“Mamona 3: ‘O Le A Outou Tutula’i Uma i Luma o le Nofoa-Faamasino o Keriso.” Tusi Lesona a Tagata o le Vasega o le Tusi a Mamona (2024)

“Mamona 3,” Tusi Lesona a Tagata o le Vasega o le Tusi a Mamona

Mamona 3

“O Le A Outou Tutula’i Uma i Luma o le Nofoa-Faamasino o Keriso”

Ata

O le Faamasinoga Mulimuli

Pe na i ai se taimi na e mafaufau ai pe o le a faape’ī le Faamasinoga Mulimuli? A o vaavaai atu Mamona i le amioleaga o lona nuu, sa ia aoao atu e uiga i lē o le a faamasinoina i tatou ma le ala o le a faamasinoina ai i tatou i lenei Faamasinoga Mulimuli. O lenei lesona e mafai ona fesoasoani e saunia ai oe e tu atu ma le mautinoa ma le olioli i luma o Iesu Keriso i le Faamasinoga Mulimuli.

O le suega mulimuli

Manatu faapea na talosagaina oe e fai se iloiloga faaiu e faatatau i lau suesuega o le Tusi a Mamona i aso nei lea na aofia ai fesili e pei o nei:

E fia fuaiupu o loo i ai i le Tusi a Mamona?
E faafia ona ta’ua Keriso i se tasi o Ona suafa po o faalagiga i le Tusi a Mamona?
E toafia sa Lamana na liua i aoaoga a Nifae ma Liae o loo i le Helamana 5?

Mafaufau pe mafai ona e taliina sao nei fesili e aunoa ma se sauniuniga.

Mata e ese faapefea ou lagona e uiga i le suega pe afai e ta’u muamua atu e lou faiaoga ia te oe e uiga i ai ma tuuina atu ia te oe se taiala suesue ua mamanuina e saunia ai oe mo lena suega?
E ui o le a le talosagaina i tatou e faasoa atu ni mea moni mai tusitusiga paia i le taimi o le Faamasinoga Mulimuli, ae o a ni auala e mafai ai ona faatusatusa le Faamasinoga Mulimuli i se suega o le a tatou faia uma i se aso? O a ni auala o le a ese ai nai lo le faia o se suega faaleaoaoga?

Mafaufau loloto pe o a ou lagona e uiga i lou saunia mo le Faamasinoga Mulimuli. E te iloa le auala e sauniuni i ai? Aisea ua e manao ai e te saunia i ai?

E alolofa le Tama Faalelagi ma Iesu Keriso ia te oe ma ua tuuina mai tusitusiga paia e fesoasoani e te iloa ai ma saunia ai mo le aso o le a e “tutula’i uma i luma o le nofoa-faamasino o Keriso” (Mamona 3:20). A o e suesue, vaavaai mo upumoni e mafai ona fesoasoani ia te oe e saunia ai e tu atu ma le mautinoa ma le olioli i luma o Iesu Keriso i le Faamasinoga Mulimuli.

Na aoao mai Mamona e uiga i le Faamasinoga Mulimuli

Sa alofa Mamona ia sa Nifae ma taitai ia i latou i le taua i le tele o taimi. Sa ia aioi atu ia i latou ia salamo i lo latou amioleaga ma liliu atu i le Faaola. Peitai, sa latou teena le Alii ma mitamitavale i lo latou lava malosi, ma tauto i tautoga paia sa aoaoina i latou e aua lava nei faaaogaina, o lea na musu ai Mamona e taitai i latou mo se taimi (tagai Mamona 3:10–16). Ona ia aoao atu lea e uiga i le Faamasinoga Mulimuli o le a feagai ma tagata uma.

Fatu ma faamaea le siata lenei e fai ma au meaaoga atofa mo lenei lesona. Faaopoopo i ai e pei ona faatonuina ai i le vaega o totoe o le lesona ma a o musuia ai oe e le Agaga Paia.

I le itu agavale o lau siata, fai se lisi o fesili o loo ia te oe e uiga i le Faamasinoga Mulimuli e pei o faataitaiga ua tuuina atu.

O Fesili o loo ia te au e uiga i le Faamasinoga Mulimuli	O tali, malamalamaaga, ma uunaiga na ou maua
O Fesili o loo ia te au e uiga i le Faamasinoga Mulimuli O ai o le a faamasinoina a’u?	O tali, malamalamaaga, ma uunaiga na ou maua
O Fesili o loo ia te au e uiga i le Faamasinoga Mulimuli O afea o le a faamasinoina ai a’u?	O tali, malamalamaaga, ma uunaiga na ou maua

Faitau upu a Mamona i le Mamona 3:18–22; 6:17–22 e saili ai tali i fesili na e lisiina. Lisi ni malamalamaaga e te maua i le koluma taumatau o lau siata, e aofia ai le mau faasino lea e te maua ai malamalamaaga taitasi.

O le nofoa faamasino o Keriso

O se upumoni e tasi ua tatou aoao mai nei fuaitau e faapea o le a tatou tutula’i uma i luma o le nofoa faamasino o Keriso ina ia faamasinoina i a tatou galuega, pe lelei pe leaga. Mafaufau e faailoga ia fasifuaitau o loo aoao mai ai lenei upumoni i le Mamona 3:20.

Aisea e ono mafanafana ai le iloa e faapea o le Faaola o lo tatou Faamasino? (Faamaumau lau tali i le koluma taumatau o le siata).

Mo se fesoasoani i le taliina o le fesili na muamua atu, e mafai ona e faitauina le Alema 7:11–13, ma vaavaai mo mea na oo i le Faaola lea e mafai ai e Ia ona malamalama atoatoa ia i tatou i le Faamasinoga. E mafai foi ona e faalogologo i se saunoaga mai ia Peresitene Dallin H. Oaks o le Au Peresitene Sili i le “O Le Fuafuaga Sili” mai le faailo taimi 14:06 i le 14:51 o loo maua i le ChurchofJesusChrist.org.

