Seminare
Alema 1:19–33: Mauaina o le Filemu ia Keriso e ala i le Tumau Faamaoni i taimi o Sauaga

“Alema 1:19–33: Mauaina o le Filemu ia Keriso e ala i le Tumau Faamaoni i taimi o Sauaga,” Tusi Lesona a le Faiaoga o le Tusi a Mamona (2024)

“Alema 1:19–33,” Tusi Lesona a le Faiaoga o le Tusi a Mamona

Alema 1:19–33

Mauaina o le Filemu ia Keriso e ala i le Tumau Faamaoni i taimi o Sauaga

Ata
faifeautalai fiafia o loo aoaoina se tina ma se tamaitiiti

Matou te talitonu ua i ai i tagata uma le aia tatau e tapuai ai i le Atua e tusa ai ma o latou lava lotofuatiaifo (tagai Mataupu Faavae o le Faatuatua 1:11). Ae o le a le mea e tupu pe afai e sauaina oe e isi ona o ou talitonuga? E mafai faapefea ona e tali atu ma maua le filemu pe afai e faitioina oe e isi ona o lou talitonuga? I ona po o Alema, o tagata “sa amata ona latou sauaina i latou o e sa auai i le ekalesia a le Atua” (tagai Alema 1:19). O lenei lesona e mafai ona fesoasoani ia te oe e tali atu ai ma le faamaoni ma lagona le filemu e tusa lava pe e te feagai ma sauaga ona o le avea ai ma se tasi O Le Ekalesia a Iesu Keriso o le Au Paia o Aso e Gata Ai.

Fesoasoani i tagata aoao e atiina a’e tomai i suesuega o tusitusiga paia. O le vaavaai mo lisi i tusitusiga paia e mafai ona fesoasoani ai i faiaoga ma tagata aoga e faailoa manatu autu o loo faamamafa e le tusitala. E mafai foi e tagata aoga ona fai ni lisi o mafaufauga, manatu faaalia, po o faatonuga e faatatau i ai e fesoasoani ia latou malamalama ai i mea o loo latou aoaoina.

Sauniuniga a le tagata aoga: Valaaulia tagata aoga e mafaufau e uiga i taimi i o latou olaga na luitauina ai o latou talitonuga ma pe na faapefea ona latou tali atu.

Gaoioiga e Ono Mafai Ona Aoao Ai

O le sauaina ona o ou talitonuga

Faasoa atu le faamatalaga lenei mai ia Elder Jeffrey R. Holland. Pe mafaufau e valaaulia tagata aoga e faatino se tala o se tulaga faataitai lea e ono sauaina ai i latou ona o o latou talitonuga.

Na fautuaina e Elder Jeffrey R. Holland o le Korama a Aposetolo e Toasefululua talavou o le Ekalesia. Maimoa le vitio “O le Tau—ma Faamanuiaga—o le Avea ma Soo” mai le taimi faailo 0:25 i le 2:05, o loo maua i le ChurchofJesusChrist.org, pe faitau le faamatalaga o loo i lalo:

Ata
Elder Jeffrey R. Holland

Faatasi ai ma se faamemelo ma le faamalosiauga mo tagata uma o e o le a manaomia ona tutumau mausali i nei aso e gata ai, ou te fai atu i tagata uma aemaise lava i le autalavou o le Ekalesia pe afai tou te lei faia, o le a oo lava i se aso o le a valaauina ai oe e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o Le Ekalesia a Iesu Keriso o le Au Paia o Aso e Gata Ai. O ia taimi faapea o le a manaomia uma ai le lototele ma le amio solia mai ia te outou.

Mo se faataitaiga, sa tusi mai ia te au talu ai nei se tamaitai faifeautalai: “Sa ma vaaia ma la’u soa se alii o saofai i luga o se nofoa umi i totonu o le taulaga ma tausami lana ‘aiga o le aoauli. A o ma latalata atu, sa ia tilotilo mai i luga ma iloa mai ma pine faifeautalai. Faatasi ai ma se foliga pāū, sa ia oso i luga ma sii lona lima e po a’u. Sa fetaui lelei lava ma la’u ‘alo, o lea sa ia luai mai ai ana meaai i luga ia te a’u ma amata ona palauvale i upu sili ona mataga. Sa ma savavali ese e aunoa ma se upu. Sa ou taumafai e soloese meaai mai o’u foliga, ae ou lagonaina ai le tau o le potoi pateta i tua o lo’u ulu. O nisi taimi e faigata le avea ai ma se faifeautalai aua sa ou manao e toe foi i ai i lena lava taimi, uu lena alii, ma fai i ai, ‘O LE A LAU TALA!’ Ae ou te lei faia.” (Jeffrey R. Holland, “O Le Tau—ma Faamanuiaga—o le Avea ma Soo,” Ensign po o le Liahona, Me 2014, 6)

Fesoasoani i tagata aoga e mafaufau i o latou lava lagona e ala i le fai atu o nisi po o fesili uma nei.

  • Mata na faapefea ona e tali atu pe ana faapea o oe o le faifeautalai i lenei tulaga?

  • Aisea e ono faigata ai ona tali atu i se ala faaKeriso?

