“Moroni 7:1–19: ‘Magmakugihon sa Pagpangita diha sa Kahayag ni Kristo,’” Manwal sa Magtutudlo sa Basahon ni Mormon (2024)
“Moroni 7:1–19,” Manwal sa Magtutudlo sa Basahon ni Mormon
Moroni 7:1–19
“Magmakugihon sa Pagpangita diha sa Kahayag ni Kristo”
Mahimong lisod usahay ang pagkahibalo kon unsa ang sakto ug kon unsa ang dili. Apan, ang Dios mihatag og tabang alang kanato. Si Moroni, nga naggamit sa mga pulong sa iyang amahan, midasig kanato sa paggamit sa Kahayag ni Kristo aron makahibalo sa sakto gikan sa sayop. Kini nga leksiyon makatabang kanimo nga mosalig kang Jesukristo sa paghukom tali sa maayo ug sa daotan.
Hain nga kuwadro ang mas hayagon og kolor?
Tan-awa ang mosunod nga hulagway, ug tinoa kon hain sa duha ka abohon [gray] nga mga kuwadro ang mas hayagon og kolor.
Matingala ka ba nga mahibalo nga ang duha ka abohon [gray] nga mga kuwadro susama ra og kahayagon sa kolor? Ang imong utok nakasabot nga ang duha ka abohon [gray] nga mga kuwadro adunay nagkalainlain nga kahayagon sa kolor tungod sa kahayag o kangitngit nga mga kolor nga nagpalibot kanila.
Sama niini nga ilusyon, mahimong adunay mga sitwasyon diin lisod ang paghimo sa sakto nga mga paghukom. Si Isaias nanagna nga sa kataposang mga adlaw, pipila ka mga tawo “nagangalan sa daotan nga maayo, ug sa maayo nga daotan; [ug] nagabutang sa kangitngit nga ilis sa kahayag, ug sa kahayag nga ilis sa kangitngit” (Isaias 5:20; tan-awa usab sa 2 Nephi 15:20).
Pamalandongi ang mosunod:
-
Unsaon nimo pagtino kon ang usa ka butang sakto o sayop?
-
Unsa ka kamasaligon nga ikaw makaila sa maayo gikan sa daotan? Ngano man?
Hunahunaa ang usa ka butang nga gusto nimo nga mas klaro nga mailhan nga maayo o daotan. Pananglitan, ang usa ka tawo tingali maghunahuna nga ang ilang pagpili sa musika maayo, apan ang ilang mga ginikanan mahimong dili mouyon. Kinsa ang sakto? Ang uban pang mga ehemplo mahimong ang pagdesisyon kon unsa nga isyu sa komunidad ang barogan, pagpili kon kinsay mahimong higala, pag-apil og sa usa ka kalingawan, ug uban pa.
Samtang magtuon ka karon, pangitaa kon unsay makatabang kanimo nga makahibalo kon ang usa ka butang maayo o dili.
Ang kalainan tali sa maayo ug daotan
Sama ni Isaias, nakita usab ni Moroni ang atong panahon (tan-awa sa Mormon 8:35). Siya naglakip og tabang alang kanato diha sa Basahon ni Mormon. Human matudlo ang kamahinungdanon sa pagbuhat og maayo nga mga buhat nga adunay tinuod nga katuyoan (tan-awa sa Moroni 7:1–11), iyang girekord ang mga pulong nga gitudlo sa iyang amahan, si Mormon, sa mga miyembro sa Simbahan mahitungod sa paghukom tali sa maayo ug sa daotan.
Basaha ang Moroni 7:12–17, ug ikonsiderar ang pagmarka sa imong nakaplagan alang sa matag pag-aghat sa ubos:
-
Unsaon nato pagkahibalo kon ang usa ka butang maayo
-
Unsaon nato pagkahibalo kon ang usa ka butang daotan
-
Unsa ang gibuhat sa Manluluwas aron sa pagtabang kanato
-
Base sa unsay imong nakaplagan niini nga mga bersikulo, unsaon nimo pagpamubo ang mga baroganan nga gihisgotan?
Gikan sa Moroni 7:12–17 atong madiskobrehan nga ang tanan nga mga butang nga iya sa Dios nagdapit kanato sa pagbuhat og maayo, pagtuo kang Jesukristo, ug paghigugma ug pag-alagad sa Dios. Sa laing bahin, kana nga daotan nagdani kanato sa pagpakasala, paglimod kang Jesukristo, o pagpakig-away batok sa Dios.
Aron matabangan ka nga makasabot sa mga pagtulun-an ni Mormon, hunahunaa nga ang usa ka tawo nagtuo nga ang musika nga ilang gipaminaw ug ang paagi sa ilang paggamit sa ilang telepono ug ubang teknolohiya maayo, apan ang ilang mga ginikanan o mga lider dili mouyon.
