Ether 1

“Pangamuyo ngadto sa Ginoo”

batan-ong babaye nga nag-ampo

Sa unsang paagi nga ang imong komunikasyon ngadto sa Ginoo mausab kon ikaw mag-atubang og mga hagit? Sa dihang ang daotang mga tawo misulay sa pagtukod og tore aron makaabot sa langit, ang Ginoo milibog sa ilang pinulongan aron sila dili makasabot sa usag usa (tan-awa sa Genesis 11:1–9). Ang igsoon nga lalaki ni Jared nangamuyo ngadto sa Ginoo, naghangyo nga Siya moluwas sa iyang pamilya ug mga higala niini nga kalibog (tan-awa sa Ether 1:34–37). Ang Ginoo mitubag sa iyang kinasingkasing nga mga pag-ampo uban sa kapuangod ug kaluoy. Kini nga leksiyon gituyo aron sa pagdasig kanimo sa pag-ampo nga mas sinsero ug makanunayon.

Sinsero ug makanunayon nga mga buhat

Paghunahuna og usa ka buhat nga maayo nga buhaton, sama sa magtuon, mag-ehersisyo, o magserbisyo sa uban. Gamita kana nga buhat sa mosunod nga mga pamahayag, ug kompletoha ang mga hugpong sa mga pulong sa tukmang paagi.

• Kon ang usa ka tawo (buhat) usahay, nan .

• Kon ang usa ka tawo (buhat) nga sinsero ug makanunayon sa hataas nga panahon, nan .

• Unsaon kaha nimo pagkompleto kining sama nga duha ka mga pamahayag gamit ang buhat sa pag-ampo?

• Unsa ang pipila ka mga rason nga tingali dili kita kanunay nga sinsero o makanunayon sa atong mga pag-ampo sama sa atong gitinguha?

Paggahin og kadiyot sa pagpamalandong sa imong kaugalingong mga pag-ampo. Unsa ang nakatabang kanimo nga mahimong sinsero ug makanunayon? Unsa kaha ang nakapugong kanimo nga mahimong sinsero ug makanunayon? Ngano kaha nga gusto nimong mouswag?

Sa imong pagtuon niini nga leksiyon, pangita og mga kamatuoran nga makatabang kanimo sa imong mga pag-ampo.

Ang basahon ni Ether

Niini nga punto sa Basahon ni Mormon, si Moroni milakip sa basahon ni Ether. Kini naglangkob sa istorya sa mga Jaredite. Gihubad kini gikan sa 24 ka bulawan nga mga palid nga nakaplagan sa mga tawo nga gipadala ni Limhi (tan-awa sa Mosiah 8:7–11; Ether 1:1–2). Kini nga basahon nagsugod sa asoy sa igsoon nga lalaki ni Jared ug sa iyang mga pag-ampo ngadto sa Ginoo. Tan-awa ang mosunod nga timeline (mga petsa gibana-bana) aron makita kon kanus-a siya nagpuyo kon itandi sa ubang mga tawo nga imong natun-an sa Basahon ni Mormon karong tuiga:

timeline sa mga tawo sa Basahon ni Mormon gikan sa 3000 BC ngadto sa 400 AD

Basaha ang Ether 1:33 aron makita kon unsa ang nanghitabo samtang nagsugod ang istorya sa mga Jaredite.

• Unsa ang imong nahibaloan mahitungod sa “dako nga tore” ug “ang Ginoo milibog sa pinulongan sa mga katawhan” (Ether 1:33)?

Kon kini nga istorya dili pamilyar kanimo, ikonsiderar ang pagtan-aw sa bidyo nga “The Tower of Babel” (0:58), makita sa ChurchofJesusChrist.org, o basaha ang Genesis 11:1–9 (tan-awa usab ang​ikaduhang parapo sa ulohan nga pahina sa Basahon ni Mormon).

• Unsa kaha ang bation nga mabuhi niining panahona?

Nagapangamuyo sa Dios inubanan sa hugot nga pagtuo

Usahay, ang mga kasulatan naglangkob sa balik-balik nga mga hugpong sa mga pulong aron sa paghatag niadtong mga hugpong sa mga pulong og dugang nga gibug-aton o kamahinungdanon. Ang pagpangita niining gibalik-balik nga mga hugpong sa mga pulong makatabang kanato nga mas makasabot kon unsa ang gisulayan nga itudlo sa dinasig nga tagsulat.

Basaha ang Ether 1:34–37 aron mahibaloan kon sa unsang paagi si Jared ug ang iyang igsoon nga lalaki nagtinguha sa pagsulbad sa ilang mga problema. Ikonsiderar ang pagmarka sa gibalikbalik nga mga hugpong sa mga pulong nga nagpakita kon sa unsang paagi ang igsoon nga lalaki ni Jared nag-ampo ug giunsa pagtubag sa Ginoo.

• Unsay imong nakat-onan gikan sa mga hugpong sa mga pulong nga imong gimarkahan?

Usa ka baroganan nga atong makat-onan gikan niini nga asoy mao nga kon kita mangamuyo ngadto sa Dios diha sa hugot nga pagtuo, Siya magmaluloy-on kanato.

icon, rekord

icon, rekord

1. Kompletoha ang mosunod:

   Isulat kon unsaon nimo pagpasabot kini nga baroganan ngadto sa usa ka tawo. Ilakip ang mosunod nga mga punto diha sa imong pagpasabot:

   • Unsa sa imong hunahuna ang gipasabot sa pagpangamuyo ngadto sa Ginoo diha sa hugot nga pagtuo ug sa unsang paagi kini mahimong lahi gikan kon giunsa usahay nato sa pag-ampo

   • Unsa ang gitudlo kanimo sa mga tubag sa Ginoo ngadto sa igsoon nga lalaki ni Jared mahitungod Kaniya

   • Pipila ka mga paagi nga ang Ginoo mahimong motubag sa atong mga pag-ampo uban sa kaluoy

Aron makakita og usa ka modernong ehemplo sa Ginoo nga mitubag diha sa kaluoy sa sinsero ug makanunayon nga pag-ampo, tan-awa ang “Mga Tubag sa Pag-ampo” gikan sa time code 2:17 hangtod sa 4:32, nga makita sa ChurchofJesusChrist.org.

