1 Nifae 10; 11:1–6

“Ina Ia Ou Vaai, ma Faalogo, ma Iloa”

Nifae o loo tatalo

O anafea na uunaia ai oe e saili pe moni se mea na e faalogo i ai? O a ni taumafaiga na e faia ma o ai na e faalagolago i ai mo se fesoasoani? Ina ua uma ona faalogo i lona tama, o Liae, o aoao atu e uiga i le laau o le ola ma vavalo atu e uiga i le afio mai o Iesu Keriso, sa manao Nifae e aoao le moni o upu a lona tama mo ia lava. O lenei lesona e mafai ona fesoasoani ia te oe i au taumafaiga e saili ma le filiga le malamalama mai le Alii.

Faia o fesili e valaaulia ai le mauaina. O le faia o fesili tatala talafeagai, ona tuu lea i tamaiti aoga e saili i tusitusiga paia mo tali, e mafai ona maua ai avanoa anoa ma mamana mo tamaiti aoga e iloa ai aoaoga faavae ma mataupu faavae mo i latou lava. O nei ituaiga o fesili e faaali atu ai i tamaiti aoga o tali e mafai ona maua i tusitusiga paia ma e ia i latou le tomai e maua ai na tali.

Sauniuniga a le tamaitiiti aoga: Valaaulia tamaiti aoga e fesili i se matua po o se taitai o le autalavou po o le a se mea latou te faia e saili ai ma le filiga le upumoni mai le Atua po o le auala e faaali mai ai e le Agaga Paia upumoni ia i latou. Uunaia tamaiti aoga e omai sauni e faasoa mai se aafiaga i le vasega.

Gaoioiga e Ono Mafai Ona Aoao Ai

Pe a saunoa perofeta

Faapaiaga o le Polokalama o le Pathway a le BYU i le Lalolagi Aoao [BYU Pathway Worldwide Inauguration]

Nai lo le faaaogaina o le tala faataitai o loo i lalo, e mafai ona e amataina le lesona i le faasoa atu o ni nai faamatalaga na faia e le perofeta ma aposetolo o i ai nei lea e folafola mai ai aoaoga faavae pe valaaulia ai tagata taitoatasi e faatino i le faatuatua. Faaali pe faitau leotele ia faamatalaga ma valaaulia tamaiti aoga e fuafua faalilolilo po o fea o faamatalaga e tolu e atagia ai o latou lagona: (1) Ou te talitonu ma ua saunia e faatinoina, (2) Ou te talitonu i ai ae ou te le o faamoemoe e faatinoina, ma (3) Ou te le o mautinoa pe ou te talitonu i lena mea. Ia mautinoa ua malamalama tamaiti aoga e leai se tali sao pe sese ma e le manaomia ona latou faasoa mai pe faapefea ona latou faatulaga i latou lava.

Vaai faalemafaufau e faapea, i le taimi o se faigalotu i le lalolagi atoa mo le autalavou, sa tuuina atu ai e le perofeta ni valaaulia mo le autalavou e faatino i le faatuatua.

• O a ni tali eseese atonu o loo i ai i le autalavou?

• Aisea e te manatu ai o le a tulai mai nei tali eseese?

• E mafai faapefea e nei tali ona tosina ai o latou olaga i le taimi nei po o le lumanai?

Mafaufau pe na faapefea ona e tali atu i aoaoga a perofeta ma pe aisea. Na faapefea ona uunaia oe e nei aafiaga? A o e suesue i lenei lesona, saili e aoao mai tali eseese i aoaoga faaperofeta i tusitusiga paia ma mafaufau loloto pe faapefea ona faatatau ia te oe.

O se naunautaiga ia iloa

Ina ua uma ona faamatala e le perofeta o Liae lana faaaliga i le laau o le ola i lona aiga (tagai 1 Nifae 8), sa ia molimau atu o le a faataunuuina e Iesu Keriso Lana Togiola (tagai 1 Nifae 10:1–16). Sa eseese tali a atalii o Liae i ana aoaoga musuia.

