Moroni 7:44–48

“Ang Tiunay nga Gugma ni Kristo”

Manluluwas nga naggakos sa usa ka bata

Paghunahuna og mga higayon nga gibati nimo ang Kristohanong gugma. Unsa ang kalainan nga nahimo sa Kristohanong gugma diha sa imong kinabuhi? Girekord ni Moroni ang panapos nga wali nga gihatag sa iyang amahan, si Mormon, diha sa sinagoga mga tuig na ang nakalabay. Si Mormon mitudlo kon unsaon nga “mohupot sa matag maayo nga butang” (Moroni 7:20, 25), ilabi na sa gugma nga putli, “ang tiunay nga gugma ni Kristo” (Moroni 7:47). Kini nga leksiyon gituyo aron sa pagtabang kanimo sa pagsabot ug sa pagtinguha sa gugma nga putli diha sa imong kinabuhi.

Kristohanong gugma

Kon mahimo, sugdi pinaagi sa pagtan-aw o sa pagbasa og bisan usa sa mosunod nga mga istorya sa usa ka tawo nga mitabang gumikan sa gugma. Pamalandongi kon unsa nga kalainan ang mahimo sa Kristohanong gugma.

• Usa ka batang lalaki nga walay paghinakog nga mihatag ngadto sa laing bata nga nanginahanglan. Tan-awa ang “The Coat” (2:07), anaa sa ChurchofJesusChrist.org,o basaha ang istorya, nga ang tinuod nga asoy gikan ni pagkabata ni Presidente Heber J. Grant’ (“The Coat,” Friend, Mar. 2012, 16–17).

• Imbes nga mangomedya sa usa ka estranghero, duha ka batang lalaki ang mihukom sa pagtabang kaniya. Tan-awa ang “Gordon Hinckley: Lessons I Learned as a Boy” (4:04), anaa sa ChurchofJesusChrist.org.

• Usa ka grupo sa batan-ong mga babaye mitabang sa pagkamabination ug gugma nga putli sa usa ka estudyante nga adunay kakulangan. Tan-awa ang “Charity: An Example of the Believers” (4:50), anaa sa ChurchofJesusChrist.org.

• Ngano sa imong hunahuna nga ang Kristohanong gugma mahimo nga usa ka gamhanan nga impluwensiya sa atong mga kinabuhi?

• Kinsa ang nahimong ehemplo sa Kristohanong gugma sa imong kinabuhi?

Si Mormon ug si Apostol Pablo mitudlo nga ang pagpalambo og Kristohanong gugma mahinungdanon alang sa atong pag-uswag (tan-awa sa Moroni 7:44; 1 Mga Taga-Corinto 13:2). Aron matabangan ka sa pagsukod kon unsa ka maayo ang imong pagpalambo sa Kristohanong gugma, pamalandongi kon unsa ka tinuod ang mosunod nga mga pamahayag alang kanimo sa sukdanan nga 1 ngadto sa 5 (1 = dili gayod tinuod; 5 = kanunay nga tinuod):

• Naningkamot ko sa pagtabang ug sa pagserbisyo sa uban, ilabi na kon sila naglisod o nawad-an sa kadasig.

• Naningkamot ko nga mahimong mabination, mapailobon, ug mapinasayloon sa uban, bisan pa man nga lisod sila ikauban.

• Kon angay, gisultihan nako ang uban nga gihigugma ko sila ug nagpakabana kabahin nila.

Samtang magtuon ka sa Moroni 7, hangyoa ang Ginoo sa pagtabang kanimo nga makasabot ug magtinguha sa gugma nga putli.

Ang wali ni Mormon mahitungod sa gugma nga putli

Duol sa kataposan nga bahin sa iyang rekord, gilakip ni Moroni ang usa ka wali nga gihatag sa iyang amahan, si Mormon, ngadto sa “malinawon nga mga sakop ni Kristo” (Moroni 7:3). Si Mormon mitudlo sa mga baroganan sa gugma nga, kon gipatalinghogan, makapugong unta sa kalaglagan sa mga Nephite. Kini nga mga pagtulun-an magamit usab kang Moroni, kinsa nakasaksi sa mabangis nga kalaglagan sa mga Nephite pinaagi sa mga Lamanite ug naglatagaw nga nag-inusara sulod sa mga katuigan.

Basaha ang Moroni 7:47 ug markahi ang hugpong sa mga pulong nga naghulagway sa gugma nga gitudlo ni Mormon.

Si Jesukristo mihatag og hingpit nga ehemplo alang kanato kon unsaon sa paghigugma ang uban. Basaha ang Moroni 7:45–48, mangita sa mga hugpong sa mga pulong nga (1) dugang nga naghulagway sa gugma nga putli, o kon unsaon paghigugma sama sa Manluluwas, ug (2) sa pagdugang sa imong tinguha sa pagpalambo sa gugma nga putli diha sa imong kinabuhi.

