1 Nifae 3

E Saunia E Le Atua Se Ala

O loo nofonofo Nifae i autafa o se vaitafe

Ina ua mavae le malaga mo le tele o aso i le vao, sa feagai Nifae ma ona uso ma se suega o lo latou usiusitai ma le faatuatua i le Atua ina ua poloaiina i latou e toe foi atu i Ierusalema e aumai papatusi apamemea mai ia Lapana. E i ai taimi, o le a talosagaina ai foi oe e le Alii e faia ni mea faigata. O lenei lesona e mafai ona fesoasoani ia te oe e faatino ai le faatuatua i le Atua e faataunuu ai mea ua Ia poloaiina oe e fai.

Fesoasoani i tamaiti aoga ia iloa aafiaga a le Alii i o latou olaga. A o aoao tamaiti aoga e uiga i le ala na faamanuiaina ai e le Faaola olaga o tagata i tusitusiga paia, vaavaai mo auala e fesoasoani ai ia latou iloa Ana faamanuiaga i o latou lava olaga. Valaaulia i latou e mafaufau loloto pe faapefea ona tali mai le Faaola i a latou tatalo, faamalosiaina o i latou, po o le faamaloloina o i latou.

Sauniuniga a le tamaitiiti aoga: Valaaulia tamaiti aoga e galulue i le taulotoina o le fuaitau o le atamai i aoaoga faavae 1 Nifae 3:7 ma mafaufau pe faapefea ona faatatau i tulaga latou te feagai i o latou olaga.

Gaoioiga e ono Mafai Ona Aoao Ai

Poloaiga faigata

Ina ia fesoasoani i tamaiti aoga ia maua le taua i le tala i atalii o Liae na poloaiina e faia ni mea faigata, mafaufau e tusi i luga o le laupapa tali a tamaiti aoga i fesili nei ma faasino i ai i le taimi atoa o le lesona.

• O a poloaiga, tulaga faatonuina, po o isi valaaulia faaperofeta e sili ona faigata ona usitaia e talavou i aso nei? O le a le mea ua sili atu ai ona faigata nei mea nai lo isi?

• O le a sau tala e fai atu i se tasi e lagona e faigata tele ona tausia se poloaiga patino po o se tulaga faatonuina?

O se isi auala e amata ai le vasega o le fesoasoani lea i tamaiti aoga ia iloa tatou te manaomia le fesoasoani a le Alii e ausia ai mea ua Ia poloai mai ai ia i tatou. O se tasi auala e faia ai lenei mea o le fai atu lea i se tamaitiiti aoga e fai se mea o le a manaomia ai le fesoasoani a le faiaoga. Mo se faataitaiga, o se vaega o se galuega, atonu latou te manaomia ona tatala se mea e manaomia ai se ki mai le faiaoga.

Afai e i ai se poloaiga sa faigata ia te oe ona usitaia, ia manatua a o e suesueina le 1 Nifae 3. Saili e aoao mai faataitaiga e te suesueina, ma mafaufau loloto pe mafai faapefea e au filifiliga ona aafia ai lau sootaga ma le Alii.

Ua tuuina mai e le Alii se poloaiga i atalii o Liae

Faitau le 1 Nifae 3:1–6, ma vaavaai mo mea na poloaiina atalii o Liae e fai.

• Aisea e te manatu ai na sa’o uso o Nifae i le ta’ua o lenei poloaiga o se “mea faigata”? (fuaiupu 5).

E mafai ona fesoasoani le parakalafa lenei pe afai e le o mautinoa e tamaiti pe faapefea ona tali le fesili na muamua atu.

Vaai faalemafaufau pe mata o a ni lagona o atalii o Liae i le tuua o lo latou aiga ma malaga atu i le fia selau o maila e ui atu i se atunuu naumati i le vao ae ua toe talosagaina e toe foi atu i Ierusalema i se taimi puupuu mulimuli ane e aumai papatusi mai ia Lapana.

Faitau le 1 Nifae 3:7–8 ma faailoa le mafuaaga na tuuina mai ai e Nifae lona naunau e usitaia le poloaiga a le Alii.

1 Nifae 3:7 o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e maua gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O le a le mea na malamalama i ai Nifae atonu e le malamalama i ai ona uso?

O se tasi o mea tatou te aoao mai le fuaiupu 7 e faapea e saunia e le Atua se auala mo i tatou e faataunuu ai soo se mea e finagalo o Ia tatou te faia.

Mafaufau pe faapefea ona fesootai lenei upumoni i poloaiga atonu e faigata ia te oe.

E ui o le a fesoasoani le Atua ia te oe e faataunuu mea ua Ia poloai mai ai, ae Na te lei folafola mai o le a faigofie pe o le a faamanuiaina lau taumafaiga muamua.

Sa faamatala mai e Peresitene Dieter F. Uchtdorf, a o i ai i le Au Peresitene Sili:

Peresitene Dieter F. Uchtdorf

O le mulimuli i le Faaola o le a le aveesea uma ai ou tofotofoga. Ae peitai, o le a aveesea ai papupuni i le va o oe ma le fesoasoaniga e finagalo lou Tama Faalelagi e avatu ia te oe. O le a faatasi le Atua ma oe. (Dieter F. Uchtdorf, “O Se Faananau mo le Aiga,” Ensign poo le Liahona, Nov. 2017, 22)

• O le a se mea ua fesoasoani lenei faamatalaga ia te oe e te malamalama ai e uiga i le Tama Faalelagi ma Iesu Keriso?