Ina ia faafaigofie le faateleina o le auai o tamaiti aoga ma talanoaga, mafaufau e vaevae le vasega i ni vaega toalaiti e suesue faatasi ai nei fuaiupu. Faatasi ai ma tamaiti aoga i vaega, ia nofouta pe o faapefea ona latou galulue faatasi, ma faaaoga lau faatosinaga e fesoasoani ai ia i latou ia faamanuiaina.

Faitau le 1 Nifae 10:17–19 ma le 15:1–3, 8–9, faatusatusa pe na faapefea ona tali atu Nifae, Lamana, ma Lemuelu i upu a lo latou tama. Atonu e te manao e faailoga upu ma fasifuaitau e tulaga ese ia te oe.

Mafaufau e faaali atu fesili nei mo tagata o le vasega e talanoaina. Atonu e te manao e faasolo i vaega ma faalogologo i le auala e tali mai ai tamaiti aoga.

• O a ni eseesega na e vaaia i le tali atu a Nifae ma ona uso i le savali lava lea e tasi?

• O le a se mea na talitonu ai Nifae e uiga i le Atua? O le a le mea na talitonu i ai Lamana ma Lemuelu? (Tagai i le 1 Nifae 10:17–18; 15:9.)

• O le a sou manatu o le a faapefea ona faatosinaina i latou e o latou talitonuga ma uiga eseese?

O se tasi o upumoni na malamalama i ai Nifae e faapea e faaali mai e le Atua upumoni ia i tatou e ala i le Agaga Paia pe a tatou saili atu ma le filiga ia te Ia.

Mafaufau e tusi le mataupu faavae ua faamatatetele i luga o le laupapa.

• O a nisi o mea ua uma ona oo ia Nifae na fesoasoani ia te ia e maua ai lenei malamalama e uiga i le Atua?

Afai e faigata i tamaiti aoga ona tali mai, e mafai ona e valaaulia i latou e iloilo le 1 Nifae 2:16 ma le 1 Nifae 4:6–13 pe aotele nei mea na tutupu.

O le mafaufau e uiga i aafiaga o Nifae e ono aumaia ai i lou mafaufau ni aafiaga ua tuanai na e oo i ai ina ua faaalia mai e le Tama Faalelagi upumoni ia te oe. Atonu e te manao e matau pe na faapefea ona Ia faamanuiaina oe i lau api talaaga mo suesuega.

E mafai ona avea lenei mea ma se tasi o avanoa i le taimi o le lesona atonu e mananao ai tamaiti aoga e faasoa mai ni aafiaga patino.

Sailia o le upumoni mai le Atua

Na aoaoina e Nifae e faamanuiaina i tatou e le Tama Faalelagi i le Agaga Paia a o tatou sailia le upumoni mai ia te Ia. Ina ia vaavaai totoa atili i lenei upumoni, fai ni koluma se lua i luga o se itulau i lau api talaaga mo suesuega. Faaigoa le koluma e tasi “O auala e saili ai ma le filiga le upumoni mai le Atua” a o le isi “O ala e faaalia ai e le Atua upumoni e ala i le Agaga Paia.” Faaopoopo ni manatu e mafai ona e mafaufau i ai i koluma taitasi. Atonu e te manao e faaaofia ai ia malamalamaaga mai le 1 Nifae 10:17–19.

O se isi filifiliga e mafai ona fai o le faaaoga lea e vaega toalaiti o se fasipepa se tasi, pasi atu le pepa mai lea tagata i lea tagata mo ni nai taimi. E faaopoopo e tamaiti aoga taitasi se manatu i soo se koluma pe a latou mauaina le pepa. E mafai foi ona faia lenei gaoioiga e le vasega atoa i luga o le laupapa. Afai e lava le taimi, mafaufau e uunaia tamaiti aoga e faaaofia ai mau faasino e lagolago ai a latou fautuaga.

