2 Nifae 5

Ola e tusa ma le Ala o le Fiafia

Tamaitai talavou mata ataata

Ina ua mavae le vavaeeseina mai ona uso, sa faatuina e Nifae ma i latou na mulimuli ia te ia se nuu fou. Na uluola ma soifua le nuu o Nifae i ni olaga na taunuu i le fiafia. O lenei lesona e mafai ona fesoasoani ia oe e iloa ai mea e mafai ona e faia e ola ai e tusa ma le ala o le fiafia.

Faamalosiauina o le auai ma le mataalia. A o saunia lesona ma fegalegaleai ma tamaiti aoga, vaavaai mo ni auala e valaaulia ai tamaiti aoga e auai ma le mataalia. O le faia o lena mea o le a fesoasoani ai i tamaiti aoga e auai i le aoaoina ma fesoasoani ia i latou ia latalata atili atu ai i le Faaola.

Sauniuniga a le tamaitiiti aoga: Valaaulia tamaiti aoga e talanoaina ma se uo faatuatuaina po o se tagata o le aiga le eseesega i le va o le fiafia ma le mālie.

Gaoioiga e Ono Mafai Ona Aoao Ai

Ala o le fiafia

Mafaufau e tusi le fesili “O le a se mea e fiafia ai se tagata?” i luga o le laupapa ma fai atu i tamaiti aoga e faasoa mai pe faapefea ona tali mai se talavou masani; ona talanoaina lea pe faapefea ona tali mai le Faaola.

Valaaulia tamaiti aoga e tomanatu lemu pe faapefea ona faatusatusa a latou tali i le auala latou te manatu o le a tali mai ai le Faaola. Valaaulia i latou e saili faaaliga a o latou suesueina lenei lesona ia iloa ai le mea e finagalo le Tama Faalelagi latou te iloa pe faia.

O le mataupu 2 Nifae 5 o loo auiliili mai ai le tuueseeseina o le aiga o Liae i sa Nifae ma sa Lamana. Ina ua fuafua Lamana ma Lemuelu e fasioti Nifae, sa lapataia e le Alii Nifae e aluese mai ona uso (tagai 2 Nifae 5:1–5). Sa usitai Nifae i le Alii ma o ese atu ma i latou o e sa “talitonu i lapataiga ma faaaliga a le Atua” (2 Nifae 5:6) ma faatuina se nuu fou.

Sa nonofo pea sa Lamana i le laueleele ma fouvale faasaga i le Alii. Sa “vavae ese lava i latou mai ona luma” (2 Nifae 5:20). O le fetuu o loo ta’ua i lenei mataupu o le vavaeeseina mai le Atua (tagai 2 Nifae 5:20–24). O le suiga o pa’u o sa Lamana o se faailoga po o se faatusa o le fetuu. O le natura o lenei faailoga e le o malamalama atoatoa i ai. O le taimi muamua, o le faailoga sa iloagofie ai sa Lamana mai ia sa Nifae. Mulimuli ane, ina ua tau fai oo uma sa Nifae ma sa Lamana i ni vaitau o le amioleaga ma le amiotonu, sa faapea ona le tāua ai le faailoga o se faailoaga o le tutu o sa Lamana i luma o le Atua.

Aua le taumatemate i le fetuu. Afai e i ai ni fesili a tamaiti aoga, o loo maua nisi faamatalaga i le vaega o le “Manatu ma Talaaga o Faamatalaga”.

Faitau le 2 Nifae 5:27 ma matau pe na faapefea ona faamatalaina e Nifae le nuu fou na ia faavaeina.

• O le a sou manatu i le uiga o le ola e tusa ma le ala o le fiafia?

• O a luitau e ono i ai i le ola ai e tusa ma le ala o le fiafia?

Vaai i fuaiupu na muamua atu i le mataupu ia maua ai se malamalamaaga i mea na faia e sa Nifae lea na taitai atu ai i latou e ola e tusa ma le ala o le fiafia.

Faitau le 2 Nifae 5:10–17, 26 ma faauma le faamatalaga lenei i mea e te mauaina:

e mafai ona fesoasoani ia te au e mulimuli i le Faaola ma ola e tusa ma le ala o le fiafia.