Toe mafaufau i poloaiga, tulaga faatonuina, po o isi valaaulia faaperofeta na e faailoaina i le amataga o le lesona e sili ona faigata ona usitaia e le autalavou.

• O a ni mea faalavefau e mafai ona faigata ai ona usitaia nei poloaiga?

• E mafai faapefea e le Alii ona “saunia se ala” e fesoasoani ai i le autalavou ia usiusitai i nei poloaiga?

Valaaulia tamaiti aoga e faasoa mai ni mafuaaga i le fesili ua mavae atu.

Sa taumafai Nifae ma ona uso e aumai papatusi apamemea

Mo le gaoioiga lenei, e mafai ona vaevae tamaiti aoga i ni vaega toalaiti, o le afa o le vaega o loo suesueina le taumafaiga muamua ae o le isi afa e suesueina le taumafaiga lona lua. E mafai e vaega taitasi ona saunia e faatino le mea na tupu i la latou tala ma faatino mo se isi vaega o e sa suesueina le isi tala, pe mafai foi e vaega taitasi ona aotele a latou tala mo se isi vaega.

E mafai e tamaiti aoga ona maimoa i vitio fautuaina nai lo le faitauina po o le faatinoina o tala.

Suesue tala nei o taumafaiga muamua e lua ina ia maua mai papatusi apamemea. Vaavaai pe na faapefea ona tali atu uso eseese i taumafaiga taitasi. (Manatua: I le lesona “1 Nifae 4–5” o le a e aoao ai pe na faapefea ona saunia e le Alii se ala mo i latou ina ia manuia ai.)

Taumafaiga muamua: Faitau le 1 Nifae 3:10–15 pe maimoa i le “Ua Taitaiina Nifae e le Agaga e Aumai Papatusi Apamemea” mai le faailotaimi 4:43 i le 8:18. O loo maua lenei vitio i le ChurchofJesusChrist.org. (Atonu e fesoasoani le iloa o le faia o se vili o se auala e filifili ai soo se tasi mai le toatele.)

Taumafaiga lona lua: Faitau le 1 Nifae 3:22–31; 4:1, pe maimoa i le “Ua Taitaiina Nifae e le Agaga e Aumai Papatusi Apamemea” mai le faailotaimi 8:18 i le 15:10.

• Faamata o le a se mea na mafai ona aoaoina e nei uso e uiga ia i latou lava mai luitau sa latou oo i ai a o taumafai e usitai i le poloaiga a le Atua?

• Aisea e te manatu ai e mafai e lo tatou Atua alofa ona faatagaina i tatou e tauivi mo se taimi a o lei tuuina mai se ala e faataunuu ai Lona finagalo?

• O le a sou manatu na faapefea ona aafia le faatuatua ma le sootaga a le auuso ma Iesu Keriso ona o le eseese o a latou tali atu i le mea na tupu? Aisea?

Faaaogaina o lenei tala i lou olaga

E mafai ona fesoasoani le Faaola ia te oe e faatoilalo faafitauli ia e faigata ai ona usitai i Ana poloaiga ma mulimuli i fautuaga a Ana perofeta. Ina ia fesoasoani ia te oe e faaaoga lenei mea i lou olaga, tali fesili nei i lau api talaaga mo suesuega.

Mafaufau e faaali atu filifiliga nei o fesili mo tamaiti aoga e faasino i ai.

A uma ona faia e tamaiti aoga, valaaulia ni volenitia e faasoa mai i le vasega se vaega o mea sa latou tusia. Molimau atu o le a faia pea e le Alii se ala mo i tatou e faataunuu ai mea ua Ia poloaiina ai i tatou.

1. Vaai faalemafaufau i le tuuina atu e Nifae ia te oe o le fautuaga e uiga i se poloaiga po o le fautuaga a le perofeta e faigata ona e usitaia. O le a se mea e te manatu o le a ia fai atu ai ia te oe?

2. O a ni faatinoga patino o le a e faia e usitaia atoatoa ai se tasi o poloaiga a le Alii po o fautuaga a le perofeta?

3. O le a se mea ua e vaaia pe ua e aafia ai ua e maua ai le mautinoa o le a saunia e le Alii se ala mo oe e usitai ai i Ana poloaiga ma mulimuli i Lana perofeta?

Afai o le a aoga mo tamaiti aoga le suesueina o le vaega o totoe o le tala ia Nifae i le mauaina o papatusi a o lei aoaoina i latou i le lesona o le atamai i aoaoga faavae mo le 1 Nifae 3:7, e mafai ona e faatali e aoao atu le lesona o le atamai i aoaoga faavae seia uma le lesona “1 Nifae 4–5”. O le isi filifiliga o le tuu atu lea i se tamaitiiti aoga e aotele mea na tutupu o loo tusia i le 1 Nifae 4 e fesoasoani ai i le vasega ia iloa le auala na saunia ai e le Alii se ala e usitaia ai Ana poloaiga.

