“3 Nephi 19: ‘Silang Tanan Napuno sa Espiritu Santo,’” Manwal sa Magtutudlo sa Basahon ni Mormon (2024)
“3 Nephi 19,” Manwal sa Magtutudlo sa Basahon ni Mormon
3 Nephi 19
“Silang Tanan Napuno sa Espiritu Santo”
Walay laing labaw nga gitinguha ang napulog duha ka mga tinun-an nga Nephite kay sa pagpakig-uban sa Espiritu Santo. Kini mao ang unod sa ilang mga pag-ampo ngadto sa Langitnong Amahan human sa pagtapos sa Manluluwas sa unang adlaw sa Iyang pangalagad taliwala kanila. Unsa ang kinahanglan natong buhaton aron ang Espiritu Santo magauban kanato? Unsaon man nato sa pagpahimulos sa Iyang pakig-uban sa atong mga kinabuhi? Ang katuyoan niini nga leksiyon mao ang pagtabang kanimo nga mas makasabot kon unsaon sa pagdawat sa mga panalangin sa Espiritu Santo.
Matarong nga mga tinguha sa tin-edyer
-
Kon imong i-survey ang 100 ka tin-edyer gikan sa imong dapit, unsa sa imong hunahuna ang ilang labing komon nga matarong nga mga tinguha?
Pamalandongi kon hain niini nga mga tinguha ang imong masabtan. Samtang magtuon ka sa 3 Nephi 19, pangita og mga kamatuoran nga makatabang kanimo nga makab-ot ang imong matarong nga mga tinguha.
Human ang Manluluwas nangalagad, nagtudlo, nag-ayo, ug nagpanalangin sa mga katawhan, Siya “mibiya kanila, ug mikayab ngadto sa langit” (3 Nephi 18:39) nga adunay gisaad nga Siya mobalik pagkasunod nga adlaw. Ang mga katawhan mipauli, ug “sa tibuok gabii kini gibalita diha sa tanan nga dapit mahitungod kang Jesus,” ug “hilabihan ka daghan, ang naghago sa hilabihan nianang tibuok gabii, nga aron unta sila sa pagkabuntag anaa sa dapit diin si Jesus mopakita sa iyang kaugalingon ngadto sa pundok sa mga katawhan” (3 Nephi 19:3). Pagkasunod nga adlaw, ang napulog-duha ka tinun-an nga gipili ni Jesus mipundok sa mga tawo ug nagtudlo kanila sa “mga pulong nga gipamulong ni Jesus.” Ang mga tinun-an dayon miluhod ug “nag-ampo ngadto sa Amahan sa ngalan ni Jesus” (3 Nephi 19:8).
Basaha ang 3 Nephi 19:9 aron makita kon unsa ang ilang labing gitinguha samtang sila nag-ampo.
-
Tubaga ang mosunod nga mga pangutana:
-
Sa imong hunahuna ngano kaha nga sila hilabihan nga nagtinguha sa Espiritu Santo?
-
Unsa ang pipila ka mga kahimtang nga mahimo nimong atubangon sa umaabot diin imong tinguhaon nga mailhan ug masabtan ang mga pag-aghat sa Espiritu Santo?
-
Pamalandongi kon tinud-anay ka ba gayod nga nagtinguha sa Espiritu Santo diha sa imong kinabuhi ug sa unsang paagi nga ang imong kinabuhi mahimong lahi kon ikaw mas kanunay nga nagtinguha sa Iyang impluwensiyay.
Pagtinguha sa Espiritu Santo
Basaha ang 3 Nephi 19:10–23, ug pangitaa ang mga paagi nga mahimo nimong makompleto ang mosunod nga pamahayag:
-
Kita mahimong mapuno sa Espiritu Santo samtang kita …
Ang pipila ka mga posibleng paagi sa pagkompleto niini nga pamahayag mao ang:
-
… kinasingkasing nga nagtinguha ug nag-ampo alang sa Iyang pakig-uban.
-
… moapil sa mga ordinansa sa ebanghelyo.
