2 Nifae 5:1-9

O Lapataiga a le Atua

Ua sosola le aiga o Nifae i le vao

Atonu o se faamomoi loto ia Nifae. Ona sa fuafua Lamana ma Lemuelu e fasioti o ia, o lea na lapataia ai Nifae e ave “i latou sa talitonu i lapataiga ma faaaliga a le Atua” (2 Nifae 5:6) ma sosola atu i le vao. E i ai taimi, e ono lapataʻia foi i tatou e le Alii i lamatiaga faaletino ma faaleagaga o loo siomia ai i tatou. O lenei lesona e mafai ona fesoasoani ia te oe e mulimuli ai i lapataiga e tuuina mai ma le alofa e le Alii e puipui ai oe.

Atiina ae se siosiomaga o le alofa ma le faaaloalo. Fausia se lagona o le auai i tagata aoao taitasi e ala i le iloaina ma le faamaoni o loo manaomia tamaiti aoga taitasi, faatauaina ni talaaga ma ni tulaga eseese, ma tuuina atu ni avanoa mo tamaiti aoga e maua ai le malosi mai le tasi ma le isi ma le Faaola. E mafai foi ona e fesoasoani i tamaiti aoga ia iloa o loo latou faia se matafaioi i le galuega a le Atua.

Sauniuniga a le tamaitiiti aoga: Mafaufau e valaaulia tamaiti aoga e o mai saunia i le vasega e faasoa mai se aafiaga ina ua tuuina atu e se tasi ia i latou se lapataiga na latou faafetai ai.

Gaoioiga e Ono Mafai Ona Aoao Ai

Lapataiga

Mafaufau e faaali atu nisi o faailoga lapatai ma fai atu fesili e pei o nei e fesoasoani ai i tamaiti aoga e talanoaina pe faapefea ona avea lapataiga ma faamanuiaga.

E mafai foi ona e mafaufau e tuu se mea palapala pe pipii i luga o se tasi o nofoa ma tuu i ai faailoga lapatai i lena nofoa atoa a o lei amataina le vasega.

faailoga lapatai

• Aisea e taua ai faailoga lapatai e pei o nei?

• Aisea e ono tilotilo ai nisi tagata i faailoga lapatai ma le lotofaafetai? ma le le fiafia?

• O anafea na e faafetai ai ona sa lapataia oe?

A o e suesue i le aso, mafaufau pe aisea ua auina mai ai e le Atua ia i tatou lapataiga. Taumafai foi e manatua ni auala eseese atonu na e tali atu ai i lapataiga na Ia tuuina mai.

Lapataiga a le Atua mo Nifae

Faitau le 2 Nifae 5:1–9, ma vaavaai mo se lapataiga na tuuina atu e le Alii ia Nifae ina ua uma ona avea o ia ma taitai faaleagaga o le aiga ina ua mavae le maliu o Liae. Pe atonu foi e te manao e matamata le vitio “Ua Sosola Sa Nifaē i le Vao” mai le faailotaimi 0:00–3:21.

Taumafai e tuu oe lava i le tulaga o se tasi o talavou sa Nifae lea na valaaulia o latou aiga e mulimuli ia Nifae.

• Aisea atonu na faigata ai ona aluese?

• O le a se mea e te manaomia e te fai ai le faaiuga e mulimuli ia Nifae i le vao?

• E tusa ma le fuaiupu 6, o le a le mea na iloa ai po o ai na o ma ia?

O se upumoni e tasi e mafai ona tatou aoao mai lenei tala o le, e mafai e le Atua ona taitai ese i tatou mai mea matautia pe afai tatou te filifili e talitonu i Ana faaaliga ma faalogo i Ana perofeta.

E mafai ona fesoasoani se talanoaga faalevasega i tamaiti aoga e lagona ai le lotofaafetai ona ua lava le alofa o le Atua ia i tatou e lapataia ai i tatou i mea matautia.

Ina ia faafaigofie se talanoaga, e mafai ona e uunaia tamaiti aoga e taumafai e vaai faalemafaufau pe faapefea ona ese le lalolagi (po o o latou olaga patino) pe afai e le lapataia lava i tatou e le Atua e uiga i soo se mea. Ona valaaulia lea o ni nai tamaiti a’oga e faasoa mai o latou manatu i le vasega. A o talanoaina e tamaiti aoga o latou manatu, fesoasoani ia latou iloa o lapataiga a le Atua o se faailoga lea o Lona alofa ma le tausiga mo i tatou. O le vitio lenei ma nisi o fesili nei e mafai ona faaaoga e faalautele ai le talanoaga a le vasega.

