O Anomea Tomua

O Le Fuafuaga o le Faaolataga

O Le Fuafuaga a le Tama Faalelagi mo Ana Fanau

O Le Fono Tele

E ala i la tatou malaga i le olaga nei, e tele ina tulai mai fesili e uiga i le faamoemoega ma le uiga o le olaga: O fea na ou sau ai? Aisea ua ou i ai iinei? O fea ou te alu i ai? O le iloaina o tali i nei fesili e mafai ona fesoasoani ia te oe e faatautaia ai luitau o le olaga ma tumau ai i le ala o feagaiga a le Alii. O lenei lesona e mafai ona fesoasoani ia te oe ia malamalama ma lagona le taua o le fuafuaga a le Tama Faalelagi.

O Le Sini Faamoemoeina o Seminare ma Inisitituti Faalelotu. Ia manatua “o lo tatou faamoemoega o le fesoasoani lea i le autalavou laiti ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o o latou aiga, ma isi mo le ola e faavavau faatasi ma lo latou Tama i le Lagi” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], x, ChurchofJesusChrist.org)

aikona, faatonuga o le aoaoina

Sauniuniga a le tagata aoga: Valaaulia tagata aoga e mafaufau e uiga i se mea latou te lagona e le mafai ona latou ola e aunoa ma lena mea ma ia saunia e faamatala mai pe aisea. E mafai foi ona latou aumaia lena mea po o se ata i le vasega, pe a talafeagai ai.

Gaoioiga e Ono Mafai Ona Aoao Ai

O le fuafuaga a le Tama Faalelagi

aikona, faatonuga o le aoaoina

Ina ia fesoasoani i tagata o le vasega e aoao e uiga i le tasi ma le isi, mafaufau e valaaulia tagata aoga e faasoa mai a latou tali i le fesili o loo i lalo. Atonu e aoga mo tagata aoga le faaali atu o se mea sa latou mafaufau i ai pe faasoa atu se ata o lena mea. Ia mautinoa e uunaia se siosiomaga lelei ma faaaloalo e faatatau i mea taua i olaga o tagata aoga.

• O le a se malamalamaaga e te manatu e le mafai ona e ola e aunoa ma le i ai? Aisea?

E ala mai i tusitusiga paia ma faaaliga i ona po nei, ua tatou maua ai se malamalama o le muai olaga, le Togiola a le Faaola, olaga pe a mavae le oti, ma le tele o isi elemene o lo tatou olaga faavavau. O lenei malamalamaaga o le a faigata ona tatou ola e aunoa ma lona iai. Faaalu sina taimi e mafaufau ai e uiga i mea ua e iloa e uiga i le fuafuaga a le Tama Faalelagi. Mafaufau loloto pe faape’i lou olaga e aunoa ma lena malamalama.

A o e suesue i le asō, saili le mafutaga a le Agaga Paia e fesoasoani ia te oe e aoao atili ai e uiga i le fuafuaga alofa a le Tama Faalelagi mo Ana fanau.

O le fuafuaga a le Tama Faalelagi i le Tusi a Mamona

aikona, faatonuga o le aoaoina

Atonu e fesoasoani le tusi o nei fesili ma mau faasino i luga o le laupapa. O le isi filifiliga o le tusi lea o fesili taitasi i se isi fasipepa ma tuutuu solo ia pepa faataamilo i le potu. Valaaulia tagata aoga e savavali faataamilo i le potu, sue ia fesili, ona vaavaai lea i tusitusiga paia mo tali i fesili. E mafai foi e tagata aoga ona tusi tali latou te maua i luga o le pepa.

Ua aoao mai e le Tusi a Mamona le tele o mea e uiga i le fuafuaga a le Tama Faalelagi. Na folafola mai e Peresitene Russell M. Nelson: “Ou te molimau atu o le Tusi a Mamona o le afioga moni lava a le Atua. O loo i ai tali i fesili sili ona taua o le olaga” (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Ensign po o le Liahona, Nov. 2017, 62). O ni nai fesili nei o loo tali e le Tusi a Mamona. Filifili ia le itiiti ifo ma le lua ma faitau le mau e fesoasoani e tali ai le fesili.

• O le a le mea ua aoao mai e le Tusi a Mamona e uiga i le muai olaga? (Alema 12:25, 30; o le fasifuaitau “faavaega o le lalolagi” e faasino i le muai olaga.)

