aoao mai Peresitene Ezra Taft Benson:

Peresitene Ezra Taft Benson

O le vaifofo mo le faamaualuga o le lotomaualalo—agamalu, gauai atu [tagai Alema 7:23]. (Ezra Taft Benson, “Beware of Pride,” Ensign, Me 1989, 6)

Faitau le Alema 4:13–14, ma vaavaai mo mea na faia e nisi o tagata o le Ekalesia e aloese ai mai le faamaualuga ma tumau i le faamaoni. Maitau o le faalotomaualalaloina i le fuaiupu 13 e faasino i le avea ia lotomaualalo atili ma le agamalu.

Valaaulia tagata aoga e tusi faatinoga faatauvaa a tagata o le Ekalesia i luga o le laupapa.

• O a faatinoga ma amioga i fuaiupu 13–14 e faamanatu atu ai ia te oe Iesu Keriso?

• E mafai faapefea e le atiina a’e o nei uiga ma le faia o nei faatinoga ona fesoasoani ia i tatou ia avea atili e faapei o Ia?

• Na faapefea ona e vaaia isi o ola ai i nei uiga faaKeriso po o faatinoga, ma na faapefea ona aafia ai oe i lena mea?

Tuu atu se taimi mo tagata aoga e mafaufau loloto le leoa ai i so o se faamaualuga po o se finauga o loo ono i ai i o latou olaga ma pe faapefea ona latou mulimuli i le faataitaiga a le Faaola.

Na naunau Alema e tatau ona ia faaaluina lona taimi e fesoasoani ai i tagata i le tulaga faaleagaga. Sa ia tuuina atu le nofoa faamasino ia Nifaea a o faatumauina le tofi o le faitaulaga sili mo ia lava (tagai Alema 4:15–18).

Faitau le Alema 4:19 ma vaavaai mo mea na iloa e Alema e mafai ona “toso i lalo” le faamaualuga ma finauga i le va o tagata. E mafai foi ona e matamata i le “Ua Talai Atu e Alema le Afioga a le Atua” mai le faailo taimi 0:36 i le 1:59, o loo maua i le ChurchofJesusChrist.org.

• O a ni auala na galue ai Alema e faapei o Iesu Keriso?

• O le a se mea e mafai ona tatou aoao mai le faataitaiga a Alema?

O se tasi upumoni mai le Alema 4:19 o le afioga a le Atua ma le lagonaina o le molimau mama a’ia’i e mafai ona fesoasoani ia i tatou e faatoilalo le faamaualuga ma finauga.

Vaavaai mo mea na aoao mai e Peresitene Ezra Taft Benson e uiga i le afioga a le Atua i le faamatalaga lenei.

Peresitene Ezra Taft Benson

O le afioga a le Atua, e pei ona i ai i tusitusiga paia, i upu a perofeta soifua, ma i faaaliga patino faaletagata lava ia, o loo i ai le mana e faamalosia ai le Au Paia ma faaauupegaina ai i le Agaga ina ia mafai ona latou tetee atu i le leaga, taofimau i mea lelei, ma maua ai le olioli i lenei olaga. (Ezra Taft Benson, “The Power of the Word,” Ensign, Me 1986, 80)

• O a ni auala e mafai ai e le afioga a le Atua ma le tuuina atu o le molimau mama a’ia’i ona fesoasoani e toso i lalo le faamaualuga ma finauga?

Valaaulia tagata aoga e filifili ni aafiaga se lua pe tolu o le faamaualuga sa latou lisiina i luga o le laupapa, ma tuu atu ia i latou se taimi e suesue ai pe faapefea ona faatoilalo na faafitauli i ni vaega toalaiti.

E mafai e tagata aoga ona suesue i autu e pei o le “Lotomaualalo” i le Taiala i Autu po o le O le Taiala i Tusitusiga Paia. E mafai foi ona fesoasoani e faaali atu ai ia i latou le auala e faia ai se sailiga i le polokalama o le Gospel Library e sue ai faamatalaga.

