Enosa

O Le Faatuatua ia Iesu Keriso e Mafai ona Aumaia ai le Faamagaloga o Agasala

Enosa o loo tatalo

Na i ai se taimi na e mafaufau ai pe faapefea ona maua le faamagaloga o au agasala? O Enosa, le atalii o Iakopo ma o le atalii o le atalii o Liae, sa tatalo atu i le Atua “i le tatalo malosi” (Enosa 1:4) mo le faamagaloga o ana agasala. O lenei lesona ua faamoemoe e fesoasoani ia oe e faatino ai le faatuatua ia Iesu Keriso ma salamo ina ia maua le faamagaloga.

Tatalo. O se vaega o le saunia e aoao atu lesona, mafaufau e tatalo i le Tama Faalelagi, ma ole atu ia te Ia e fesoasoani i au tagata aoga. E talafeagai le tatalo ina ia latou iloa le mea e fai e faamalosia ai lo latou faatuatua ia Iesu Keriso ma fesoasoani ai ia i latou e faalogo mo uunaiga mai le Agaga Paia.

Sauniuniga a le tagata aoga: Valaaulia tagata aoga e faitau le Enosa 1:1–8 a o lei amataina le vasega, ma manatunatu i lagona o Enosa ma mea sa ia aoaoina e uiga i le Alii ma le faamagaloina o ana agasala. Mafaufau e fai atu i tagata aoga e mafaufau loloto pe na faapefea ona suia e lenei aafiaga le olaga o Enosa.

Gaoioiga e Ono Mafai Ona Aoao Ai

Mafaufau po o le a le uiga o le faamagaloga ia te oe

Mafaufau e fai le gaoioiga lenei e fesoasoani ai i tagata aoga e sauni e suesue e uiga ia Enosa ma le faamagaloga.

Mafaufau faapea e i ai sau uo ua fesili atu ia te oe e uiga i le salamo ma le faamagaloga. Mafaufau pe faapefea ona e tali atu i fesili nei:

• E faapefea ona e iloa pe manaomia ona faamagaloina oe mo se mea?

• E mafai faapefea ona e maua le faamagaloga mo agasala?

• E mafai faapefea e se tasi ona iloa pe ua faamagaloina i latou pe a uma ona latou taumafai e salamo?

Mafaufau loloto i sau tala e fai atu i lau uo. Mafaufau e uiga i mea ua e iloa ma ua e oo i ai i le sailia o le faamagaloga, faapea foi ma mea atonu e te manao ia iloa atili.

Mafaufau e valaaulia ni nai tagata aoga e faasoa mai ni mea atonu latou te fai atu ai.

A o e suesue i le tala ia Enosa i lenei lesona, vaavaai mo mea na ia faia e maua ai le faamagaloga o ana agasala ma pe faapefea ona faatatau i lou olaga.

O le faamagaloga e amata i fesootaiga loloto i le va o oe ma le Atua

O Enosa, le atalii o Iakopo ma o le atalii o le atalii o Liae, sa tatalo atu i le Atua “i le tatalo malosi“ mo le faamagaloga o agasala.

Faitau le Enosa 1:1–8 ma faailoga upu ma fasifuaitau e fesoasoani e te malamalama atili ai i le auala e saili ma maua ai le faamagaloga.

Mafaufau e valaaulia tagata aoga e tusi i luga o le laupapa ia fasifuaitau na tulaga ese ia i latou.

O le faaaluina o se taimi e mafaufau loloto ai i fasifuaitau taua e mafai ona avea ma se tomai aoga mo le suesueina o tusitusiga paia. E mafai ai e le Agaga Paia ona musuia oe i se malamalama sili atu. Ina ia mafaufau loloto, atonu e te mafaufau po o le a le uiga o se fasifuaitau ma sue soo se upu e te manao e malamalama atili ai i le Taiala i Tusitusiga Paia po o le Taiala o Autu. Atonu e te mafaufau loloto pe aisea na faaaoga ai e Enosa se fasifuaitau faapitoa ma pe na e oo iai i se mea faapena.