Faitau le 1 Nifae 11:1–6, ma vaavaai mo mea na faia e Nifae e saili ai le upumoni ma le ala na fesoasoani ai le Agaga ia te ia. Faailoga upu patino po o fasifuaitau e tulaga ese ia te oe. Atonu e te manao e fai ni faaopoopoga i koluma i lau api talaaga mo suesuega.

Mafaufau e valaaulia tamaiti aoga e faasoa mai mea anoa na latou mauaina. A uma ona faasoa mai tamaiti aoga, e mafai ona e fai atu fesili tulitatao e pei o le “Aisea e te manatu na olioli ai le Agaga?” (tagai i le fuaiupu 6)) po o le “O le a sou manatu e mafai faapefea e le mafaufau loloto ona taitai atu i faaaliga?”

Ina ia vaai i le ala na sailia ai e se Aposetolo i ona po nei ia tali mai le Alii a o talavou, maimoa i le vitio “How I #Hear Him: Elder Ronald A. Rasband” (2:55), o loo maua i le ChurchofJesusChrist.org. Mafaufau pe na faapefea ona mulimuli Elder Rasband i se mamanu talitutusa o le sailia o le upumoni ma faamanuiaina ai e le Alii. Faaopoopo soo se manatu fou i koluma i lau api talaaga mo suesuega.

Vaavaai i mea ua e faamaumauina e uiga i le ala e faaali mai ai e le Atua upumoni e ala i le Agaga Paia a o tatou saili atu ma le filiga ia te Ia. Mafaufau pe na faapefea ona e vaai i nisi o nei mea ua moni i lou lava olaga. O a ni auala ua faamalosia ai lou sootaga ma le Tama Faalelagi a o e saili atu ma le naunautai ia te Ia?

Afai e le patino tele aafiaga, valaaulia nisi o tamaiti aoga e faasoa mai. Mafaufau e faasoa atu foi ni au aafiaga patino. Saili e faamamafa atu pe faapefea ona moni ma talafeagai le mataupu faavae o lenei lesona i o tatou olaga i aso nei.

E taua faaaliga faaletagata lava ia

Ona sa manao Nifae e aoao mo ia lava ma liliu atu i le Alii mo ni tali, sa ia vaaia ai le mea na vaai i ai lona tama, o Liae, na vaaia ma faaalia i ai le tele o mea o le a tutupu i le lumanai i le lalolagi. (Ina ia aoao atili e uiga i le faaaliga a Nifae, tagai i le 1 Nifae 11–14.) O le faaaliga a Nifae o le ala lauitiiti ma le vaapiapi sa suia ai le olaga mo ia. Na ia faamaumauina mulimuli ane lana faamalosiauga mo tagata uma ina ia mulimuli i lena lava ala e tasi (tagai 2 Nifae 31:18–21).

Valaaulia tamaiti aoga e tali i fesili nei i a latou api talaaga mo suesuega:

• O le a se mea ua e aoaoina e uiga i le mafuaaga e taua ai lou tali atu i aoaoga musuia?

• E faapefea ona e faaaogaina mea ua e aoaoina e uiga i le sailia ma le filiga o le upumoni?

• O le a se mea ua e aoaoina e uiga i le Tama Faalelagi ma Iesu Keriso ua musuia ai oe e faalatalata atili atu ia i Laua?

Manatu ma Talaaga o Faamatalaga

O a nisi o mafuaaga tatou te le fai atu ai a tatou fesili i nisi taimi i le Tama Faalelagi?

Na matauina e Peresitene Camille N. Johnson o le Au Peresitene Aoao o le Peraimeri:

Peresitene Camille N. Johnson

Atonu ona e le o ia i tatou le faatuatua e talia ai le tali atonu tatou te mauaina. Atonu ona o le tagata natura i totonu o i tatou e tetee atu i le liliuina atoatoa o mea i le Alii ma faalagolago atoa atu ia te Ia. (Camille N. Johnson, “Valaaulia Keriso e Taitai Lau Tala,” Liahona, Nov. 2021, 80–81)

E faapefea ona ou mafaufau loloto?