Mainampoong maghunahuna sa usa ka tawo nga imong nailhan kinsa paminaw nimo makabenepisyo gikan sa mas maayo nga pagsabot kon unsaon nga mas kanunay nga makadawat sa paggiya ug paghupay sa Espiritu Santo. Kompletoha ang mga kalihokan A ug B ug hunahunaa kon sa unsang paagi nimo matabangan kini nga tawo.
Kalihokan A: Kita mahimong mapuno sa Espiritu Santo samtang kita kinasingkasing nga nagtinguha ug nag-ampo alang sa Iyang pakig-uban.
-
Sa unsang paagi ang atong mga tinguha ug mga pag-ampo makatabang kanato nga mapuno sa Espiritu Santo?
Si Elder David A. Bednar sa Korum sa Napulog Duha ka Apostoles mipasabot kon sa unsang paagi ang tinguha ug pag-ampo makatabang kanato nga makabaton sa Espiritu uban kanato.
Kita ba … nahinumdom sa pag-ampo nga matinguhaon ug makanunayon alang sa labaw natong gitinguha, gani ang Espiritu Santo? O kita nalinga ba sa kalibotanong mga kabalaka ug sa inadlawng panginabuhi ug gikalimtan o wala na matagad kining pinakabililhon sa tanang mga gasa? Ang pagdawat sa Espiritu Santo magsugod sa atong sinsero nga tinguha ug sa padayon nga tinguha alang sa Iyang pakig-uban sa atong kinabuhi. (David A. Bednar, “Dawata ang Espiritu Santo,” Liahona, Nob. 2010, 96)
Mahimo nimong tan-awon ang “Having the Holy Ghost” (2:56), anaa sa ChurchofJesusChrist.org.
-
Kanus-a ang imong matarong nga mga tinguha ug mga pag-ampo nakatabang kanimo nga mobati sa impluwensiya sa Espiritu?
Kalihokan B: Kita mahimong mapuno sa Espiritu Santo samtang moapil kita sa mga ordinansa sa ebanghelyo.
Basaha ang 3 Nephi 18:7, 11; 27:20, mangita kon sa unsang paagi ang mga ordinansa makatabang kanato nga mapuno sa Espiritu Santo.
Si Propeta Joseph Smith (1805–44) mitudlo:
Ang bunyag usa ka balaan nga ordinansa pasiuna sa pagdawat sa Espiritu Santo, mao kini ang agianan ug yawe diin ang Espiritu Santo ipangalagad. Ang Gasa sa Espiritu Santo pinaagi sa pagpandong sa mga kamot, dili mahimong madawat pinaagi sa bisan unsa nga laing baroganan kay sa baroganan sa pagkamatarong. (Mga Pagtulun-an sa mga Presidente sa Simbahan: Joseph Smith [2007], 113.)
-
Unsa ang imong nakat-onan mahitungod sa tahas sa mga ordinansa (sama sa bunyag ug sa sakramento) sa pagtabang kanato nga mapuno sa Espiritu Santo?
-
Kanus-a ka napuno sa Espiritu Santo samtang nag-apil ka sa mga ordinansa sa ebanghelyo?
-
Hinumdomi pag-usab ang tawo nga imong gihunahuna nga makabenepisyo gikan sa mas maayo nga pagsabot kon unsaon pagdawat sa Espiritu Santo. Pag-andam og mensahe nga mahimo nimong ipakigbahin kaniya. Pagpakigbahin sa bisan unsa nga kasinatian diin ang tinguha ug pag-ampo o pag-apil sa mga ordinansa nakatabang kanimo o sa uban nga makadawat sa Espiritu Santo.
Personal nga paggamit
Hunahunaa ang imong kaugalingong panginahanglan sa Espiritu Santo ug nganong nagtinguha ka sa Iyang impluwensiya sa imong kinabuhi. Pag-ila og usa ka butang nga imong gibati nga nadasig nga buhaton aron sa pagpabilin sa Espiritu Santo nga nagauban kanimo. Paningkamoti nga sundon kini nga impresyon.