Filifili ni nai fasifuaitau nei po o isi na e faailoaina ma faaalu sina taimi e mafaufau loloto ai i mea e mafai ona e aoao mai ai.

Mafaufau e faaopoopo soo se fasifuaitau nei i luga o le laupapa. A o faasoa mai e tagata aoga nei fasifuaitau, e mafai ona e fai atu ni fesili tulitatao e pei o le “O le a sou manatu o le a se uiga o le fasifuaitau a Enosa ‘sa matelaina lo’u agaga’?” “Faamata e faapefea e le tomanatu i aoaoga e uiga i le ola e faavavau ma le olioli o le Au Paia ona mafua ai ona matelaina le agaga o se tagata?” “Aisea e mafua ai ona tatou lagona le gaogao faaleagaga ona o le agasala?” “Aisea ua avea ai le fagatuaga o se upu lelei e faamatala ai a tatou taumafaiga ia salamo?”

• O “le fagatuaga na ou faia i luma o le Atua” (fuaiupu 2)

• “Gotouga ifo i lo’u loto” (fuaiupu 3)

• “Sa matelaina lo’u agaga” (fuaiupu 4)

• “Tatalo malosi ma le faatauanau” (fuaiupu 4)

• “Ua faamagaloina au agasala” (fuaiupu 5)

• “Sa tafi ese ai loʼu lagona o aʼu sese” (fuaiupu 6)

• “Le Alii e, ua faapefea ea ona faia lenei mea?” (fuaiupu 7)

• “Ona o lou faatuatua ia Keriso” (fuaiupu 8)

Mafaufau e vaevae tagata aoga i ni paga ma valaaulia i latou e faasoa mai mea sa latou aoaoina. E mafai ona latou taliina faatasi fesili nei:

• O a ni upu po o ni fasifuaitau sa tumatila mai ia te oe? Aisea?

• O le a se mea na e aoaoina a o e mafaufau loloto i nei fasifuaitau?

• O le a se mea e te lagona o loo aoao atu e le Atua ia te oe mai le aafiaga o Enosa?

Afai e tali e tagata aoga nei fesili i ni vaega toalaiti, valaaulia nisi o tagata aoga e faasoa mai i le vasega mea na latou aoaoina po o mea sa latou fiafia i ai na latou faalogo i ai mai a latou paga. A o latou faasoa atu mataupu faavae moni, mafaufau e tusi i luga o le laupapa.

Afai e faigata i tagata aoga ona faasoa mai ni upumoni, mafaufau e fai atu fesili e pei o nei: “O le a le mafuaaga na tuuina atu e Enosa ona o le tafiesea o lona tausalaina?” “O le a se mea na aoaoina e Enosa mai le Alii e uiga i le mafuaaga na faamagaloina ai o ia mo ana agasala?”

O se tasi o mataupu faavae taua ua tatou aoaoina i le Enosa o le a tatou salamo ma faaaoga lo tatou faatuatua ia Iesu Keriso, e mafai ona faamagaloina a tatou agasala, ma e mafai ona faaatoatoaina i tatou. Atonu e te manao e tusi lenei mataupu faavae i lau api talaaga mo suesuega.

Faitau le saunoaga lenei mai ia Elder Dieter F. Uchtdorf o le Korama a Aposetolo e Toasefululua.