Atonu e te manao e maimoa le vitio “Enemy Territory” (3:38), o loo maua i le ChurchofJesusChrist.org, ma vaavaai pe faapefea e lapataiga a le Atua ona faamanuiaina o tatou olaga.

• Aisea e te manatu ai tatou te manaomia lapataiga a le Atua i o tatou aso?

• O a ni auala eseese e faailoa mai ai e le Atua Ana lapataiga i tagata lautele ma i tagata taitoatasi e uiga i o latou tulaga patino?

• O a mafuaaga e ono filifili ai se tasi e le mulimuli i lapataiga a le Atua, ma e faapefea ona e tali atu i se tasi e tuuina mai se tasi o nei mafuaaga?

• Na faapefea ona puipuia oe po o e pele ia te oe e ala i le mulimuli i lapataiga mai le Atua? Faasoa atu se faataitaiga patino pe a mafai ona e mafaufau i se tasi.

E lapataia i tatou e le Atua e ala i Ana perofeta.

O se tasi o auala e lapataia ai i tatou ma le alofa e le Atua i mea matautia e auala mai lea i Ana perofeta soifua. Mo se faataitaiga, i le 2 Nifae 5:5–6, o le toatele o le aiga o Nifae na faalogo i le lapataiga na tuuina atu ia te ia e le Alii e o ese atu i le vao. (Tagai foi i le Amosa 3:7.) Tatou te maua foi le tele o lapataiga faaperofeta mai le Atua mo i tatou i Ana tusitusiga paia.

Faaaoga sina taimi e suesue ai tusitusiga paia mo lapataiga na tuuina mai e le Atua ia i tatou e ala mai i Ana perofeta i aso ua mavae. (O nisi faataitaiga e aofia ai le Alema 41:10; Moronae 10:30, 32; Mataupu Faavae ma Feagaiga 63:57–58; 89:1–4.)

Mafaufau e tuu atu i tamaiti aoga e sue ni lapataiga mai le Atua i tusitusiga paia e i latou lava. E mafai ona e tuuina atu faataitaiga o i luga po o isi faataitaiga pe afai latou te manaomia le fesoasoani.

Faaali atu fesili nei a o latou suesue. Ona valaaulia lea o i latou e faasoa mai a latou tali i ni vaega toalaiti.

• O a ni lapataiga na e maua e te manatu e sili ona manaomia e le lalolagi i aso nei?

• O le a sou manatu o a taunuuga mo le usitaia po o le le amanaiaina o nei lapataiga?

• O faapefea ona avea nei lapataiga ma faailoga o le alofa o le Atua?

• E faapefea e le usiusitai i lapataiga na e maua ona fesoasoani ia te oe e avea atili ai e faapei o Iesu Keriso?

• E mafai faapefea e le le amanaiaina o Ana lapataiga ona taumamao ai i tatou mai ia te Ia?

Lapataiga a le Atua mo oe

Mafaufau e faasoa atu se aafiaga patino ina ua faamanuiaina oe e ala i le mulimuli i se lapataiga mai le Atua.

Ona tuu atu lea ia lava se taimi filemu i tamaiti aoga e mafaufau loloto ai ma tusi o latou manatu ma lagona i a latou api faamaumau mo suesuega e faauma ai le lesona. O le faamatalaga ma uunaiga nei e mafai ona fesoasoani e saunia ai tamaiti aoga a o lei tusitusi.

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

Peresitene Boyd K. Packer

E le o faamoemoeina e te ola i lenei olaga e aunoa ma le faia o ni mea sese, ae o le a e le faia lava se mea sese matuia e aunoa ma le lapataia muamua o oe e ala i uunaiga a le Agaga Paia. O lenei folafolaga e faatatau i tagata uma o le Ekalesia. (Boyd K. Packer, “Fautuaga i le Autalavou,” Ensign po o le Liahona, Nov. 2011, 18)

• Pe na lapataia a’u e le Tama Faalelagi i se mea patino i lo’u olaga e ala i manatu po o lagona mai le Agaga?

• O i ai ni lapataiga patino mai le Atua ua ou mauaina e ala mai i taitai o le Ekalesia, matua, faamanuiaga faaperisitua, po o isi auala? O faapefea mai lo’u mulimuli ai i nei mea?

• O le a se mea e tasi ou te manatu e finagalo le Tama Faalelagi ou te faia i mea sa ou aoaoina pe lagonaina i le asō?

Manatu ma Talaaga o Faamatalaga

E faapefea ona ou maua le saogalemu faaleagaga i le lalolagi i aso nei?

