“3 Nifae 19: ‘Sa Faatumuina i Latou i le Agaga Paia,’” Tusi Lesona a Tagata o le Vasega o le Tusi a Mamona (2024)
“3 Nifae 19,” Tusi Lesona a Tagata o le Vasega o le Tusi a Mamona
3 Nifae 19
“Sa Faatumuina i Latou i le Agaga Paia”
Sa leai se mea na sili atu ona mananao i ai soo sa Nifaē e toasefululua nai lo le mauaina o le mafutaga a le Agaga Paia. O le mafuaaga lea o a latou tatalo i le Tama Faalelagi ina ua uma ona faaiuina e le Faaola le uluai aso o Lana galuega ia i latou. O le a le mea e tatau ona tatou faia ia maua ai le Agaga Paia e faatasi ma i tatou? E mafai faapefea ona tatou olioli i Lana mafutaga i o tatou olaga? O le faamoemoega o lenei lesona o le fesoasoani lea ia te oe ia malamalama atili i le auala e maua ai faamanuiaga a le Agaga Paia.
Manaoga amiotonu o le talavou
-
Afai e te faia se sailiiliga i le 100 talavou mai la outou eria, o le a sou manatu o le a se manaoga taatele o le a i ai i o latou manaoga amiotonu?
Mafaufau loloto po o le fea o nei manaoga e mafai ona e fesootai i ai. A o e suesueina le 3 Nifae 19, vaavaai mo upumoni e mafai ona fesoasoani ia te oe e ausia ai ou manaoga amiotonu.
Ina ua uma ona auauna atu, aoao atu, faamalolo, ma faamanuiaina tagata e le Faaola, sa Ia “afio ese mai ia te i latou, ma afio ae i le lagi” (3 Nifae 18:39) ma le folafolaga o le a Ia toe foi mai i le aso e sosoo ai. Sa toe foi atu tagata i le fale, ma “sa salalau atu lava le tala e uiga ia Iesu i le po atoa,” ma sa “toatele lava le aofai o tagata, … sa galulue malosi i lena po atoa, ina ia mafai ona latou i ai i le aso e sosoo ai i le nofoaga lea o le a faaali mai ai e Iesu o ia lava i le motu o tagata” (3 Nifae 19:3). O le aso na sosoo ai, na faapotopoto ai e soo e toasefululua, o e na filifilia e Iesu, le nuu ma aoao atu ia i latou “upu na fetalaia e Iesu.” Ona tootutuli lea o le au soo ma “tatalo atu i le Tama i le suafa o Iesu” (3 Nifae 19:8).
Faitau le 3 Nifae 19:9 e vaai ai po o a mea na sili ona latou mananao i ai a o latou tatalo.
-
Tali fesili nei:
-
Aisea e te manatu ai na latou matuai manaomia ai le Agaga Paia?
-
O a nisi o tulaga atonu e feagai ma oe i le lumanai o le a e manao ai e iloa ma malamalama i uunaiga a le Agaga Paia?
-
Mafaufau loloto pe e te manao moni i le Agaga Paia i lou olaga ma pe faapefea ona ese lou olaga pe afai e te manao soo i Lana faatosinaga.
Sailia o le Agaga Paia
Faitau le 3 Nifae 19:10–23, ma vaavaai mo auala e mafai ona e faaumaina ai le faamatalaga lenei:
-
E mafai ona faatumulia i tatou i le Agaga Paia a o tatou …
O nisi o auala talafeagai e faauma ai lenei faamatalaga o le:
-
… naunau ma le faamaoni ma tatalo mo Lana mafutaga.
-
… auai i sauniga o le talalelei.
Mafaufau ma le agaga tatalo i se tasi e te iloa e te lagona e mafai ona manuia mai le malamalama atili pe faapefea ona maua soo le taitaiga ma le faamafanafanaga a le Agaga Paia. Faamaea gaoioiga A ma le E ma mafaufau pe mafai faapefea ona e fesoasoani i lenei tagata.
Gaoioiga A: E mafai ona faatumulia i tatou i le Agaga Paia pe a tatou mananao ma le faamaoni ma tatalo mo Lana mafutaga.
-
E mafai faapefea e o tatou manaoga ma tatalo ona fesoasoani ia i tatou ia faatumulia i le Agaga Paia?
Na faamalamalama mai e Elder David A. Bednar o le Korama a Aposetolo e Toasefululua le auala e mafai ai e le manao ma le tatalo ona fesoasoani ia i tatou ia maua le Agaga e faatasi ma i tatou.
Pe tatou te … manatua e tatalo faatauanau ma tatalo e le aunoa mo le mea e aupito sili ona manaomia, o le Agaga Paia lea? Pe o faalavelaveina ea i tatou i mana’oga o le lalolagi ma aga masani o le olaga i aso taitasi ma lē amanaia ai ia lea meaalofa e aupito sili ona taua i lo meaalofa uma? O le mauaina o le Agaga Paia e amata i lo tatou naunau ma le faamaoni e le aunoa mo Lana mafutaga i o tatou olaga. (David A. Bednar, “Ia Maua le Agaga Paia,” Ensign po o le Liahona, Nov. 2010, 96)
Atonu e te manao e matamata i le “Ia Maua le Agaga Paia,” (2:56), o loo maua i le ChurchofJesusChrist.org.
-
O anafea na fesoasoani ai ou manaoga amiotonu ma tatalo, e te lagonaina ai le uunaiga a le Agaga?
Gaoioiga E: E mafai ona faatumulia i tatou i le Agaga Paia a o tatou auai i sauniga o le talalelei.
Faitau le 3 Nifae 18:7, 11; 27:20, ma vaavaai pe mafai faapefea e sauniga ona fesoasoani ia i tatou ia faatumulia i le Agaga Paia.
Sa aoao mai le Perofeta o Iosefa Samita (1805–44):
O le papatisoga o se sauniga paia lea e sauniuni ai mo le mauaina o le Agaga Paia; o se auala lea ma le ki o le a auauna mai ai le Agaga Paia. O le mea foaifua o le Agaga Paia e ala i le faaee atu o lima, e le mafai ona mauaina i se isi lava mataupu faavae nai lo le mataupu faavae o le amiotonu. (Aoaoga a Peresitene o le Ekalesia: Iosefa Samita [2007], 95–96.)
-
O le a se mea na e aoaoina e uiga i le matafaioi o sauniga (e pei o le papatisoga ma le faamanatuga) e fesoasoani ia i tatou ia faatumulia i le Agaga Paia?
-
O anafea na faatumulia ai oe i le Agaga Paia a o e auai i sauniga o le talalelei?
-
Toe mafaufau i le tagata na e mafaufau i ai e mafai ona manuia mai le malamalama atili i le auala e maua ai le Agaga Paia. Saunia se savali e mafai ona e faasoa atu ia te ia. Faasoa atu soo se aafiaga na fesoasoani ai le manao ma le tatalo po o le auai i sauniga ia te oe po o isi ia maua le Agaga Paia.
Faaaogaina patino
Mafaufau i lou lava manaomia o le Agaga Paia ma pe aisea e te manao ai i Lana uunaiga i lou olaga. Faailoa mai se mea ua musuia oe e fai e faatumau ai le Agaga Paia ia te oe. Taumafai e mulimuli i lena uunaiga.