• O le a le matafaioi a Iesu Keriso i le fuafuaga a le Tama Faalelagi? Alema 22:12–14)

• O le a le faamoemoega o le olaga? (Alema 34:32–33)

• O le a le mea e tupu pe a tatou oti? (Alema 40:11–14, 21–23)

• O le a se mea e ono tupu pe ana leai le Togiola a Iesu Keriso? (2 Nifae 9:6–11)

aikona, faatonuga o le aoaoina

Valaaulia tagata aoga e talanoaina tali o fesili na latou mauaina. E mafai foi ona valaaulia tagata aoga e fai ni fesili e uiga i fuaiupu na latou faitauina po o le fuafuaga a le Tama Faalelagi. E mafai ona latou faaaogaina le tusiga o Autu o le Talalelei “Fuafuaga o le Faaolataga” e malamalama ai i fuaitau o mau ma vaavaai mo tali i a latou fesili.

• O a upumoni po o aoaoga faavae na e faailoa mai i fuaiupu na e faitauina?

• O a upu po o fasifuaitau i fuaiupu o loo aoao mai ai le upumoni po o le aoaoga faavae na e faailoaina?

  aikona, faatonuga o le aoaoina

  Mafaufau e tusi upumoni ma aoaoga faavae e faailoa mai e tagata aoga i luga o le laupapa. Atonu e faailoa mai e tagata aoga ni upumoni eseese, e pei o le e ala i le Togiola a Iesu Keriso, e mafai ai ona faaolaina i tatou mai le Pa’ū.

• O le fea o aoaoga e uiga i le fuafuaga a le Tama Faalelagi e sili ona e faafetai ai? Aisea?

aikona, faatonuga o le aoaoina

E ono fesoasoani mo tagata aoga le faataitai le faamatalaina o le fuafuaga a le Tama Faalelagi i ni paga po o ni vaega toalaiti. E faaopoopo atu i le faamatalaina o le fuafuaga, valaaulia tagata aoga e faasoa mai pe faapefea ona aafia ai o latou olaga.

O le fuafuaga a le Tama Faalelagi ma lo’u olaga

aikona, faatonuga o le aoaoina

Fesoasoani i tagata aoga e talanoaina pe faapefea e se malamalama i le fuafuaga a le Tama Faalelagi ona aafia ai o latou olaga. Atonu e te mafaufau e faaaoga le saunoaga lenei a Peresitene M. Russell Ballard ma nisi o fesili nei.

Sa faamalamalama mai e Peresitene M. Russell Ballard peresitene o le Korama a Aposetolo e Toasefululua le ala e mafai ai e le malamalama i le fuafuaga o le faaolataga a le Tama Faalelagi ona fesoasoani ia i tatou i o tatou olaga. Atonu e te manao e maimoa le vitio “Answers to Life’s Questions” mai le faailotaimi 10:37 i le 12:09 pe faitau le faamatalaga lenei:

Peresitene M. Russell Ballard

Ua i ai ia i tatou o tagata faitino se vaaiga faatapulaaina o le olaga mai le vaaiga e faavavau. Ae afai tatou te iloa ma malamalama i le fuafuaga a le Tama Faalelagi, tatou te iloa ai o le taulimaina o faigata o se tasi lea o auala autu e tofotofoina ai i tatou. …

E ala i le taulai atu ma ola ai i mataupu faavae o le fuafuaga a le Tama Faalelagi mo lo tatou fiafia e faavavau, e mafai ai ona tatou vavaeeseina i tatou lava mai le amioleaga o le lalolagi. Afai ua taula i tatou i le malamalama sa’o po o ai i tatou, le pogai ua tatou i ai iinei i lenei lalolagi, ma le mea e mafai ona tatou o i ai pe a mavae lenei olaga faaletino, e le mafai e Satani ona faamatauina lo tatou fiafia e ala i soo se ituaiga o faaosoosoga. Afai tatou te naunau e ola i le fuafuaga a le Tama Faalelagi, o le a tatou faaaogaina lo tatou faitalia na tuuina mai e le Atua e faia ai faaiuga e faavae i upumoni faaalia, ae le o manatu o isi po o mafaufauga o i ai nei o le lalolagi. (M. Russell Ballard, “Tali i Fesili o le Olaga,” Ensign po o le Liahona, Me 1995, 23–24)

• O faapefea ona aafia lou olaga i lou malamalama i le fuafuaga a le Tama Faalelagi?

• O a nisi o tulaga e aafia ai faaiuga e te faia ona o se malamalamaaga i le fuafuaga a le Tama Faalelagi?

• E mafai faapefea e se malamalama i le fuafuaga a le Tama Faalelagi ona aafia ai le ala e te vaai ai i tulaga ma aafiaga o lou olaga?

aikona, faatonuga o le aoaoina

Faaiu le lesona i le faasoa atu o lau molimau i le fuafuaga a le Tama Faalelagi ma le auala na aafia ai lou olaga.