Sa aoao mai Peresitene Henry B. Eyring o le Au Peresitene Sili:

Peresitene Henry B. Eyring

E foliga mai e leai se gataaga i le finagalo o le Faaola i le taitai atu o i tatou i le saogalemu. Ma o loo i ai le faamaoni i le ala ua Ia faaalia ai ia i tatou le ala. Na te valaauina e ala i auala e sili atu nai lo le auala e tasi ina ia oo atu ia i latou e naunau e taliaina. Ma o na auala e masani ona aofia ai le auina atu o le savali e ala i fofoga o Ana perofeta, i soo se taimi lava e agavaa ai tagata ia i ai perofeta a le Atua ia i latou. O na auauna faamaonia ua tofiaina i taimi uma e lapataia tagata, ma ta’u atu ia i latou le ala i le saogalemu. (Henry B. Eyring, “Finding Safety in Counsel,” Ensign, Me 1997, 24)

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

Peresitene Boyd K. Packer

Ae i le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e oo mai le Agaga Paia. (Boyd K. Packer, “Fautuaga i le Autalavou,” Ensign po o le Liahona, Nov. 2011, 18)

Gaoioiga Faaopoopo e Aoao Ai

Atamai i aoaoga faavae: Esekielu 3:16–17

Pe a talanoa e uiga i le matafaioi a perofeta e lapatai atu, mafaufau e faitau le Esekielu 3:16–17 ma talanoaina pe faapefea ona pei perofeta o ni tagatavaai. Valaaulia tamaiti aoga e faasoa mai pe aisea e ese ai le vaaiga ma le taga’i a se perofeta i tulaga mai vaaiga a isi tagata.

Vavaeese i tatou lava mai le amioleaga

Valaaulia tamaiti aoga e faasoa mai ni faataitaiga mai tusitusiga paia a le Alii o loo lapataia ai se tagata po o se vaega o tagata e vavaeese mai i latou lava mai se tulaga amioleaga. (O faataitaiga e mafai ona aofia ai le 1 Nifae 2:1–2; Ominae 1:12–13; po o le Eteru 9:2–3.)

Valaaulia tamaiti aoga e faasoa mai ni faataitaiga i o tatou aso atonu e sili ona lelei e vavaeese ai i tatou lava mai tulaga matautia faaleagaga. Valaaulia volenitia e faasoa mai pe na faapefea ona faamanuiaina i latou e ala i le mulimuli i se lapataiga mai le Atua e vavaeese ai i latou lava mai se tulaga faapena.

E ono fesoasoani foi le talanoaina o auala e mafai ona latou maua ai le fesoasoani ma le puipuiga mai le Atua pe afai e le mafai ona see ese mai se tulaga matautia faaleagaga mo se taimi.

Mo Le Malosi o le Autalavou (tamaitusi, 2011)

I le vaega o le “E lapataia i tatou e le Atua e ala i Ana perofeta” o le lesona, mafaufau e valaaulia tamaiti aoga e sue ma faasoa mai lapataiga mai perofeta o aso nei i le Mo Le Malosi o le Autalavou (tamaitusi, 2011) latou te faafetai ai.

E mafai ona tatou faatuatuaina lapataiga a le Atua

Mafaufau e aumai ni koneteina se lua i le vasega, se tasi o i ai se mea lelei i totonu ma le isi o i ai se mea e sili atu ona lelei i totonu.

Tau atu i se volenitia e mafai ona latou maua le mea o loo i totonu o se tasi o koneteina, ae e tatau ona latou filifili e aunoa ma le iloaina po o le a le mea o loo i ai i totonu. Fai i se volenitia e tuua le potu mo se minute ao lei faia le filifiliga. A o alu ese atu o ia, faaali atu i ni nai tamaiti aoga mea o loo i totonu o koneteina taitasi. Faatonu nisi o i latou e lapatai atu i le tamaitiiti aoga e uiga i le filifilia o le mea lelei ma nisi o i latou e lapataia le volenitia i le filifilia o le mea e sili atu ona lelei. Ona valaaulia lea o le volenitia e toe foi mai i totonu o le potu ma tuu atu i tamaiti aoga e taumafai e faatosina lana faaiuga. A uma ona fai le filifiliga a le volenitia, fesili pe aisea na faigata ai ona iloa po o manatu ma lapataiga o ai e tatau ona latou faalogo i ai.

Valaaulia tamaiti aoga e faasoa mai mea e lagona e le lalolagi e saogalemu ma lelei ae na lapataia ai i tatou e le Alii e ala mai i Ana perofeta. Valaaulia tamaiti aoga e faasoa mai pe aisea e mafai ai ona tatou faatuatuaina lapataiga ma le vaaiga a le Atua nai lo manatu o tagata i le lalolagi.