Ang Moroni 7:45–48 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Ang mosunod nga mga kahulogan mahimong makatabang:

• “mainantoson” = mapailobon nga molahutay sa mga pagsulay

• “dili masinahon” = dili masina sa uban

• “dili manghambog” = mapaubsanon

• “dili mangita alang sa iyang kaugalingon” = nagbutang sa Dios ug sa mga panginahanglan sa uban sa dili pa ang kaugalingon

• “dili dali nga masuko” = dili dali nga mapungot

• “matuohon sa tanan nga mga butang” = modawat sa tanang kamatuoran

Ikonsiderar ang pagmarka gikan sa hugpong sa mga pulong nga “ang gugma nga putli dili mopakyas” sa bersikulo 46 hangtod sa hugpong sa mga pulong nga “kini molahutay sa kahangtoran” sa bersikulo 47. Si Elder Jeffrey R. Holland sa Korum sa Napulog Duha ka Apostoles mitudlo:

Elder Jeffrey R. Holland

Ang kinabuhi adunay bahin sa mga kahadlok ug kapakyasan. Usahay ang mga butang magkulang. Usahay ang mga tawo mopakyas kanato, o mga ekonomiya o mga negosyo o ang mga gobyerno mopakyas kanato. Apan usa ka butang dinhi o sa kahangtoran dili mopakyas kanato—ang gugma nga putli ni Kristo. (Jeffrey R. Holland, Christ and the New Covenant: The Messianic Message of the Book of Mormon [1997], 337)

• Ngano sa imong hunahuna nga ang tiunay nga gugma ni Kristo dili gayod mopakyas kanato?

• Sa unsang paagi nga ang gugma sa Manluluwas makatabang kanato sa mga paagi nga walay laing makahimo?

Si Presidente Thomas S. Monson (1927–2018) detalyado nga mitudlo mahitungod sa gugma nga putli. Kon mahimo, tan-awa ang “Charity Never Faileth​,” anaa sa ChurchofJesusChrist.org, gikan sa time code 15:05 hangtod sa 17:22. O basaha ang pakigpulong, sugod sa “Akong gikonsiderar ang gugmang putli” ug taposon sa “pagbatok sa aghat sa pagkategoriya sa uban” (“Ang Gugma nga Putli Dili Gayod Mopakyas,” Liahona, Nob. 2010, 124). Pangita og dugang nga mga hugpong sa mga pulong nga gigamit ni Presidente Monson sa paghulagway sa tiunay nga gugma ni Kristo.

Ang imong mga pangutana bahin sa gugma nga putli

Unsa ang imong mga pangutana mahitungod sa unsa ang gugma nga putli o kon unsaon nga mapuno niini nga gugma?

icon, rekord

1. Aron makatabang sa pagtubag sa imong mga pangutana, buhata ang mosunod:

   1. Tun-i ang mosunod nga mga pagtulun-an sa Manluluwas mahitungod sa gugma o sa gugma nga putli: Mateo 5:43–44; Mateo 22:37–40; Juan 15:12.

   2. Paghunahuna og asoy sa kasulatan sa dihang ang Manluluwas nagpakita og gugmang putli. Pangitaa ug basaha ang ehemplo nga imong gihunahuna, o gamita ang usa sa mosunod:

      1. Ang Manluluwas mikaon uban sa mga maniningil sa buhis ug sa mga makasasala (tan-awa sa Mateo 9:10–13). (Ang usa ka maniningil sa buhis maoy usa ka kobrador og buhis alang sa mga Romano, nga niadtong panahona misakop sa Israel.)

      2. Ang Manluluwas mitabang ug mitudlo sa babaye nga nasakpan sa pagpanapaw (tan-awa sa Juan 8:1–11).

      3. Ang Manluluwas nag-antos, nag-ula, ug namatay alang sa tanang katawhan (tan-awa sa Lucas 22:41–44; 23:33–34; 1 Nephi 19:9; Doktrina ug mga Pakigsaad 19:16–19).

      4. Ang Manluluwas miayo ug mipanalangin sa katawhan sa Amerika (tan-awa sa 3 Nephi 17:5–12, 21–24).

   3. Paghunahuna og mga kasinatian sa dihang gibati nimo ang tiunay nga gugma sa Langitnong Amahan ug ni Jesukristo alang kanimo o sa dihang mibati ka og gugma nga putli ngadto sa laing tawo.

Unsaon pagbaton ug pagpakita og gugma nga putli

Ikonsiderar ang pagmarka sa awhag ni Mormon sa “pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma” (Moroni 7:48).

• Sa unsang paagiha sa imong hunahuna ang pag-ampo ngadto sa Langitnong Amahan makatabang sa pagpuno kanato sa gugma nga putli?