Elder Dieter F. Uchtdorf

O le taimi lava tatou te salamo moni ai, o le a aveese e Keriso le avega o le tausalaga ona o a tatou agasala. E mafai ona tatou iloa mo i tatou lava ua faamagaloina i tatou ma ua faamamaina. O le a faamaonia mai ia i tatou e le Agaga Paia lena mea; O Ia o le Faapaiaina. E leai se isi molimau o le faamagaloga e mafai ona sili atu. (Dieter F. Uchtdorf, “Vaega Tonu o le Toe Foi Saogalemu,” Ensign po o le Liahona, Me 2007, 101)

Afai na tusi e tagata aoga le mataupu faavae i a latou api talaaga mo suesuega, mafaufau e valaaulia i latou e lio se vaega o le mataupu faavae latou te fia malamalama atili i ai. Ona fai atu lea ia i latou e faasoa mai mea ua latou lioina. Fai atu i isi tagata aoga e faasoa mai mea ua latou iloa e mafai ona fesoasoani i tagata o le latou vasega. E mafai ona latou faaaogaina tusitusiga paia, aafiaga, po o faamatalaga mai taitai o le Ekalesia e fesoasoani ai. E mafai foi ona aoga fesili nei:

• O le a sou manatu o le a le mea e tupu pe a taumafai se tasi e saili le faamagaloga e aunoa ma le salamo ma le faatinoina o le faatuatua ia Iesu Keriso? Aisea?

• O a nisi o auala na taumafai ai Enosa e salamo ma faatino le faatuatua ia Iesu Keriso?

• O le a sou manatu o le a le uiga o le faaatoatoaina?

Atonu e aoga le vaai po o a fesili mai le tulaga i le amataga o le lesona e mafai ona e taliina e faaaoga ai le tala a Enosa.

E mafai ona tatou maua aafiaga e pei o Enosa i aso nei

O le toatele o tagata e le mauaina le faamagaloga i se auala vave pe tulagaese e pei o Enosa. Peitai, a o tatou saili e faatino le faatuatua ia Iesu Keriso ma salamo e pei ona sa faia e Enosa, e mafai foi e i tatou ona maua le faamagaloga ma faaatoatoaina.

Fesoasoani i tagata aoga e mafaufau loloto pe mafai faapefea ona latou faatinoina le faatuatua ia Iesu Keriso ma salamo. E mafai ona e faaali atu nei manatu po o nisi e mafai ona e mafaufau i ai e fesoasoani ai i tagata aoga.

• Mafaufau loloto i mea ua e iloa e uiga ia Iesu Keriso ma Lona finagalo e faamagalo ma fesoasoani ia te oe. O le a sou lagona i le mea e finagalo o Ia e te faia e faatino ai le faatuatua ia te Ia ma salamo?

• Mafaufau i le taimi mulimuli na e lagonaina ai e pei o e faatinoina le faatuatua ia Iesu Keriso ma salamo. Na tupu talu ai nei? Aisea pe aisea foi e lei tupu ai?

• Mafaufau e fuafua se taimi e tatalo ai ma se faatuatua sili atu ia Iesu Keriso. E faapefea ona ese le auala e te faia ai lau tatalo nai lo le mea e te masani ai? E mafai faapefea ona e faaalia lou manao i le faamagaloga a le Alii e pei o Enosa?

Mafaufau e valaaulia tagata aoga e faasoa mai ni uunaiga ma molimau i le Faaola o Iesu Keriso ma mea sa latou aoaoina mai ia Enosa. Mafaufau e faasoa atu foi ou manatu ma lau molimau.

Manatu ma Talaaga o Faamatalaga

O le a se isi mea e tatau ona ou iloa e uiga i le faatuatua ia Iesu Keriso?

Sa faasoa mai Peresitene Dallin H. Oaks o le Au Peresitene Sili:

Peresitene Dallin H. Oaks

O le faatuatua i le Alii o le faalagolago lea i le Alii. E le mafai ona tatou maua le faatuatua moni i le Alii e aunoa foi ma le i ai o le faalagolago atoa i le finagalo o le Alii ma i le taimi a le Alii. O le taunuuga, e tusa lava po o le a le malosi o lo tatou faatuatua, e le mafai ona maua ai se taunuuga e feteenai ma le finagalo o Ia o lē ua tatou faatuatua i ai. Ia manatua lena mea pe a foliga mai e le taliina au tatalo i le ala po o le taimi e te manao ai. O le faatinoina o le faatuatua i le Alii o Iesu Keriso e tusa ai ma le faatulagana a le lagi, i le agalelei ma le finagalo ma le poto, ma le taimi a le Alii. A tatou maua lena ituaiga o faatuatua ma faalagolago i le Alii, ua tatou maua le saogalemu moni ma le toafimalie i o tatou olaga. (Dallin H. Oaks, “O le Togiola ma le Faatuatua” [lauga na tuuina atu i le semina mo peresitene fou o le misiona, Iuni 2001])

O le a se mea e mafai ona ou faia e faaleleia ai le ala ou te tatalo ai?

