“3 Nephi 27, Bahin 1: ‘Gitukod diha sa Akong Ebanghelyo,’” Manwal sa Magtutudlo sa Basahon ni Mormon (2024)
“3 Nephi 27, Bahin 1,” Manwal sa Magtutudlo sa Basahon ni Mormon
3 Nephi 27, Bahin 1
“Natukod diha sa Akong Ebanghelyo”
Unsa ang pipila sa labing importante nga mga kinaiya sa Simbahan sa Manluluwas? Si Jesukristo mitudlo sa Iyang mga tinun-an nga Nephite nga ang Iyang Simbahan kinahanglang pagatawgon sunod sa Iyang ngalan ug itukod diha sa Iyang ebanghelyo. Kini nga leksiyon makatabang kanimo nga makasabot kon unsa ang ebanghelyo sa Manluluwas ug ang kamahinungdanon sa ngalan sa Simbahan.
Unsaon nimo sa pagtubag?
Handurawa ang mosunod nga senaryo:
Usa ka adlaw samtang mipakigbahin sa ilang gibuhat sa kataposan sa semana, si Naomi naghisgot sa iyang higala nga si Marco nga siya nagtambongan sa pagsimba sa adlawng Dominggo.
Nangutana si Marco, “Mormon ka, dili ba?”
Si Naomi miingon, “Usahay ang mga tawo motawag kanamo niana, apan mas gusto namong tawgon nga mga miyembro sa Ang Simbahan ni Jesukristo sa mga Santos sa Ulahing mga Adlaw.”
Si Marco mitubag, “Murag taas ra kaayo kana. Nganong dili naman lang ka moingon nga nahisakop ka sa simbahan sa Mormon? Wala ka ba nagbasa gikan sa Basahon ni Mormon?”
-
Unsa ang pipila ka mga paagi nga si Naomi mahimong motubag sa pangutana ni Marco?
Karon, ikaw magtuon sa pipila sa mga pagtulun-an sa Manluluwas ngadto sa Iyang mga tinun-an nga mga Nephite nga natala sa 3 Nephi 27. Samtang magtuon ka, pangita og mga kamatuoran nga gitudlo ni Jesus mahitungod sa Iyang Simbahan nga makatabang kanimo kon mag-atubang ka og mga sitwasyon sama sa imong nabasa.
Ang ngalan sa Simbahan
Sa wala madugay human sa pagbisita ni Kristo sa mga Nephite, ang Iyang napulog duha ka mga tinun-an nga mga Nephite nagkahiusa diha sa pagpuasa ug pag-ampo. Sila gusto nga masayod kon unsay angay nga pangalan sa Simbahan. Samtang sila nag-ampo, ang Manluluwas mipakita ug misugod sa pagtudlo kanila (tan-awa sa 3 Nephi 27:1–3).
Basaha ang 3 Nephi 27:4–7, mangita kon unsa ang gitudlo sa Manluluwas sa Iyang mga tinun-an mahitungod sa ngalan sa Iyang Simbahan.
-
Unsa ang gisulti sa Manluluwas nga angayng itawag sa Iyang Simbahan?
Usa ka kamatuoran nga atong makat-onan gikan niini nga mga bersikulo mao nga ang tinuod nga Simbahan ni Jesukristo kinahanglan pagatawgon pinaagi sa Iyang ngalan.
-
Unsa ang mga rason nga gihatag sa Manluluwas sa pagngalan sa Simbahan sunod sa Iyang Kaugalingon?
Si Presidente Russell M. Nelson mipakigbahin og mga rason kon nganong importante nga gamiton nato ang husto nga ngalan sa Simbahan:
Ang ngalan sa Simbahan dili mausab. Sa dihang ang Manluluwas klaro nga namahayag unsay ngalan sa Iyang Simbahan ug gani giunhan sa Iyang pamahayag sa, “Kay sa ingon ang akong simbahan pagatawgon,” Siya seryoso. Ug kon kita motugot nga gamiton ang mga angga o modawat o kita mismo mopasiugda niadto nga mga angga, Siya masilo.