Valaaulia vaega e faasoa mai mea ua latou aoaoina i le vasega, e aofia ai auala e mafai ona tatou taulimaina atili ai isi e pei ona faia e le Faaola. I se isi foi faiga, a uma ona suesue, e mafai ona latou tusia se lauga puupuu e talanoaina ai faafitauli o le faamaualuga ma finauga.

Uunaia tagata aoga e faatino soo se musumusuga na latou maua e uiga i le auala e mafai ona latou faaaoga ai mea sa latou aoaoina i lenei lesona.

• Lisi ni faafitauli se lua pe tolu e mafua mai i le faamaualuga ma finauga.

• Lisi mau ma aoaoga a perofeta o aso nei e te lagona e mafai ona fesoasoani i nei faafitauli.

• Faailoa pe aisea pe faapefea foi ona fesoasoani mea na e lisiina e te taulimaina ai isi e pei ona faia e le Faaola.

Saili e maitau ma iloa uunaiga mai le Agaga Paia i auala e ono mafai ona e faaaogaina ai mea sa e aoaoina i lenei lesona. Vaavaai mo avanoa e mulimuli tautu ai i na musumusuga.

Manatu ma Talaaga o Faamatalaga

Alema 4:8. O a ni auala tatou te taufaifai ai pe faatauemu ai le isi i le tasi i nisi o taimi?

Na faamatala mai e Peresitene Dallin H. Oaks o le Au Peresitene Sili:

Peresitene Dallin H. Oaks

E toatele faiaoga i le lotu ma aoga e faanoanoa i le auala o loo taulimaina ai isi talavou, e aofia ai ma le autalavou a le Ekalesia, le tasi ma le isi. O le poloaiga ia outou fealofani ua mautinoa lava o loo aofia ai le alofa ma le faaaloalo i va o lotu eseese faapea ai ma so o se tulaga faale-ituaiga, faaleaganuu ma faaletamaoaiga. Matou te luiina le autalavou uma ia aloese mai le faamaasiasi tagata, faatiga, po o gagana ma faiga e faamoemoe e faatiga ai i isi. O nei mea uma e solia ai le poloaiga a le Faaola o le fealofani. (Dallin H. Oaks, “Ola Faatasi ma Alolofa atu i Isi e Eseese o Tatou Talitonuga,” Ensign po o le Liahona, Nov. 2014, 27)

Matamata i le “O Loto ua Fili Faatasi,” mai le faailo taimi 7:03 i le 8:15 e vaavaai ai i le fautuaga na faasoa mai e Elder Gary E. Stevenson o le Korama a Aposetolo e Toasefululua e uiga i le taulimaina o isi ma le alofa ma le faaaloalo.

Alema 4:10. E faapefea ona “amata ai ona vaivai o le ekalesia i lona alualu i luma” o se taunuuga o le faamaualuga?

Na faamatala mai e Peresitene Dallin H. Oaks o le Au Peresitene Sili:

Peresitene Dallin H. Oaks

O loo faamatala mai e le Tusi a Mamona se taimi i le Ekalesia a le Atua na “amata ai ona vaivai o le ekalesia i lona alualu i luma” (Alema 4:10) ona sa “amata [e] tagata o le ekalesia … ona tuu atu o latou loto i luga o oa ma luga o mea lē aoga o le lalolagi” (Alema 4:8). Po o ai lava e mauoa i mea faalelalolagi ua lamatia i le “faatamaiaina” faaleagaga e oa ma isi mea o le lalolagi. (Dallin H. Oaks, “O Le Faataoto o le Lūlū Saito,” Ensign po o le Liahona, Me 2015, 34)

Na aoao mai Elder Quentin L. Cook o le Korama a Aposetolo e Toasefululua:

Elder Quentin L. Cook

Ona o le aoaoga faavae faagaeetia o le Toefuataiga, ua olioli ai tagata o le ekalesia i le talalelei ma maua le olioli ma le faamalieina i le Ekalesia. E mataina lelei i tatou pe a tatou ola ai i aoaoga o le talalelei toefuataiina a Iesu Keriso. A lē ola ai tagata o le ekalesia i aoaoga, e mafai ona avea o se maa tu’ia ia i latou e le auai i le Ekalesia (Alema 4:10). (Quentin L. Cook, “Our Father’s Plan—Big Enough for All His Children,” Ensign or Liahona, Me 2009, 35)

Aisea e faataumaoia ai le faamaualuga?