E mafai ona e tusia le faamatalaga i luga o le laupapa ma tuu i tamaiti aoga e o mai i luga ma tusi mea latou te maua pe a uma ona latou faitau.

• O le a se isi mea e te manatu e mafai ona fesoasoani ia oe e ola ai e tusa ma le ala o le fiafia?

• E faafia ona e auai i nei ituaiga o gaoioiga?

O gaoioiga nei ua mamanuina o ni lesona pupuu mo tamaiti aoga e aoao ai e le tasi le isi. O ni nai manatu nei i le auala e faaaoga ai:

1. Vaevae le vasega i ni vaega taitoatolu ma tuu atu i tagata taitasi o le vaega e saunia ma aoao atu se tasi o lesona e tolu i la latou vaega.

2. Atofa mamao atu lesona i ni tamaiti aoga gafatia se toatolu o e e mafai ona saunia ma o mai saunia e aoao atu le vasega.

3. Talanoaina se lesona se tasi pe sili atu o se vasega.

O auala talafeagai e tolu e faauma ai lenei fuaiupu o le “Usiusitai i tulafono a le Atua,” “Galue,” ma le “O Le malumalu.” O gaoioiga o loo mulimuli mai e suesue loloto atili ai nei gaoioiga taitasi.

Gaoioiga 1. Usiusitai i tulafono a le Atua

Tusi Lesona a le Faiaoga o le Tusi a Mamona (2024)—“2 Nifae 5: Ola e Tusa ma le Ala o le Fiafia

Mafaufau e valaaulia tamaiti aoga e talanoaina fesili nei i ni paga:

• O a nisi o tulafono i lou nuu?

• O le a le taunuuga o le mulimuli pea lava pea po o le le mulimuli i na tulafono?

• E faapefea ona talitutusa pe ese foi lenei faatusatusaga mai tulafono a le Atua?

Sa usitai Nifae ma e na mulimuli ia te ia i poloaiga a le Alii (tagai 2 Nifae 5:10). Faitau le fuaitau o le atamai i aoaoga faavae o le Mosaea 2:41 ma vaavaai mo mea na manao le Tupu o Peniamina i lona nuu ia malamalama i ai e uiga i le tausia o poloaiga a le Atua. E mafai ona e mafaufau e faasino lenei fuaiupu i le 2 Nifae 5:10.

• O le a sou manatu e faapefea e le usiusitai i tulafono a le Atua ona fesoasoani ia i tatou ia fiafia?

• Na faapefea ona faaalia e Iesu Keriso le usiusitai?

  Mafaufau e tusi i luga o le laupapa po o se fasipepa se lisi o poloaiga e fesoasoani ia i tatou ia fiafia atili ai. Fesili i tamaiti aoga pe aisea na latou filifilia ai poloaiga na latou tusia.

• O a nisi o poloaiga a le Atua ua aumaia ia te oe le fiafia sili atu?

Mafaufau e faasoa atu lou lava aafiaga pe faasoa atu lau molimau e uiga i le sootaga i le va o le fiafia ma le usiusitai i poloaiga a le Atua.

© 2023 Puletaofia e le Intellectual Reserve, Inc. Ua taofia aiā tatau uma.

Gaoioiga 2. Galue ma le faalagolago o le tagata ia te ia lava

Tusi Lesona a le Faiaoga o le Tusi a Mamona (2024)—“2 Nifae 5: Ola e Tusa ma le Ala o le Fiafia

I luga o se pepa po o totonu o lau api faamaumau mo suesuega, faaaoga sina taimi e fai ai se lisi o faamanuiaga e te iloa e maua mai le galue malosi.

Atonu e te valaaulia nisi o tamaiti aoga e faasoa mai mea na latou tusia.

Faitau le 2 Nifae 5:11, 15, 17 ma faailoa mai auala eseese na galulue ai sa Nifae ma taunuuga o a latou galuega.

• O le a se mea na e mauaina?

Mafaufau e tuu atu i tamaiti aoga e fai mea nei i paga.

Faitau le “Galue ma le Faalagolago o le Tagata ia te Ia Lava” i le tamaitusi Mo le Malosi o le Autalavou (2011) ma vaai po o a mea ua e aoaoina e uiga i le mataupu faavae o le galue.