Manatu ma Talaaga o Faamatalaga

E faapefea ona avea le fuafuaga o le faaolataga ma faamaoniga o le alofa o le Atua?

Na aoao mai Peresitene M. Russell Ballard o le Korama a Aposetolo e Toasefululua:

Peresitene M. Russell Ballard

Ua alofa tele le Tama Faalelagi ia i tatou ua Ia saunia ai Lana fuafuaga o le faaolataga ma se Faaola o le tagata autu lea. Ma na alofa tele Iesu ia i tatou o lea, i le Fono tele i le Lagi, ina ua fesili le Tama Faalelagi, “O ai se Ou te auina atu?” Na tali atu Iesu, o le ulumatua o fanau agaga uma a le Tama, “O A’u lenei, auina atu au” [Aperaamo 3:27]. Na fetalai atu o Ia i le Tama, “Le Tama e, ia faia Lou finagalo, ma e a Oe pea le mamalu e faavavau” [Mose 4:2]. Sa ofofua atu Iesu e avea ma o tatou Faaola ma Togiola ina ia mafai ai ona tatou avea e faapei o i La’ua ma toe foi atu ai i lo La’ua afioaga. (M. Russell Ballard, “Pe Sili Mai Lou Alofa ia te A‘u i o Latou Nei?,” Ensign po o le Liahona, Nov 2021, 52)

Aisea e i ai ai o tatou luitau i le olaga?

Na saunoa mai Peresitene Dallin H. Oaks o le Au Peresitene Sili:

Peresitene Dallin H. Oaks

Ua tatou oo uma i aafiaga o ituaiga eseese o mea faafeagai ia e tofotofoina ai i tatou. O nisi o nei tofotofoga o faaosoosoga ia agasala. O nisi o luitau faaletino e ese mai agasala faaletagata lava ia. O nisi e matua tetelē lava. O nisi e laiti. O nisi e faifai pea, ma o nisi ua na o ni mea e auauai mai. E leai ma se tasi o i tatou e tuusaunoaina. O le faafeagai e faatagaina i tatou ia tuputupu ae e agai atu i le tagata e finagalo lo tatou Tama Faalelagi e avea ai i tatou. (Dallin H. Oaks, “Faafeagai o Mea Uma” Ensign po o le Liahona, Me 2016, 115-116)

E faapefea e le iloaina o le fuafuaga a le Tama Faalelagi ona fesoasoani ai ia te a’u?

O le vitio “Plan of Salvation—We’re Still a Family” (4:46) o loo faaalia ai le ala na fesoasoani ai le i ai o le malamalama i le fuafuaga o le faaolataga i se tasi alii talavou e faatautaia le luitau faataumaoi o le toesea ai o nisi o tagata o le aiga.

O le a le faamoemoega ma le uiga o le olaga?

Na faamatala mai e Peresitene Dallin H. Oaks o le Au Peresitene Sili:

Peresitene Dallin H. Oaks

O loo faasino i ai tusitusiga paia e faapea o le “fuafuaga tele o le fiafia,” “o le fuafuaga o le togiolaina,” ma le “fuafuaga o le faaolataga” (Alema 42:8, 11, 5), o lena fuafuaga—ua faaalia i le Toefuataiga—na amata i se Fono i le Lagi. I le avea ai ma ni agaga, sa tatou mananao ai ia ausia le ola e faavavau o loo soifua olioli ai o tatou matua faalelagi. I lena taimi sa tatou alualu i luma i le mea na gata ai lo tatou mafai e aunoa ma se olaga faaletino i se tino faitino. Ina ia maua lena aafiaga, na fuafua ai le Atua le Tama e foafoa lenei lalolagi. I le olaga faaletino na fuafuaina, o le a faaeleelea ai i tatou e le agasala a o tatou feagai ai ma mea faataumaoi e manaomia mo lo tatou tuputupu a’e faaleagaga. O le a noatia foi i tatou i le oti faaletino. Ina ia toe faatuina mai i tatou mai le oti ma le agasala, o le a saunia ai e lo tatou Tamā Faalelagi se Faaola. O Lona Toetu o le a togiola ai tagata uma mai le oti, ma o Lana taulaga togiola o le a totogi ai le tau e manaomia mo tagata uma ina ia faamamaina ai mai agasala e tusa ma tuutuuga ua faatuina e siitia ai lo tatou tuputupu a’e. O lenei Togiola a Iesu Keriso e totonugalemu i le fuafuaga a le Tama. (Dallin H. Oaks, “O Le Fuafuaga Sili,” Ensign po o le Liahona, Me 2020, 93)

Mo se vaaiga aoao i le fuafuaga a le Tama Faalelagi, mafaufau e maimoa i vitio “What Is the Purpose and Meaning of Life?” (7:43) ma le “O Lo Tatou Ola e Faavavau” (3:46), o loo maua i le YouTube ma le ChurchofJesusChrist.org, i le faasologa lena.