Manatu ma Talaaga o Faamatalaga

O fea ou te amata ai pe afai o loo ou tauivi e tausia ni poloaiga se tele?

Na aoao mai Peresitene Harold B. Lee (1899–1973) e faapea:

Peresitene Harold B. Lee

“O le poloaiga e aupito sili ona taua a le Atua, o le poloaiga lena e tasi o loo faigata ia te oe ona tausia i le aso nei. … Ia faatoilaloina lena faafitauli ona amata lea i le isi tasi lena e pito sili ona faigata ia te oe le tausiaina. O le auala lena e faapaiaina ai oe e ala i le tausiga o poloaiga a le Atua. (Aoaoga a Peresitene o le Ekalesia: Harold B. Lee [2000], 30)

Aisea e tuuina mai ai e le Tama Faalelagi ia i tatou poloaiga?

E fesoasoani le Atua e tali lenei fesili i le Mataupu Faavae ma Feagaiga 82:8–9.

Sa faamalamalama mai e Carole M. Stephens, sa avea muamua ma se tasi o le Au Peresitene Aoao o le Aualofa:

Sister Carole M. Stephens

A o tatou tuuina atu i lo tatou Tama e aoao i tatou, o le a amata ona tatou vaaia o Ana tulafono o se faailoga o Lona alofa mo i tatou ma o le usiusitai i Ana tulafono o se faailoga lea o lo tatou alofa mo Ia. (Carole M. Stephens, “Afai Tou te Alofa Mai ia te Au, Ia Outou Tausi i Au Poloaiga,” Ensign poo le Liahona, Nov. 2015, 119)

O le a se mea e mafai ona tatou aoao mai le soifuaga o Iesu Keriso e uiga i le usiusitai?

Maimoa le vitio “O le Usiusitai e Aumai ai Faamanuiaga” (3:26) e faalogo ai i le mea na aoao mai e Peresitene Thomas S. Monson (1927–2018) e uiga i le usiusitai.

Gaoioiga Faaopoopo e Aoao Mai Ai

“Lototele o Nifae”

Ina ia folasia atu le faasologa o tala i le 1 Nifae 3, mafaufau e valaaulia tamaiti aoga e usu pe faalogologo ile “Lototele o Nifae” (Tusipese a Tamaiti, 120). Ona valaaulia lea o se volenitia e faasoa mai auiliiliga o le tala o loo ta’ua i le fuaiupu muamua o le pese.

“Ou Te Alu ma Faia”

Mafaufau e taina le pese “Ou Te Alu Ma Faia” (3:56) ma valaaulia tamaiti aoga e usu faatasi ia upu a o latou faalogologo. Valaaulia tamaiti aoga e faasoa mai manatu, lagona, po o upu na tulagaese ia i latou a o latou faalogologo i le pese.

O le taua o a tatou amio

Valaaulia tamaiti e mafaufau loloto i fesili nei:

O ai atalii o Liae na tuua lo latou aiga ae nonofo i le vao ma o latou matua? na toe foi atu i Ierusalema e aumai papatusi apamemea? ositaulagaina a latou oa e faafesuiai ma papatusi apamemea? (O le tali i fesili taitasi o fesili uma ia e fa.)

Valaaulia tamaiti aoga e faitau le 1 Nifae 3:6 e sue ai se mafuaaga se tasi na sili atu ai ona alofagia e le Alii o Nifae nai lo Lamana ma Lemuelu e ui ina sa usiusitai uma uso i faatinoga.

Valaaulia tamaiti aoga e faasoa mai ni aafiaga i se taimi na latou lagonaina ai le faamanuiaina ona sa latou naunau e usitai e aunoa ma le faitio.

O isi faataitaiga o le usiusitai i le Atua

Fai i tamaiti aoga e faasoa mai ni faataitaiga mai tusitusiga paia po o le talafaasolopito o le Ekalesia a i latou o e na faaalia le faatuatua tele i le Atua e ala i le usiusitai i taimi o tulaga faigata. Afai e manaomia e tamaiti aoga se fesoasoani, faaali atu ata o tagata e pei o Noa, Mose, po o Iosefa Samita.

Valaaulia tamaiti aoga e faasoa mai po o le a le mea na naunau le tagata e oo i ai ina ia usitaia, o a faafitauli na latou feagai, ma pe na faapefea ona saunia e le Alii se ala mo i latou e faataunuu ai mea na Ia poloaiina ai i latou.

Ia mautinoa e taitai le talanoaga i le faataitaiga a le Faaola o le usiusitai atoatoa i Lona Tama. Mafaufau e faaaoga le faamatalaga lenei:

“Mai lesona uma ua tatou aoaoina mai le soifuaga o le Faaola, e leai se lesona ua sili ona manino ma mamana nai lo le lesona o le usiusitai” (Robert D. Hales, “Afai Tou Te Alofa Mai ia te Au, Ia Outou Tausi Mai i Au Poloaiga,” Ensign po o le Liahona, Me 2014, 35).