• O a ni faamanuiaga faaopoopo o le galue na e mauaina? (Mafaufau e faaopoopo mea nei i lau lisi.)

• O le fea o nei faamanuiaga ua e mauaina?

• E faapefea ona fesoasoani le galue i se tagata ia avea atili ai faapei o Iesu Keriso?

© 2023 Puletaofia e le Intellectual Reserve, Inc. Ua taofia aiā tatau uma.

Gaoioiga 3. O le malumalu

Tusi Lesona a le Faiaoga o le Tusi a Mamona (2024)—“2 Nifae 5: Ola e Tusa ma le Ala o le Fiafia

olaga faaleaiga

Faitau le 2 Nifae 5:16 ma vaai po o a mea ua e aoaoina e uiga i le malumalu o sa Nifae.

• Aisea e te manatu ai na faia e Nifae ma lona nuu ni taumafaiga maoae e fausia le malumalu?

• Aisea e te manatu ai ua poloaiina ma faaauau pea e le Alii ona fetalai atu i Lona nuu e ositaulaga e fausia malumalu?

Sa saunoa Peresitene Russell M. Nelson i mea nei e uiga i le faamoemoega ma faamanuiaga o malumalu. Atonu e te manao e matamata le vitio “O Le Malumalu ma Lou Faavae Faaleagaga” mai le faailotaimi 4:27 i le 5:55 pe faitau le faamatalaga lenei:

Peresitene Russell M. Nelson

O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo aoaoina i totonu o le malumalu, e ala i aoaoga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau. Ma ioe, oka so tatou manaomiaina o Lona mana i aso o i luma atu.

Ua folafola mai ia i tatou e faapea “afai ua [tatou] saunia o le a [tatou] lē matata’u.” O lenei faamautinoaga ua i ai ni taunuuga loloto i aso nei. Ua tautino mai e le Alii e faapea e ui i luitau faigata tele o nei aso, ae o i latou o ē atiae o latou faavae i luga o Iesu Keriso, ma aoao i le auala e utuvai ai mai Lona mana, e lē manaomia ona lolo atu i lagona popolevale o lenei vaitau. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93, 94)

• O le a se mea ua faagaeetia ai oe mai le saunoaga a Peresitene Nelson?

• E faapefea e le auai i le malumalu ona fesoasoani ia te oe e fausia lelei ai lou faavae ia Iesu Keriso? E mafai ona e faasoa atu se aafiaga pe afai e mafai ona e manatuaina se tasi.

• Na faapefea ona aumaia e le malumalu le fiafia sili atu ia te oe po o se tasi e te iloaina?

Pe a uma ona aoao atu tamaiti aoga, e mafai ona e valaaulia i latou e faasoa mai pe na faapefea ona latou lagonaina le fiafia sili atu i le mulimuli i mataupu faavae o le talalelei a Iesu Keriso e pei ona talanoaina i le asō. Mafaufau e faasoa atu lau lava molimau e uiga i le auala na aumaia ai e nei mataupu faavae ia te oe le fiafia sili atu.

© 2023 Puletaofia e le Intellectual Reserve, Inc. Ua taofia aiā tatau uma.

Manatu ma Talaaga o Faamatalaga

O le a se isi mea e mafai ona tatou faia e valaaulia ai le fiafia i o tatou olaga?

Sa aoao mai Elder Claudio R. M. Costa o le Fitugafulu:

Elder Claudio R. M. Costa

Ua tatou iloa o le fiafia e maua mai i le faia o mea laiti lea e fesoasoani ai ia i tatou e tuputupu ae faaleagaga, e faateleina ai lo tatou faatuatua ma molimau. O mea laiti tatou te faia i o tatou olaga i aso taitasi, e pei o:

Tatou te maua le fiafia pe a tatou tatalo i taeao ma po taitasi, pe a mafai ona tatou lagonaina e faafofoga mai le Alii ia i tatou ma e naunau lava o ia e faamanuia, faamagalo ma fesoasoani mai ia i tatou. Tatou te maua le fiafia pe a tatou lagonaina uunaiga a le Agaga Paia i o tatou olaga—a o tatou lagonaina le Agaga i lo tatou faia o filifiliga taua o le olaga. … I se aotelega, e mafai ona tatou lagonaina le fiafia i aso uma o o tatou olaga, e ala mai i mea iti tatou te faia, ma e atoatoa lo tatou fiafia pe a tatou tausia poloaiga a se Atua alofa, o le e manatu tele mai mo i tatou. (Claudio R. M. Costa, “O Mea Malie ma le Fiafia,” Ensign po o le Liahona, Nov. 2002, 92–93)

2 Nifae 5:20–21. O le a le fetuu na oo mai i luga o sa Lamana?

I aso o Nifae o le fetuu o sa Lamana o le “vavae ese lea o i latou mai luma [o le Alii] … ona o lo latou amioletonu” (2 Nifae 5:20–21). O lona uiga na aveesea le Agaga o le Alii mai o latou olaga. Ina ua mulimuli ane talia e sa Lamana le talalelei a Iesu Keriso, “sa le toe mulimuli ia i latou le fetuu a le Atua” (Alema 23:18).

O loo ta’ua foi e le Tusi a Mamona na oo mai se faailoga o le pa’u uliuli i luga o sa Lamana ina ua o ese sa Nifae mai ia i latou. O le natura ma foliga o lenei faailoga e le o malamalama atoatoa i ai. O le taimi muamua, o le faailoga sa iloagofie ai sa Lamana mai ia sa Nifae. Mulimuli ane, ina ua tau fai oo uma sa Nifae ma sa Lamana i ni vaitau o le amioleaga ma le amiotonu, sa faapea ona le tāua ai le faailoga o se faailoaga o le tutu o sa Lamana i luma o le Atua.

Ua faamaonia mai e perofeta i o tatou aso, o le pa’u uliuli e le o se faailoga o le le fiafia po o le fetuu faalelagi. E talisapaia e le Ekalesia aoaoga a Nifae e faapea, “e lē teena e [le Alii] se tasi e sau ia te ia, e uliuli pe pa’epa’e, e pologa pe saoloto, o tane ma fafine” (2 Nifae 26:33). Na folafola mai e Peresitene Russell M. Nelson:

“Ua faamamafaina mai ai e le Alii Lana aoaoga faavae taua o le avanoa tutusa mo Ana fanau. …

“… O eseesega i aganuu, gagana, itupa, ituaiga, ma tagatanuu e galoma atu i le le faatauaina a o ulufale atu tagata faamaoni i le ala o le feagaiga ma o mai i lo tatou Togiola pele” (“Tuleiga a Peresitene Nelson i le Faamanatuga o le Perisitua i le Lalolagi Atoa,” 1 Iuni, 2018, newsroom.ChurchofJesusChrist.org).

“Ou te faamautinoa ia te outou o lo outou tulaga i luma o le Atua e lē o fuaina i le lanu o lou pa’u. O le fiafia po o le le fiafia i le Atua e faalagolago lea i lou tuuto atu i le Atua ma Ana poloaiga ae le o le lanu o lou pa’u” (“Ia Faamuamua le Atua,” Ensign po o le Liahona, Nov. 2020, 94).

Gaoioiga Faaopoopo e Aoao Ai

O isi auala na ola ai sa Nifae i le ala o le fiafia

Mafaufau e talanoaina isi faaiuga na faia e sa Nifae lea na fesoasoani ia i latou e ola ai e tusa ma le ala o le fiafia. Mo se faataitaiga:

• 2 Nifae 5:12. Sa ia i latou tusitusiga paia.

• 2 Nifae 5:6–13. Sa latou nonofo i aiga ma maua ni fanau.

• 2 Nifae 5:26. Sa latou faatuina se lotu.

Vitio o le Tusi a Mamona

O le vitio lenei, “Ua Ola sa Nifae e Tusa ma le Ala o le Fiafia” (3:01), o loo faaalia ai Nifae o loo faamatalaina le ola e tusa ai ma le ala o le fiafia mai le 2 Nifae 5. E mafai ona maua i le ChurchofJesusChrist.org.

obedience to God’s laws handout

temple activity handout