A o lei valaauina o ia i le Fitugafulu, sa matauina e Elder Gerald N. Lund:

Elder Gerald N. Lund

Faaalu se taimi e mafaufau loloto ma manatunatu ai. Alu ese mai le pisi o le olaga. Saili se nofoaga filemu ma faaaoga sina taimi e tau ai lava na ona nofo ma mafaufau, ina ia faalogo atu i ou manatu ma faalogona, ina ia tatalaina atu oe lava i uunaiga a le Agaga. …

O nisi taimi e tatau ai ona tatou tuuese ma le loto i ai popolega o le lalolagi, tuu ese le pisi o o tatou olaga i aso taitasi, ma saili se nofoaga filemu ma se taimi filemu lea e mafai ona tatou nonofo ai ma mafaufau loloto ma tomanatu ma manatunatu loloto—ma faalogologo mo lena leo filemu itiiti lea e musumusu mai. (Gerald N. Lund, “The Voice of the Lord” [faigalotu a le Iunivesite o Polika Iaga, Tes. 2, 1997], 9–10, speeches.byu.edu)

Gaoioiga Faaopoopo e Aoao Ai

1 Nifae 9. O papatusi a Nifae

Manatua: O le lesona i Upu a Mamona o le a aofia ai mau faasino i le 1 Nifae 9. Afai e aoga le aoao atu i le taimi nei, talanoa i lena lesona. Afai e i ai ni fesili a tamaiti aoga, mafaufau e faasino atu i latou i punaoa o loo maua i le Sau, Mulimuli Mai ia te A’u i lenei vaiaso.

1 Nifae 10:2–16. Na molimau Liae ia Iesu Keriso ma Lana misiona

Atonu e te manao e faafesootai aoaoga a Liae e uiga i le laau o le ola i le misiona a Iesu Keriso. Mafaufau e valaaulia tamaiti aoga e faitau le 1 Nifae 10:2–16 ma mafaufau pe faapefea e nei aoaoga ona taitai atu ai tagata taitoatasi e talitonu ia Iesu Keriso ma aai i le fua o le laau. E mafai foi e tamaiti aoga ona mafaufau loloto pe aisea o le a finagalo ai le Alii i le aiga o Liae—ma i tatou uma—ia iloa nei upumoni. E pei lava ona manao Liae i lona aiga ia iloa ma alolofa i le Faaola, fai atu i tamaiti aoga e mafaufau pe o le a se mea e mafai ona latou ta’u atu i e pele ia i latou e valaaulia ai i latou e liliu atu ia te Ia.

O se isi amataga i le lesona

O tali eseese nei e ono maua e tagata taitoatasi i se savali mai le perofeta. Mafaufau e fai atu i ni tamaiti aoga se toafa e faitau taitoatasi se tasi o faamatalaga nei:

• Sa talitonu Dirk i le tele o mea sa aoaoina ae e i ai ni fesili e uiga i nisi o na mea. E fia talanoa o ia i ona matua e uiga i ona popolega.

• Sa lagona e Abbie e pei na te lei malamalama atoatoa i vaega o le savali a le perofeta. Ua ia fuafua e tatalo mo le malamalama e uiga i le ala e faatatau ai aoaoga a le perofeta ia te ia.

• Sa fiafia Jayden i vaega o le lauga ae sa tauivi i isi vaega. Sa ia faasoa mai ona manatu ma lagona i luga o ala o faasalalauga faaagafesootai.

• Na maua e Simone lagona fiafia i le lauga. E le o fuafua o ia e faia se gaoioiga pe a uma ona faalogo i ai.

Fai atu i tamaiti aoga e faasoa mai mea latou te mafaufau i ai e uiga i nei tali ma talanoaina tulaga lelei ma tulaga le lelei o ia mea taitasi. E mafai foi ona latou faasoa mai po o fea e ono taitai atu i ai nei tali.