Importante kini nga makaamgo nga wala kita masayod kon unsa ka dugay nga nadawat sa igsoon nga lalaki ni Jared ang iyang mga tubag. Si Elder Brook P. Hales sa Seventy mipakigbahin sa mosunod:

Elder Brook P. Hales

Ang Amahan nakaila kanato, nasayod sa atong mga panginahanglan, ug motabang kanato sa hingpit. Usahay kana nga tabang ihatag sa takna nga gikinahanglan gayod o diha-diha dayon human nga kita nangayo alang sa balaan nga tabang. Usahay ang atong labing bug-os ug takos nga tinguha wala matubag sa paagi nga atong gilaoman, apan atong masuta nga ang Dios adunay mas dako nga mga panalangin nga gitagana. Ug usahay ang atong matarong nga mga tinguha dili mahatag niining kinabuhia. (Brook P. Hales, “Mga Tubag sa Pag-ampo,” Liahona, Mayo 2019, 12)

• Ngano kaha sa imong hunahuna nga kini nga mga pagtulun-an importante nga atong hinumdoman?

• Sa unsang paagi ang Ginoo mipakita og kaluoy nganha kanimo o sa uban nga imong nailhan samtang ikaw nag-ampo ngadto Kaniya?

Pagkamakanunayon sa pag-ampo

Basaha ang Ether 1:38–43; 2:5, 13–15, mangita og dugang nga mga panabot mahitungod sa pag-ampo ug sa mga tubag sa Ginoo.

icon, rekord

2. Tubaga ang mosunod nga mga pangutana:

   • Unsa nga mga hugpong sa mga pulong diha sa Ether 1:43 ug 2:14 ang nagpakita kon unsa ang gibati sa Ginoo mahitungod sa atong pagkamakanunayon sa pag-ampo? Ngano kaha nga Siya gusto nga kita mag-ampo ngadto Kaniya sa kanunay?

   • Ang igsoon nga lalaki ni Jared adunay panahon nga siya dili kaayo makanunayon sa iyang mga pag-ampo (tan-awa sa Ether 2:14). Unsa ang pipila ka mga rason nga tingali dili kaayo kita makanunayon sa atong mga pag-ampo karon?

Pagpalambo sa pag-ampo

Handurawa nga ikaw anaa sa panel nga panaghisgot sa mga batan-on kon unsaon pagtabang ang kabatan-on sa pagpalambo sa ilang mga pag-ampo.

3. Tubaga ang mosunod nga mga pangutana:

   • Unsay usa ka butang nga imong nabuhat o mabuhat aron mahimong mas makahuloganon o sinsero ang imong mga pag-ampo?

   • Unsay imong gihimo nga nakatabang kanimo nga mag-ampo sa makanunayon? Unsa pa ang ubang mga butang nga mahimo nimo?

   • Sa unsang paagi nga ang paghunahuna mahitungod sa imong relasyon sa Langitnong Amahan nakaimpluwensiya sa pagkamakanunayon ug pagkasinsero sa imong mga pag-ampo? (Tan-awa sa Giya ngadto sa mga Kasulatan, “Pag-ampo.”)

Tinguhaa ang pagdasig sa Espiritu Santo ug pamalandongi ang bisan unsang mga kausaban nga imong gibati nga kinahanglan nimong himoon sa imong mga pag-ampo. Paghimo og usa ka piho nga tumong ug pasalig sa pagsunod sa bisan unsang mga impresyon nga imong madawat.

Opsiyonal: Gustong Makakat-on Pa og Dugang?

Unsa ang pangalan sa igsoon nga lalaki ni Jared?

Si Elder George Reynolds (1842-1909) sa Seventy miasoy nga sa Kirtland, si Propeta Joseph Smith (1805–44) mihatag og ngalan ug panalangin ngadto sa anak nga lalaki ni Elder Reynolds Cahoon ug mihatag kaniya sa ngalan nga Mahonri Moriancumer. Human sa panalangin, ang Propeta mipaila nga kini mao ang ngalan sa igsoon nga lalaki ni Jared. (Tan-awa sa Book of Mormon Student Manual Rel. 121–122 [2009], 362.)

Sa unsang paagi kita napanalanginan pinaagi sa sinsero ug makanunayon nga mga pag-ampo?

Tan-awa ang “Mga Pag-ampo uban sa Hugot nga Pagtuo” gikan sa time code 6:57 hangtod sa 8:40 aron makita si Presidente Henry B. Eyring sa Unang Kapangulohan nga naghatag og pipila ka mga sugyot.

Si Elder Peter M. Johnson sa Seventy mipasabot:

Elder Peter M. Johnson

Mag-ampo sa Amahan sa ngalan ni Jesukristo matag adlaw, matag adlaw, matag adlaw. Pinaagi sa pag-ampo kita mobati sa gugma sa Dios ug makapakita sa atong gugma alang Kaniya. Pinaagi sa pag-ampo makapasalamat kita ug makapangayo og kusog ug kaisog sa pagtugyan sa atong kabubut-on ngadto sa Dios ug magiyahan ug matudloan sa tanang butang. (Peter M. Johnson, “Gahom sa Pagbuntog sa Kaaway,” Liahona, Nob. 2019, 111)