-
Base sa mga kamatuoran nga imong nahibaloan, unsa ang mahimo nga ipangutana niini nga tawo diha sa iyang kaugalingon aron madiskobrehan kon maayo ba o dili ang iyang paggamit sa musika ug teknolohiya?
Ang pipila ka mga ehemplo mao ang:
-
Ang pagpaminaw ba niini nga musika o ang paggamit sa akong telepono ug teknolohiya sa paagi nga akong gibuhat …
-
… makapuno ba sa ang akong hunahuna og mga ideya sa pagbuhat og maayo o sa pagbuhat og sala?
-
… makadasig ba kanako sa pagbuhat sa mga butang nga buhaton o dili buhaton sa usa ka sumusunod ni Jesukristo?
-
… makatabang ba kanako sa paghigugma sa mga butang sa Dios o dili?
-
Timan-i nga tingali kinahanglan nimong pamalandongan ang pipila ka mga artist o mga kanta sa tagsa-tagsa, ingon man ang pipila ka mga app, mga dula, o media. Dugang pa, ang gidaghanon sa oras nga imong gigahin sa usa ka kalihokan mahimong usa ka importante nga butang nga ikonsiderar.
Kahayag aron matabangan ka nga makakita
Tingali namatikdan nimo nga sa pipila ka mga sitwasyon mahimong lisod ang paghukom tali sa sakto o sa sayop.
Handurawa ang pagsulay sa hingpit nga pagtan-aw o paghukom sa usa ka butang diha sa kangitngit. Dayon handurawa nga makahimo ka sa pagpasiga sa mga suga o sa paggamit og espat.
Maghunahuna niini nga paghanduraw, bantayi ang mga hugpong sa mga pulong diha sa bersikulo 16 nga nagpakita kon sa unsang paagi kita gitabangan sa Manluluwas.
Basaha ang mosunod nga pamahayag ni Presidente Henry B. Eyring sa Unang Kapangulohan aron matabangan ka nga makasabot sa Kahayag ni Kristo:
Ang matag anak sa Langitnong Amahan nga natawo sa kalibotan gihatagan sa pagkahimugso, isip libre nga gasa, [og] Kahayag ni Kristo. Inyong gibati kana. Mao kini ang pagbati sa unsay sakto ug sa unsay sayop ug sa unsay tinuod ug sa unsay dili tinuod. Diha na kana kaninyo sukad nagsugod ang inyong panaw sa kinabuhi. …
… Kamo mohimo og mga pagpili sa matag adlaw ug hapit sa matag oras nga maoy maghimo kaninyo nga maglakaw diha sa kahayag o modala kaninyo ngadto sa kangitngit. (Henry B. Eyring, “Lakaw diha sa Kahayag,” Liahona, Mayo 2008, 123–124)
-
Unsa ang imong nakat-onan mahitungod sa Kahayag ni Kristo?
Alang sa dugang nga impormasyon sa Kahayag ni Kristo, tan-awa sa Gospel Topics, “Light of Christ,” topics.ChurchofJesusChrist.org.
Basaha ang Moroni 7:18–19, mangita og dugang nga tambag nga gihatag ni Mormon mahitungod sa paghukom tali sa maayo ug sa daotan.
-
Unsa kaha sa imong hunahuna ang gipasabot sa “magmakugihon sa pagpangita diha sa Kahayag ni Kristo”?
-
Sa unsang paagi nga ang ehemplo ug ang mga pagtulun-an sa Manluluwas mahisama sa kahayag nga makatabang kanato sa hustong paghukom tali sa sakto ug sa sayop karon?
-
Unsa ang ubang mga paagi nga atong madungog ang Iyang mga pulong ug mabati ang Iyang impluwensiya nga naggiya kanato?
Paggamit sa unsay imong nakat-onan
Hinumdomi ang sitwasyon nga imong gihunahuna kaganena sa dihang gihangyo ka sa paghunahuna og usa ka butang nga gusto nimo nga mas mailhan kon maayo o dili. Paggahin og pipila ka minuto sa mainampoong pagkonsiderar kon unsaon nimo paggamit ang mga baroganan nga imong nakat-onan karon aron sa pagtino kon kini sakto o sayop. Sulayi nga magmakugihon sa pangpangita diha sa Kahayag ni Kristo samtang imong pamalandongan ang sitwasyon. Irekord ang imong mga hunahuna diha sa imong journal sa pagtuon.
-
Tubaga ang usa sa mosunod nga mga pangutana:
-
Unsa ang imong nakat-onan karon nga makatabang kanimo sa pagpalambo sa imong abilidad sa pagpili tali sa sakto ug sa sayop?
-
Sa unsa nga duha o tulo ka bahin sa kinabuhi imong nakita ang panginahanglan sa malamposong pag-ila sa maayo gikan sa daotan? Ngano man?
-