2. Paghimo og tinuod sa kinabuhi nga senaryo diin ang tubag sa usa ka tin-edyer makapakita kon siya napuno ba sa gugmang putli o wala. Tubaga ang mosunod nga mga pangutana nga daw anaa ka sa maong sitwasyon:

   • Sumala sa unsay imong nakat-onan gikan sa Moroni 7:45, 47–48 ug sa ehemplo sa Manluluwas, unsaon nimo pagpakita og Kristohanong gugma niini nga sitwasyon?

   • Sa unsang paagi nga ang kinasingkasing nga pag-ampo makatabang kanimo sa pagtubag uban sa gugma niini nga sitwasyon?

   • Unsa kaha nga mga hagit ang mahimo nimong atubangon samtang maningkamot ka sa paggamit sa imong nakat-onan? Unsaon nimo sa paglihok uban sa hugot nga pagtuo bisan niini nga mga hagit?

Paggahin og kadiyot sa pagsulat unsa ang gusto nimong buhaton aron mas masabtan ug mapalambo ang hiyas sa gugma nga putli.

Opsiyonal: Gustong Makakat-on Pa og Dugang?

Unsaon nato sa pagkahibalo kon kita adunay gugma nga putli?

Si Elder Marvin J. Ashton (1915–94) sa Korum sa Napulog Duha ka Apostoles mitudlo:

Elder Marvin J. Ashton

Tingali ang labing dako nga gugma nga putli moabot kon kita mabination sa usag usa, kon kita dili mohukom o mokategorya sa laing tawo, kon kita mohatag lamang sa usag usa sa kaayohan sa pagduhaduha o magpakahilom. Ang gugma nga putli mao ang pagdawat sa mga kalahian, mga kahuyang, ug mga kasaypanan sa usa ka tawo; ang pagbaton og pasensiya sa tawo kinsa nagpakyas kanato; o sa pagpugong sa pagbati nga masilo kon wala himoa sa usa ka tawo ang usa ka butang sa paagi nga ato untang gilaoman. Ang gugma nga putli mao ang pagdumili sa pagpahimulos sa kahuyang sa uban ug pagkaandam sa pagpasaylo sa usa ka tawo kinsa nakapasakit kanato. Ang gugma nga putli nagtinguha sa labing maayo sa usag usa. (Marvin J. Ashton, “The Tongue Can Be a Sharp Sword,” Ensign, Mayo 1992, 19)

Unsa ang ubang mga ehemplo kon unsaon pagpakita og gugma nga putli?

Si Elder Neil L. Andersen mipakigbahin og duha ka mga ehemplo sa gugma nga putli. Tan-awa ang “Two Examples of Charity” (2:11).

Si Elder D. Todd Christofferson misulti bahin sa usa ka tawo nga nagserbisyo sa usa ka refugee nga pamilya. Basaha ang “Dali na diri sa Zion,” sugod sa “Nahinumdom ko sa istorya” ug taposa sa “tinuod nga paghatag” (Liahona, Nob. 2008, 40). O tan-awa ang bidyo gikan sa time code nga 13:58 hangtod sa 15:59.

Si Presidente Gordon B. Hinckley (1910–2008) misulti kabahin sa usa ka batan-ong lalaki kinsa wala pakitai og gugma nga putli sa mga miyembro sa Simbahan apan sa wala madugay nakakaplag og tinuod nga higala kinsa mipakita og Kristohanong gugma. Tan-awa ang “The Need for Greater Kindness” gikan sa time code 6:32 hangtod sa 11:34.

Si Presidente Susan W. Tanner, kanhi Kinatibuk-ang Presidente sa Young Women, miasoy sa istorya ni Ray Hinton, usa ka tawo nga sayop nga nakonbikto sa kamatayon kinsa mitabang sa uban diha sa gugma. Tan-awa sa “The Greatest of These Is Charity” (36:41) gikan sa time code 17:28 hangtod sa 21:50.

Si Elder Jeffrey R. Holland sa Korum sa Napulog Duha ka Apostoles mitanyag niining lawom nga panabot:

Elder Jeffrey R. Holland

Ang tinuod nga gugma nga putli nailhan kausa lamang. Kini gipakita sa hingpit ug sa lunsay nga paagi diha sa dili mapakyas, dili katupngan, ug maulaong gugma ni Kristo alang kanato. … Kini sama sa gipakita diha kang Kristo nga “ang gugma nga putli dili mopakyas.” Mao kana ang gugma nga putli—iyang tiunay nga gugma alang kanato—nga kon wala kita mahimo nga wala, walay paglaom, sa tanang mga lalaki ug mga babaye nga labing makaluluoy. Sa pagkatinuod, kadtong kinsa naghupot sa mga panalangin sa iyang gugma sa katapusang adlaw— ang Pag-ula, ang Pagkabanhaw, kinabuhing dayon, mahangturong saad—sa tinuod kini maayo alang kanila. (Jeffrey R. Holland, Christ and the New Covenant: The Messianic Message of the Book of Mormon [1997], 336.)