Unsay naa sa ngalan o niining kahimtanga, ang usa ka angga? Kon bahin na sa mga angga sa Simbahan, sama sa “LDS Church,” ang “Mormon Church,” o ang “Simbahan sa mga Santos sa Ulahing mga Adlaw,” ang labing importanteng butang sa maong mga ngalan mao ang pagkawala sa ngalan sa Manluluwas. Ang pagkuha sa ngalan sa Ginoo gikan sa Simbahan sa Ginoo usa ka dakong kadaogan ni Satanas. Kon atong kuhaon ang ngalan sa Manluluwas, gituyo nato sa pagbaliwala ang tanan nga gibuhat ni Jesukristo alang kanato—gani ang Iyang Pag-ula. (Russell M. Nelson, “Ang Sakto nga Ngalan sa Simbahan,” Liahona , Nob. 2018, 87–88)
-
Tubaga ang mosunod nga mga pangutana:
-
Unsa ang labing mahinungdanon kanimo gikan sa pamahayag ni Presidente Nelson?
-
Sa imong hunahuna, sa unsang paagi ang atong paningkamot sa paggamit sa sakto nga ngalan sa Simbahan makaapektar niadtong dili mga miyembro sa Simbahan?
-
“Natukod diha sa Akong ebanghelyo”
Agig dugang sa pagpasiugda nga ang Iyang Simbahan kinahanglang pagatawgon pinaagi sa Iyang ngalan, ang Manluluwas mitudlo sa Iyang mga tinun-an nga mga Nephite og laing mahinungdanong kinaiya sa Iyang Simbahan.
Basaha ang 3 Nephi 27:8–10, mangita niini nga kinaiya.
-
Unsa ang imong ikadugang gikan niini nga mga bersikulo ngadto sa gipabaga nga pagkasulat nga kamatuoran nga imong naila bag-o lang mahitungod sa Simbahan sa Manluluwas?
Usa ka paagi nga atong mapamubo ang mga pagtulun-an sa Manluluwas nga imong natun-an sa pagka karon mao ang tinuod nga Simbahan ni Jesukristo kinahanglan pagatawgon pinaagi sa Iyang ngalan ug pagatukoron diha sa Iyang ebanghelyo.
-
Unsa sa imong hunahuna ang gipasabot sa pagtukod sa Simbahan sa Manluluwas diha sa Iyang ebanghelyo?
Mahimong makatabang sa pagsabot nga ang pulong ebanghelyo nagpasabot og “maayong balita” (tan-awa sa Bible Dictionary, “Gospels”).
Aron matabangan ka nga masabtan ang importante nga mga aspeto sa ebanghelyo sa Manluluwas, pagdrowing og yano nga hulagway sa usa ka bilding sa simbahan diha sa imong journal sa pagtuon, sama sa mosunod. Siguroha nga magbilin og luna aron masulatan og mga pulong ug mga hugpong sa mga pulong ubos sa simbahan.
Basaha ang 3 Nephi 27:13–22, mangita sa unsay gisulti ni Jesukristo sa Iyang ebanghelyo. Isulat ang mga pulong o mga hugpong sa mga pulong nga imong napalgan diha sa luna ubos sa imong drowing.
-
Base sa mga bersikulo nga imong gitun-an, unsaon nimo sa paghulagway kon unsa ang ebanghelyo sa Manluluwas?
-
Tubaga ang mosunod nga mga pangutana:
-
Unsa ang labing menos tulo ka mga aspeto sa ebanghelyo sa Manluluwas gikan niini nga mga bersikulo nga imong gibati nga hilabihan ka mahinungdanon?
-
Ngano sa imong hunahuna nga kini nga mga aspeto sa ebanghelyo sa Manluluwas mahimong ikonsiderar nga “maayong balita”?
-
Ngano sa imong hunahuna nga importante alang sa Simbahan sa Manluluwas nga “matukod” (o magpunting) niini nga mga pagtulun-an o mga baroganan?
-