Gaoioiga Faaopoopo e Aoao Ai

O se isi filifiliga mo le amataina o le lesona

Afai e maua, mafaufau e aumai se matatioata e i ai ni tioata lanu. Valaaulia se tagata aoga e faataitai le matatioata ma faamatala pe faapefea ona aafia ai la latou vaai. Ona mafai lea ona valaaulia i latou e mafaufau pe mafai faapefea e le vaai atu i le olaga ma le fuafuaga a le Tama Faalelagi i le mafaufau ona aafia ai le auala latou te mafaufau ma faatino ai. A o tatou malamalama atili i le fuafuaga a le Tama Faalelagi, tatou te maua se vaaiga manino atu o o tatou olaga faaletino. O se tasi o faataitaiga e faapea, o i latou o e iloa e i ai le olaga pe a mavae le oti e mafai ona sili atu le faamafanafanaina pe a maliu se tasi e pele.

Taulai atu i le matafaioi autu a le Faaola i le fuafuaga o le faaolataga.

Mafaufau e faaaoga le saunoaga a Peresitene Dallin H. Oaks “O Le A Le Mea Ua Faia e lo Tatou Faaola mo i Tatou?” (Liahona, Me 2021, 75–77) e fesoasoani ai i tagata aoga ia malamalama i le auala e fesoasoani ai Iesu Keriso ia i tatou e faatoilalo luitau e o faatasi ma le olaga faaletino. E mafai ona faia lenei mea i le faitauina o le tala amata o le lauga e uiga i le fafine na fesili “O le a le mea ua faia e [Iesu] mo a’u?” Vaevae vaega o le lauga i le vasega ma valaaulia i latou e saili tali i lena fesili. Valaaulia tagata aoga e molimau mai pe faapefea e le iloaina o nei mea ona aafia ai o latou lagona i le Tama Faalelagi ma Iesu Keriso. E mafai foi e tamaiti aoga ona suesue fuaiupu nei e uiga i le tulaga o le a i ai le olaga i le iai po o le leai foi o lo tatou Faaola.

• Faatasi ma Keriso: Mosaea 16:8–11; Alema 11:42–45; Alema 12:33–34

• A aunoa ma Keriso: 2 Nifae 9:6–9; Mosaea 16:6–7; Alema 41:10–11; Alema 42:11–14

Faapupula le fuafuaga o le faaolataga

A uma ona suesue tagata aoga e uiga i le fuafuaga a le Tama Faalelagi, e mafai ona e valaaulia i latou e fatu se ata e faamatala ai le fuafuaga ma le matafaioi a le Faaola o loo i ai. E mafai e tagata aoga ona faaaoga a latou ata e faataitai ai le faamatalaina atu i se tasi o le vasega o mea ua latou iloa e uiga i le fuafuaga. O se faataitaiga lenei o se ata.

Fuafuaga o le faaolataga

O le fuafuaga o le faaolataga i vaega e tolu

O se tasi auala e malamalama ai i le fuafuaga o le faaolataga o le vaevae lea i ni vaega se tolu: muai olaga, olaga faitino, ma le olaga pe a mavae le oti. Mafaufau e faasoa atu le vitio “The Plan of Salvation” (10:39) ma valaaulia tagata aoga e vaavaai pe mafai faapefea ona faatusatusa le fuafuaga i se tala faatino e tolu vaega ma pe faapefea e le maimoaina i lenei auala ona fesoasoani ia i latou e malamalama atili ai. O vaega e taofi ai i le vitio ma talanoaina e aofia ai faailo taimi nei:

• 1:42: E mafai faapefea e le malamalama i le fuafuaga a le Tama Faalelagi ona fesoasoani i nei tulaga?

• 2:59: Aisea e te manatu ai o le a iai se nunumi i lenei vaega? E faapefea e le iloaina o le mea na tupu i le amataga ona fesoasoani?

• 4:56: O le a le tusiga o ia i tatou e fesoasoani ai ia i tatou? Na faapefea ona fesoasoani ia oe?

• 6:00: Iloilo vaega e tolu o le fuafuaga ma faamatala pe faapefea ona fesoasoani le iloaina o i latou.