Atonu o loo i ai pea ni au fesili ma ni atugaluga e uiga i le Faamasinoga Mulimuli. Saili mo tali ma malamalamaaga faaopoopo e faaaoga ai punaoa o loo i lalo po o isi punaoa paia. Lisi malamalamaaga loloto sa e mauaina i le koluma taumatau o lau siata.

Taiala i Tusitusiga Paia i lalo o le upuautū “Faamasinoga Mulimuli, O Le”
Faamatalaga o le Taiala o Autu i lalo o le upuautū “Faamasinoga Mulimuli, O Le”
Mosaea 3:10; 3 Nifae 27:13–20
Mataupu Faavae ma Feagaiga 45:3–5; 58:42–43; 137:9

Atonu foi e te manao e faalogologo i isi aoaoga mai ia Peresitene Oaks e uiga i le Faamasinoga Mulimuli i le “Alofa Paia i le Fuafuaga a le Tama” mai le faailo taimi 1:44 i le 3:32, po o le “Faamamaina e ala i le Salamo” mai le faailo taimi 8:09 i le 12:03, o loo maua uma i le ChurchofJesusChrist.org.

O a upumoni e uiga i le Tama Faalelagi, Iesu Keriso, salamo, ma le Faamasinoga Mulimuli o le a e faasoa atu i se tasi o loo popole e uiga i le Faamasinoga Mulimuli? Aisea?

Lotomautinoa i le Aso Faamasino

Mafaufau pe o a ni ou lagona i le taimi o lenei suesuega. O e lagonaina le sili atu po o le itiiti ifo o le lotomautinoa ma le olioli e uiga i le Faamasinoga Mulimuli nai lo le mea sa e lagonaina a o lei faia lenei lesona? Aisea e te faalogoina ai se lagona e pei ona e iai? O le a se mea o uunaia oe e le Agaga Paia e fai?

I lau api talaaga mo suesuega, fai se fuafuaga e amata tapena ai ma le naunautai mo le Faamasinoga Mulimuli. Mafaufau loloto ma filifili i se faatinoga se tasi e mafai ona e faia e fesoasoani ai ia te oe ia lagona atili le mautinoa ma le olioli a o e sauni e tu i luma o Keriso. Mo se faataitaiga, o le salamo faamaoni i aso taitasi o se auala mamana lea e maua ai le “fiafia ma le filemu o le mafaufau.” (Tagai i le Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Ensign po o le Liahona, Me 2019, 67.) Tuuto e mulimuli i lau fuafuaga.

Tuu i le faitalia: O e Manao e Aoao Atili?

Mamona 3:17–22. O ai o le a aofia i lo tatou faamasinoga?

Ua aoao mai e tusitusiga paia o le a i ai e le itiiti ifo ma le lima punaoa o le a aofia ai i lo tatou faamasinoga:

I Tatou Lava (tagai Alema 41:3–7)
Tusitusiga Paia (tagai 2 Nifae 25:18; 29:11; 33:14; 3 Nifae 27:25–26)
Aposetolo (tagai Mataio 19:27–30; 1 Nifae 12:9; 3 Nifae 27:27; Mamona 3:18; Mataupu Faavae ma Feagaiga 29:12)
Iesu Keriso (tagai Ioane 5:22; 2 Nifae 9:41; 3 Nifae 27:14)

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua le matafaioi a le Faaola o se Faamasino.

Ata
Elder Bruce R. McConkie

O le a i ai se faagasologa atoa o faamasino o e, i lalo o Keriso, o le a faamasinoina e amiotonu. E na o Ia lava o le a tuuina atu tuutuuga o le malaia mo e amioleaga. (Bruce R. McConkie, The Millennial Messiah: The Second Coming of the Son of Man [1982], 520)

O le a le mea o le a faavae ai lo tatou faamasinoga?

Na faamatala mai e Peresitene Dallin H. Oaks o le Au Peresitene Sili:

Ata
Peresitene Dallin H. Oaks

O le Faamasinoga Mulimuli ua le na o se iloiloga o le tuuaofaiga atoa o amioga lelei ma le leaga—o mea sa tatou faia. O se faailoaga o aafiaga tupito o a tatou faatinoga ma mafaufauga—o tagata ua avea ai i tatou. E lē lava mo so o se tasi le tau lava ina fai. O poloaiga, sauniga, ma feagaiga o le talalelei ua le o se lisi o tupeteu e manaomia ona fai i se teugatupe faalelagi. O le talalelei a Iesu Keriso o se fuafuaga lea ua faaali mai ai ia i tatou le auala e avea ai ma tagata ua finagalo lo tatou Tama Faalelagi e avea ai i tatou. (Dallin H. Oaks, “The Challenge to Become,” Ensign or Liahona, Nov. 2000, 32)

E mafai faapefea e le salamo ona saunia i tatou mo le Faamasinoga Mulimuli?

Na aoao mai Peresitene Russell M. Nelson:

Ata
Peresitene Russell M. Nelson

O le tatou sailiga silisili lava i le olaga o le saunia lea e feiloai ma lo tatou Mataisau. Tatou te faia lenei mea e ala i le tauivi i aso taitasi ia avea atili e pei o lo tatou Faaola, o Iesu Keriso. Ma e tatou te faia lena mea pe a tatou salamo i aso taitasi ma maua Lana faamamāāga, faamalologa, ma le mana faamalosiau. (Russell M. Nelson, “Tuleiga Amata,” Ensign po o le Liahona, Me 2020, 6)