  • O anafea na soona fai ai oe pe sauaina ona o ou talitonuga?

  • O a nisi o tulaga i le lumanai e ono sauaina ai oe ona o ou talitonuga?

A o e suesue i faataitaiga a tagata o le Ekalesia a Keriso i le Tusi a Mamona, vaavaai mo auala e mafai ona e tumau mausali ai ma maua le filemu ia Iesu Keriso i le taimi o sauaga.

Sauaga i le Tusi a Mamona

Sa tele luitau o Alema i lona taimi a o avea ma faamasino sili. Ina ua mavae le fasiotia o Neoa ona o le fasiotia o Kitiona, sa faaauau pea ona talitonu nisi o tagata i aoaoga a Neoa. Faitau le Alema 1:19–24, ma vaavaai mo luitau na feagai ma sa Nifae.

  • O a ni mea talitutusa o loo e vaaia i le va o mea na feagai ma sa Nifae ma ou aafiaga?

  • O a faatinoga mai tagata o le Ekalesia na saofaga i nei luitau (tagai fuaiupu 22)?

Atonu e te manao e faasino atu i tagata aoga e faapea na aoao mai le Faaola, o finauga e sese ma e mai le tiapolo (tagai 3 Nifae 11:29–30). E aofia ai pe afai o mea o loo e aoaoina atu e moni ma sa’o.

Faitau le Alema 1:25–28, ma vaavaai mo mea na faia e tagata amiotonu o le Ekalesia. Ina ia fesoasoani ia te oe e faatulaga mea sa e suesueina, fai se lisi o mea na faia e tagata. E mafai ona e faia lenei mea i lau api talaaga mo suesuega, pe faailoga mea e te maua i au tusitusiga paia.

E mafai ona aoaoina tagata aoga i le tomai faale-suesuega o tusitusiga paia o le faia o lisi. E mafai ona latou makaina tusitusiga paia i se auala e talafeagai ia i latou. O nisi tagata aoga atonu e mananao e faaopoopo se ulutala i le lisi e pei o le “O le Auala e Maua ai le Filemu Pe a Sauaina” po o se isi ulutala i a latou tusitusiga paia.

E mafai ona valaaulia tagata aoga e filifili se aitema se tasi mai a latou lisi ona fealuai solo lea i le potu ma tali fesili o loo i lalo faatasi ma le toatele o tagata aoga e mafai ona faia.

  • O a nisi o auala eseese na tali atu ai tagata o le Ekalesia i sauaga?

Faauma le fasifuaitau lenei i se mea na e aoaoina mai le faataitaiga a sa Nifae.

  • … e mafai ona fesoasoani tatou te lagona ai le filemu faifaipea o le Faaola e tusa lava pe sauaina i tatou ona o le talitonu ia te Ia.

  • O le a sou manatu e mafai faapefea e le tali atu i nei auala ona fesoasoani i se tasi ia lagonaina le filemu o le Faaola?

  • O le a se mea mai nei fuaiupu po o lau lisi e sili ona e manao e manatua pe afai e te feagai ma sauaga ona o ou talitonuga? Aisea?

    Afai e i ai se taimi, mafaufau e talanoaina nisi o aoaoga a le Faaola e uiga i le onosaia o sauaga i le 3 Nifae 12:10–12, 43–45.

    Atonu e aoga le valaaulia o tagata aoga e mafaufau loloto i le isi fesili nai lo le fai atu ia i latou e tali leotele mai. O le faia o lena mea e mafai ai e le Agaga Paia ona taialaina patino i latou e aunoa ma se lagona faapea ua faamalosia i latou e faasoa mai ni uunaiga patino.

  • O a ni aafiaga i lou olaga ua e lagona ai le manaomia o le filemu ua ofoina mai e Iesu Keriso?

E sili atu nai lo na o le filemu

E faaopoopo atu i le mauaina o le filemu, sa faamanuiaina e le Tama Faalelagi sa Nifae faamaoni i isi auala. Faitau le Alema 1:29–32, ma vaavaai mo faamanuiaga a le Tama Faalelagi ia sa Nifae a o latou tumau mausali i taimi faigata.

  • Na faapefea ona e vaaia faamanuiaga a le Tama Faalelagi a o tumau faamaoni pea oe po o isi e te iloa i taimi o sauaga?

Mafaufau e faasoa atu se aafiaga patino o le ala ua faamanuiaina ai oe e le Alii po o se tasi e te iloa ona o le tumau faamaoni i taimi o sauaga.

Filifili ia le itiiti ifo ma le lua ni faatinoga na faia e sa Nifae faamaoni e faaalia ai le alofa ma le agaalofa mo tagata uma e ui lava i sauaga (tagai Alema 1:25–30). Faamatala pe mafai faapefea e se tasi i o tatou aso ona faia lea lava mea e tasi.

Valaaulia tagata aoga e faasoa mai a latou tali.

Faasoa ma tagata aoga ou talitonuga mautinoa o le a fesoasoani le Faaola ia i latou ia tumau mausali ia te Ia e oo lava i taimi o sauaga. Valaaulia i latou e mafaufau e faatino mea na faasoa mai e i latou po o se tasi o le latou vasega.