Na faasoa mai e Elder Dale G. Renlund o le Korama Aposetolo e Toasefululua le mea lenei:

Elder Gary E. Stevenson

A faamaualuga, tatou te mananao ia faaee le mamalu ia i tatou lava nai lo le tuuina atu i isi, e aofia ai le Alii. O le faamaualuga e masani lava o le faatautava; o le lilifa atu e saili ia sili atu mea ua maua ma mafaufau ua tatou sili atu nai lo isi. O le faamaualuga e masani ona iu i lagona o le ita ma le inoino; e mafua ai le ita faamoemoe po o le taofia ai o le faamagalo atu. (Gary E. Stevenson, “Gasetoto Faaleagaga,” Ensign po o le Liahona, Nov. 2017, 47)

Gaoioiga Faaopoopo e Aoao Ai

Faataitaiga lelei ma le leaga

Afai o le a manuia tagata aoga mai se ata o se faataitaiga lelei ma se faataitaiga le lelei o le aafiaga a tagata o le Ekalesia i isi, mafaufau e matamata pe faitau le saunoaga a Peresitene Gordon B. Hinckley (1910–2008) “O Le Manaomia o le Agalelei Tele Atu.” Matamata le vitio mai le taimi faailo 6:31 i le 11:54.

Saili pe faapefea ona tetee atu i aafiaga o le faamaualuga

Afai o le a manuia tagata aoga mai le galue ai i se tulaga faataitai lea e ono avea ai le faamaualuga ma se popolega, e mafai ona e faasoa atu le tulaga faataitai lenei ma tuu i tagata aoga e fatu ni vaaiga se lua o le vaega o totoe o le tala. E mafai ona faia o se vasega. O se tasi o vaaiga e mafai ona faapea o filifiliga a le alii talavou e taitai atu ai i lona tautevateva ona o le faamaualuga. O le isi e mafai ona avea ma auala e faaaoga ai e le alii talavou le afioga a le Atua e tumau ai i le lotomaualalo.

“O Raul o se alii talavou tulaga ese. A o i ai pea i le aoga maualuga, sa faafaigaluegaina o ia mo se galuega lelei lea e faaluaina le aofai o lona totogi nai lo isi o lana tupulaga.”

Faatusatusa ma le faaeseesega

Valaaulia tagata aoga e faasoa mai mea e tutusa ai faapea ma eseesega i le vaega o tagata o loo faamatalaina i le Alema 1:19–24 ma i latou o loo faamatalaina i le Alema 1:25–31. Ia faapena foi ona faia ia i latou o loo faamatalaina i le Alema 4:1–5 ma i latou o i le Alema 4:6–10. Valaaulia tagata aoga e faasoa mai uiga faaKeriso o loo maua i nei fuaitau ma pe mafai faapefea ona tatou mulimuli i nei faataitaiga ia avea atili ai e faapei o le Tama Faalelagi ma Iesu Keriso ma avea ma ni soo sili atu le lelei.

Alema 4:19. O le mana o le molimau mama a’ia’i

Afai o le a manuia tagata aoga mai le aoao atili e uiga i le mana o le molimau, mafaufau e matamata le “O Le Tagata Oge Upu” (6:06) po o le “Molimau Mamā A’ia’i” mai le faailo taimi 1:33 i le 3:54. Valaaulia tagata aoga e faasoa mai ni faataitaiga i auala na tosinaina a latou molimau ia Keriso e molimau a isi, ma uunaia i latou e vaavaai mo avanoa e faasoa atu ai a latou molimau i isi e faatosinaina ai i latou mo le lelei.