Na saunoa Elder David A.Bednar o le Korama a Aposetolo e Toasefululua:

Elder David A. Bednar

O le faamoemoega o a tatou tatalo e le o le tuuina atu ai o se lisi o moomooga po o se faasologa o talosaga ae ia faamautinoa ai mo i tatou lava ma isi ia faamanuiaga o loo naunau le Atua e tuuina mai, e tusa ai ma Lona finagalo ma Lona taimi. E faafofogaina tatalo uma ma le loto faamaoni ma e tali mai e lo tatou Tama Faalelagi, ae o tali tatou te mauaina atonu e le o mea ia sa tatou faamoemoe i ai, pe oo mai foi i le taimi tatou te mananao ai, po o le ala foi tatou te faanaunau i ai. …

O le tatalo o se avanoa ma le moomooga moni o le agaga. E mafai ona sili atu nisi tatalo tatou te faia nai lo na o tatalo masani ua na o se “lisi” ae leai se uiga, ae faia se tatalo anoa a o tatou ole atu ma le faatuatua ma ia faatino, a o tatou onosai ma tutumau mausali i tofotofoga o lo tatou faatuatua, ma tatou faailoa atu ma le lotomaulalo ma talia le “aua le faia lo’u loto, a o Lou finagalo.” (David A. Bednar, “Ole Atu ma le Faatuatua,” Ensign po o le Liahona, Me 2008, 97)

Gaoioiga Faaopoopo e Aoao Ai

E faapefea ona ou iloa ua faamagaloina au?

Afai e te lagona e mafai ona manuia au tagata aoga mai le malamalama atili i le fesili o i luga, mafaufau e valaaulia i latou e faitau le Mosaea 4:1–3 ma faaali le vitio “E Faapefea Ona Tatou Iloa Ua Faamagaloina i Tatou e le Alii” (3:18). Na faasoa mai e Elder Neil L. Andersen o le Korama a Aposetolo e Toasefululua le taua o le tatalo anoa a o tatou faatinoina le faatuatua i le finagalo o le Atua e faamagalo i tatou e ala i le salamo faamaoni ma le manatu moni i ai.

O le a se aafiaga o le aafiaga o Enosa ia te ia?

Atonu e fesoasoani mo tagata aoga le iloa o le mea na faia e Enosa ina ua uma ona maua le faamagaloga mai le Alii. Faitau le Enosa 1:9–18, ma vaavaai po o ai na sosoo ona tatalo i ai Enosa ma pe aisea foi. Mafaufau loloto i mea ua e aoaoina mai lona aafiaga. Ma le isi, mafaufau e faitau le 2 Nifae 26:33 ma mafaufau loloto pe faapefea ona fesootai i nei fuaiupu. Mafaufau po o ai e mafai ona e tatalo ai ma saili e fesoasoani i ai.

O le a se mea e mafai ona e aoao mai le aafiaga o Enosa i le tatalo?

Nai lo le taulai atu i le faamagaloga, valaaulia tagata aoga e faitau le tusi a Enosa, ma vaavaai mo malamalamaaga e uiga i le tatalo. Valaaulia i latou e faasoa mai pe na faapefea ona fesoasoani le tatalo a Enosa ia te ia, atonu o le faasoaina atu o le auala na suia ai le loto o Enosa e ala i le aafiaga. Ma le isi, valaaulia tagata aoga e faasoa mai mea e mafai ona latou faia ina ia atili anoa ai a latou tatalo.